Moskvada Rusiya Federal Məclisi Federasiya
Şurasının Azərbaycan Milli Məclisi
ilə ikitərəfli parlamentlərarası
komissiyasının on birinci
iclası keçirilmişdir
Dekabrın 11-də Moskvada Rusiya Federal Məclisi Federasiya Şurasının Azərbaycan
Milli Məclisi ilə ikitərəfli parlamentlərarası komissiyasının
on birinci iclası keçirilmişdir.
İclasda Milli Məclis Sədrinin müavini, parlamentlərarası komissiyanın
həmsədri Valeh Ələsgərovun başçılığı
ilə nümayəndə
heyəti iştirak etmişdir.
Nümayəndə heyətinin tərkibinə Milli Məclisin komitə sədrləri Arif Rəhimzadə, Əli Hüseynli, parlamentin deputatları, habelə əmək və əhalinin sosial müdafiəsi nazirinin müavini Natiq Məmmədov, Azərbaycan Dövlət Miqrasiya Xidmətinin nümayəndəsi Vahid Qəhrəmanov daxil idilər. İclasda Azərbaycanın Rusiyadakı səfiri Polad Bülbüloğlu, Ümumrusiya Azərbaycan Konqresinin icraçı direktoru İlqar Hacıyev iştirak etmişlər.
Rusiya Federal Şurası sədrinin müavini, komissiyanın Rusiya tərəfindən yeni seçilmiş həmsədri İlyas Umaxanov iclası açaraq bildirmişdir ki, komissiyanın 10-cu iclasından ötən bir il ərzində Azərbaycanda olduqca önəmli hadisə baş vermiş, Azərbaycan Prezidentinin seçkiləri keçirilmişdir. İ.Umaxanov komissiya üzvləri adından Azərbaycan Prezidenti İlham Əliyevi seçkilərdə inamlı qələbəsi münasibətilə təbrik edərək demişdir: "Biz Azərbaycanda prezident seçkilərində müşahidəçi kimi iştirak etdik və Azərbaycan xalqının İlham Əliyevi necə ürəkdən dəstəklədiyinin şahidi olduq".
İclasın gündəliyinə
iki ölkə arasında əmək miqrasiyası sahəsində
əməkdaşlıq haqqında,
dəniz ticarət gəmiçiliyi və gəmi nəqliyyatı sahəsində əməkdaşlıq
haqqında, Azərbaycan
gəmilərinin Rusiyanın
daxili su yollarından keçməsi
qaydaları və şərtləri haqqında,
Samur çayı üzərindəki avtomobil
körpüsünün Azərbaycan-Rusiya
dövlət sərhədindəki
"Yaraq-Kazmalyar" (Rusiya)
və "Samur" (Azərbaycan) keçid məntəqəsi hissəsində
təmir işlərinin
aparılması haqqında,
ölkəyə
gəlmə, ölkədən
getmə və ölkədə qalma qaydalarını pozmuş,
habelə əcnəbi
və vətəndaşlığı
olmayan şəxslərin
qəbulu və təhvil verilməsi haqqında sazişlərin
və digər sənəd layihələrinin
müzakirəsi daxil edilmişdi.
İclasda qeyd olunmuşdur ki, Rusiyanın 40 subyekti ilə Azərbaycan arasında əməkdaşlıq haqqında sazişlər imzalanmışdır. Rusiya ilə Azərbaycan arasında 2012-ci ildə əmtəə dövriyyəsinin həcmi rekord həddə - 3,5 milyard dollara çatmışdır, bu isə 2011-ci illə müqayisədə 11 faiz çoxdur. Bu ilin yanvar-oktyabr ayları ərzində əmtəə dövriyyəsi 2,9 milyard dollar olmuşdur ki, bu da 2012-ci ilin müvafiq dövründəkindən 9 faiz çoxdur. İqtisadi sahədə əməkdaşlığın inkişafında Azərbaycan-Rusiya regionlararası forumlarının əhəmiyyəti vurğulanmışdır.
Komissiyanın həmsədri Valeh Ələsgərov qeyd etmişdir ki, Rusiya regionları rəhbərlərinin mütəmadi surətdə Azərbaycanda ikitərəfli görüşləri olur, Azərbaycan dövləti Azərbaycan diasporu ilə birlikdə Rusiya regionlarında quruculuq və abadlıq işləri həyata keçirir. Eyni zamanda, Azərbaycan dövləti ölkəmizdə rus dilinə, rus mədəniyyətinə, rus dilində təhsilə böyük qayğı ilə yanaşır. Bu baxımdan Rusiya tərəfinin də Azərbaycanda fəaliyyət göstərən rus icmasının və mədəniyyət mərkəzlərinin inkişafına dəstək verməsinin əhəmiyyəti diqqətə çatdırılmışdır.
İclasda Azərbaycan tərəfi Azərbaycan-Rusiya sərhədindəki Samur gömrük-keçid məntəqəsinin Rusiyaya aid hissəsinin təmirinin yubanması, habelə "Yaraq-Kazmalyar" məntəqəsində sənədlərin qeydiyyatının ləngidilməsinin vətəndaşların narazılığına səbəb olmasını komissiya üzvlərinin diqqətinə çatdırmışlar. Keçid məntəqəsinin Azərbaycana aid olan hissəsində "vahid pəncərə" sistemi tətbiq olunduğundan burada vətəndaşların və yük avtomobillərinin qeydiyyata alınmasında heç bir problem yaranmır. Komissiya üzvləri bu məsələnin Rusiyanın aidiyyəti orqanları ilə müzakirə olunmasını qərara almışlar.
İclasda müzakirə edilən digər mühüm məsələlərdən biri
də miqrasiya qanunvericiliyinin tətbiqi və iki ölkənin
miqrasiya qurumları arasında əlaqələrin
genişləndirilməsi olmuşdur.
Rusiya Federal Miqrasiya
Xidməti rəhbərinin
birinci müavini Yekaterina
Yeqorova bu ölkədə miqrasiya qanunvericiliyi sahəsində
həyata keçirilən
yeniliklərdən danışmış,
əmək miqrasiyası
ilə bağlı statistik məlumatları səsləndirmişdir.
Azərbaycanın Rusiyadakı səfiri Polad Bülbüloğlu Azərbaycan vətəndaşlarının sərhəd keçid məntəqələrində üzləşdikləri problemlərdən danışaraq bildirmişdir ki, Rusiyada təhsil alan azərbaycanlı tələbələrin, yaxud ailə üzvlərindən birinin keçid məntəqələrində səbəbi aydınlaşdırılmadan saxlanması və ya deportasiya olunması hallarına rast gəlinir. Bundan əlavə, Azərbaycan vətəndaşlığından çıxma və Rusiya vətəndaşlığını qəbul etmə proseslərində uyğunsuzluqlar yaranır.
Səfir qeyd etmişdir ki, iki ölkənin miqrasiya xidmətləri bu istiqamətdə daha sıx əməkdaşlıq etməlidirlər. Komissiya üzvləri miqrasiya qanunvericiliyi sahəsində maarifləndirmə işlərinin təşkili sahəsində fəaliyyət planının hazırlanmasını qərara almışlar.
İclasda iqtisadi, humanitar və sosial sahələrdə qarşılıqlı
fəaliyyəti gücləndirmək
məqsədi ilə iki ölkənin vergi, gömrük və miqrasiya qanunvericiliklərinin uyğunlaşdırılması,
beynəlxalq parlament təşkilatları çərçivəsində
əlaqələrin möhkəmləndirilməsi
və digər məsələlər müzakirə
olunmuşdur.
Sonda İlyas Umaxanov Federasiya Şurasının
20 illik yubileyi medalını Milli Məclis Sədrinin müavini, komissiyanın həmsədri Valeh Ələsgərova təqdim
etmişdir.
Fəridə
ABDULLAYEVA,
AzərTAc-ın xüsusi müxbiri
Moskva
Azərbaycan.-2013.-13 dekabr.-S.6.