«Od və alov» alman jurnalında

Almaniyanın "Genibenund reisen" jurnalında "Od və alov" başlıqlı məqalə dərc olunmuşdur.

Bakıya səfər edən müəllif yazısında öz təəssüratlarını oxucularla bölüşür. Paytaxta xüsusi gözəllik verən "Alov qüllələri" kompleksinin təsviri ilə başlanan məqalədə bu kompleksdə yenicə istifadəyə verilən "Fairmont Baku" hoteli haqqında ətraflı söhbət açılmışdır. Hotelin həm dizayn, həm də texniki cəhətdən ən yüksək səviyyədə tikildiyi qeyd olunan məqalədə müəllif onun texniki məqamlarını açıqlayır: hotel binasının fasadı 70 min kvadratmetr sahədə şüşə ilə örtülmüş, inşası zamanı 1500 ton metal və 235 min kubmetr beton sərf edilmişdir.

Təəssürat dolu dizaynı ilə diqqət çəkən hotelin 36 mərtəbədən ibarət olduğu vurğulanaraq, otaqlarının sahəsi ən azı 50 kvadratmetr təşkil edən 318 lüks nömrənin, mərmərlə işlənmiş vanna otaqlarının xüsusi memarlıq üslubu qeyd olunmuşdur.

Bildirilmişdir ki, gecə şəhər gəzintisinə çıxanlar Bakının istənilən yerindən kompleksin işıq şousunu müşahidə edə bilərlər. Lazer effekti ilə yaradılan bu şou olduqca maraqlıdır.

Müəllif bildirir ki, hotelin yerləşdiyi "Alov qüllələri" adlı binalar kompleksi ölkənin "Odlar diyarı" kimi izah edilən adına müvafiq olaraq ucaldılmışdır. Bakı şəhərinin simvoluna çevrilən bu tikili artıq təyyarədən qonaqların diqqətini cəlb edir.

Vurğulanır ki, "Alov qüllələri" UNESCO-nun qeyri-maddi mədəni irs siyahısına daxil edilmiş tarixi İçərişəhərin panoramını tamamlayır.

Vüqar SEYİDOV,

AzərTAc-ın xüsusi müxbiri

Berlin

Azərbaycan.-2013.-14 dekabr.-S.7.