Qurucu lider
Bu gün Azərbaycan dövlətçilik tarixinin ən güclü, möhtəşəm və qüdrətli dövrünü yaşayır. Qazandığımız uğurlar, nail olduğumuz inkişaf göstəriciləri nə qədər genişmiqyaslı olsa da, təəssüf ki, gündəlik həyatımızda bu nailiyyətlər silsiləsi, intibah mənzərəsi sanki adiləşib. Yəni Azərbaycan elə bir yüksəlişin, elə bir gücün rəmzinə çevrilib ki, xalqımız hər bir yeni müvəffəqiyyəti, tərəqqinin növbəti təzahürünü normal, təbii qanunauyğunluq kimi qəbul edir.
Ulu öndər Heydər Əliyevin şah əsəri olan müstəqil Azərbaycan bu gün məhz möhtərəm Prezident İlham Əliyevin müdrik siyasəti nəticəsində mükəmməl inkişaf modelinə malikdir və müxtəlif sahələr üzrə əldə etdiyi yüksəliş dinamikası əslində bir cox dünya ölkələri üçün nümunəyə çevrilib: hər bir vətəndaşımıza qürur verən, onda özünəgüvəni artıran faktorlar o qədər çoxdur ki, xalqımız onları eşidəndə deyil, məhz eşitməyəndə təəccüblənir!
Təəssüf ki, bəziləri ötən əsrin 90-cı illərinin əvəlindəki ağır və böhranlı vəziyyəti unudurlar. Nəinki yeniyetmə və gənclər, hətta artıq yaşlaşmaqda olan nəslin nümayəndələri bəzən zənn edirlər ki, məhz elə belə də olmalıymış və bütün bu uğurlar da hansısa "təbii proseslərin" nəticəsidir.
Biz bu gün əldə etdiklərimizin həm qədrini bilməli, həm də onları xalqa nəsib edənlərə minnətdar olmağı unutmamalıyıq!
Bugünkü Azərbaycanla 20 il öncəki Azərbaycanın müqayisəsini mütəmadi aparmalıyıq!
Haradan gəlib, hansı məşəqqətlərdən keçərək bugünkü səviyyəyə çatmağımızı, tənəzzüldən tərəqqiyə keçidin məhrumiyyətlərini daim xatırlamalıyıq!
Bu gün inkişaf dinamikasına görə dünyada ön sıralarda olmağımızın qürurunu yaşayarkən, 20 il öncə iqtisadi böhran, anarxiya, parçalanma və dövlət müstəqilliyinin itirilməsi ilə üz-üzə olduğumuzu unutmamalıyıq!
Bu gün paytaxtımızda dünyanın ən nüfuzlu sammitlərinin, forumlarının, konfranslarının, idman və musiqi yarışlarının keçirilməsi ilə fəxr edərkən, 20 il öncə Bakıda tankların şütüdüyünü, saat 8-dən sonra çölə çıxmaqdan çəkinməyimizi, qardaşın qardaşı güllələdiyini, Qarabağda döyüşməli olan əsgərlərin mərkəzdə hakimiyyət savaşı etməsini xatırlamalıyıq!
Bu gün Qafqazın iqtisadiyyatının tam olaraq 80 faizinə malik olmağımızla, büdcəmizin digər iki ölkənin birgə büdcəsindən 3-4 dəfə artıq olması ilə şərəf duyarkən, 20 il öncəki səfaləti, 1993-cü ildə dövlət büdcəsinin, ümumiyyətlə, qəbul edilməməsini unutmamalıyıq!
Bu kimi yüzlərlə faktı misal gətirmək olar. Ona görə də 20 il öncə ilə bu günün müqayisəsini və fərqini unutmamalıyıq, yaddan çıxartmamalıyıq və daim xatırlamalıyıq! Bu həqiqətləri həm də o dəhşətli günləri görməyən yeniyetmə və gənclərə də çatdırmalıyıq.
Xalqımız müdrikdir, qədirbiləndir. O, müqayisə əsasında seçim etməyi də bacarır, seçdiyini sonadək dəstəkləməyi də müqəddəs borcu sayır. Bu baxımdan cəmi iki ay öncə keçirilən mühüm bir hadisənin - prezident seçkilərinin nəticələrini də mən məhz bu konteksdə qəbul edirəm. Xalq ona yaşamaq inamı, ailəsini dolandımaq üçün iş yeri, günü-gündən yüksələn rifah, təhlükəsiz həyat, başqa ölkələrin nümunə kimi qəbul etdikləri qüdrətli dövlət bəxş edən siyasi kursa növbəti dəfə etimad göstərdi.
Bu seçkilər Heydər Əliyev siyasi kursuna, İlham Əliyev missiyasına xalqın etimad səsverməsi idi! Bu, Heydər Əliyevin qurduğu müstəqil Azərbaycanda cənab İlham Əliyevin fəaliyyəti sayəsində çadır şəhərciyindən müasir evlərə köçən, təsərrüfatını becərmək üçün hökumətdən yardım qəbul edən, dövlətdən sosial təminat və mənzil alan, kəndində, şəhərində yeni xəstəxanası, məktəbi, yolları tikilən, daha xoş sabahına əmin olan, özünə və dövlətinə güvənən milyonların xilaskarlarına minnətdarlıq, inam aksiyası idi.
2013-cü ilin seçkilərində vətəndaşlarımız İlham Əliyevin şəxsində uğurlu gələcəyi, qüdrətli dövləti seçdilər. Seçimin qalibi təkcə Prezident İlham Əliyev deyil, həm də Azərbaycan dövləti və xalqı oldu.
10 il əsrin onda biridir. Tarix
üçün çox kiçik andır. Hansısa dövlətin inkişaf və quruculuq mərhələsi,
güclənməsi üçün isə bu dövr yetərli
sayılmır, buna bir neçə onillik tələb olunur.
Lakin respublikamız adətən bir neçə onilliklər,
hətta bəzən əsrlər boyu əldə olunan
yüksəlişə və tərəqqiyə cəmi 10 il ərzində nail olub. Bunlar cənab
İlham Əliyevin yüksək
işgüzarlığının, peşəkarlığının
və fitri istedadının nəticəsidir. Onilliklər keçəcək və İlham
Əliyevin hakimiyyətdə olduğu dövr böyük
quruculuq və inkişaf dövrü, "Qurucu İlham"
dövrü kimi tarixdə qalacaqdır.
Ulu öndər Heydər Əliyevin rəhbərlik illəri
Azərbaycanın tənəzzüldən intibaha uğurlu
keçidi, müstəqilliyin formalçılıqdan real
müstəviyə transformasiyası, düzgün iqtisadi
inkişaf modelinin müəyyənləşməsi və tətbiqi
dövrü kimi tariximizin ən şərəfli səhifələrini
təşkil edir. Prezident İlham Əliyev bu nailiyyətlərin
əsasında tam yeni bir Azərbaycan qurdu.
İlham Əliyevin Azərbaycanı dünyanın
nüfuzlu ölkələri cərgəsinə qoşulan,
mövqeyi ilə hesablaşılan, fövqəldövlətlərə
belə iradəsini göstərən qüdrətli respublikadır. Bu gün
dünyanın mühüm bir qisminin enerji təminatı məhz
Azərbaycanın üzərindədir. Respublikamız
tək Qafqazın deyil, Avrasiya məkanının mühüm
enerji, nəqliyyat logistikasını müəyyənləşdirən
mühüm ölkələrdəndir.
Cəmi
bir neçə gün öncə "Şahdəniz - 2"
ilə bağlı imzalanan müqavilə həm ölkəmizin
qarşıdakı onilliklərdə daha böyük
uğurlara nail olacağının əməli əsasını
qoydu, həm də Azərbaycanın Avropanın enerji xəritəsini
dəyişən və onu yenidən müəyyənləşdirən
dövlətə çevrilməsi qürurunu bizlərə bəxş
etdi!
Bu milli
qürurun da, milyonların iftixarının da müəllifi
yenə də məhz Azərbaycan Prezidentidir!
Cənab
İlham Əliyev planetar təfəkkürlü,
bacarıqlı liderdir!
O,
dünya ölkələrinin rəhbərləri
sırasında tək şəxsi xarizması və nüfuzu
ilə deyil, həm də müdrikliyi, düzgün strateji
düşüncəsi, qlobal oyunlarda xalqının və
ölkəsinin maraqlarını böyük ustalıqla
qorumağı ilə fərqlənir, seçilir!
Bu gün Azərbaycanın inkişaf prosesinin mahiyyətində
yalnız iqtisadi-sosial amil dayanmır. Dünya yalnız Azərbaycanın
iqtisadi inkişaf modelini öyrənmir. Ölkəmiz
tolerantlığın və multikulturalizmin ən mükəmməl
örnəyi kimi dünya birliyində qəbul edilir. Biz minilliklərə bağlı mənəvi dəyərlərimizlə,
mədəniyyət, incəsənət incilərimizlə
dünyanı heyran qoyuruq. Qloballaşmanın
sərt fəsadları Prezidentin birbaşa dəstəyi nəticəsində
qorunan mili ənənələrimizə əsla xələl gətirmir.
Dünyanın
coğrafi xəritəsində kiçik nöqtə kimi əks
olunan Azərbaycan bu gün Prezident İlham Əliyev sayəsində
dünyanın nüfuz və hesablaşmaq xəritəsində
olduqca böyük görünür!
10 il öncə ulu öndər Heydər
Əliyevdən "Mən Ona özüm qədər
inanıram" - yüksək dəyərini alaraq
xalqının etimadını qazanan möhtərəm
Prezidentə bu gün bütün Azərbaycan inanır,
güvənir!
Dünya
dövlətlərinin rəhbərləri də birmənalı
olaraq Azərbaycan Prezidentini sözünə sadiq,
bütöv insan kimi qəbul edirlər!
Ötən
on il ərzində Azərbaycan bir əsrlik
tərəqqi, yüksəliş yolu keçdi. İnkişaf göstəricilərinin
10 il ərzindəki faktları saysız-hesabsızdır.
Artım tempinə nəzər salaq:
- ölkə iqtisadiyyatı 3,4 dəfə
artıb, 150 milyard dollar investisiya qoyulub;
- dövlət büdcəsinin həcmi 20 dəfəyədək
artıb, gələn ilin əsas maliyyə sənədi isə
20 milyard manatlıq həddi də keçir;
- strateji valyuta ehtiyatlarının həcmi 30 dəfə
artaraq 50 milyard dollara çatıb;
- Cənubi
Qafqazda iqtisadiyyatın 80 faizi, strateji valyuta
ehtiyatlarının isə 91 faizi respublikamızın
payına düşür;
- iqtisadi
sahədə keçid dövrü uğurla başa
çatıb, "İnkişafın Azərbaycan modeli"
fenomeni dünyanın ən nüfuzlu tədqiqat və
"beyin" mərkəzlərinin araşdırma
mövzusuna çevrilib;
- milli iqtisadiyyatın rəqabət qabiliyyəti
göstəricilərinə görə ölkəmiz 144
dövlət sırasında 39-cu yerdədir;
- 1 milyon
200 mindən artıq iş yeri açılıb, işsizlik
4,8 faizə düşüb;
- əhalinin
sosial müdafiəsinə və təminatına yönəldilən
dövlət vəsaitinin həcmi 9 dəfə, pensiyalar 10 dəfə,
maaşlar isə 6 dəfə artıb, yoxsulluq 10 dəfə
azalaraq 6 faizdən də aşağı enib, adambaşına
düşən ÜDM-in həcmi 8000 dollara
yaxınlaşır;
- 110 min məcburi
köçkünün məskunlaşması və normal
yaşayışı üçün 23500 yaşayış
evindən ibarət 57 müasir qəsəbə və məhəllə
(bütövlükdə isə 82 qəsəbə)
salınıb;
- Azərbaycan
borc alan ölkədən borc verən
ölkəyə çevrilib, çoxsaylı dövlətlərə
milyardlarla dollar həcmində investisiya qoyulub;
- Ermənistan
bölgənin bütün strateji layihələrindən kənarlaşdırılıb,
tam təcrid edilib və bu proses təcavüzkar dövlətin
tam iflasına qədər davam edəcək;
- müdafiə xərcləri 20 dəfə
yüksəlib və Azərbaycanda indi 750 adda hərbi təyinatlı
məhsul istehsal olunur;
- 2708 məktəb,
500-ə yaxın tibb ocağı tikilib və əsaslı təmir
olunub;
- 35
olimpiya kompleksi istifadəyə verilib, idman
qurğularının sayı 10 minə
çatdırılıb;
- 5 beynəlxalq
hava limanı, 4 avtovağzal kompleksi, 4 metropoliten stansiyası
tikilib, 10 min kilometrə yaxın avtomobil yolu və 207 yeni
körpü istifadəyə verilib və s.
Bunlar çoxsaylı statistik göstəricilərin
çox cüzi hissəsidir. Onları sadalamağa
nəinki bir məqalə, heç bir kitab da bəs etməz.
Əslində, buna heç ehtiyac da yoxdur.
Çünki hər bir vətəndaş 10 ilin müsbət
dəyişikliyini
həyatında, güzəranında, rifahında
görür.
Bu gün Azərbaycan elə mühüm nailiyyətlərə
imza atıb ki, onilliklər sonra da bu uğurlar böyük
qürurla xatırlanacaq. Azərbaycan kosmik ölkələr
sırasına qoşularaq ilk telekommunikasiya peykini Yer orbitinə
çıxarıb və növbətisinin
hazırlıqlarını yaxın illərdə
yekunlaşdıracaq. Azərbaycan BMT Təhlükəsizlik
Şurasına üzv seçilməsi və iki müddətə
quruma sədrlik etməsi ölkəmizin dünyada artan
nüfuzunun, regional gücdən beynəlxalq aktora çevrilməsinin
real göstəricisidir. Azərbaycan sammitlər məkanına
çevrildi, "Eurovizion" tarixinin ən möhtəşəm
müsabiqəsinə Bakı ev sahibliyi
etdi, ilk Avropa Olimpiya Oyunlarının da məhz
paytaxtımızda keçirilməsinə qərar verildi və
s...
Prezident İlham Əliyev xalqa arxalanmaqla ucalmağı
bacaran Liderdir.
Hər bir azərbaycanlının Prezidenti həm
də hər bir azərbaycanlının dostu, cəfakeşi,
güvənci, qürur mənbəyidir. Bu gün hər
birimiz bir də onunla qürur duyuruq ki, Mehriban xanım
Əliyevanın fədakar xidmətləri həm Heydər
Əliyevin ölməz ideyalarını davam etdirir, həm də
Prezident İlham Əliyevin fəaliyyətinə böyük
dəstək və töhfə verən mükəmməl
missiyaya çevrilir. İlham Əliyevin hər
bir azərbaycanlının Prezidenti olmasını təmin edən
amillərdən biri də onun xeyirxahlıq, himayədarlıq
siyasətində əsas yardımçısı olan Mehriban
xanım Əliyevanın genişmiqyaslı fəaliyyətidir.
Birinci şəxs-birinci xanım tandemi Azərbaycanda mərhəmətin
və xeyirxahlığın ən ali səviyyəsini,
xalqın inam və etimad ünvanını təşkil edir.
Prezident İlham Əliyevin genişmiqyaslı inkişaf
və quruculuq fəaliyyətində Sumqayıt şəhəri
də mühüm yer tutur. Əslində, son illərdə
şəhərimizdə baş verən müsbət dəyişiklikləri,
daha doğrusu inqilabi dəyişiklikləri mən
"YENİ SUMQAYIT"ın zəmini sayıram.
Və yeni
Sumqayıtın banisi də, müəllifi də, memarı da
məhz cənab İlham Əliyevdir!
Son 2 il yarımda cənab Prezident 6 dəfə
Sumqayıta səfər edib. Hər səfərdə
yeni obyektlər istifadəyə verilməklə bərabər,
ən müasir müəssisələrin yaranmasının da
xeyir-duası verilib. Eyni zamanda möhtərəm
Prezident fondundan dəfələrlə mühüm layihələrin
icrası ilə bağlı iri maliyyə ayırmaları
üçün sərəncamlar imzalayıb.
Prezidentin
qoyduğu hədəf Bakı standartlarına
yaxınlaşmaq, Yeni Sumqayıtı nəinki Cənubi
Qafqazın, ümumilikdə Avropanın mühüm sənaye
mərkəzlərindən birinə çevirməkdir!
Şübhəsiz ki, möhtərəm Prezidentin dəstəyi,
nəzarəti, rəhbərliyi altında bu vəzifə də
uğurla həyata keçiriləcəkdir. Bunun
üçün mükəmməl təməl də var. Həqiqətən
də, Sumqayıt bu gün iqtisadi potensialı ilə
yanaşı, dünyanın ən müasir və modern şəhər
quruculuğu standartlarına da uyğunlaşır.
Sumqayıtda inkişafı indi 10 il, 5 il
müqayisəsində aparmırıq. İnkişaf
artıq aylar üzrə dinamik dəyişir. Məsələn,
2013-cü ilin 9 ayında şəhərimizdə ümumi
daxili məhsul istehsalı 120 faiz, sənaye istehsalı 116 faiz
təşkil etmişdir. Son dövrlərdə müxtəlif
xarakterli obyektlərin - Sumqayıt Cümə məscidi, 1
saylı şəhər xəstəxanası, Olimpiya İdman
Kompleksi, Bayraq meydanı, Heydər parkı, Nəsimi parkı,
Bismak Sağlam Qida Kompleksi, Metal-boru prokat zavodu və bir
çox digər zavod, fabriklərin açılması
Sumqayıtın mühüm uğurlarının bir qismidir. Bir sözlə, Sumqayıt hər gün inkişaf
edir, böyüyür və yeni səviyyədə təqdim
olunur. Buna görə biz daim cənab
İlham Əliyevə dərin təşəkkürümüzü
bildiririk. Çünki bütün bu uğurlar Prezidentin yüksək
intellektinin, mükəmməl
dünyagörüşünün nəticəsidir.
İlham Əliyev tarixin ən güclü, ən
möhtəşəm, ən inkişaf edən Azərbaycanın
şəriksiz lideri, xalqının taleyini onilliklər boyu
etibar etməyə hazır olduğu rəhbərdir. Möhtərəm
Prezidentin inauqurasiya zamanı çıxışında
söylədiyi bu fikirlər - "Azərbaycan xalqı
taleyinin sahibidir və Azərbaycan heç vaxt tarixdə bu qədər
güclü olmamışdır. Heç vaxt müstəqilliyimiz
bu qədər möhkəm olmamışdır" - sözləri
əslində ötən 10 ili xarakterizə
edən ən uğurlu faktdır. Həm də
daha böyük inkişafa doğru gedilən yolda bizə yeni
hədəflər müəyyənləşdirən məramdır.
Azərbaycan İlham Əliyevin rəhbərliyi
altında tarixinin ən möhtəşəm 10 ilini
böyük qürur və şərəflə
yekunlaşdıraraq, növbəti yüksəliş onilliyinə
qədəm qoyur. Qarşıda böyuk vəzifələr
var. Onların tam gerçəkləşəcəyinə zərrə
qədər də şübhə etmirik.
Çünki
bu ölkənin rəhbəri İlham Əliyevdir!..
Eldar ƏZİZOV,
Sumqayıt Şəhər İcra
Hakimiyyətinin başçısı
Azərbaycan.-2013.- 24 dekabr.- S.6.