Dövlət Gömrük Komitəsinin sədri Aydın Əliyev Sumqayıtda şimal bölgəsindən olan vətəndaşları qəbul etmişdir

Dövlət başçısı İlham Əliyevin göstəriş və tövsiyələrinə əsasən, vətəndaşların yerlərdə qəbulu üzrə təsdiq edilmiş cədvələ uyğun olaraq iyulun 5-də Dövlət Gömrük Komitəsinin sədri, gömrük xidməti general-leytenantı Aydın Əliyev Sumqayıt şəhərində şimal bölgəsindən olan vətəndaşları qəbul etmişdir. Sumqayıt Baş Gömrük İdarəsinin konfrans zalında keçirilən qəbulda əsasən Abşeron, Qobustan, Şabran və Siyəzən rayonlarında fəaliyyət göstərən şirkətlərin nümayəndələri iştirak etmişlər.

AzərTAc xəbər verir ki, qəbul üçün müraciət edənlərin rahatlığının təmin olunması məqsədilə əvvəlcədən qeydiyyat aparılmışdır. Komitənin müvafiq qurumlarının rəhbərlərinin də iştirak etdikləri qəbulda müxtəlif spektrli müraciətlərə baxılmışdır. Müraciətlərin bir qismi yerindəcə həllini tapmışdır. Komitənin səlahiyyətlərinə aid olmayan müraciətlər isə müvafiq qurumlara çatdırılmaq üçün qeydiyyata alınmışdır.

A. Əliyev qəbul zamanı şəhərdə fəaliyyət göstərən müəssisə və şirkətlərin nümayəndələrinin, sumqayıtlı sahibkarların gömrük prosesinin daha səmərəli təşkili istiqamətində təkliflərini də dinləmişdir. Komitə sədri tərəfindən "Azərkimya" İstehsalat Birliyi və "Azqlas" şirkətinin idxal etdikləri yüklərin gömrük rəsmiləşdirilməsi ilə bağlı yaranan problemlərlə əlaqədar struktur bölmələrinin rəislərinə müvafiq tapşırıqlar verilmişdir.

Bundan başqa, şirkət nümayəndələrinə idxal etdikləri yüklərin rəsmiləşdirilməsi üçün gömrük ödənişlərinin ödənilməsində möhlət verilməsi və bu kimi digər məsələlərlə bağlı müvafiq qanunvericiliyin tələbləri izah olunmuşdur.

Azərbaycan.-2013.- 6 iyul.- S.10.