Azərbaycan ilə Gürcüstan arasında əlaqələr strateji tərəfdaşlıq səviyyəsinə çatmışdır

Azərbaycana rəsmi səfəri çərçivəsində Gürcüstan Prezidenti Mixeil Saakaşvili fevralın 27-də Milli Məclisdə olmuşdur.

Milli Məclisin Sədri Oqtay Əsədov qonağı salamlayaraq demişdir ki, Azərbaycan ilə Gürcüstan arasında əlaqələr sürətlə inkişaf edərək strateji tərəfdaşlıq səviyyəsinə çatmışdır. Ölkələrimiz arasında münasibətlərin bütün sahələrdə inkişaf etdiyini bildirən O.Əsədov yüksək səviyyəli qarşılıqlı səfərlərin əlaqələrimizin daha da genişlənməsi üçün yeni imkanlar açdığını diqqətə çatdırmışdır.

Azərbaycana səfərlərini məmnunluqla xatırlayan Mixeil Saakaşvili bu səfərlərin əlaqələrimizin inkişafına impuls yaratdığını demişdir. Gürcüstanın Azərbaycan ilə əlaqələrin bütün sahələrdə inkişaf etdirilməsində maraqlı olduğunu bildirən Prezident Mixeil Saakaşvili bu sahədə parlamentlərin rolunu xüsusi qeyd etmişdir.

Görüşdə ölkələrimizin bir çox irimiqyaslı layihələrdə birgə iştirak etdiyi də diqqətə çatdırılmışdır.

AzərTAc

Azərbaycan.-2013.- 28 fevral.- S.3.