Yekaterinburqda Xocalı qurbanlarının xatirəsi yad edilmişdir

Fevralın 25-də Yekaterinburqda Ümumrusiya Azərbaycan Konqresinin "Azərbaycan" Sverdlovsk vilayət ictimai təşkilatının təşəbbüsü ilə Xocalı soyqırımının 21-ci ildönümü ilə əlaqədar "Xocalıya ədalət" konfransı keçirilmişdir. Tədbirdə Xocalı qurbanlarının xatirəsi bir dəqiqəlik sükutla yad edilmişdir. Sonra Xocalı hadisələri haqqında film nümayiş etdirilmişdir.

Tədbiri "Azərbaycan" Sverdlovsk vilayət ictimai təşkilatının sədri Şahin Şıxlı açaraq 21 il əvvəl Azərbaycanın Xocalı şəhərində erməni quldurları tərəfindən törədilmiş qanlı hadisələr barədə ətraflı məlumat vermişdir. Bildirilmişdir ki, Azərbaycan xalqına qarşı törədilmiş bu faciə XX əsrin ən qanlı hadisələrindən biridir. Erməni quldur dəstələrinin Xocalı şəhərinə basqını nəticəsində 613 nəfər, o cümlədən 106 qadın, 63 uşaq, 70 qoca öldürülmüş, 1000 nəfər müxtəlif yaşlı dinc sakin aldığı güllə yarasından əlil olmuş, 8 ailə tamamilə məhv edilmiş, 25 uşaq hər iki valideynini, 130 uşaq isə valideynlərindən birini itirmişdir. Faciə baş verən gecə 1275 nəfər dinc sakin girov götürülmüş, onların 150-sinin taleyi indiyədək məlum deyildir.

Konfransda Azərbaycanın Yekaterinburqdakı baş konsulu Sultan Qasımov, Heydər Əliyev Fondunun Rusiya nümayəndəliyinin təmsilçisi Natiq Əliyev, Sverdlovsk vilayəti insan hüquqları üzrə vəkili Tatyana Merzlyakova, Avropa İttifaqı İnformasiya Mərkəzinin direktoru, Ural Federal Universitetinin professoru Aleksandr Nesterev çıxış edərək faciə qurbanlarının xatirəsini yad etmiş, Xocalı hadisələrinə dünyada düzgün qiymət verilməsinin vacibliyini vurğulamışlar.

Konfransda Sverdlovsk vilayəti ictimaiyyətinin nümayəndələri, Yakutiya, Gürcüstan, Tacikistan, Dağıstan, Başqırdıstan diaspor təşkilatlarının rəhbərləri, Rusiya Azərbaycanlı Gənclər Birliyi Sverdlovsk bölməsinin üzvləri iştirak etmişlər.

Fəridə ABDULLAYEVA,

AzərTAc-ın xüsusi müxbiri

Moskva

Azərbaycan.-2013.- 27 fevral.- S.6.