«Şahdağ» Qış-Yay Turizm Kompleksi və Andorranın

«PGI Management» şirkəti arasında saziş imzalanmışdır

 

İyulun 9-da Azərbaycanın "Şahdağ" Qış-Yay Turizm Kompleksi və Andorranın "PGI Management" şirkəti arasında saziş imzalanmışdır.

Mədəniyyət və Turizm Nazirliyinin mətbuat xidmətindən AzərTAc-a bildirmişlər ki, sənədi "Şahdağ" Qış-Yay Turizm Kompleksinin direktoru Emin Həşimov və "PGI Management"in prezidenti Con Viladomat imzalamışlar.

 Sazişə əsasən, "Şahdağ" Qış-Yay Turizm Kompleksinin ərazisindəki "Zirvə", "Gaya Residence" və "Shahdag Hotel&SPA" mehmanxanalarının idarəçiliyi 3 il müddətinə "PGI Management" şirkətinə verilmişdir.

1955-ci ildən fəaliyyət göstərən "PGI Management" şirkəti Andorranın ən böyük turizm operatoru və turizm kurortlarının sahibidir. Şirkət ildə 5 milyon turistə xidmət göstərir. Portuqaliya, İspaniya, Rusiya və digər ölkələrdə mehmanxana biznesinə malikdir.

"PGI Management" şirkəti 2012-ci ilin noyabrından 2013-cü ilin martında qış mövsümü başa çatanadək "Şahdağ" Qış-Yay Turizm Kompleksində texniki xidmətlərə rəhbərliyi həyata keçirmişdir. Ötən mövsüm Andorra şirkəti əməkdaşlarının süni qaryağdırma sistemlərinin, kanat yollarının idarəsi, dağ-xilasetmə xidməti və yerli mütəxəssislərin hazırlanması sahəsində yüksək peşəkarlıq səviyyəsini sübut etmişdir. Bununla bağlı "PGI Management" şirkətinin kompleksdə fəaliyyətinin genişləndirilməsi barədə qərar qəbul olunmuşdur.

 

 

Azərbaycan.-2013.- 10 iyul.- S.2.