Qətərin milli bayramı şərəfinə

Dekabrın 19-da Qətərin Azərbaycandakı səfirliyi ölkəsinin milli bayramı münasibətilə rəsmi qəbul təşkil etmişdir.

AzərTAc xəbər verir ki, səfir şeyx Mübarək bin Fəhd Casim Al Tani ötən müddətdə ölkəsinin keçdiyi inkişaf yolundan danışmışdır. Bildirmişdir ki, Qətər dövləti siyasi, iqtisadi, mədəni sahələrdə mühüm dəyişikliklər dövrünü yaşayır.

Səfir Azərbaycan ilə Qətər arasında əlaqələrin uğurla inkişaf etməsindən məmnunluğunu bildirmişdir. Qeyd etmişdir ki, Azərbaycan Prezidenti İlham Əliyevin və Qətər Dövlətinin Əmiri Şeyx Həməd bin Xəlifə Al Taninin dostluq münasibətləri ölkələrimiz arasında əlaqələrin daha da inkişafına şərait yaradır. O, əmin olduğunu bildirmişdir ki, Azərbaycan ilə Qətər arasında iqtisadiyyat, mədəniyyət, təhsil və digər sahələrdə əlaqələr gələcəkdə daha da inkişaf edəcəkdir. Diplomat qarşıdan gələn Dünya Azərbaycanlılarının Həmrəylik Günü və Yeni il münasibətilə xalqımızı təbrik etmişdir.

Rabitə və informasiya texnologiyaları naziri Əli Abbasov əlamətdar gün münasibətilə Qətər xalqını Prezident İlham Əliyevin adından təbrik etmiş, dövlət başçısının salamlarını və xoş arzularını çatdırmışdır. Nazir bildirmişdir ki, Prezident İlham Əliyevin Qətərə, Əmir Şeyx Həməd bin Xəlifə Al Taninin Azərbaycana səfərləri ölkələrimiz arasında əsası ümummilli lider Heydər Əliyev tərəfindən qoyulmuş dostluq münasibətlərinin daha sürətlə inkişafına səbəb olmuşdur. Azərbaycan-Qətər əlaqələrinin bir çox sahələrdə uğurla inkişaf etdiyini vurğulayan nazir hər iki ölkənin mövqelərinin beynəlxalq təşkilatlarda üst-üstə düşdüyünü söyləmişdir.

Əli Abbasov əmin olduğunu bildirmişdir ki, ölkələrimiz arasında dostluq münasibətləri getdikcə daha da möhkəmlənəcək və dərinləşəcəkdir.

Rəsmi qəbulda Azərbaycanın dövlət və hökumət rəsmiləri, Milli Məclisin deputatları, xarici ölkələrin Bakıdakı səfirləri, ictimaiyyətin nümayəndələri iştirak etmişlər.

AzərTAc

Azərbaycan.-2013.- 20 dekabr.- S.11.