İslamabad şəhərində keçirilən Asiya
Parlament Assambleyasının 6-cı
iclasında Azərbaycan Milli Məclisinin
deputatları iştirak etmişlər
Pakistanın paytaxtı İslamabad şəhərində Asiya
Parlament Assambleyasının
(APA) 6-cı iclası keçirilmişdir. Tədbirdə Asiya qitəsinin 30-dan artıq ölkəsindən
gəlmiş dövlət
strukturlarının nümayəndələri
və deputatlar iştirak etmişlər.
İclasda Azərbaycanı Milli Məclisin deputatları Mübariz Qurbanlı və Asəf Hacıyev təmsil etmişlər.
Tədbirdə region ölkələri arasında
azad ticarətin stimullaşdırılması, mühacirlərin
və fələstinlilərin
hüquqlarının qorunması,
Əfqanıstanda sülh
və sabitliyin təmin edilməsi, qitə dövlətləri
arasında müxtəlif
səpkili mübahisələrin
dinc yolla həlli və digər aktual məsələlər müzakirə
olunmuşdur.
İclasında Asəf Hacıyev çıxış edərək gündəlikdə duran məsələlərlə bağlı fikirlərini bildirmiş, Asiyada sülh və təhlükəsizliyin bərqərar olması üçün münaqişələrin həllinin vacibliyinə toxunmuşdur. A.Hacıyev Ermənistan-Azərbaycan, Dağlıq Qarabağ münaqişəsi haqqında məlumat vermiş, Ermənistanın torpaqlarımızı işğal etməsi, nəticədə bir milyon azərbaycanlının öz torpağından didərgin salınması faktını diqqətə çatdırmış, Dağlıq Qarabağ münaqişəsinin qitədə sülhün və sabitliyin bərqərar olmasına qarşı ən böyük təhlükələrdən biri olduğunu vurğulamışdır. O bildirmişdir ki, Azərbaycanın ərazi bütövlüyü beynəlxalq hüququn norma və prinsiplər əsasında bərpa olunmalıdır. Milli Məclisin deputatı Azərbaycanın aparıcı enerji ölkələrindən biri olduğunu bildirmiş, bununla yanaşı informasiya texnologiyalarının tətbiqinə də xüsusi önəm verdiyini diqqətə çatdırmışdır. Azərbaycan son illərdə davamlı iqtisadi inkişafa nail olmuş, yoxsulluğun səviyyəsi dəfələrlə aşağı düşmüş, Qafqazın lider dövlətinə çevrilmişdir.
APA-nın 6-cı plenar iclasının yekununda İslamabad Bəyannaməsi qəbul edilmişdir.
Assambleyanın növbəti
iclasının Kambocada keçirilməsi
qərara alınmışdır.
Qulu KƏNGƏRLİ,
AzərTAc-ın xüsusi müxbiri
İslamabad
Azərbaycan.-2013.-11 dekabr.-S.6.