YASAMAL dinamik inkişaf yolundadır

Prezident İlham Əliyevin müdrik rəhbərliyi sayəsində artıq dünya birliyində öz layiqli yerini tutan, dayanıqlı və davamlı iqtisadi inkişafa nail olan respublikamız dünyanın ən inkişaf etmiş ölkələrindən birinə çevrilmək hədəfinə doğru böyük inamla irəliləyir, ötən hər bir il bütün sahələrdə əldə olunan uğurlarla tarixə düşür.

Əvvəlki illərdə olduğu kimi, 2012-ci ildə də qlobal iqtisadi böhran şəraitində Azərbaycan iqtisadiyyatı uğurlu siyasət sayəsində mənfi xarici iqtisadi təsirlərə dayanıqlılıq nümayiş etdirdi, iqtisadi artımın davamlılığı təmin olundu. Makroiqtisadi sabitlik qorunub saxlanıldı, iqtisadiyyatın şaxələndirilməsi, qeyri-neft sektorunun və regionların inkişafı sürətləndi, valyuta ehtiyatlarının səmərəli idarə edilməsi və milli valyutanın sabitliyi təmin olundu, sahibkarlığa dövlət dəstəyi gücləndirildi, özəl bölmənin inkişafı üçün azad rəqabət və münbit investisiya mühiti yaradıldı, əhalinin sosial rifahı daha da yaxşılaşdı.

2012-ci ildə Bakı və onun qəsəbələrinin inkişafı proqramı da uğurla icra edildi, irihəcmli işlər görüldü. Bu il başa çatacaq proqrama əsassən Bakının bütün rayon və qəsəbələrində infrastruktur layihələri icra edilir, yollar salınır, lazımi şərait yaradılır. Ümumiyyətlə, bu proqram çox müfəssəl, geniş və dəqiqdir, o cümlədən icrası daim nəzarətdədir. Bu ilin sonuna qədər proqram çərçivəsində qəsəbələrin əsas infrastruktur və sosial məsələləri öz həllini tapacaq, mövcud problemlərin böyük əksəriyyəti aradan qaldırılacaq.

Ümumi inkişafa layiqli töhfələr

Azərbaycanda geniş vüsət alan sosial-iqtisadi inkişaf, aparılan quruculuq və abadlıq işləri Yasamal rayonunda da yüksək templə davam edir. Bütövlükdə Yasamal rayonu paytaxt Bakının və ölkənin inkişafı prosesinə ildən-ilə özünün layiqli töhfələrini verir. Rayonun inkişafından danışarkən, ilk növbədə, qeyd etməliyik ki, bu yuksəlişə və qazanılan hər bir nailiyyətə Prezident İlham Əliyevin göstərdiyi böyük diqqət və qayğı sayəsində nail olunub. Ölkə Prezidentinin birbaşa təşəbbüsü və himayəsinin nəticəsidir ki, son illər Yasamal rayonunda mühüm obyektlərin inşası uğurla başa çatdırılıb. Çoxsaylı səhiyyə və təhsil müəssisələri, yollar, yol ötürücüləri, piyada keçidləri, parklar, infrastruktur obyektləri, dünya standartlarına cavab verən hotellər, yeni inzibati binalar istifadəyə verilib. Görülmüş bütün işlər rayon sakinlərində dövlətə inamı, dövlət başçısına etimadı daha da artırıb, ümummilli lider Heydər Əliyevin siyasi kursunun alternativsizliyini bir daha təsdiq edib.

Özünün tarixi ənənələri, milli mədəniyyət nümunələri, bəzi coğrafi özəllikləri ilə seçilən bu rayon həm də ziyalı, alim və tələbə kontingentinin sıx yaşadığı, işgüzar insanların məskunlaşdığı məkan kimi tanınır. Odur ki, özünəməxsus tarixi ənənələri zəngin olan Yasamal rayonu paytaxtın mühüm elm, o cümlədən iqtisadi mərkəzlərindən sayılır. Lakin bu rayon da müstəqilliyin bərpasının ilk illərində ciddi problemlərlə üzləşmişdi. Bütün respublikada olduğu kimi, Yasamalda da iri müəssisələr fəaliyyətini dayandırmaq məcburiyyətində qalmış, istehsal prosesi zəifləmiş, işsizliyin səviyyəsi dözülməz həddə çatmış, əhalinin sosial vəziyyəti pisləşmişdi. Rayonun sosial-mədəni infrastrukturu tamamilə yararsız hala düşmüş, ekoloji problemlərin kəskinləşməsi insanların sağlamlığı üçün ciddi təhlükəyə çevrilmişdi. Bütövlükdə respublikada hökm sürən sosial-iqtisadi tənəzzül prosesinin doğurduğu ciddi problemlər və depressiv ovqat Yasamalda da özünün kəskinliyi ilə duyulurdu.

1993-cü ildə respublikada hakimiyyətə qayıdan ulu öndər Heydər Əliyev bu rayonun da problemlərinə xüsusi diqqət və qayğı ilə yanaşdı. Yasamal rayonu tədricən iqtisadi potensialını bərpa etdi, əvvəlki şöhrətini özünə qaytardı. İnsanların rifahında, yaşayış tərzində əsaslı keyfiyyət dəyişiklikləri baş verdi. Son 10 ildə isə Azərbaycanın təkcə dövlət büdcəsinin gəlirlərinin deyil, ümumən valyuta ehtiyatlarının dinamik artımı Yasamal rayonunun da problemlərinin həllinə imkanlar yaratdı. Yasamaldakı real sosial-iqtisadi inkişaf əsla quru, cansız rəqəmlərdə deyil, rayon sakinlərinin gündəlik həyatında, məişətində, maddi rifah halında əksini tapır. Ötən 10 ildə Prezident İlham Əliyevin dəfələrlə Yasmal rayonunda olması, onun inkişaf perspektivləri ilə bağlı dəyərli tövsiyə və tapşırıqlarını verməsi görülən işlərini səmərəsini və keyfiyyətini artırıb.

Bu gün Yasamal paytaxtın əsas rayonlarından biri olduğundan daim diqqət mərkəzindədir. Eyni zamanda, mövcud potensialın səmərəli realizə edilməsi, rayonun malik olduğu əmək ehtiyatlarının və digər resursların konkret məqsədlərə yönəldilməsi, ən başlıcası, Azərbaycan Prezidentinin imzaladığı dövlət proqramlarından, fərman və sərəncamlarından irəli gələn vəzifələrin əzm və bacarıqla həyata keçirilməsi Yasamal rayonunun bugünkü uğurlarını şərtləndirən başlıca məqamlar sırasındadır. Rayonda həyata keçirilmiş çoxşaxəli tədbirlər sistemi həm kəmiyyət, həm də keyfiyyət göstəricilərinə görə miqyaslı, konkret və ünvanlıdır. Rayon rəhbərliyi üzərinə düşən məsuliyyəti düzgün dəyərləndirməklə fəaliyyətini dövlət başçısı İlham Əliyevin yeritdiyi çevik və səmərəli inkişaf strategiyasının mahiyyətinə uyğun qurmağa, idarəetmədə mütərəqqi prinsipləri tətbiq etməyə, qarşıda duran vəzifələri dəqiq müəyyənləşdirərək vaxtında icrasına nail olmağa çalışır.

Prezident İlham Əliyevin apardığı siyasətin mahiyyətinə uyğun olaraq ötən il rayonda qarşıya qoyulmuş başlıca vəzifələr əhalinin sosial rifah halının yaxşılaşdırılması, abadlıq-quruculuq işlərinin daha sürətlə və keyfiyyətlə aparılması, təhsil-səhiyyə müəssisələrinə diqqətin artırılması, xidmət və infrastruktur sahələrində işin müasir dövrün tələblərinə uyğunlaşdırılması, sahibkarların fəaliyyətinə mane olan süni əngəllərin aradan qaldırılması olub.

Hər bir ölkənin, şəhərin, qəsəbənin inkişafı makroiqtisadi göstəricilərdən daha aydın görünür. Bu mənada, Yasamal rayonunun sosial-iqtisadi nəticələrinə nəzər yetirək. Yasamal rayonunun sosial-iqtisadi həyatında son illər əldə olunan sürətli inkişaf 2012-ci ildə də davam etdirilib. Həm sosial, həm də iqtisadi sahələrdə yeni nailiyyətlər qazanılıb. Belə ki, ötən ilin yekunlarına əsasən rayon üzrə sənaye məhsulunun ümumi həcmi 198,5 milyon manat, nəqliyyat sektorunda xidmətlərin həcmi 1 milyard 577 milyon manat, rabitə xidmətlərinin həcmi 184 milyon manat, ümumi investisiyadan tikinti-quraşdırma işləri 570 milyon manat təşkil edib. Orta aylıq əməkhaqqı 6,9 faiz artaraq 488,5 manat olub. İl ərzində rayonda 4179 yeni iş yeri açılıb ki, onlardan 421-i yeni yaradılmış müəssisə və təşkilatlarda, 1139-u mövcud və bərpa olunmuş müəssisələrdə, 2619-u isə fiziki şəxslərdən ibarət olub.

Abadlıq-quruculuq işləri müasirliyi və çoxşaxəli olması ilə diqqət çəkir

Milli iqtisadi modeli, makroiqtisadi uğurları ilə dünyanın aparıcı maliyyə mərkəzlərinin diqqət mərkəzində olan, insan amilinin yüksəlişinə xidmət edən qlobal infrastruktur layihələrini inamla həyata keçirən, sosial məsələlərə geniş diqqət ayıran Azərbaycan, eyni zamanda, böyük tikinti meydanını xatırladır. Prezident İlham Əliyev xüsusən inzibati mərkəz statusu daşıyan Bakının Şərq və Qərb arxitekturasının uğurlu sintezi əsasında yenidən qurularaq modern Avropa şəhərinə çevrilməsi üçün müəyyənləşdirdiyi kompleks tədbirlərin icrasını gündəlik nəzarətdə saxlayır. Özünün gündən-günə gözəlləşən siması ilə Yasamal rayonu da paytaxtın müasir görkəminə böyük töhfələr verir.

Qeyd etdiyimiz kimi, Yasamal rayonu Bakının mərkəzi və əsas rayonlarından biridir. Azərbaycan Respublikasının bir çox strateji ünvanları, nazirliklər, nüfuzlu ali təhsil ocaqları, Azərbaycan Milli Elmlər Akademiyası və bir çox aparıcı elmi-tədqiqat institutları, Bakımetropoliten idarəsi və sair dövlət idarələri bu rayonda yerləşir. Yasamal rayonu ərazisində çoxlu istirahət və gəzinti parkları, tarixi şəxsiyyətlərin abidələri var. Odur ki, Yasamal rayonunda abadlıq və quruculuq işləri hər zaman diqqət mərkəzindədir.

Son dövrlər rayonun inkişafında keyfiyyətcə yeni mərhələ başlayıb və həyata keçirilən tikinti-abadlıq, quruculuq işləri özünün sistemliliyi, qlobal miqyası, müasirliyi ilə diqqət çəkir. Cəmi 10 il əvvəllə müqayisədə Yasamal rayonu tanınmaz dərəcədə müasirləşib, yeniləşib. Ümumiyyətlə, Azərbaycanın müxtəlif guşələrində müşahidə olunan abadlıq, tərəqqi və yüksəliş Yasamal rayonunda da qabarıq görünür. Ölkə başçısı rayonda aparılan işlərə xüsusi əhəmiyyət verir, mütəmadi olaraq aparılan işlərin gedişi ilə maraqlanır, açılış mərasimlərində şəxsən iştirak edir. Təkcə ötən il Prezident İlham Əliyev 9 dəfə Yasamal rayonunda olub.

İndi bura yolu düşənlər rayondakı genişmiqyaslı abadlıq və quruculuq, yenidənqurma işlərinə heyrətlərini gizlədə bilmirlər. Ən müasir şəhərlərə xas arxitektura əsasında abadlaşdırılan rayonun əksər küçə, meydan, park və xiyabanlarında, sosial-mədəni, inzibati obyektlərində, o cümlədən çoxsaylı yaşayış binalarında aparılan təmir və yenidənqurma işləri həqiqətən göz oxşayır. İlk baxışdan aydın görünür ki, görülən işlər kampaniyaçılıqdan, kosmetik dəyişikliklərdən tamamilə uzaq olub rayonun uzun illərdən bəri həllini gözləyən problem və qayğılarının kompleks həlli məqsədinə hesablanıb.

Qeyd edək ki, Bakı şəhərində abadlıq və quruculuq işlərinin sistemli şəkildə aparılmasında Prezident İlham Əliyevin 4 may 2011-ci il tarixli sərəncamı ilə təsdiq etdiyi "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı" xüsusi rol oynayır. Ölkə başçısının sədrliyi ilə 2012-ci ilin mayında Bakı Şəhər İcra Hakimiyyətində dövlət proqramının icra vəziyyəti müzakirə olunmuş və Prezident tərəfindən dövlət proqramına əlavə və dəyişikliklər edilməsi barədə müvafiq sərəncam imzalanıb. Ölkə başçısının sərəncamı ilə təsdiq olunmuş əlavələrdə Yasamal Rayon İcra Hakimiyyəti tərəfindən qaldırılan məsələlərin əksəriyyəti öz əksini tapıb.

Proqramda Bakı şəhərinin və ətraf qəsəbələrin problemlərinin həllini önə çəkən məqsədyönlü və ardıcıl tədbirlər sistemi paytaxtın qədim tarixi ənənələrə, mədəni-mənəvi irsə malik rayonlarından olan Yasamalın da simasını əsaslı şəkildə dəyişib. Xüsusi vurğulamaq lazımdır ki, dövlət başçısı İlham Əliyev proqram çərçivəsində müxtəlif obyektlərin açılış mərasimlərində iştirak etmək üçün, qeyd etdiyimiz kimi, dəfələrlə Yasamala gəlib, bu diqqət və qayğı rayonun dinamik inkişafına, uzun illərdən bəri yığılıb qalmış bəzi problemlərin həllinə əsaslı təkan verib. Ən əsası, bu səfərlərin hər biri Yasamal sakinlərinin həyatında müsbət irəliləyişlərə səbəb olub, onların yaddaşında xoş izlər buraxıb.

Bütövlükdə dövlət proqramının icra olunması rayonun yol təsərrüfatı, abadlıq və yaşıllaşdırma sahələrində öz müsbət nəticələrini göstərməkdədir. Proqrama rayonla bağlı salınmış 53 bəndin 25-i tamamilə icra olunub, 14 bənd icra olunmaqdadır. Qalan tədbirlərin icrası isə bu il nəzərdə tutulub.

Aparılan abadlıq və quruculuq işlərinə gəldikdə qeyd etmək lazımdır ki, ötən il rayon icra hakimiyyəti tərəfindən İnşaatçılar prospektində sahəsi 3500 kv.m olan ərazidə yeni park salınıb. Ulu öndər Heydər Əliyevin anadan olmasının 89-cü ildönümündə istifadəyə verilən parkın açılışında Prezident İlham Əliyev iştirak edib. 2012-ci ildə rayonun Mikayıl Müşfiq küçəsi boyunca Mətbuat prospektindən "Kempenski-Badamdar" hotelinə qədər olan ərazidə genişmiqyaslı abadlıq işləri də görülüb. Mətbuat prospekti 501-ci məhəllədə 3000 kv.m sahədə yeni yaşıllıq zolağı və istirahət parkı salınıb. 5 yaşayış məhəlləsində - Mətbuat prospekti 29, Şərifzadə küçəsi 75A, Talıblı küçəsi 32, H.Cavid prospekti 91 və Şəfahət Mehdiyev 97 və 94 saylı evlərin qarşısındakı məhəllələrdə genişmiqyaslı abadlıq işləri aparılaraq nümunəvi həyətlər yaradılıb. Sonuncu məhəllədə uşaqların asudə vaxtının səmərəli keçirilməsi məqsədilə mini-futbol meydançası tikilib istifadəyə verilib. Rayon ərazisində 6 yaşayış binasının fasadında yenidənqurma və bərpa işləri görülüb.

Yasamal rayonunda şəhərin ümumi görkəminə xələl gətirən köhnə dam örtüklərinin, o cümlədən binadaxili su, istilik və kanalizasiya xətlərinin dəyişdirilməsi, yenisi ilə əvəz olunması da diqqət mərkəzindədir. Belə ki, ötən il 180 yaşayış binasında 16100 kv.m müxtəlif örtüklü dam örtüyü, 57 yaşayış binasında 3510 p/m. aşağı paylayıcı istilik xətləri dəyişdirilib. İl ərzində 432 min kubmetr məişət, 40320 kubmetr isə süpürüntü və digər tullantılar Balaxanı zibilxanasına daşınaraq zərərsizləşdirilib. Magistral yollara 456 min kv.m məhəllədaxili yollara isə 115 min kv.m asfalt örtüyü salınıb. Rayonun Zərdabi, Şərifzadə küçələri tamamilə yenidən qurulmuş, müasir işıqlandırma sistemi tətbiq edilib. 24 ədəd müxtəlif təyinatlı qeyri-qanuni tikili, 6 ünvanda zəbt olunmuş torpaq sahəsi ətrafına çəkilmiş hasarlar sökülüb.

Təhsil və səhiyyə infrastrukturu müasirləşir

Ötən il Azərbaycan Prezidenti İlham Əliyevin və Heydər Əliyev Fondunun Prezidenti, Milli Məclisin deputatı, UNESCO-nun və İSESCO-nun xoşməramlı səfiri Mehriban xanım Əliyevanın təhsil və səhiyyəyə diqqət və qayğıları sayəsində ölkənin bütün bölgələrində olduğu kimi, Yasamal rayonunun orta ümumtəhsil məktəblərinin, məktəbəqədər uşaq və səhiyyə müəssisələrinin maddi-texniki bazalarının möhkəmləndirilməsi istiqamətində saysız- hesabsız işlər görülüb.

"2011-2013-cü illərdə Bakı şəhərinin və onun qəsəbələrinin sosial-iqtisadi inkişafının Dövlət Proqramı"na əsasən Yasamal rayonunda 11 məktəbin, 21 məktəbəqədər uşaq müəssisəsinin əsaslı təmiri, yenidən qurulması və Yeni Yasamal yaşayış massivində məktəbəqədər uşaq müəssisəsinin tikintisi nəzərdə tutulub. 2011-2012-ci illərdə 6 tam orta məktəb (150, 225, 21, 31, 38, 173 saylı məktəblər) dövlət proqramı, 13 nömrəli tam orta məktəb Heydər Əliyev Fondunun dəstəyi ilə əsaslı təmir olunub. Dövlət Proqramına əsasən, 16 uşaq bağçası da əsaslı təmir edilib. Prezident İlham Əliyev 150, 225, 21 və 173 nömrəli məktəblərdə aparılan əsaslı təmir işləri ilə şəxsən tanış olub. Dövlət başçısı 15 sentyabr "Bilik günü"ndə 18 nömrəli məktəbdə aparılmış əsaslı təmir və yenidənqurma işlərindən sonra açılışında da iştirak edib. Rayonda Azərbaycan-Avropa məktəbi də bu tədris ilindən fəaliyyətə başlayıb. Azərbaycanın birinci xanımı Mehriban Əliyeva və Heydər Əliyev Fondunun vitse-prezidenti Leyla xanım Əliyeva ötən ilin iyul ayında 27 və 325 nömrəli uşaq bağçalarının əsaslı təmirdən sonra açılışlarında iştirak ediblər.

Dövlət proqramının icrasının son ilində isə Yasamal rayonunda 4 məktəbin, 5 uşaq bağçasının əsaslı təmiri, 99 nömrəli uşaq bağçası üçün əlavə korpusun və Yeni Yasamal yaşayış massivində uşaq bağçasının tikintisi nəzərdə tutulub. Bununla da 2013-cü ilin sonunadək rayonda təmir olunmayan məktəb və bağça qalmayacaq.

Müasir dövrdə hər bir dövlətin qarşısında duran əsas vəzifələrdən biri də vətəndaşlar üçün keyfiyyətli və müasir səhiyyə xidməti təşkil etməkdir. Azərbaycan Prezidentinin son 9 ildə imzaladığı fərman və sərəncamların nəticəsi kimi, bu sahələrdə əldə olunmuş nailiyyətlər Bakının Yasamal rayonu üçün də səciyyəvidir. Paytaxtın digər rayonlarında olduğu kimi, burada da səhiyyə infrastrukturunun yeniləşdirilməsinə xüsusi qayğı göstərilir, bu sahədə problemlərin həlli üçün davamlı tədbirlər həyata keçirilir.

Xatırladaq ki, ötən illərdə rayonun səhiyyə müəssisələrinin əsaslı təmiri, yenidən qurulması və müasir tələblərə cavab verən tibbi avadanlıqlarla təchiz olunması istiqamətində xeyli iş görülüb. Respublika Uşaq Klinik Xəstəxanasının, Uşaq Nevroloji Xəstəxanasının, Respublika Diaqnostika Mərkəzinin, Əziz Əliyev adına Həkimləri Təkmilləşdirmə İnstitutunun, Topçubaşov adına Respublika Elmi Cərrahiyyə Mərkəzinin əsaslı təmiri, yenidən qurulması və ən müasir tibbi avadanlıqlarla təchiz olunaraq istifadəyə verilməsi bunun bariz nümunəsidir. Bu tibb ocaqlarının açılışlarında Prezident İlham Əliyev və ölkəmizin birinci xanımı Mehriban Əliyeva iştirak ediblər.

Həmin səhiyyə müəssisələrinin maddi texniki bazasının möhkəmləndirilməsi üçün daim iş görülür. Bu yaxınlarda isə 13 nömrəli uşaq poliklinikasında əsaslı təmir işləri başa çatıb. Müalicə profilaktika müəssisələri ilə birgə Yasamal Rayon İcra Hakimiyyəti də rayon əhalisinin sağlamlığını daim diqqət mərkəzində saxlayır. Güzəştli əhali qrupuna pulsuz dərman preparatlarının verilməsi istiqamətində müəyyən işlər görülür.

Vətəndaş müraciətinə həssas münasibət

Hər bir cəmiyyətin tərəqqisi ilə yanaşı, sosial həmrəyliyini təmin edən əsas şərtlərdən biri vətəndaşı düşündürən problemlərin vaxtında həll edilməsi, hər bir insanın dövlət strukturlarına olan müraciətlərinə çevik və ədalətli münasibətin ortaya qoyulmasıdır. Ələlxüsus söhbət sosial dövlətdən və sosial cəmiyyətdən gedirsə, burada vətəndaşı narahat edən məsələlərə daha diqqətlə yanaşılması olduqca vacibdir. Çünki məhz bu kimi məsələlərin kökündə insanların dövlət orqanlarına inamının və etimadının formalaşması dayanır.

Bu məsələlər Yasamal rayonunda da diqqət mərkəzindədir. Yasamal RİH-nin rəhbərliyi dinamik yüksəliş üçün bütün zəruri tədbirləri həyata keçirməklə, ölkədəki inkişaf prosesinə öz töhfəsini verməklə yanaşı, fəaliyyətinin digər zəruri istiqamətini məhz vətəndaş müraciətlərinin dinlənilməsinə, öyrənilməsinə, araşdırılmasına və problemlərin yoluna qoyulmasına yönəldir.

Əhalinin sosial-məişət problemlərinin öyrənilməsi və vaxtında həll edilməsi məqsədilə rayon rəhbərliyi, xidmət sahələrinin rəhbərlərinin iştirakı ilə yerlərdə 2012-ci il ərzində müxtəlif ünvanlarda 20 səyyar qəbul və görüşlər keçirib. Həmin görüş və qəbullarda 3500 nəfər sakin iştirak edib. Qəbullar zamanı edilən 185 müraciətdən hamısı öz həllini qısa müddətə tapıb. Müraciətlərin əksəriyyəti yaşayış binalarının, ümumi giriş sahələrinin, damların təmiri, küçə və məhəllədaxili yolların, həyətlərin asfaltlanması və abadlaşdırılması, elektrik enerjisi, istilik ilə təchizat, kanalizasiya xidməti və digər sosial-məişət və mənzil məsələləri ilə bağlı olub.

Ümumilikdə 2012-ci il ərzində Yasamal RİH-yə 2837 ərizə şikayət və təklif daxil olub. 2011-ci ildə bu rəqəm 3225 olub. Daxil olmuş 2743 müraciətdən 2687-nə baxılaraq 717 müraciət müsbət, 268-i qismən həll olunub, 920-nə müvafiq izahat verilib, 81 müraciət tabeli təşkilatlara göndərilib, 573 müraciət isə əsassız hesab edilib. Vətəndaşlardan daxil olmuş müraciətlər əsasən mənzil, təmir-tikinti, sahibkarlığın inkişafı, təhsil sahəsi və sairlə əlaqədar olub. Ötən il vətəndaşların qəbulu və müraciətləri ilə iş məsələləri icra hakimiyyəti başçısı aparatında müxtəlif müşavirələrdə 21 dəfə müzakirə edilib.

2012-ci ildə icra hakimiyyəti başçısının aparatında 3167 vətəndaş qəbul edilib. 410 nəfər isə icra hakimiyyəti başçısının qəbulunda olub. Vətəndaşların müraciətləri əsasən mənzil məsələsi, evlərin təmiri, abadlıq işlərinin aparılması, kommunal problemlərin həllinə kömək göstərilməsi ilə əlaqədar olub, bunların da böyük əksəriyyəti müsbət həllini tapıb.

Ümumiyyətlə, ötən illərdə olduğu kimi, 2012-ci ildə də Yasamal rayonunun sosial-iqtisadi inkişafı və genişmiqyaslı abadlıq-quruculuq işlərinin aparılması, əhaliyə göstərilən kommunal məişət xidmətlərinin səviyyəsinin daha da yaxşılaşdırılması istiqamətində əhəmiyyətli işlər görülüb. Bunun nəticəsidir ki, Yasamal rayonu surətlə abadlaşır və paytaxtımızın ən gözəl güşələrindən birinə çevrilir. Qeyd olunan faktlar isə ötən il rayonda aparılan genişmiqyaslı işlərin yalnız bir hissəsinin qısa xronikasıdır. Başqa sözlə desək, Yasamal rayonunun da hər bir sakini Prezident İlham Əliyevin rəhbərliyi altında qazanılan uğurların bəhrəsini öz gündəlik həyatında bariz şəkildə hiss edir, ölkədəki ümumi yüksəliş və tərəqqi xəttini ürəkdən dəstəkləyir. İndi qarşıda daha böyük vəzifələr dayanır və rayon ictimaiyyəti onların da öhdəsindən layiqincə gələcəyinə əmindir.

Rəşad CƏFƏRLİ

Azərbaycan.-2013.- 21 fevral.- S.3.