Qafqaz Müsəlmanları İdarəsi «Daş yuxular»ı
pislədi
Əkrəm Naibovun "Daş yuxular" yazısını Qafqaz
Müsəlmanları İdarəsi (QMİ) də pisləmişdir. AzərTAc xəbər verir ki, bununla
əlaqədar fevralın 13-də QMİ-də keçirilən
tədbirdə Qafqaz Müsəlmanları
İdarəsinin elmi-dini və qazılar
şuralarının üzvləri, müxtəlif dini konfessiyaların rəhbərləri iştirak etmişlər.
Tədbirdə
Qafqaz Müsəlmanları İdarəsinin
sədri Şeyxülislam Allahşükür
Paşazadə çıxış edərək bildirmişdir ki, yazı
Azərbaycan ictimaiyyətində ciddi
narazılığa səbəb olmuş,
istər dövlət qurumları, istərsə də sadə
vətəndaşlar bu cızma-qaraya öz etirazlarını bildirmişlər. Dövlət
başçısı İlham Əliyev bütün bunları nəzərə alaraq Əkrəm Naibovun
"Xalq yazıçısı" fəxri
adından və Azərbaycan Respublikası Prezidentinin
fərdi təqaüdündən məhrum edilməsi ilə
bağlı sərəncamlar imzalamışdır.
A.Paşazadə
vurğulamışdır ki, bu yazı tamamilə Azərbaycan
xalqının təhqir olunmasına həsr edilmişdir
və milli-mənəvi dəyərlərimizə ziddir. Burada Azərbaycanın
tarixi təhrif, İslam
dini təhqir olunmuşdur.
Yazıda, eyni zamanda,
şəhidlərimizin ruhu təhqir olunur. Ona görə də
bu yazı qəbuledilməzdir.
"Daş yuxular"ın Azərbaycan
xalqının milli və dini
heysiyyətinə zərbə vurduğunu
bildirən AMEA-nın A.Bakıxanov adına Tarix
İnstitutunun direktoru,
Milli Məclisin deputatı Yaqub
Mahmudov vurğulamışdır ki, əslində, Ə.Naibov
bu yazısında özünün
erməni xislətini ortaya qoymuşdur.
Y.Mahmudov diqqətə
çatdırmışdır ki, "Daş yuxular"ın heç
bir elmi əsası yoxdur və bu,
xalqımıza qarşı sifarişlə yazılmış
"əsər"dir, real tariximizə xəyanət
nümunəsidir. Yazı, həqiqətən,
dözülməzdir. Yazıçı ermənilərin
mövqeyindən çıxış edir
və Azərbaycanın başına gələnləri pərdələyir.
"Əsər" və müəllif Vətənə xəyanət
nümayiş etdirir. Bu, Ə.Naibovun görmək
istədiyi yuxulardır. Ermənilər tərəfindən daim təcavüzə məruz qalan
azərbaycanlılardır, amma bu yazı ermənilərə bəraət
qazandırır.
Rus Pravoslav
Kilsəsinin Bakı və Azərbaycan Yeparxiyasının arxiyepiskopu Aleksandr İşein Azərbaycanın müxtəlif
xalqların, dinlərin birgə yaşadığı nümunəvi
ölkə olduğunu diqqətə
çatdırmış, "Daş
yuxular"ı qeyri-səmimi yazı kimi
xarakterizə etmişdir.
Avropa yəhudilərinin
Bakı dini icmasının sədri Gennadi Zelmanoviç Azərbaycanın
tolerant ölkə olduğunu
vurğulamış, Ə. Naibovun
yazısında Azərbaycan tarixinin, həqiqətlərinin
təhrif olunduğunu diqqətə
çatdırmışdır.
Tədbirdə
QMİ-nin elmi-dini və
qazılar şuralarının üzvləri də
çıxış edərək "Daş
yuxular"ı tənqid etmiş, Azərbaycanın
tarixi gerçəkliklərini, toponimlərini
saxtalaşdıran və xalqımızı təhqir edən Ə.Naibovun qələminin ancaq
şərə və böhtana xidmət etdiyini bildirmişlər.
Natiqlər
qeyd etmişlər ki,
torpaqlarımızın azadlığı və bütövlüyü uğrunda
canlarından keçmiş şəhidlərimizin
ruhu ermənilərə böyük
sevgi bəsləyən Ə.Naibova heç zaman rahatlıq verməyəcəkdir.
Daha sonra QMİ-nin elmi-dini və
qazılar şuralarının bəyanatı oxunmuşdur.
Bəyanatda
vurğulanır ki, çoxmilyonlu
Azərbaycan dindarlarının iradəsini ifadə edərək
xalqımıza xəyanət, onun milli-mənəvi
və dini dəyərlərinə həqarət
mahiyyətli bir yazıya öz
münasibətimizi bildirməyi vacib
sayırıq.
Azərbaycan dindarları Əkrəm Naibovun üzdəniraq yazısını birmənalı
olaraq xalqımızın heysiyyətinə
toxunan, ülvi dəyərlərinə
təhqir kimi dəyərləndirir, bu mənəviyyatsızlığın
qarşılığında onun xalq yazıçısı adından məhrum
edilməsini ədalətli addım sayırlar. Azərbaycan
xalqının milli və dini
irsinə sədaqəti, ümumbəşəri dəyərlərə
sadiqliyi, tolerantlığı dünyaya məlumdur.
Bunu dünya görür və etiraf edir. Bunu hətta
torpaqlarımızı işğal etmiş ermənilər belə danmağa cürət etmirlər. Belə olduğu təqdirdə,
Əkrəm Naibovun öz
millətinə, onun tarixinə, görkəmli
şəxsiyyətlərinə nifrət nümayiş
etdirdiyi halda,
qarşı tərəfə hədsiz təəssübkeşliyinə
və böhtan dolu saxta xəyallarına istinad
etməsinə xalqımız tərəfindən heç bir bəraət ola bilməz.
Bəyanatda
qeyd edilir ki, qəhrəmanının dili
ilə Azərbaycan xalqının ünvanına olmazın iftiralar yağdıran müəllifin guya xalqlar arasında
barışığa nail olmaq
məramında olduğu fikrini
səsləndirməsi isə riyakarlıqdan başqa
bir şey deyildir.
"Məsum" adlandırdığı ermənilərin
ruhları üçün üzüntü və təəssüf hissi keçirən Əkrəm Naibovun yuxusuna nədən
Xocalı qətliamının günahsız
qurbanlarının narahat ruhları girmir? Qəhrəmanının dili ilə dinimizin müqəddəsliklərinə
hörmətsizlik nümayiş etdirən,
dini dəyərlərimizə bağlılığımızı
şübhə altına alan dönük xislətli müəllifin azərbaycanlıları
tamamilə mənfi səpkidə göstərməsi, öz soydaşlarını vəhşi,
həmkəndlilərini psixi cəhətdən
qeyri-sağlam biriləri kimi
qələmə verməsi, müxtəlif
alçaldıcı ayamalar qoşması
onun mənəvi naqisliyinin
göstəricisidir.
Azərbaycan.-
2013.- 14 fevral.- S.3.