«Xarici ölkələrin jurnalistikası tarixi» dərsliyinin təqdimatı olmuşdur

Fevralın 22-də Azərbaycan Mətbuat Şurasında (MŞ) Bakı Dövlət Universitetinin (BDU) jurnalistika fakültəsinin kafedra müdiri, professor Həmid Vəliyevin "Xarici ölkələrin jurnalistikası tarixi" kitabının təqdimatı olmuşdur.

AzərTAc xəbər verir ki, tədbirdə idarə heyətinin üzvləri, KİV rəhbərləri, ictimaiyyət nümayəndələri, BDU-nun müəllimləri və tələbələr iştirak etmişlər.

Mərasimdə Mətbuat Şurasının sədri Əflatun Amaşov ömrünün yarıdan çoxunu jurnalistika sahəsində elmi axtarışlara, tədqiqatlara həsr etmiş Həmid Vəliyevin yeni dərs vəsaiti barədə ətraflı məlumat vermişdir. Bildirmişdir ki, xarici ölkələrin jurnalistikası tarixi müasir jurnalistikanın ən mühüm və maraqlı sahələrindən biridir. Sahəyə dünyanın bütün inkişaf etmiş ölkələrində xüsusi önəm verilir, tədqiqatların nəticəsi olaraq elmi nəşrlər, tədris vəsaitləri hazırlanır.

Qeyd edilmişdir ki, Azərbaycanda xarici ölkələrin jurnalistikası tarixi fənni ölkəmizdə jurnalistikanın tədris olunduğu ilk illərdən proqrama daxil edilmişdir. Lakin buna baxmayaraq, ali məktəblərimizin müvafiq fakültələrində bu fənnə aid ana dilimizdə tədris vəsaitlərinin çatışmazlığı xarici dillərdə olan mənbələrə üz tutmaq zərurəti yaratmışdır. Bu mənada müəllifin Azərbaycan dilində yazılmış dərsliyi jurnalistika elmimizə yüksək xidmət nümunəsi hesab edilməlidir. Belə dərsliklərin yazılmasının o qədər də asan olmadığını vurğulayan Ə.Amaşov Təhsil Nazirliyinin müvafiq əmri ilə fənn proqramı kimi çap olunmuş vəsaitin "Xarici ölkələrin jurnalistikası tarixi" kursunun proqramları əsasında yazılmış ilk dərslik olduğunu söyləmişdir.

Sonra Həmid Vəliyevə Mətbuat Şurasının diplomu təqdim edilmişdir.

Tədbirdə MŞ idarə heyətinin üzvlərindən "İki sahil" qəzetinin baş redaktoru Vüqar Rəhimzadə, "Paralel" qəzetinin baş redaktoru Tapdıq Abbas, MŞ sədrinin müavini, Jurnalistlərin Həmkarlar İttifaqının sədri Müşfiq Ələsgərli, Bakı Dövlət Universitetinin Beynəlxalq jurnalistika kafedrasının müəllimi, tarix elmləri namizədi İlham Mazanlı, BDU-nun mətbuat və informasiya şöbəsinin müdiri Pərvanə İbrahimova və digərləri vəsaitin elmi məziyyətlərindən söz açmışlar.

Bildirilmişdir ki, yeni dərslik, ilk növbədə, ali məktəblərin jurnalistika və filologiya fakültələrinin tələbələri üçün nəzərdə tutulmuşdur. Vəsaitdən magistr, dissertant və doktorantlar, xarici ölkələrin jurnalistika tarixini tədris edən müəllimlər faydalana bilərlər. Elmi redaktorları filologiya elmləri doktoru, professor Nəsir Əhmədli və filologiya elmləri namizədi, dosent Vüqar Əliyev olan dərslikdə qədim dövrdən XX əsrin sonlarınadək keçən müddətdə dünya jurnalistikası tarixindən xronoloji ardıcıllıqla bəhs edilmiş, kütləvi informasiya vasitələrinin (KİV) tipoloji inkişafı prosesi nəzərdən keçirilmiş, müxtəlif ölkələrin və xalqların sosial, qarşılıqlı mədəni fəaliyyətinin xüsusiyyətləri, ümumi inkişaf meyilləri göstərilmişdir.

Çıxışçılar çoxillik axtarışlarının bəhrəsi olan nəşrin müəllifinə elmi axtarışlarında uğurlar arzulamışlar.

Sonda Həmid Vəliyev çıxış edərək tədbirin təşkilatçılarına və iştirakçılara minnətdarlığını bildirmişdir.

Azərbaycan.-2013.- 23 fevral.- S.8.