Ermənistanın işğalçı dövlət olması elə bu ölkənin parlamentində rəsmən bəyan edildi

Ermənilər tərəfindən törədilən vəhşiliklər beynəlxalq ictimaiyyət tərəfindən artıq Ermənistanın özündə də açıq ifadə olunur

Azərbaycanın uğurla reallaşdırdığı hücumçu diplomatiya nəticəsində dünya ictimaiyyəti Ermənistanın işğalçı siyasətini qəbul etməklə yanaşı, onun nəticələrinin aradan qaldırılmasını da əsas tələblərdən biri kimi irəli sürməyə başlayıb. Eyni zamanda işğal zamanı ermənilər tərəfindən törədilən vəhşiliklər beynəlxalq ictimaiyyət tərəfindən təkcə dünyanın müxtəlif ölkələrində yox, artıq Ermənistanın özündə də açıq ifadə olunur.

Moldovalı hüquqşünas Aureliya Qriqoriunun Ermənistan parlamentində keçirilən tədbirdə məruzəsi zamanı dediyi fikirlər də bunu təsdiq edir. O, açıq bəyan edib ki, Xocalıda soyqırımını ermənilər törədib: "Xocalıda baş verən soyqırımını ermənilər törədib və bu, beynəlxalq səviyyədə qəbul edilmiş faktdır. Ermənistan Azərbaycan torpaqlarının 20 faizini işğal edib və azərbaycanlılara münasibətdə soyqırımı həyata keçirib".

Qeyd edək ki, bu olay Ermənistan parlamentində keçirilən Ümumavropa Konfransının gedişində baş verib. Aureliya Qriqoriu "Dondurulmuş münaqişə zonalarında insan haqlarının qorunması" mövzusunda məruzə ilə çıxış edib. Xanım Qriqoriu "Ermənistan Azərbaycan torpaqlarının 20 faizini işğal edib və azərbaycanlılara münasibətdə soyqırımı həyata keçirib" ifadəsini səsləndirərkən zalda olan bəzi iştirakçılar onu alqışlayıb.

Ermənistan parlamentinin vitse-spikeri Ermine Naqdalyan isə bildirib ki, Ermənistan parlamentinin tribunasından sifarişləri yerinə yetirmək üçün istifadə etmək lazım deyil: "Mən bilmirəm siz kimin sifarişini yerinə yetirirsiniz, amma öz çıxışınızı yazaraq sifarişçilərə göstərə bilərsiniz. Düşünürəm ki, yüksək səviyyəli qonaqlar elmi konfransda yolverilməz müzakirələr üçün istifadəyə etiraz etməlidirlər". Aureliya Qriqoriu buna cavab olaraq deyib ki, münaqişənin təfərrüatlarına varmaq fikrində deyil: "Yalnız onu deyə bilərəm ki, dondurulmuş münaqişə zonalarında insan haqlarının pozulması yolverilməzdir".

Bu bir daha göstərir ki, beynəlxalq ictimaiyyətin nümayəndələri Xocalı soyqırımını tanıyır və bunu Ermənistan qanunverici orqanında səsləndirməkdən də çəkinmirlər. Hazırda isə ölkəmizin həyata keçirdiyi uğurlu diplomatiya sayəsində Xocalı soyqırımının dünya dövlətləri tərəfindən tanınması prosesi davam edir. Məsələn, elə ötən ay Peru parlamenti də bu istiqamətdə addım atıb. Belə ki, Latın Amerikasının həmin ölkəsinin qanunverici orqanı Xocalı soyqırımı ilə bağlı məsələni müzakirə edərək qərar verib. Qərarda deyilir ki, 1992-ci ilin fevral ayının 25-dən 26-na keçən gecə Azərbaycanın Xocalı şəhərində azərbaycanlılara qarşı dəhşətli qətliam baş verib: "Qətliam nəticəsində qadın və uşaqların da daxil olduğu 613 insan öldürülüb, 1275 nəfər girov götürülüb, 150 nəfər itkin düşüb, 76-sı azyaşlı olmaqla 487 nəfər əlil edilib, 26 uşağın hər iki, 130 uşağın isə azı bir valideyni qətlə yetirilib. Soyqırımı kimi qiymətləndirilən və tam şəkildə planlaşdırılmış bu hücumun ardınca Dağlıq Qarabağ və ətrafdakı 7 rayon Ermənistan silahlı qüvvələri tərəfindən işğal olunub". Qəbul olunmuş qərarda münaqişə nəticəsində Azərbaycan Respublikasına on milyardlarla dollar ziyanın dəyməsi də öz əksini tapıb.

Beləliklə, Xocalı soyqırımını tanıyan ölkələrin sayı artır. Bundan əvvəl Pakistan, Meksika, Kolumbiya və bir sıra digər ölkələrin parlamentləri də analoji addım atıb. Hətta ABŞ-ın bir neçə ştatı da Xocalı qətliamı ilə bağlı qətnamələr qəbul edib. Artıq dünya ictimaiyyəti açıq bildirir ki, Xocalı faciəsi bütün azərbaycanlıların dərdidir, törədilən vəhşiliksə bəşəriyyətə qarşı yönələn ağır cinayətdir. Beynəxlaq birlik getdikcə daha kəskin şəkildə Ermənistanın təcavüzü, onun işğalçılıq siyasətini, Azərbaycan xalqına qarşı törətdiyi vəhşilik barədə daha sərt mövqe sərgiləyir. Təbii ki, bütün bunlar həm də Azərbaycan diplomatiyasının uğurudur.

Elçin CƏFƏROV

Azərbaycan.-2013.- 6 iyul.- S.9.