Los-Ancelesdə «Azərbaycan Los-Anceles ilə görüşür» tədbiri uğurla başa çatmışdır

 

Azərbaycanın Los-Ancelesdəki Baş Konsulluğunun və Azərbaycan Dövlət Gömrük Komitəsinin  birgə təşkilatçılığı ilə fevralın 5-də Los-Ancelesdə "Azərbaycan Los-Anceles ilə görüşür" adlı geniş tədbir keçirilmişdir.

Azərbaycanın Los-Ancelesdəki konsulluğundan bildirmişlər ki, şəhərin nüfuzlu "Skirball" Mədəniyyət Mərkəzində keçirilən tədbirdə Los-Anceles şəhəri və vilayətinin təmsilçiləri, Kaliforniya yerli qanunvericilik orqanının nümayəndələri, universitet professorları, iş adamları, xarici ölkələrin baş konsulları, KİV nümayəndələri, Hollivud filmlərinin bəstəkarları və digər mədəniyyət xadimləri, eləcə də Azərbaycan və yəhudi icmalarının üzvləri iştirak etmişlər. Tədbir Azərbaycan muğam triosunun və Amerikan caz qrupunun ifasında muğam-caz sintezi konserti ilə başlamışdır. Mahir instrumental ifaçılar İmamyar Həsənov (kamança), Rüfət Həsənov (tar) və Elşən Qasımovun (nağara) ifa etdikləri Azərbaycan muğam və xalq musiqisi nömrələri məşhur gitaraçı Piter Spraqın rəhbərlik etdiyi caz qrupu tərəfindən müşayiət olunmuşdur. Tamaşaçılar sənətkarların ifalarını sürəkli alqışlarla qarşılamışlar.

Konsertdən sonra "Azərbaycan gömrüyü mədəni dəyərlərin keşiyində" adlı sərginin açılışı olmuşdur. Sərgidə Azərbaycan Dövlət Gömrük Komitəsi muzeylərində saxlanılan, komitə əməkdaşları tərəfindən zaman-zaman qaçaqmalçılardan müsadirə olunmuş qədim və dəyərli incəsənət əsərləri nümayiş etdirilir. Azərbaycanın Los-Ancelesdəki baş konsulu Nəsimi Ağayev tədbiri açaraq, qonaqları salamlamış və belə tədbirlərin keçirilməsinin Azərbaycanın Kaliforniyada daha da tanınması, eləcə də Azərbaycan və ABŞ xalqları arasındakı dostluq bağlarının daha da gücləndirilməsi baxımından yüksək önəm daşıdığını bildirmişdir.

Sonra Azərbaycan Dövlət Gömrük Komitəsinin sədri, gömrük xidməti general-leytenantı Aydın Əliyev çıxış etmişdir. A.Əliyev Dövlət Gömrük Komitəsinin mədəni dəyərlərin qorunması və gələcək nəsillərə çatdırılması sahəsində gördüyü işlərdən, sərgidə nümayiş etdirilən eksponatların yüksək bəşəri önəmindən bəhs etmişdir. Komitə sədri, həmçinin Azərbaycanın işğal altındakı Dağlıq Qarabağ ərazisi kimi nəzarət olunmayan digər ərazilərdən istifadə yolu ilə mədəni dəyərlərin oğurlanmasının bəşəriyyətin mədəni irsinə zərbə vurduğunu qeyd edərək, belə halların qarşısının alınmasının vacibliyini vurğulamışdır.

Daha sonra ABŞ Dövlət Departamentinin Təhlükəsizlik İdarəsinin Los-Anceles bölməsinin direktoru Vesli Veller və Los-Anceles Vilayətinin protokol xidmətinin rəhbəri Lurdes Saab çıxış edərək, belə bir tədbirin keçirilməsinə görə təşəkkürlərini bildirmişlər.

Tədbir Azərbaycan mətbəxinin nümunələri və şərabları ilə zəngin ziyafətlə yekunlaşmışdır.

Növbəti belə tədbirin fevralın 8-də Kaliforniyanın San-Dieqo şəhərində keçirilməsi planlaşdırılır.

 

 

Yusif BABANLI,

AzərTAc

Vaşinqton

 

Azərbaycan.-2013.- 8 fevral.- S.2.