Böyük Britaniyanın azərbaycanlı icması Xocalı aeroportu ilə bağlı bu ölkənin Baş nazirinə petisiya ünvanlamışdır

Böyük Britaniyanın azərbaycanlı icması bu ölkənin Baş naziri Devid Kemeronun iqamətgahına petisiya ünvanlamışdır.

Avropa Azərbaycan Cəmiyyətindən (AAC) AzərTAc-a verilən məlumata görə, Xocalı aeroportu ilə əlaqədar petisiyada deyilir: "Xocalı aeroportunun açılmasının sülh danışıqlarına mənfi təsir edəcəyini nəzərə alaraq, biz Böyük Britaniyanın Baş nazirini Ermənistan hökumətinə təqdimat göndərərək onu işğal olunmuş Dağlıq Qarabağ ərazisində Xocalı aeroportunun qanunsuz açılmasından çəkindirməyə çağırırıq. Xocalı aeroportu Ermənistan-Azərbaycan, Dağlıq Qarabağ münaqişəsi zamanı Ermənistan silahlı qüvvələri tərəfindən işğal edildikdən sonra bağlanmışdır. Aeroport 2010-2011-ci illərdə yenidən tikilmiş, onun mümkün açılışı artıq ABŞ-ın Azərbaycandakı səfiri, ATƏT və Avropa Şurası Parlament Assambleyası tərəfindən pislənilmişdir. Xocalı aeroportundan uçuşların həyata keçirilməsinin dəhşətli nəticələri ola bilər".

AAC Böyük Britaniyada yaşayan azərbaycanlıları bu petisiyanı (http://epetitions.direct.gov.uk/petitions/45179) imzalamağa və Britaniya hökumətinin diqqətini bu məsələyə çəkməyə çağırır.

Azərbaycan.-2013.- 7 fevral.- S.6.