SÖHBƏT ANAMIZ AZƏRBAYCANDAN GEDİRSƏ...

Tarixdə öz xalqına, dövlətinə və millətinə xain çıxan, arxadan kürəyinə bıçaq saplayan qələm sahibləri də olub!

Müxtəlif səbəblərdən dönüklük göstərənlərin aqibəti isə nəticə etibarı ilə eyni olub: xalqın qınağı, töhməti, qəzəbi və nifrəti! Bir də qələm sahibinin alnına vurduğu ömürlük lənət damğası!

Bu gün xalqımız tərəfindən millətə xəyanət kimi dəyərləndirilən hadisələrdən biri hələ XIX əsrdə, Əkrəm Naibovun "Daş yuxular" "əsəri"nin dərc olunduğu "Drujba narodov" jurnalının çıxdığı Rusiyada baş vermişdi. O zaman məşhur rus tənqidçisi V.Belinski "Dostlarla yazışmadan parçalar" adlı son kitabı ilə özünü biabır edən N.Qoqola bir məktub da ünvanlamışdı. Az qala rus gəncliyinin əzbər bildiyi "Qoqola məktub"da deyilirdi: "Burada söhbət mənim, ya sizin şəxsiyyətinizdən getmir. Barəsində danışdığınız məfhum məndən, hətta sizdən də dəfələrlə yüksəkdə dayanır. Söhbət rus cəmiyyətindən, Rusiyadan gedir".

Əkrəm Naibovu xalqın qəzəb və nifrət ünvanına çevirən "Daş yuxular"da da söhbət ayrı-ayrı fərdlərdən yox, bütövlükdə Azərbaycan xalqından, onun ən həssas nöqtəsi və hələ də qanı kəsilməmiş Qarabağ yarasından, işğal altındakı müqəddəs torpaqlarından gedir!

Söhbət Anamız Azərbaycandan gedəndə isə hamı qeyrətli və vicdanlı, obyektiv və dərrakəli, vətənpərvər və qərəzsiz olmağı bacarmalıdır!

Bu, Azərbaycanda yaşayan və azərbaycanlı adını daşıyan bütün xalqlara və millətlərə də aiddir.

ƏGƏR SÖHBƏT ANAMIZ AZƏRBAYCANDAN GEDİRSƏ...

burada fərdi yox, milli və dövləti maraq olmalıdır;

heç bir şirnikləndirici vədə, mükafata (onsuz da heç kim sənə Nobel mükafatı verən deyil) susamaq yaramaz;

təmənnasında olduqlarını ala bilmədiyinə görə (amma əslində özünə, ailəsinə də hər şey artıqlaması ilə verilmişdi) dövlətə "müharibə elan etməyə", xalqdan qisas almağa da yer yoxdur!

Azərbaycan Anamızdır! Adam anası barədə hədyanlar danışmaz!

Adam başqasına xoş getməkdən ötəri anasını ləkələməyə, millətini şərləməyə, olmayan şeyləri uydurmağa çalışmaz!

Adam anasını (Azərbaycanı) pula, mükafata, ucuz söhrətə satmaz!

İndi çoxlarını bir sual maraqlandırır: Əkrəm niyə belə etdi?

Siyasi şantaj janrında yazdığı "əsər"lə nə demək və nəyə nail olmaq istəyir?

Heç də sadə olmayan sualdır! Çünki bu addımı atan 76 yaşlı adamdır və demək olar ki, yazıçı kimi hər şeyi vardı! Həm də artıqlaması ilə!

BU, XƏYANƏTDİR!

İlk növbədə həqiqətə xəyanətdir! Çünki əsl həqiqət Əkrəm Naibovun yazdığı kimi deyil!

Tarixə xəyanətdir! Çünki "əsərdə" tarix saxtalaşdırılıb, tərsinə çevrilib!

Millətə xəyanətdir! Çünki Azərbaycan xalqı Əkrəmin yazdığı kimi qəddar, ... pis deyil!

Yazıçı ideallarına xəyanətdir! Çünki həmin ideallar bu "əsərdə" ayaqlar altına atılıb!

Şəhidlərin ruhuna xəyanətdir! Çünki Ermənistan-Azərbaycan, Dağlıq Qarabağ münaqişəsində verdiyimiz 20 min şəhiddən biri belə anılmayıb!

Kəndinə, el-obasına xəyanətdir! Çünki Əylis camaatı Əkrəmin bu "əsərdə" təsvir etdiyi kimi deyil!

Bir neçə il bundan qabaq Bakı hava limanında naxçıvanlı bir gənc (təəssüf ki, adını unutmuşam) Azərbaycana gələrək Qarabağın Ermənistana məxsusluğu barədə jurnalistlərə müsahibə verən bir erməni dığasına babat şillə vurmuşdu!

Bu şillə əslində bütün ermənilərə dəymişdi!

İndi isə daxili "mən"i erməni olan, əli rusca yazan, dili azərbaycanca danışan Əkrəm Naibov "Daş yuxular"ı ilə Azərbaycan xalqına xəyanət şilləsi vurdu!

O heç kəsin tanımadığı Azərbaycan gənci, bu isə qocalmış, bir ayağı burda, o biri ayağı gorda olan Azərbaycan yazıçısı!

Şapalaq demişkən... Əlbəttə, Əkrəm Naibov çox arzulayır ki, kimsə ona bir şapalaq vursun və şapalağın yeri qızarsın! Çünki həmin şapalaqdan və qızarmış şillə yerindən yaxşı bəhrələnə bilər.

Amma Azərbaycan xalqı onun təsvir etdiyi kimi qəddar deyil!

Çox mədəni şəkildə əsərlərinə od vurub yandırdı! Özü də ikinci dəfə!

Allaha və Onun Peyğəmbərinə sataşan, xalqına xain və nankor çıxan Əkrəmin özü isə Cəhənnəmin Qır qazanında yanacaq!

Əkrəm Naibov siyasi şantaj janrında yazdığı "əsərində" əylislilərə şər və böhtan ataraq onları aşağılamaq istədi.

Amma əylislilər mərdlikləri və prinsipiallıqları ilə nankorun cavabını verərək onu lənətlə damğaladı, hər cür şər-şəbədədən yüksəkdə durduğunu göstərdi!

Erməniyə yaltaqcasına xidmət göstərərək yarınan Əkrəmin bütün kitablarını ictimai şəkildə yandırdı!

Və bundan sonra kəndin adından yazıçı təxəllüsü kimi istifadə etməsinə qadağa qoydu!

Yəqin ki, belə dönüyün və nankorun kənd qəbiristanlığında basdırılmasına da yol verməyəcəklər!

Körpəliyindən yetim qalaraq kənd camaatının rəhmi və köməyi ilə boya-başa çatan Əkrəmə kimsənin öz haqqını halal edəcəyini də düşünmürəm!

ADAM SU İÇDİYİ QUYUYA TÜPÜRMƏZ, - deyiblər!

Əkrəm Naibov həmişə su içdiyi quyuya tüpürüb! Amma yenə həmin quyudan su içib!

Vəzifəyə keçmək, kitablarını çap etdirmək üçün intriqalar yaradıb!

Amma həmişə düzlükdən, səmimiyyətdən danışıb!

Çörək kəsdiyi dostlarının üzünə gülüb. Amma daldada paxıllığını çəkib, badalaq gəlib!

Kişilikdən, mərdlikdən söz açıb. Amma ona xeyirxahlıq edənlərə, dar günündə qolundan tutanlara namərdlik edib, əsərlərində riyakarcasına atmacalar atıb!

Ağızdolusu vətənpərvərlikdən danışıb. Amma vətənimizin bu çətin, sınaqlı günlərində bizi ermənilərə satdı, özündən sonra da illər boyu əleyhimizə işləyəcək sifarişli "əsər" yazdı!

UTANMASAN OYNAMAĞA NƏ VAR! - Bu isə başqa bir atalar sözüdür

Millətini sevməsən (hərçənd ki, Əkrəm Naibovun damarlarından təmiz türk qanı axması böyük şübhə doğurur), onu aşağılamağa nə var!

Xalqına düşmənçilik niyyətinə düşsən, arxadan bıçaq soxmağa nə var!

Dövlətinə xəyanət yolu tutsan, şərəfsiz üsul və vasitə tapmağa nə var!

Kənd-kəsəyindən üz çevirsən, həmkəndlilərinə böhtan ataraq şərləməyə nə var!

Doğmalarını düşünməsən, onları biabır edərək başıaşağı etməyə nə var!

CƏHƏNNƏMƏ GEDƏN ÖZÜNƏ YOLDAŞ AXTARAR!

Əkrəm Naibovun belə yoldaşları çoxdur!

Mətbuata sızan informasiyaya görə, reneqat Eldar Namazovun dəstəsinin üzvlərinin Əkrəmin son "əsəri"ndən xəbərləri olub. Hətta "Daş yuxular"ı kitab şəklində oxuyaraq ona öz tövsiyələrini də veriblər! Başqa sözlə, Azərbaycan xalqına və onun maraqlarına qarşı yönələn bu xəyanət əməlinə ilk günlərdən həmmüəlliflik ediblər.

Bu gün də İsa Qəmbər, Əli Kərimli, İctimai Palatanın bəzi üzvləri (deyəsən, Əkrəmin "Ətirşah Mazan" povestini unudublar), reneqat Eldar Namazovun dəstə üzvləri - reneqat Rüstəm İbrahimbəyov, Rafiq Əliyev, Gültəkin Hacıbəyli, özlərini postmodernist adlandıran, əsərləri Biləcəridən o taya keçməyən yazarlar "demokratiya" (xalqa xəyanətin demokratiyaya, söz azadlığına nə dəxli var?!) adı ilə dolayısı şəkildə Əkrəm Naibovu və onun "əsər"ini müdafiə edirlər!

Niyə dolayı yolla?

Çünki xalqın qəzəb və nifrətindən qorxurlar.

İsa Qəmbər və Əli Kərimli əndirəbadi çıxışlarla "tənqid" görüntüsü yaratmaq istəyirlər. Amma onların əsas qınağı xalqa qarşı yönəlmiş olur! Guya yazıçının üzərinə bu sayaq getmək olmaz, bu, Avropaya xoş gəlməz və s.

Əslində onlar belə mövqe ilə yazanı (edəni) yox, qınayanı (görəni) ittiham edirlər!

Belə məntiq yalnız Azərbaycanın aqressiv müxalifətində ola bilər!

Deyir, tamarzıdan kəs, dadanmışa ver!

Cavanlığında, istedadlı vaxtlarından Əkrəm Naibov povest və hekayələr yazıb çap etdirər, mətbuatda təriflənərdi. Artıq istedadı tükəndiyindən gündəmə çıxa, təriflənə, mükafat ala bilmir!

İSTEDAD TÜKƏNƏNDƏ:

onun yerini intriqa, qalmaqal, cığallıq, yetənə yetib, yetməyənə bir daş atmaq şakəri tutur;

hamının dediyinin əksinə gedərək "fərqlənmək" həvəsi tutur;

xəyanətlə də olsa, gündəmə gəlmək, müzakirələr predmetinə çevrilmək istəyi tutur;

xaricdə çap olunmaqdan ötrü düşmən sifarişini icra etmək naminə nökərçilik xisləti tutur!

Əkrəm Naibov ona verilən "tapşırığı" "yüksək səviyyədə" icra etdi.

İndi qalır "malades" almağı.

Bu "malades"in yağlı olmasından ötrü:

- dissident adına yiyələnmək;

- vətəndaşlıqdan məhrum edilmək;

- yaxud, bir balaca fiziki təzyiqə məruz qalmaq vacibdir!

İndi Əkrəm Naibov buna çalışır!

Bunların hamısını "çötkəyə" vuraraq yaxşıca hesablayıb.

Amma "çötkəsi" düz işləmir: itirdiyi ilə qazandığının balansı yaxşı görünmür!

"Qazancı" (əgər bunları qazanc saymaq mümkünsə) nə ola bilər:

- milyonlarla dollar qonorar (artıq Rusiyada və Ermənistanda "Daş yuxular" çap edilir);

- çoxsaylı "yaradıcılıq" mükafatları (bunun əsl adı "ədəbi rüşvət"dir);

- "əsərin" erməni diasporlarının fəaliyyət göstərdikləri ölkələrin xalqlarının dillərinə tərcüməsi (yəni qonorar formasında rüşvət) və nəşri;

- Ermənistanda dönə-dönə nəşr (sevdiyi və xidmət etdiyi millətin hər bir üzvü sifarişin icrasına əmin olmalıdır);

- Əkrəm Naibov fondu yaradaraq dünya erməniliyindən oraya külli miqdarda vəsait toplamaq!

İtirilən isə:

- əvvəlki hörmət-izzət;

- vətən, xalq, millət;

- doğmalar, dostlar, həmkəndlilər;

- urvatlı gor evi!

Əkrəm Naibov erməniləri mədh edərək azərbaycanlıları aşağılayan "əsəri"ni elə bir vaxtda yazıb ki:

Artıq dünya Ermənistan-Azərbaycan, Dağlıq Qarabağ haqda həqiqətləri daha dərindən öyrənməyə başlayıb;

Dünya Xocalıya ədalət istəyir;

Dünya Xocalı soyqırımının baş verdiyini qəbul edərək onu qiymətləndirməyə başlayıb;

Dünya dövlətlərinin parlamentləri bir-birinin ardınca Xocalı soyqırımı barədə qərarlar qəbul edirlər.

Əkrəm Naibov isə öz "əsərində" Xocalı soyqırımının adını bir dəfə də olsun belə çəkməyib:

Əkrəm Naibov əksini, azərbaycanlıların soyqırımı törətdiklərini isbat etməyə çalışır!

V.Belinski "Dostlarla yazışmadan parçalar" adlı biabırçı kitab yazan N.Qoqolu qəzəblə qınayırdı:

"Xalq öz yazıçısına pis, istedadsız kitabı bağışlamağa hazırdı, amma ona zərər vuracaq kitabı bağışlamağa hazır deyil".

"Əgər siz Rusiyanı sevirsinizsə, kitabınızın rüsvay olmasına mənimlə birlikdə sevinin!"

Gözəl deyilib, amma müəyyən fərqlər var.

Əvvəla, Əkrəm Naibov heç Qoqolun dırnağı da ola bilməz!

İkincisi, rüsvay olan onun kitabı yox, özüdür!

Əkrəm Naibov "dünya tarixi"nə düşməyə can atırdı...

Tarixə "düşdü"!

Amma Azərbaycan torpaqlarını işğal edərək 20 min vətəndaşımızı qətlə yetirən düşmən dövlətin tarixinə!

Azərbaycan ədəbiyyatı tarixinə də "düşdü"!

Amma əsərləri xalq tərəfindən yandırılan, "xalq yazıçısı" adı əlindən alınan, həmkəndliləri tərəfindən yazıçı təxəllüsündən məhrum edilən, vətənə və qələmə xəyanət edən cılız insan kimi!

Əkrəm Naibovun "əsəri" uzun illər boyu düşmənlər tərəfindən əleyhimizə işlədiləcək!

Özü isə daima xalq tərəfindən lənətlənəcək, söyüləcək, gor evində də rahat yata bilməyəcək!

Vətənin məhəbbəti kimi, nifrəti də müqəddəsdir!

Bəxtiyar SADIQOV

Azərbaycan.-2013.- 13 fevral.- S.8.