«Qaradağlı
soyqırımı şahidlərin dili ilə» kitabının təqdimatı oldu
Fevralın
17-si Qaradağlı soyqırımının ildönümüdür.
Bununla əlaqədar
"Azərbaycan Respublikasının Dağlıq Qarabağ Bölgəsinin Azərbaycanlı
İcması" İctimai Birliyinin mərkəzi qərargahında Milli Məclisin deputatı Qənirə Paşayeva və Xocavənd Rayon
İcra Hakimiyyətinin əməkdaşı
Şaiq Aslanovun həmmüəllifliyi
ilə hazırlanan və Qaradağlı
soyqırımını şahidlərin dili ilə oxucuya
çatdıran "Qaradağlı soyqırımı
şahidlərin dili ilə"
kitabının təqdimat mərasimi keçirilib.
Şəhidlərimizin xatirəsinin bir dəqiqəlik
sükutla yad edilməsi
ilə başlanan tədbiri açan Şaiq Aslanov qeyd etdi
ki, kitabda
Qaradağlı soyqırımı şahidlərinin, ermənilərin
əsir və girovluğunda
amansız işgəncələrə məruz qalan Xocavənd rayonu Qaradağlı
kənd sakinlərinin acı xatirələri yer
alıb.
Soyqırımı
dəhşətlərini, ümumən erməni terrorunu əks etdirən fotofaktlar,
dəqiq rəqəmlərlə tərtib edilmiş
siyahılar, o cümlədən, həlak
olan, əsir və girov
götürülən Qaradağlı sakinlərinin adları
olan kitabın baş
məsləhətçisi Xocavənd Rayon İcra
Hakimiyyəti başçısı Eyvaz Hüseynov və Milli Məclisin
deputatı, tarix elmləri doktoru
Musa Qasımlı, redaktoru
isə Əkbər Qoşalıdır.
Tədbirdə
çıxış edən Milli Məclisin
deputatı Qənirə Paşayeva bildirdi ki, Xocavənd rayonunun Qaradağlı kəndində Ermənistan
ordusunun törətdiyi
soyqırımı qurbanlarının əziz xatirəsinə
həsr olunmuş "Qaradağlı
soyqırımı şahidlərin dili ilə"
kitabı canlarını vətən, torpaq
yolunda fəda etmiş bir elin,
bir kəndin igid və
cəsur övladlarının xatirələrini yaşatmaqla yanaşı, eyni
zamanda Azərbaycan həqiqətlərini,
erməni vəhşiliyi və cinayətlərinin ölkə
və dünya ictimaiyyətinə
çatdırılması istiqamətində
apardığımız informasiya
mübarizəsində tutarlı bir vasitə
olacaq, kitab yaxın
vaxtlarda başqa dillərə
də tərcümə ediləcək.
Milli Məclisin deputatı Elman Məmmədov qeyd etdi ki, ermənilərin öz mənfur niyyətlərini gerçəkləşdirmək
üçün ötən əsrin
sonlarında əsassız torpaq və ərazi
iddiası ilə başladıqları növbəti
müharibə nəticəsində minlərlə oğul və qızlarımız şəhid
olub.
Milli Məclisin deputatı professor Musa Qasımlı
vurğuladı ki, keçmişdə yol verdiyimiz
yanlışlıqlardan doğru nəticə
çıxarmaq üçün tariximizi dərindən bilməli və öyrənməliyik.
Bu kimi faktlarla
zəngin kitabların yazılması isə ümumi
işimizə ciddi kömək olacaqdır.
Xarici İşlər Nazirliyinin əməkdaşı Elman Abdullayev və
"Dağlıq Qarabağ Bölgəsinin
Azərbaycanlı İcması" İctimai
Birliyinin Əlaqələndirmə
Şurasının sədri Orxan Əkbərov
xüsusi olaraq
vurğuladılar ki, Azərbaycan həqiqətlərinin
dünya ictimaiyyətinə
çatdırılması istiqamətində dövlət səviyyəsində əsaslı işlər
həyata keçirilir. Bütün
bu işlərin məntiqi nəticəsi olaraq beynəlxalq təşkilat və nüfuzlu qurumlarda ölkəmizin
haqq işi qəbul olunur.
Təqdimat
mərasiminə qatılan Türkiyə Böyük
Millət Məclisinin üzvü Sinan Oğan, tarixçi alim Məhərrəm
Zülfüqarlı, Şuşa Rayon İcra Hakimiyyəti
başçısının müavini
Vüsalə Fətəliyeva, Qaradağlı kənd sakini, keçmiş əsir
Seyyur Nağıyev çıxış
edərək
soyqırımı ilə bağlı yazılmış bu kitabın informasiya
mübadiləsi və mübarizəsində ermənilərə
qarşı tutarlı cavab olduğunu bildirdilər.
Təqdimat
mərasiminə yekun vuran
Xocavənd Rayon İcra
Hakimiyyətinin başçısı Eyvaz
Hüseynov bildirdi ki, 1992-ci ilin 17 fevral günü Azərbaycan
tarixində qanla yazılan növbəti bir səhifə oldu. Lakin düşmənlərimiz öz
istəklərinə çata, bizi tamamilə məhv edə bilmədlər.
Soyqırımına məruz qalan, öz doğmalarını, əzizlərini
itirən qaradağlılar sınmadılar, əyilmədilər.
Bəxtiyar QARACA
Azərbaycan.- 2013.- 15 fevral.- S.5.