İsa Qəmbər və Əli Kərimli
antiazərbaycan mövqeli Əkrəm Əylisliyə tam dəstək
verirlər, amma susmaqla
Dövlət
müstəqilliyinin bərpasından ötən 21 ildə Azərbaycan
bir çox keçmiş sovet respublikalarından fərqli
olaraq, böyük uğurlara imza atmışdır.
İqtisadi, siyasi, mədəni sahələrdə əldə
edilən nailiyyətlər Azərbaycanın beynəlxaq aləmdə
nüfuzunu artırmışdır. Tarixi həqiqətdir ki,
xalqın təkidli istəyi ilə 1993-cü ilin iyununda -
taleyüklü bir zamanda müstəqil Azərbaycanın rəhbərliyinə
qayıdan, məsuliyyətli bir missiyanı çiyinlərinə
götürməkdən çəkinməyən ulu öndər
Heydər Əliyev qısa zamanda dövlətçiliyin
xilasına, ictimai-siyasi sabitliyin, qanunçuluğun, hüquq
qaydalarının bərpasına, iqtisadi tənəzzülün
qarşısının alınmasına nail olmaqla
yanaşı, həm də milli-mənəvi, əxlaqi dəyərlərin
deqradasiyası təhlükəsinin qarşısını
almışdır.
Hakimiyyətə
qayıtdıqdan sonra ilk görüş yerlərindən biri
kimi məhz Azərbaycan Elmlər Akademiyasını seçən
ümummilli lider azərbaycançılıq
ideologiyasının, milli-mənəvi dəyərlərin
inkişafı ilə bağlı alimlər
qarşısında yeni tələblər müəyyənləşdirmişdir.
Hələ
Sovet Azərbaycanına rəhbərliyi dövründə
formalaşdırdığı mütərəqqi ənənələri
müstəqillik illərində inamla davam etdirən ulu
öndər Azərbaycanın görkəmli şair və
yazıçılarının, elm, incəsənət xadimlərinin
yubileylərinin keçirilməsinə, ev-muzeylərinin
yaradılmasına xüsusi qayğı ilə
yanaşmışdır. Heydər Əliyevin bu sahədəki
mədəni quruculuq siyasəti nəticəsində milli-mənəvi
dəyərlərimiz qorunmuş, adət-ənənələrimiz
yaşadılmış, klassiklərimizin yüzillərin
sınağından günümüzə gəlib
çatmış irsinin gələcək nəsillərə
itkisiz çata bilməsi üçün lazım olan
bütün zəruri addımlar atılmışdır.
Böyük strateq Heydər Əliyevin respublikaya rəhbərliyinin
bütün fəlsəfəsi yalnız xalqın milli
dirçəlişi, milli qürur hisslərinin
oyanışı məramına hesablanmışdı. Bu məqsədə
yetişmək üçün Heydər Əliyev azərbaycançılıq
məfkurəsinin rejimin ideoloji repressiya maşını ilə
boğulmasına nəinki imkan verməmiş, eyni zamanda milli
məfkurə və düşüncə sahibi olan
ziyalıları qorumuş, nəticədə respublikada
dissident yazarlar olmamışdır. Ötən əsrin 70-ci
illərində Azərbaycan xalqının görkəmli
şəxsiyyətlərinin, klassik yazıçı və
şairlərinin xatirəsini əbədiləşdirən,
onların əsərlərinin təkrar nəşrini təmin
edən Heydər Əliyev milli ədəbi düşüncənin
inkişafına da əsaslı təkan vermişdir.
Həmin
dövrdə milli düşüncəli vətənpərvər
ziyalılarımızın imperiyanın xüsusi xidmət
orqanlarının təqiblərindən qurtulması, milli
dövlətçilik hissinin güclənməsinə xidmət
edən sanballı əsərlər yazıb-yaratması da
ümummilli lider Heydər Əliyevin xalqına necə
bağlı şəxsiyyət olduğunu təsdiqləyir.
Vaxtı ilə azərbaycançılıq məfkurəsini
əsərlərində təbliğ etdiklərinə görə
şovinizmdə, millətçilikdə
günahlandırılan, təqiblərə məruz qalan Bəxtiyar
Vahabzadə, Xəlil Rza Ulutürk, Anar, Ziya Bünyadov kimi
şəxsiyyətləri ən çətin məqamlarda
qoruyan Heydər Əliyev milli kökə bağlı şəxsiyyət
olduğunu bir daha sübuta yetirmişdir.
Prezident
İlham Əliyev də ilk gündən xalqın milli mədəniyyətinin
və mənəviyyatının qorunub saxlanılmasına,
inkişaf etdirilməsinə xidmət edən strateji siyasi
kursa üstünlük vermişdir. Ölkə
başçısı mədəni, elmi, habelə
yaradıcılıq sahələrində irəliləyişi,
mənəviyyat məsələlərinə dövlət
himayəsini iqtisadi-sosial tərəqqi ilə ayrılmaz şəkildə
bağlayır. Bu, dünyanın ümumi həyatının
rəhnidir və hər bir millətin gələcəyində,
dövlətin qabaqcıl ölkələrlə eyni hüquqi
səviyyədə yaşayıb inkişaf etməsində
mühüm amildir.
Təəssüflər
olsun ki, bu gün adını ziyalı qoyan Eldar Namazovun,
Rüstəm İbrahimbəyovun təsisçi olduğu
"reneqantlar" dəstəsi seçkiqabağı siyasi
şou göstərirlər.
"İnkarçılar"ın toplaşdığı
bir qurumun təmsilçiləri öz şəxsi problemlərini
qabartmaqla bunu xalqın problemi kimi qələmə verməyə
cəhd göstərirlər. Bu "ziyalı" qrupunun
antiazərbaycan şəbəkənin təsiri altına
düşərək ziyalı adına yaraşmayan hərəkətləri
yalnız ikrah doğurur. "Ziyalılar" qrupuna daxil olan və
son günlər gündəmin əsas müzakirə
mövzusuna çevrilən "Daş yuxular" əsəri
müəllifi Əkrəm Əylisinin də antiazərbaycan
şəbəkənin "əmr" qulu olduğunu üzə
çıxartdı. Zaman-zaman bu "ziyalı"nın
iç üzü cəmiyyətə açılsa da, onun
xisləti birbaşa erməni dəyirmanına
su tökdüyü "Daş yuxular"dan sonra aşkara
çıxdı. Ə.Əylisli öz əsərində
xalqın milli heysiyyətinə toxunaraq ona mənəvi zərbə
vurmaqla erməni daşnaklarının əsas
ideoloqlarından heç də fərqlənmədiyini
göstərmiş oldu.
Azərbaycan
ictimaiyyəti bu "əsər"ə öz kəskin
etirazını bildirsə də, daim
milli heysiyyətdən dəm vuran müxalifət təmsilçiləri
bu məsələdə nala-mıxa vurmağa
başladılar. "İctimai Palata" adlı qondarma
qurumun bu günlərdə verdiyi bəyanat da təəssüf
doğurur. Əli Kərimli və İsa Qəmbər
"Daş yuxular" əsərinin müəllifi Ə.Əylislinin
yaradıcılıq azadlığını qeyd-şərtsiz
tanıdıqlarını bildiriblər. Bu isə ifrat
radikalların dolayısı ilə Ə.Əylislini müdafiə
etdikləri anlamına gəlir. Əlbəttə ki, bu məqam
adıçəkilən şəxslərin bir şəbəkədən
idarə olunduğunu deməyə əsas verir. İsa Qəmbərin
vaxtilə söylədiyi "Maraqlarım naminə
şeytanla da əməkdaşlığa gedərəm"
fikri bu gün öz təsdiqini tapır. Ermənilərə
"dayı" deməklə qürur duyan və
yazılarında erməni dostlarının niskilini çəkdiyini
açıq deyən Ə.Əylislinin hərəkətlərinə
haqq qazandıran bu partiya rəhbərləri maraqları naminə
hər cür rəzilliyə getməyə hazır
olduqlarını bir daha sübuta yetirdilər.
"Ziyalılar
qrupu"nun təsisçisi Rüstəm İbrahimbəyov,
eləcə də məqsəd
və məramı bəlli olmayan "El" hərəkatının
əsas istiqamətverici siması olan Eldar Namazovun da məsələdə
"sürüşkən" mövqe sərgiləmələri
onların da birbaşa antiazərbaycan şəbəkənin
diktəsi altında fəaliyyət göstərdiklərini təsdiqlədi.
Özlərini "ziyalı" adlandıran bir qurumun
nümayəndələrinin Ə.Əylislinin "erməni
yuxuları"na konkret münasibət bildirməmələri
əsl ziyalı təfəkkürü və
dünyagörüşü ilə qətiyyən
üst-üstə düşmür.
Sual
olunur: bəs əsl ziyalı mövqeyi harada qaldı? Ad almaq
və təltif olunmaq ziyalı olmağa dəlalət etmir.
"Ziyalı" qrupunda təmsil olunan şəxslərin
ümummilli maraqlar pərdəsi altında gizlənərək
şəxsi ambisiyaları uğrunda mübarizə
apardıqları bəlli olur. "Reneqantlar" dəstəsinin
məhz ümummilli maraqları şəxsi maraqlara satan
manqurtlaşmış bir qrup olduğu bununla da təsdiqini
tapdı.
Bütün
sahələrdə əldə edilmiş uğurları
gözü götürməyən xarici antiazərbaycançı
dairələr belə "ziyalılardan" istifadə etməyə
çalışırlar. Ə.Əylisli də növbəti
"qurban" oldu.
Ziyalının yeganə fəaliyyət amalı
xalqın mənafeyini düşünən, onun
sabahını prioritet hesab edən, dövlətin, dövlətçiliyin
qorunmasına xidmət göstərən əsl vətəndaşlıq
mövqeyi olmalıdır. Əsl ziyalı mövqe dəyişikliyindən,
avantürizmdən uzaq olmalıdır. Bu adı daşıyan
insan elmə, maarifə, tərəqqiyə,
kamilliyə xidmət etməklə ziyalı missiyasını
ləyaqətlə daşımalıdır. Antiazərbaycançı
şəbəkənin böyük oyunlarının xırda
oyunçusuna çevrilən Ə.Əylisli də xəyanətkar
"ziyalı"lar arasında öz yerini tutdu. Tarix sübut
edir ki, dövlətinə, xalqına qarşı xəyanət
yolunu tutan insanların cəzası çox ağır olur.
Elnur HACALIYEV
Azərbaycan.-2013.- 8 fevral.- S.6.