Lerik aqrar-sənaye və turizm rayonuna çevrilir

Bu qış dağlar diyarı Lerikdə də mülayim keçir. Yalnız rayon mərkəzinin cənub-qərbində yerləşən sal qayalardan ibarət çılpaq dağlarda tala-tala seyrək qar görünür. Leriklilər havaların belə xoş keçməsindən istifadə edərək tikinti-abadlıq, quruculuq işlərini davam etdirir, sosial-iqtisadi sahədə uğurlarını möhkəmləndirirlər.

Hər rübdə, yarımildə, il başında görülən işlərə yekun vurmaq, qarşıdakı vəzifələri müəyyənləşdirmək respublikamızda artıq çoxdan adət halını almışdır. Ölkə səviyyəsində Prezident İlham Əliyevin sədrliyi ilə keçirilən Nazirlər Kabinetinin belə iclaslarında sosial-iqtisadi sahədə görülən işlər ətraflı təhlil edilir, ayrı-ayrı nazirlik, komitə və digər dövlət qurumu rəhbərlərinin məlumatları dinlənilir, mövcud problemlərin həlli yolları müəyyənləşdirilir. İqtidarla xalq arasında körpü yaradan, demokratiyanı inkişaf etdirən belə iş metodu yerlərdə də tətbiq olunur. Öncə qəsəbə, kənd inzibati ərazi nümayəndələri, sonra isə şəhər və ya rayon icra hakimiyyəti başçıları xalqa və hökumətə hesabat verirlər.

Bu günlər leriklilər də 2012-ci ildə görülən işlərə yekun vurmaq, 2013-cü ildə görüləcək işləri müəyyənləşdirmək məqsədilə rayon mədəniyyət evinə toplaşmışdılar. Hesabat məruzəsi ilə çıxış edən Lerik Rayon İcra Hakimiyyətinin başçısı Rövşən Bağırov bildirdi ki, 2012-ci ildə rayonda ümumi məhsul buraxılışının həcmi əvvəlki illə müqayisədə 12,2, pərakəndə əmtəə dövriyyəsi 2,2, pullu xidmət 2,2, təmir-tikinti 74,1, sənaye məhsulunun ümumi həcmi 56 faiz artmışdır. Rayon üzrə əhalinin orta aylıq əməkhaqqı ötən ilə nisbətən 2,1 faiz artaraq 274,6 manata çatmışdır. Hesabat ilində kənd təsərrüfatı sahəsində də müsbət nəticələr əldə edilmişdir. Kənd təsərrüfatı məhsulları istehsalçılarına verilən subsidiyalar sahənin inkişafına təkan vermişdir. Regionların sosial-iqtisadi inkişafı ikinci Dövlət Proqramının icrası çərçivəsində Lerikdə son 4 ildə 3,2 min, keçən il 1200-dən çox, 2004-2012-ci illər ərzində isə 8 min yeni iş yeri açılmışdır. Onların 40 faizdən çoxu daimidir.

Məruzədə vurğulandı ki, Lerikin tarixində ilk dəfə olaraq 2006-cı ildə buraya təbii qaz xətti çəkilmişdir. Bu gün Lerik şəhəri və digər 12 yaşayış məntəqəsi mavi yanacaqdan istifadə edir. Hazırda rayonun daha 20-dən çox kəndinə qaz xətti çəkilir. Cari ilin sonuna kimi isə daha 20 kənd qazlaşdırılacaq.

Natiq qeyd etdi ki, rayon mərkəzinin yenidən qurulması və abadlaşdırılması ilə bağlı 2012-ci ildə də işlər davam etdirilmişdir. Bir çox küçələrdə abadlıq işləri aparılmış, şəhərin giriş və çıxış hissələrində istinad divarları yeni formada bərpa olunmuş, divarlar çay daşı, ağ lay üzlük daşları və mərmərlə üzlənmiş, səkilərə ağ lay və tamet plitələr, yollara asfalt döşənmiş, müasir işıqlandırma sistemləri quraşdırılmışdır. Hazırda isə Lerik şəhərində eyni vaxtda 300 nəfərə xidmət edə biləcək xeyir-şər evinin inşasında son tamamlama işləri görülür. Bunlardan əlavə, keçən il Züvüc, Davadibi, Daster, Aran, Ləkər, Barzavu, Veri kəndlərində yeni məktəb binaları şagird və müəllimlərin istifadəsinə verilmişdir. Hazırda Nücü, Molalan, Livədirgə, Bibyani, Durğan, Nüvədi, Zəriküməco kəndlərində də yeni məktəb binaları tikilir. Ümumiyyətlə, 2013-cü ildə daha 6 məktəbin tikilməsi və 2 məktəbin təmiri nəzərdə tutulur.

R.Bağırov xatırlatdı ki, ötən il Prezidentin sərəncamı ilə Lerik-Qosmalian-Kəlvəz avtomobil yolunun tikintisi üçün ilkin olaraq 3 milyon manat vəsait ayrılmışdır. Artıq yolun 8,6 kilometri asfaltlaşdırılmış, Noda, Peştətük kənddaxili yollarına 7 min 820 kvadratmetr asfalt döşənmişdir. Həmçinin rayon əhalisinin yaxından köməyi ilə digər bir neçə kəndin yolları abadlaşdırılmış, körpülər təmir edilmişdir.

Lerikin təbiəti füsunkardır və rayon ərazisində çoxlu tarixi abidələr mövcuddur. Rayon uzunömürlülər diyarı kimi də şöhrət tapmışdır. Bunlar isə turizmin inkişafına imkan yaradan mühüm amillərdir. Rayon ərazisində indi "Relax", "Cənub", "Yaşıl ada", "Meşəbəyi" və digər turizm-istirahət mərkəzləri fəaliyyət göstərir. Yaradılan şərait nəticəsində rayona gələn turistlərin sayı ilbəil artır.

RİH başçısının sözlərinə görə, keçən il əhalinin elektrik enerjisi və içməli su təminatında müəyyən irəliləyişlər olmuşdur. Belə ki, 19 kilometrlik Qosmalian-Lerik su xəttinin çəkilişi başa çatdırılmışdır. Hazırda isə su-kanalizasiya sisteminin çəkilişi davam etdirilir.

Məruzəçi qeyd etmişdir ki, əhalinin yumurta və quş ətinə tələbatını ödəmək üçün rayonun Piran kəndi ərazisində tikilən broyler fabrikində də son tamamlama işləri görülür. Gündə 50 ton quş əti istehsal edəcək fabrikin tikintisində 80 nəfər lerikli işləyir. Müəssisə tam gücü ilə işlədikdə burada 150-dən çox işçi çalışacaq.

Tənqid və özünütənqid şəraitində keçirilmiş yığıncaqda Azərbaycan Respublikası Prezidenti Administrasiyasının məsul işçisi Vəfadar Bağırov da iştirak etmişdir.

Seyran CAVADOV

Azərbaycan.-2013.- 13 fevral.- S.10.