Asiya və Avropanın qovuşduğu məkan

Dünya İqtisadi Forumunun Bakıda keçirilməsi Azərbaycana olan inamın bariz nümunəsidr

Müstəqilliyinin bərpasının 21-ci ilini yaşayan Azərbaycan bu gün bütün dünyada beynəlxalq tədbirlərin keçirildiyi mərkəz statusunu qazanıb. Qloballaşan dünyanı düşündürən bir sıra vacib məsələlər məhz Azərbaycanda müzakirə olunur. Paytaxt Bakı sivilizasiyalararası mədəniyyətin toqquşduğu məkana çevrilib. Eyni zamanda, sürətli iqtisadi inkişaf, Avropa və dünyaya inteqrasiya, həmçinin Cənubi Qafqaz regionunda lider dövlət olması artıq Azərbaycanın nüfuzunun yüksəlişindən xəbər verir.

Bu günlərdə İsveçrədə keçirilən 43-cü Davos Forumunda qəbul olunan qərar isə buna əyani sübutdur. Qərara əsasən 2013-cü ilin aprel ayında Dünya İqtisadi Forumu Bakıda keçiriləcək. Qeyd edək ki, Davos Forumu kimi tanınan Dünya İqtisadi Forumunun əsası alman əsilli, isveçrəli iqtisadiyyat professoru Klaus Şvabın 1971-ci ildə avropalı şirkət idarəçiləri ilə birgə təşkil etdiyi kiçik bir toplantı ilə qoyulub. İlk dövrlərdə Avropa İdarəetmə Forumu olaraq tanınan bu forum avropalı iş adamlarının ABŞ-da biznes həyatına uyğunlaşmalarını asanlaşdırmaq və Amerika üsullu kapitalizmin qaydalarını avropalılara öyrətmək məqsədini daşıyan seminarlar silsiləsi idi. 1970-ci illərin ikinci yarısından etibarən əlaqədar mövzuların məşhur iqtisadçı, biznesmen və siyasətçilərin iştirakı ilə geniş bir platformada ələ alınması forumu əhəmiyyətli dünya məsələlərinin müzakirə edildiyi böyük toplantılar silsiləsinə çevirdi.

43-cü Davos Forumunda Azərbaycan Prezidenti İlham Əliyev də iştirak edirdi. Azərbaycan Prezidentinin Forum çərçivəsində qrafikinin sıx olması, keçirdiyi çoxsaylı görüşlər bir daha ölkəmizə olan maraqdan xəbər verirdi. Onu da əlavə edək ki, Prezident İlham Əliyev Davos İqtisadi Forumunda dövlət başçısı kimi ilk dəfə 2007-ci ildə iştirak edib.

Bütün bunlar onu deməyə əsas verir ki, artıq dünya birliyi həyata keçirilən böyük layihələrlə bağlı Azərbaycanın da münasibətini öyrənir. Aprel ayında Bakıda keçiriləcək beynəlxalq Dünya İqtisadi Forumu isə Azərbaycana böyük uğurlar gətirəcək.

Milli Məclisin İqtisadi siyasət komitəsinin sədri Ziyad Səmədzadə qəzetimizin əməkdaşı ilə söhbətində bildirdi ki, Davos İqtisadi Forumu dünyanın ən mötəbər iqtisadi forumlarından biridir. Hələ 1992-ci ildə Davos İqtisadi Forumunun Türkiyədə keçirilən iclasında iştirak etdiyini söyləyən komitə sədri forumun rəhbəri, professor Klaus Şvabla görüşü zamanı Azərbaycan həqiqətləri və digər məsələlər ətrafında da fikir mübadiləsi apardığını dedi: "Davos İqtisadi Forumu dünyanın ən aparıcı qlobal əhəmiyyət kəsb edən təşkilatıdır. Forumun fəaliyyəti ilə mən 20 ildən artıqdır ki, tanışam. Sevindirici haldır ki, Azərbaycan Prezidenti İlham Əliyev bu forumlarda çox yüksək səviyyədə iştirak edir, dünyanın aparıcı dövlətlərinin, ayrı-ayrı təşkilatların, iri transmilli şirkətlərin rəhbərləri ilə görüşlər keçirir. Bu görüşlərdə Azərbaycanda aparılan iqtisadi islahatlar, dövlətimizin əldə etdiyi uğurlar, üzləşdiyi problemlər barədə məlumatlar verir". Ziyad Səmədzadə onu da bildirdi ki, artıq neçə illərdir Prezident İlham Əliyev Davos İqtisadi Forumunda yüksək səviyyədə çıxışlar edir. Adı çəkilən forum çərçivəsində dünyada neft və qaz sahəsində tanınmış mütəxəssislərin iştirak etdiyi "Neft və qaz idarəçilərinin toplantısı" sessiyasında dövlət başçısı Azərbaycanın neft-qaz sektorunda kibertəhlükəsizliyin və ümumilikdə təhlükəsizliyin təmin olunması mövzusunda çıxışı zamanı uzun illərdir Azərbaycanın qlobal enerji layihələrində iştirakına diqqət çəkərək ölkəmizin bu sahədə qazandığı uğurları nəzərə çatdırıb. Azərbaycanda bu sahədə təhlükəsizlik tədbirlərinin yüksək səviyyədə təşkil olunduğunu, uzun illərdir ölkəmizdə bununla bağlı hər hansı bir problemin yaranmadığını qeyd edən Prezident İlham Əliyev ölkəmizin regional enerji təhlükəsizlik sistemində xüsusi rol oynadığını bildirib. Keçirilən bütün görüşlərdə isə Prezident İlham Əliyev bəyan etdi ki, Azərbaycan torpaqları Ermənistan tərəfindən işğal olunmasaydı, iqtisadi uğurlarımız daha yüksək səviyyədə olardı".

Komitə sədrinin sözlərinə görə, artıq bütün dünyanın böyük şirkətləri, dövlətləri Azərbaycan həqiqətləri ilə bağlı da məlumatlıdırlar. Bu, bir daha sübut edir ki, Prezident İlham Əliyevin bu gün apardığı siyasət dünya dövlətlərinin Azərbaycana marağını daha da artırıb: "Etiraf etmək lazımdır ki, Azərbaycanı qısqanan dövlətlər də mövcuddur. Lakin Azərbaycan reallıqları bir daha sübut edir ki, müstəqil ölkəmizin dinamik inkişafı üçün ölkədə çox əlverişli şərait yaradılıb".

Dünya İqtisadi Forumunun növbəti iclasının Bakıda keçirilməsinə gəlincə isə, Ziyad Səmədzadə hesab edir ki, belə bir forumun Azərbaycanda keçirilməsi ölkəmizin artan nüfuzundan xəbər verir. Onun fikrincə, bu, adi bir toplantı deyil. Bakıya dünyanın aparıcı ölkələrinin rəhbərləri, siyasətçiləri, ekspertləri, iqtisadçıları gələcəkdir. Bu forum həm təşkilati, həm də bu qədər qonağı qəbul etmək baxımından çox məsuliyyətlidir. Azərbaycan artıq irimiqyaslı tədbirlərin həyata keçirilməsində fəal iştirak edir. Bu foruma da çox ciddi hazırlıq görüləcək: "Əminliklə deyə bilərəm ki, bu forum bir daha Azərbaycanın artan nüfuzunu, qüdrətini dünyaya nümayiş etdirəcək, həm də ölkəmizin qlobal dünyanın bir hissəsi kimi getdikcə qüdrətlənməsinə xidmət edəcəkdir".

Milli Məclisin İqtisadi siyasət komitəsinin üzvü Əli Məsimli isə bildirdi ki, artıq xeyli müddətdir Azərbaycan dövlət başçısı səviyyəsində Davos İqtisadi Forumunda təmsil olunur. Bu həm Azərbaycanda həyata keçirilən siyasətin yüksək tribunadan dövlət başçısı səviyyəsində çatdırılması, həm də məqamdan istifadə edərək müxtəlif ölkələrin hökumət və dövlət başçıları, transmilli şirkətlərin rəhbərləri ilə görüşlər keçirilməsi baxımından əhəmiyyətlidir. Bu, eyni zamanda, Azərbaycanda bundan sonra həyata keçirilməsi zəruri olan layihələrin start vəziyyətindən tərpənməsinə zəmin yaradır. Digər bir tərəfdən isə həyata keçirilən layihələrin davamlılığını təmin etmiş olur.

Milli Məclisin deputatı hesab edir ki, növbəti beynəlxalq forumun Azərbaycanda keçirilməsi isə Azərbaycan iqtisadiyyatında gedən mütərəqqi bir dəyişikliklərin beynəlxalq aləm tərəfindən qəbul olunmasıdır: "Mən Davos Forumunun rəhbəri Klaus Şvabı yaxşı tanıyıram. Onun həm intellektual səviyyəsinə, dünyada olan siyasi çəkisinə bələd olan adam kimi hesab edirəm ki, əgər belə bir tədbirin Azərbaycanda keçirilməsi planlaşdırılırsa, bu, Azərbaycana bütün cəhətlərdən siyasi dvidend qazandıracaq. Ölkəmizə müsbət imic yükü gətirməklə, Azərbaycana yönəlmiş bəzi bəd əməllərin qarşısının alınması üçün yaxşı bir sədd ola bilər".

Rəşad BAXŞƏLİYEV

Azərbaycan.-2013.- 2 fevral.- S.3.