«Qarabağa doğru - Haqqın və haqqımızın səsi ilə» layihəsi çərçivəsində yürüş-mitinq keçirilmişdir

Dini Qurumlarla İş üzrə Dövlət Komitəsinin (DQİDK) təşəbbüsü, "Xocalıya ədalət!" beynəlxalq təbliğat-təşviqat kampaniyasının və "Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyinin (İB) dəstəyi ilə "Qarabağa doğru - Haqqın və haqqımızın səsi ilə" layihəsinin icrasına başlanılmışdır.

AzərTAc xəbər verir ki, bu məqsədlə Dini Qurumlarla İş üzrə Dövlət Komitəsi, "Dağlıq Qarabağ Bölgəsinin Azərbaycanlı İcması" İB-nin rəhbərliyi, ziyalılar, ictimaiyyət nümayəndələri və din xadimlərinin iştirakı ilə Ağdam rayonunun cəbhə xəttində yerləşən Çəmənli kəndində yürüş-mitinq keçirilmişdir.

Tədbir iştirakçıları əvvəlcə Ağdam rayonunun girişində "Şəhidlər" abidə kompleksini və Quzanlı qəsəbəsində ümummilli lider Heydər Əliyevin abidəsini ziyarət etmiş, önünə gül-çiçək düzmüşlər.

Çəmənli kəndindəki "Cümşüd" məscidində keçirilən mitinq-tədbirdə çıxış edən DQİDK-nın sədri Elşad İskəndərov bildirmişdir ki, Azərbaycanın ən böyük problemi Qarabağın işğal altında olmasıdır. 1993-cü ilə qədər Ağdam cümə məscidindən azan səslənirdi. O azanın sədaları altında qəhrəman Azərbaycan oğulları Vətənimizin müdafiəsinə gedirdilər və şəhid olurdular. O azan bizim ağrı-acılarımızın, həmçinin qəhrəmanlıqlarımızın şahididir. Bu gün işğal altında olan torpaqlarımızda ulularımızın məzarları, tarixi abidələrimiz və dini abidələrimiz də təcavüzə məruz qalmışdır. İllərdir ki, Qarabağ kimi müqəddəs bir diyardan azan səsi eşidilmir. Bugünkü təşəbbüsün də məqsədi odur ki, Ağdam cümə məscidində səsləndirilmiş o azanı cəbhə xəttində işğal altında olan torpaqlarımıza doğru səsləndirək. Bu azan Qarabağ işğaldan azad olunana qədər hər həftənin cümə günü ölkəmizin bütün məscidlərində səsləndiriləcəkdir.

"Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyinin sədri Bayram Səfərov, qarabağlı Seyid Camal, ilahiyyatçı alim Elşad Mahmudov və başqaları tədbirdə çıxış edərək "Qarabağa doğru - Haqqın və haqqımızın səsi ilə" layihəsini yüksək qiymətləndirmiş, işğal altında olan mənəvi dəyərlərimizin qorunması və tanıdılması istiqamətində atılan müsbət addım kimi dəyərləndirmişlər.

Sonra "Cümşüd" məscidinin minarəsindən vaxtilə Ağdam məscidindən verilən azan səsləndirilmiş, cümə namazı qılınmışdır.

Həmin gün Quzanlı qəsəbəsindəki mədəniyyət evində "Qazi azan - Haqqın və haqqımızın səsi" mövzusunda konfrans keçirilmişdir.

DQİDK-nın sədri Elşad İskəndərov, Ağdam, Ağcabədi və Xocavənd rayon icra hakimiyyətlərinin başçıları Nizami Sadıqov, Şahin Məmmədov, Eyvaz Hüseynov, "Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyinin Əlaqələndirmə Şurasının sədri Orxan Əkbərov konfransda çıxış edərək Ermənistanın respublikamıza qarşı həyata keçirdiyi qəsbkarlıq müharibəsindən, Qarabağda törədilən faciələrdən, münaqişənin mahiyyətinin, Ermənistan silahlı qüvvələri tərəfindən həyata keçirilən soyqırımlarının dünya ictimaiyyətinə çatdırılması istiqamətində Azərbaycan dövləti tərəfindən həyata keçirilən tədbirlərdən danışmışlar.

Çıxışlarda əminliklə vurğulanmışdır ki, Haqqın və haqqımızın səsi olan, vaxtilə Ağdam məscidindən səsləndirilən azan yenidən işğaldan azad edilmiş doğma Qarabağımızda səslənəcəkdir.

Konfransda Qarabağ müharibəsindən bəhs edən "Dolu" filmi göstərilmişdir.

Azərbaycan.-2013.- 23 fevral.- S.3.