Ağdamda yeni arxeoloji
materiallar aşkar edilmişdir
Ağdam rayonunun cəbhə xəttində yerləşən
Mirəşelli kəndi
yaxınlığındakı "Palıdlı" nekropolunda
aparılan arxeoloji qazıntı zamanı yeni materiallar aşkarlanmışdır.
Azərbaycan Milli Elmlər Akademiyası Arxeologiya və Etnoqrafiya İnstitutunun Qarabağ ekspedisiyasının rəhbəri,
professor Hidayət Cəfərov
bildirmişdir ki,
"Palıdlı" nekropolunda
eramızdan əvvəl
XII-XI əsrlərə aid torpaq
qəbir aşkar edilmişdir. Heç bir yerüstü
əlamətə malik
olmayan qəbir yeniyetməyə məxsusdur.
Ölü sağ yanı üstə bükülü vəziyyətdə,
başı qərbə,
ayaqları şərqə
tərəf dəfn olunmuşdur. Ətrafında
müxtəlif tip keramika
nümunələri - küplər
və cam aşkar edilmişdir. Qoşa qulplu küpün
və camın üzəri çıxıntılı,
həmçinin çərtmə
üsulu ilə, həndəsi naxışlarla
örtülüdür. Professor Hidayət Cəfərov diqqətə
çatdırmışdır ki, "Palıdlı"
nekropolunda tədqiqatlar
2009-cu ildən başlanmış,
20-dək qəbir açılmışdır.
Eramızdan əvvəl
XII-XI əsrlərə aid torpaq
qəbirlərdə çoxlu
miqdarda saxsı qablar, küplər, sərnic, bardaq, cam, nehrə, bəzək əşyaları (qolbaqlar,
üzüklər, sırğalar,
mindən artıq əqiq, Misir pastası, şüşə
və tuncdan muncuqlar) aşkar edilmişdir. Ölülər
sol və ya sağ yanı üstə bükülü
vəziyyətdə dəfn
olunmuşlar. Tapıntılar nekropolda müxtəlif sosial təbəqədən
olan insanların dəfn edildiyini göstərir.
Xocalı-Gədəbəy mədəniyyətinə aid bu
tapıntılar qazıntı
aparılan ərazidə
son tunc və ilk dəmir dövründə
davamlı yaşayış
olduğunu, sənətkarlığın
müxtəlif sahələrinin
inkişafını təsdiqləyir. Bu materiallar ermənilərin
ərazi iddialarının
əsassız olduğunu,
Qarabağın aran və dağlıq ərazilərində tarixən
eyni mədəniyyətin
daşıyıcılarının yaşadıqlarını bir
daha təsdiq edir. Bu arxeoloji
qazıntılar həm
qədim tariximizin öyrənilməsi, həm
də Qarabağ tarixini özününküləşdirməyə
çalışan ermənilərə
cavab baxımından əhəmiyyətlidir.
"Palıdlı" nekropolunda tədqiqatlar davam edir.
AzərTAc
Azərbaycan.-2013.- 30 iyul.- S.7.