Azərbaycan Respublikasının müdafiə naziri NATO-nun Mənzil Qərargahında
keçirilən iclasda iştirak etmişdir
Azərbaycan
Respublikasının NATO yanında Nümayəndəliyindən
AzərTAc-a verilən məlumata görə, fevralın 22-də
Azərbaycan Respublikasının müdafiə naziri,
general-polkovnik Səfər Əbiyev Əfqanıstanda Beynəlxalq
Təhlükəsizliyə Yardım Qüvvələrinə
(ISAF) töhfə verən dövlətlərin müdafiə
nazirlərinin Brüsseldə NATO-nun Mənzil Qərargahında
keçirilən iclasında iştirak etmişdir.
İclasda
ISAF əməliyyatının cari vəziyyəti və
NATO-nun Əfqanıstanda 2014-cü ildən sonrakı yeni
missiyası müzakirə olunmuşdur. Qeyd edilmişdir ki,
ölkədə keçid prosesi qaydasında gedir və Əfqan
milli təhlükəsizlik qüvvələrinin
döyüş bacarığı artır. Əfqan milli təhlükəsizlik
qüvvələri bir neçə aydan sonra ölkə
üzrə əsas, 2014-cü ilin sonunadək isə tam təhlükəsizlik
məsuliyyətini öz üzərinə götürmək əzmindədir.
2015-ci ildən NATO Əfqanıstanda ISAF-dan həcmcə xeyli
kiçik olan yeni qeyri-döyüş xarakterli, təlim, dəstək
və yardım missiyasına rəhbərlik edəcəkdir.
ISAF yüklərinin Əfqanıstandan geriyə
daşınması gündəlikdə duran prioritet məsələlərdən
biridir.
Brüsselə
səfəri çərçivəsində general-polkovnik Səfər
Əbiyev bir sıra dövlətlərin müdafiə nazirləri
ilə görüşmüş və
qarşılıqlı maraq doğuran məsələlər
ətrafında fikir mübadiləsi aparmışdır.
Qeyd
etmək lazımdır ki, Azərbaycan NATO-nun Əfqanıstanda
2014-cü ildən sonrakı yeni missiyası üzrə
potensial əməliyyat tərəfdaşı kimi
tanınmışdır. Həmçinin Əfqanıstandan
geriyə daşınma üzrə əsas tranzit xətlərindən
biri olan Mərkəz Tranzit yolu Azərbaycan ərazisindən
keçir. Əməliyyata hərbi dəstəklə
yanaşı, Azərbaycan Əfqanıstana müxtəlif sahələrdə
təlim, maliyyə və digər dəstək göstərir.
Vüqar SEYİDOV,
AzərTAc-ın xüsusi
müxbiri
Brüssel
Azərbaycan.-2013.- 24 fevral.- S.3.