Azərbaycan Milli İncəsənət Muzeyinin ekspozisiyasının xüsusi təqdimatı keçirilmişdir

Azərbaycan Respublikası Prezidentinin 2007-ci il 24 avqust tarixli sərəncamına əsasən, hər il iyulun 9-u ölkəmizdə diplomatik xidmət orqanları əməkdaşlarının peşə bayramı günü kimi qeyd edilir.

AzərTAc xəbər verir ki, bununla əlaqədar Azərbaycan Respublikasının Mədəniyyət və Turizm və Xarici İşlər nazirliklərinin və Azərbaycan Milli İncəsənət Muzeyinin birgə təşkilatçılığı, "Səba" ticarət markası və "Artişok" şirkətinin dəstəyi ilə iyulun 5-də Azərbaycanda akkreditə olunmuş diplomatik korpusun əməkdaşları üçün Milli İncəsənət Muzeyinin ekspozisiyasının xüsusi təqdimatı keçirilmişdir .

Tədbirdə muzeyin direktoru Çingiz Fərzəliyev çıxış edərək sərginin mühüm əhəmiyyət daşıdığını söyləmişdir.

Son illərdə ölkəmizdə müasir muzeylərin inşa olunmasını xüsusi qeyd edən Mədəniyyət və Turizm Nazirliyinin şöbə müdiri Fikrət Babayev bildirmişdir ki, bu mədəniyyət ocaqlarında Azərbaycan xalqına məxsus qədim və müasir sənət nümunələri qorunub saxlanılır.

Bildirilmişdir ki, qonaqlar muzeydə nümayiş olunan, Qərbi Avropa, rus və Azərbaycan incəsənətinin müxtəlif dövrlərini əks etdirən təsviri və tətbiqi sənət nümunələri, eyni zamanda, Azərbaycan xalqının ümummilli liderinin 90 illik yubileyinə həsr olunmuş "Heydər Əliyev və sənət müasirləri" mövzusunda sərgi ilə tanış olacaqlar.

Bir neçə gündən sonra Azərbaycan diplomatlarının öz peşə bayramlarını qeyd edəcəyini diqqətə çatdıran UNESCO üzrə Azərbaycan Respublikasının Milli Komissiyasının birinci katibi Günay Əfəndiyeva vurğulamışdır ki, diplomatiya da incə sənətdir. Diplomatlar da incəsənət sahəsində çalışan insanlar kimi, öz peşələrinə son dərəcə ciddi, məsuliyyətlə, ehtiyatla yanaşırlar. Onlar da sənət adamları kimi xalqlar arasında dostluq əlaqələrinin möhkəmlənməsi naminə fəaliyyət göstərirlər.

Son illər Azərbaycan diplomatiyasının qazandığı uğurlara toxunan G.Əfəndiyeva bildirmişdir ki, bu gün onların üzərinə daha böyük vəzifələr düşür. Diplomatlarımız öz vəzifə borclarını dərindən dərk edir və Azərbaycanın haqq işinin dünyada tanıdılması istiqamətində yorulmadan fəaliyyət göstərirlər.

Təmsil etdiyi qurumun gördüyü işlərdən söz açan G.Əfəndiyeva demişdir ki, UNESCO-nun əsas hədəflərindən biri mədəniyyətlərarası dialoq vasitəsilə davamlı sülhə nail olmaq, dünyada tolerant bir cəmiyyət yaratmaqdır. Ölkəmizdə ayrı-ayrı etiqad və inanclara malik etnosların min illərlə əmin-amanlıq şəraitində yaşamasında, etnik mədəni müxtəlifliyin günümüzədək qorunub saxlanmasında Azərbaycan xalqına xas olan humanizm və çoxmillətlilik dəyərlərin müstəsna rolu vardır.

Sonda Azərbaycanda fəaliyyət göstərən diplomatik korpusun nümayəndələri sərgi ilə yaxından tanış olmuşlar.

Azərbaycan.-2013.- 6 iyul.- S.8.