İkinci Dünya
müharibəsinin azərbaycanlı veteranları ABŞ-ın dövlət katibi Con
Kerriyə təbrik məktubu ünvanlamışlar
İkinci
Dünya müharibəsinin azərbaycanlı veteranları
ABŞ-ın dövlət katibi Con Kerriyə təbrik məktubu
ünvanlamışlar.
Respublika
Veteranlar Şurasının sədri Ə.Baxışovun
imzaladığı məktubda deyilir: "Azərbaycanın
bütün veteranları adından Sizi yeni vəzifəyə
- Amerika Birləşmiş Ştatlarının dövlət
katibi vəzifəsinin icrasına başlamağınız
münasibətilə səmimi qəlbdən təbrik edirik.
Qarabağ
münaqişəsinin sülh yolu ilə həll edilməsi
üçün hər cür təsir göstərəcəyiniz
barədə verdiyiniz bəyanata böyük ümidlə
baxır və ona inanırıq. İnanırıq ki,
İkinci Dünya müharibəsinin azərbaycanlı
veteranlarının 2011-ci il sentyabrın 29-da
keçirilmiş ümumrespublika toplantısında qəbul
etdikləri, ATƏT-in Minsk qrupunun həmsədr ölkələrinə,
o cümlədən ABŞ Prezidenti Barak Obamaya göndərdikləri
müraciət xeyirxah niyyətinizin reallığa çevrilməsində
Sizə yardımçı olacaqdır".
Biz
veteranların 2011-ci il 29 sentyabr tarixli müraciətində
deyilir: "Hörmətli cənablar! 2011-ci il oktyabrın 1-də
Hitler faşizmini ittiham edən Nyurnberq prosesinin 65-ci ili tamam
olur. 1945-ci ildə Potsdam müqaviləsinin qərarı ilə
həyata keçirilən Nyurnberq prosesi faşizmin birdəfəlik
məhv edilməsi və ona bir daha yol verilməməsi məqsədini
güdürdü. 1945-ci ilin noyabr ayının 20-dən -
1946-cı ilin oktyabr ayının 1-dək bir ilə yaxın
vaxtı əhatə edən bu prosesdə nasizmin rəhbərlərinin
əksəriyyəti layiqli cəzalarını aldılar.
Nyurnberq
prosesindən 65 il keçir. Taleyin hökmü ilə o zaman
faşizmi ittiham edən sizin dövlətlər bu gün Ermənistan-Azərbaycan,
Dağlıq Qarabağ münaqişəsinin həllini
öhdələrinə götürüblər. Dünən
faşizmə qarşı çiyin-çiyinə vuruşan
iki qonşu dövlət - Ermənistan və Azərbaycan əslində
20 ildən artıqdır ki, münaqişə deyil,
müharibə vəziyyətində yaşayır. Azərbaycan
torpaqlarının 20 faizi, Dağlıq Qarabağ və onun ətrafındakı
başqa ərazilər erməni işğalına məruz
qalmış, 1 milyondan artıq azərbaycanlı öz tarixi
və doğma yurdlarından qaçqın və
köçkün düşmüş, minlərlə insan,
onların içərisində ahıllar, qadınlar və
uşaqlar həyatlarını itirmiş, şikəst
edilmiş, əlil olmuşlar.
İşğal
olunmuş torpaqların qeyd-şərtsiz azad edilməsi barədə
BMT Təhlükəsizlik Şurasının hələ
1993-cü ildə qəbul etdiyi 4 qətnaməyə və
başqa aparıcı beynəlxalq təşkilatların qərarlarına,
bununla bərabər, bütün dünya dövlətlərinin
Azərbaycanın ərazi bütövlüyünü
tanımalarına, beynəlxalq konvensiyalara və bu gün
sizin rəhbərlik etdiyiniz ATƏT-in Minsk qrupunun həmsədrlərinin
konkret təkliflərinə, Azərbaycan hökumətinin bu
istiqamətdə apardığı ardıcıl fəaliyyətə
baxmayaraq, keçən əsrin 80-ci illərində Ermənistan
tərəfindən başlanmış təcavüz bu
gün də davam edir. İşğal edilmiş şəhərlər
və kəndlər, təhsil və mədəniyyət
müəssisələri, tarixi və mənəvi dəyərlər
dağıdılıb məhv edilir, əsl faşist cinayətləri
törədilir. Atəşkəs barədə iki dövlət
arasında bağlanmış müqavilə Ermənistan tərəfindən
hər gün pozulur, müharibə qurbanlarının sayı
artır.
Hörmətli
cənablar!
Bu
ondan irəli gəlir ki, münaqişənin həlli ilə
məşğul olan, məsələni sülh yolu ilə həll
etməyə çalışan ATƏT-in Minsk qrupunun həmsədrləri
işğalçı ölkə ilə işğal edilən
ölkəyə eyni münasibət göstərir və bu, əslində
təcavüzkar Ermənistanın istəyinə uyğun gəlir.
Münaqişənin uzanmasından istifadə edən Ermənistan
rəhbərliyi öz işğalçılıq siyasətini
davam etdirir, hər cür vasitələrlə tarixi
saxtalaşdırmağa, milli ayrı-seçkiliyi dərinləşdirməyə,
gənclərini qonşu xalqlara qarşı düşmənçilik
ruhunda tərbiyə edərək, məlum xəstə fikirlərini
gələcək nəslə ötürməyə
çalışır. Bunu Ermənistan prezidenti Serj
Sarkisyanın son zamanlar Gorusda jurnalistlərlə, Tsaxkadzorda (əsl
adı azərbaycanca Qaraçiçəkdir) gənclərlə
görüşlərindəki və Düşənbədə
MDB ölkələri başçıları
Şurasındakı çıxışları və ATƏT-in
Minsk qrupunun həmsədrlərinin həyata keçirdiyi Sahə
Qiymətləndirmə missiyalarının dəfələrlə
etdikləri xəbərdarlıqlara məhəl qoymayan Ermənistanın
işğal olunmuş əraziləri dünyanın başqa
ölkələrində yaşayan ermənilərlə məskunlaşdırması
sübut edir.
Biz,
İkinci Dünya müharibəsinin veteranları aparılan
danışıqları izləyir, Ermənistanın
qeyri-konstruktiv mövqeyini, bunun nəticəsində də iki
xalqın azərbaycanlıların və ermənilərin bu
münaqişədən çəkdikləri əziyyəti
görürük. Bununla bərabər, müharibənin nə
olduğunu hamıdan yaxşı dərk edərək, biz də
məsələnin sülh yolu ilə həll edilməsini istəyirik.
Heç kim inkar edə bilməz ki, azərbaycanlılar həmişə
özlərinin sülhsevərliyi, beynəlmiləlçiliyi
və tolerantlığı ilə fərqlənmişlər.
Ölkəmizdə yaşayan insanlar milli və dini mənsubiyyətlərindən
asılı olmayaraq eyni hüquqlara malikdirlər. Ermənilər
1828-ci ildə İrandan Dağlıq Qarabağa
köçürüldükdən sonra azərbaycanlılar həmişə
onlarla dostluq şəraitində yaşamış, onlara dayaq
olmuşlar. Münaqişə ləğv edilərsə,
heç şübhə etməyə bilərsiniz ki, məkrli
niyyətlərinə çatmaq üçün müxtəlif
hiylələrə əl atan, öz xalqını daim qorxu
altında saxlayan, yeri gələndə onun sağlam fikirli
nümayəndələrini, hətta adi insanlarını belə
qətlə yetirən erməni nasistləri nə etsələr
də azərbaycanlılarla ermənilər yenə də əvvəlki
ənənələrini bərpa edəcəklər.
Hörmətli
cənablar!
Lakin
Ermənistan-Azərbaycan, Dağlıq Qarabağ
münaqişəsinin tezliklə həll edilməsi BMT Təhlükəsizlik
Şurasının, başqa beynəlxalq təşkilatların
qərarlarının yerinə yetirilməsi, Azərbaycan
torpaqlarının qeyd-şərtsiz işğaldan azad edilməsi
üçün sizin siyasi iradə göstərməyiniz, qətiyyətli
tədbirlər görməyiniz tələb olunur, başqa yol
yoxdur! Münaqişənin uzanması bölgədə
yaşayan xalqların maraqlarına deyil,
işğalçı və separatçı dairələrin
mənafelərinə xidmət edir.
İkinci
Dünya müharibəsindən 66 il keçir. Biz, həyatın
qanunu ilə sürətlə sayı azalan müharibə
veteranları, son və müqəddəs borcumuzu yerinə
yetirərək Sizə müraciət edir, əsası olmayan ədalətsiz
Ermənistan-Azərbaycan, Dağlıq Qarabağ
münaqişəsinə son qoyulmasını istəyirik".
AzərTAc
Azərbaycan.-2013.- 8 fevral.- S.3.