Heydər Əliyev Fondunun
vitse-prezidenti Leyla
xanım Əliyevanın təşəbbüsü
ilə bir qrup uşaq Moskvada Kremlin Kilsə meydanında
olmuşdur
Heydər
Əliyev Fondunun vitse-prezidenti Leyla xanım Əliyevanın təşəbbüsü
ilə Beynəlxalq Uşaqları Müdafiə Günü
Moskvada Kərim Kərimov adına 157 nömrəli Azərbaycan
etnomədəni komponentli məktəbin şagirdləri,
Xilaskar İsa Məbədinin və Müqəddəs Danilov
monastırının bazar günü məktəblərinin
yetirmələri Moskva Kremlinin Kilsə meydanında süvari və
piyada qarovulun dəyişməsi mərasiminə dəvət
olunmuşlar.
Heydər
Əliyev Fondunun Rusiya nümayəndəliyinin və Rusiya Mədəniyyət
Fondunun təşkilati dəstəyi ilə uşaqlar Prezident
alayı hərbi qulluqçularının, habelə mərasimin
uşaq qrupu üzvlərinin və "Kreml süvari məktəbi"
komandası süvarilərinin iştirakı ilə süvari
və piyada qarovulun dəyişməsi mərasiminə
tamaşa etmişlər.
Əhalinin
müxtəlif təbəqələrindən olan uşaqlara həmişə
diqqət və qayğı ilə yanaşan Heydər Əliyev
Fondunun Rusiya nümayəndəliyi bu dəfə də
onları diqqətdən kənarda qoymamışdır. Beynəlxalq
Uşaqları Müdafiə Günü Fondun əməkdaşları
onlara Leyla xanım Əliyevanın təbriklərini
yetirmiş və hədiyyələr vermişlər.
Şirniyyat, rəngbərəng oyuncaqlar və zehni oyunlar
uşaqlara bayram əhval-ruhiyyəsi bəxş etmişdir.
Rusiyanın
əməkdar incəsənət xadimi, Rusiya Mədəniyyət
Fondunun vitse-prezidenti, Beynəlxalq proqramlar müdiriyyətinin
direktoru Tatyana Şumova AzərTAc-ın müxbirinə
müsahibəsində demişdir ki, bu il uşaqlar nəinki hərbi
qarovulun dəyişməsinə, həmçinin gənc
süvarilərin çıxışlarına tamaşa edirlər.
T.Şumova demişdir: "Heydər Əliyev Fondu ilə
birlikdə Moskvada təhsil alan azərbaycanlı uşaqlar
üçün bu bayramı təşkil etdiyimizə görə
çox məmnunam. Bu gün Leyla xanımın təşəbbüsü
ilə Heydər Əliyev Fondunun hamiliyə
götürdüyü Xilaskar İsa məbədinin və
Danilov monastırının bazar günü məktəblərinin
uşaqları da bu rəngarəng tamaşanı görə
bilmişlər".
Ənənəyə
görə, iyunun 1-də Beynəlxalq Uşaqları Müdafiə
Günü Moskva Kremlinin Kilsə meydanında məhz Moskva məktəbliləri
üçün Prezident alayının hərbi qulluqçularının
iştirakı ilə süvari və piyada qarovul dəyişməsi
mərasimi keçirilir. Bu il ilk dəfə olaraq bu tədbirdə
"Kreml süvari məktəbi" komandasının
süvariləri iştirak etmişlər. Tədbirə
Moskvanın 1000-dən çox məktəblisi, o cümlədən
Əhalinin sosial müdafiəsi departamentinin, İctimai əlaqələr
komitəsinin, Təhsil departamentinin tabeliyində olan idarələrin
yetirmələri dəvət olunmuşdular.
Qeyd
edək ki, Beynəlxalq Uşaqları Müdafiə
Gününə həsr olunmuş süvari və piyada
qarovulun dəyişməsi mərasimi 2007-ci ildən keçirilir.
Fəridə ABDULLAYEVA,
AzərTAc-ın xüsusi
müxbiri
Moskva
Azərbaycan.-2013.- 2 iyun.- S.5.