Bakıda «Virtual Qarabağ» İnformasiya-Kommunikasiya
Texnologiyaları Mərkəzinin ofisi
açılmışdır
Dekabrın
14-də Bakıda "Virtual Qarabağ" İnformasiya-Kommunikasiya
Texnologiyaları Mərkəzinin
ofisi açılmışdır. AzərTAc xəbər verir ki, "Virtual Qarabağ" İnformasiya-Kommunikasiya Texnologiyaları Mərkəzi
Azərbaycan Respublikasının Prezidenti İlham Əliyevin 2011-ci il
7 iyul tarixli Sərəncamı
ilə təsdiq edilmiş "Azərbaycan
gəncliyi 2011-2015-ci illərdə" Dövlət
Proqramının 6.2.2 yarımbəndinə uyğun
olaraq yaradılmışdır.
Mərkəzin yaradılmasının
əsas məqsədi
Qarabağa dair mərkəzləşdirilmiş
internet resurs bazasının
qurulmasıdır. "Virtual
Qarabağ" İnformasiya-Kommunikasiya
Texnologiyaları Mərkəzinin yaradılmasının digər
məqsədi Azərbaycan Respublikasının Qarabağ
bölgəsi, Ermənistan-Azərbaycan, Dağlıq Qarabağ münaqişəsi barədə dolğun və obyektiv məlumat
verməkdir.
Azərbaycan Respublikasının Gənclər
və İdman, Rabitə və İnformasiya Texnologiyaları
nazirliklərinin dəstəyi
ilə icra olunan "Virtual Qarabağ"
İnformasiya-Kommunikasiya Texnologiyaları
Mərkəzinin yaradılması
üzrə layihənin
tərəfdaşları Azərbaycan
Tələbə Gənclər
Təşkilatları İttifaqı,
Azərbaycan Qaçqın
və Məcburi Köçkün Gənclər
Təşkilatı, "Bizim
Nəsil" Gənclərin
Regional İnkişaf Assosiasiyası,
"Sağlam İnkişaf
və Maarifləndirmə"
və Yeni Yazarlar və Sənətçilər Qurumu
ictimai birlikləridir.
Layihə çərçivəsində, həmçinin "Virtual Qarabağ"
İnformasiya - Kommunikasiya
Texnologiyaları Mərkəzinin
rəsmi internet səhifəsi
olan www.virtualkarabakh.az portalı
da hazırlanmışdır. Portalın məqsədi Qarabağ həqiqətlərinin internet məkanında tanıdılmasına
xidmət etməkdir.
Mərkəzdə müxtəlif tədbirlərin
keçirilməsi üçün
konfrans zalı, Qarabağla bağlı elektron kitab resurslarından istifadə
etmək məqsədi ilə elektron kitabxana, foto-video studiya, Qarabağın Ermənistan
hərbi birləşmələri
tərəfindən işğal olunmuş rayonlarının
adı ilə adlandırılmış iş
otaqları fəaliyyət
göstərir.
Qarabağ haqqında məlumatları
səsləndirən "info adam" köşkü
də "Virtual Qarabağ"
İnformasiya-Kommunikasiya Texnologiyaları
Mərkəzinin ofisinin
açılış mərasimi
iştirakçılarının xüsusi marağına səbəb olmuşdur. Mərkəzin ofisində Qarabağ xəritəsinin tavanda
quraşdırılması maraqlı tərtibat kimi qiymətləndirilmişdir.
"Virtual Qarabağ"
İnformasiya-Kommunikasiya Texnologiyaları
Mərkəzinin ofisinin
açılış mərasimində
çıxış edən
layihənin əlaqələndiricisi,
Gənclər və İdman Nazirliyi yanında Gənclərlə
İş üzrə
İctimai Şuranın
sədri Nurəddin Mehdiyev qeyd etmişdir
ki, əsas məqsəd Qarabağı
virtual çərçivəyə salmaq deyil, əksinə,
Qarabağ həqiqətlərinin
internet məkanında tanıdılmasına
xidmət etməkdir.
N.Mehdiyev qeyd etmişdir ki, "Virtual Qarabağ"
İnformasiya - Kommunikasiya
Texnologiyaları Mərkəzi
layihəsi innovativ-kreativ
formada Qarabağın
tarixi, maddi-mənəvi,
dini-mədəni dəyərləri,
mədəniyyəti, tarixi
abidələri, ədəbiyyatı,
folkloru, Ermənistan-Azərbaycan,
Dağlıq Qarabağ
münaqişəsi, bir
sözlə, respublikamızın
bu qədim bölgəsi haqqında olan məlumatların Azərbaycan və dünyanın aparıcı
dillərində mərkəzləşmiş
internet-şəbəkə resursu kimi düşünülmüşdür.
Əsas hədəflərimizdən
biri Ermənistan-Azərbaycan,
Dağlıq Qarabağ münaqişəsi
ilə bağlı ölkəmizin haqlı mövqeyini
dünyanın sülhsevər, ədalətli sakinlərinə
çatdırılmasına töhfə verməkdir.
Azərbaycan.-2013.-15 dekabr.-S.4.