Yalnız İlham Əliyevlə!
Məlum olduğu kimi, Azərbaycan dövləti özünün idarəetmə prinsiplərinə görə Prezident respublikasıdır. Bu yeni və demokratik dövlətin idarə olunmasının möhkəm əsaslarını, etibarlı bünövrəsini Azərbaycan xalqının ümummilli lideri, görkəmli dövət xadimi Heydər Əliyev yaratmışdır. Azərbaycan Respublikasının Prezidenti İlham Əliyev isə ölkəmizi yeni epoxanın işığında hərtərəfli şəkildə irəliyə doğru inkişaf etdirməyin nümunəsini göstərmişdir. Artıq hər kəsə yaxşı bəllidir ki, Azərbaycan Respublikasının Prezidenti İlham Əliyev dünyada XXI əsrin meydana çıxardığı yeni siyasi liderlərin və dövlət başçılarının ən görkəmlisidir.
Prezident İlham Əliyev, sözün həqiqi mənasında, görkəmli dövlət xadimi kimi dövlətə rəhbərlik etməyin şərəfini də, məsuliyyətini də özünün gündəlik əməli fəaliyyətində uğurla birləşdirir. O, müstəqil Azərbaycan dövlətini həm mükəmməl şəkildə idarə edir, həm də istənilən mötəbər məqamda böyük ləyaqətlə təmsil etmək vəzifəsini yüksək səviyyədə gerçəkləşdirir. Bunun nəticəsidir ki, Azərbaycan Respublikasında köklü, davamlı dövlətçilik ənənələrinin qorunub saxlanılması şərtilə dövlət strukturu böyük sürətlə inkişaf etdirilərək Avropa standartlarına uyğunlaşdırılır, dövlətin idarə olunmasının ən müasir forma və metodları uğurla tətbiq olunur. Ölkəmizdə demokratik cəmiyyətin, bazar münasibətlərinə əsaslanan iqtisadi siyasətin bərqərar olması proseslərinə ciddi fikir verilir. İqtisadiyyatda özəl sektorun üstünlük qazanması, neft gəlirlərinin məqsədyönlü idarə olunması ilə yanaşı, qeyri-neft sahələrinin inkişaf etdirilməsinə xüsusi diqqət yetirilməsi də Prezident İlham Əliyevin siyasətinin əsasında dayanır. Azərbaycanda informasiya cəmiyyətinin formalaşdırılması, ən yeni texnologiyaların meydanının genişləndirilməsi də möhtərəm Prezidentin önə çəkdiyi zəruri sahələrdəndir. Ölkə başçısının səyləri ilə Bakı şəhəri möhtəşəm körpülər, abad yollar və çoxsaylı göydələnlər şəhərinə çevrilmişdir. Azərbaycanın regionlarında aşkar görünən hərtərəfli intibahın, sürətli canlanmanın, müasir həyatın bərqərar olması ideyasının memarı və müəllifi respublikamızın Prezidenti İlham Əliyevdir. Bir sözlə, qısa müddətdə, sözün əsl mənasında, möhtəşəm addımlarla irəliləyən müstəqil Azərbaycan dövlətinin böyük tərəqqisində İlham Əliyevin prezidentlik fəaliyyətinin xüsusi payı vardır.
İlham Əliyev artıq geniş mənada dünyada qəbul olunmuş görkəmli siyasi liderdir. Dünya təcrübəsindən görünür ki, bir çox dövlət başçıları yalnız ölkəyə ümumi rəhbərlik vəzifəsini yerinə yetirməklə kifayətlənməli olurlar. Onların bir çoxunun ampluası praktik rəhbərlikdən başqa daha heç nəyi əhatə edə, yaxud əks etdirə bilmir.
Prezident İlham Əliyev isə bacarıqlı, mükəmməl, qurucu dövlət xadimi olmaqla bir sırada həm də geniş, qlobal dünyagörüşə, analitik təhlil bacarığına, praqmatik baxışlara malik olan mükəmməl siyasi xadimdir. O, mövcud siyasi reallıqları inkişafda olan ictimai proseslərlə böyük məharətlə uzlaşdırmağı bacarır. Siyasi gerçəklikləri dərindən, ətraflı və sistemli şəkildə dəyərləndirəndə də, yaxın və uzaq gələcəkdən söz açanda da nikbin və realist görünür.
Gerçəklik, müdriklik, dərin analitik düşüncə, nikbin, aydın və yetkin məntiqi təfəkkür onun siyasi portretinin təməl prinsipləridir. Boş vədlərdən, süni populizmdən, keçici görüntüdən uzaq olmaq İlham Əliyevin xarakteridir. O, özünün siyasi rakursunda da həyatidir, realdır, gerçəkçidir. Dünya ictimaiyyəti də, Azərbaycan xalqı da artıq çoxdandır ki, Prezident İlham Əliyevi böyük siyasətçi, yaxud siyasi idarəetməni həyati proseslərlə bütün incəliklərinə qədər uzlaşdırmaq vəzifələrini məharətlə gerçəkləşdirən kamil siyasi xadim kimi qəbul edir.
Ona bir siyasətçi kimi Cənubi Qafqaz və ya ümumiyyətlə, Qafqaz müstəvisində yanaşma mövcud siyasi reallığı qətiyyən ifadə etmir. Fikrimcə, görkəmli yeni siyasi lider kimi İlham Əliyev səviyyə etibarilə postsovet məkanının sədlərini və miqyasını çoxdan aşmışdır. Hələ Avropa Şurası Parlament Assambleyasında ölkəmizin nümayəndə heyətinə başçılıq edəndə yeni təfəkkür sahibi kimi parlaq çıxışlar edib, bəyanatlar verdiyi illərdə o, Avropa evi səviyyəsində düşünmək, mesajlar vermək potensialına malik bir siyasətçi kimi dərk olunmuşdu. Prezident kimi İlham Əliyevin siyasi-ideoloji postulatı artıq böyük dövlətlərin rəhbərlərinin, yaxud çoxillik təcrübəyə malik siyasi xadimlərin səviyyəsi ilə bir sırada dayanır.
O, böyük siyasətdə milli təfəkkürlə bəşəri düşüncəni birləşdirən, real gerçəkliklə qlobal baxışları uzlaşdıran görkəmli siyasi liderdir. Buna görədir ki, İlham Əliyevin siyasi baxışları dərin nəzəri səviyyəsi, aydın məntiqi, fəlsəfi çəkisi və praqmatik xarakteri ilə səciyyələnir. Möhtərəm Prezidentin müxtəlif məqamlardakı nitqləri zamanı müdrikliklə ifadə etdiyi yetkin siyasi tezislər dərin mənalı aforizmlər kimi səslənir. Böyük siyasətdə aforizm səviyyəsində düşünmək və özünü ifadə etmək yalnız və yalnız ən təcrübəli, uzun yol keçmiş, çox səviyyəli, böyük məktəblər yaratmış siyasətçilərə nəsib ola bilir. Azərbaycan Respublikasının Prezidenti İlham Əliyev əsl siyasətçiyə məxsus olan belə uca məqamı fəth etmək vəzifəsinin öhdəsindən cavan yaşlarında ikən bacarıqla gəlmişdir. İlham Əliyevin siyasi aforizmlərinin böyük siyasətin ibrətamiz dərsləri səviyyəsində ümumiləşməsi onun yetkin, kamil siyasətçi obrazını dolğun şəkildə müəyyən edir.
Prezident İlham Əliyevin siyasi fəaliyyətinin ana xətlərini azərbaycançılıq, millətlərarası münaqişələrin həlli, yeni neft strategiyası, enerji təhlükəsizliyi, bəşəriyyətin taleyində çoxaspektli dialoqun rolu, tolerantlıq fəlsəfəsi, iqtisadiyyatın şaxələndirilmiş inkişafı, dövlətçilikdə xalq faktorunun üstün mövqeyi və sair kimi aktual, xüsusi çəkiyə malik məsələlər təşkil edir. Bu məsələlərin hər birinin şərhində və təqdimində İlham Əliyev ustad müəllim olaraq yüksək professionallıq nümayiş etdirir. Milli mənafenin, dövlətçilik maraqlarının daim üstün tutulması İlham Əliyev siyasətinin təməl prinsipidir. Prezident İlham Əliyevin siyasətində ən müxtəlif mövqelərdən, fərqli bucaqlardan ifadə olunan siyasi yanaşmaların hamısı azərbaycançılıq fəlsəfəsində, Azərbaycanın inkişafı naminə aparılan qlobal siyasətdə tamamlanır. Azərbaycançılıq bu böyük və müdrik siyasətin cövhərini, ana xəttini təşkil edir.
İlham Əliyev XXI əsrdə müstəqil Azərbaycanın yeni siyasətini, irəliyə doğru inkişafın elmi üfüqlərini aydın görən, siyasi müstəvidə yeni istiqamətlər açan, yol göstərən görkəmli dövlət xadimidir. Bacarıqlı dövlət başçısında bu tip yüksək siyasətçi düşüncəsinin və mühüm idarəetmə məharətinin olması dövlətin normal inkişafının və xalqın xoşbəxt həyatının böyük təminatıdır. Bu mənada yeni tarixi epoxada məhz İlham Əliyev kimi böyük siyasətlə yüksək idarəçiliyi və vətənpərvərliyi özündə cəmləşdirən görkəmli bir dövlət xadiminin və mahir siyasətçinin Azərbaycana rəhbərlik etməsi ölkənin və xalqın tarixi şansıdır.
Burada ciddi və mühüm bir nüans da var.
Böyük və professional bir siyasətçinin dövlət
başçısı kimi uğurlu fəaliyyəti təkcə
ölkənin və xalqın deyil, elə siyasətin də
xeyrinədir.
Çünki kamil, yetkin, lokal mənada da, qlobal səviyyədə
də faydalı, gərəkli olan böyük siyasət
özünüifadə, yaxud özünütəsdiq
baxımından real platsdarm, münasib meydan tapa bilməyəndə
bəzən mücərrəd, utopik, yaxud havadan asılı
olan nəzəri-ideoloji təlim olaraq qalır. Ancaq
böyük siyasətçi üçün siyasi fəaliyyət
dövlətçilik işinin üzvü tərkib hissəsinə,
əsasına, daşıyıcısına çevriləndə
daim yeniləşir, təkmilləşir, aşkarlanır, zənginləşir
və inkişaf edir. Prezident İlham Əliyevin
siyasəti də həm Azərbaycan məkanında, həm də
beynəlxalq müstəvidə konkret məsələlərin,
aktual problemlərin həllinə istiqamətləndirilmiş
aşkar siyasi fəaliyyət kimi mütəmadi olaraq yeniləşir
və zənginləşir. Ölkə
başçımızın qəti siyasi mövqeyi onun
ölkəni irəli aparmaq, cəmiyyəti inkişaf etdirmək
yollarındakı siyasi iradəsinin real təzahürüdür.
Bu mənada inkişafda olan müstəqil Azərbaycanda əldə
olunan möhtəşəm nailiyyətlər və beynəlxalq
miqyasda ölkə ilə əlaqədar aparılan gündəlik
düşünülmüş, məqsədyönlü və
ardıcıl iş, əldə olunan zəngin
təcrübə tükənməz ideya mənbəyi kimi
İlham Əliyev siyasətinin aktuallığını və
müasirliyini təmin edir. Beləliklə,
dövlət də, Prezidentin siyasəti də ölkəmizlə
birlikdə, xalqımızla həmahəng şəkildə
daimi inkişafdadır.
Ölkə başçısı İlham Əliyev Azərbaycan
xalqının ümummilli lideri, görkəmli dövlət
xadimi Heydər Əliyevin milli dövlətçilik təliminin,
sınaqlardan çıxmış siyasi kursunun layiqli davamçısıdır.
Heydər Əliyev siyasi kursu - Azərbaycan dövlətinin
ümummilli inkişaf strategiyasının nəzəri-ideoloji
əsasını təşkil edir.
Heydər Əliyev təlimi - ölkəmizin və
xalqımızın dirçəliş və tərəqqi
yolunun kompasıdır.
Heydər Əliyev fəlsəfəsi Azərbaycan idealının
özünütəsdiqinin dialektikasından ibarətdir.
Heydər Əliyev yolu - Azərbaycan dövlətinin və
xalqının əbədiyyət yoludur.
Heydər
Əliyev siyasi kursunu bütün fəlsəfəsi ilə,
görünən, bilinən və görünməyən cəhətləri
ilə birlikdə mənimsəyib özündə cəmləşdirməklə,
yaradıcı şəkildə inkişaf etdirib həyata
keçirməkdə Prezident İlham Əliyevlə
müqayisə edilə biləcək ikinci bir siyasi şəxsiyyət
göstərmək çətindir, bəlkə də
mümkün deyildir.
Həyatının,
mövqeyinin ən müxtəlif məqamlarında Heydər Əliyevin
çoxcəhətli fəaliyyətini yaxından izləmək,
yaşantılarını dərindən duymaq, siyasi gedişlərinin,
necə deyərlər, alt yapısının mahiyyətini
öyrənmək baxımından bu böyük şöhrətə
malik olan mötəbər ailənin üzvü kimi İlham Əliyevin
imkanları hamıdan - hətta ulu öndərin ən
yaxın məsləkdaşlarından da təbii surətdə
çox olmuşdur. Həm keçmiş sovet
rejimi mərhələsində, həm də müstəqillik
dövründə İlham Əliyev həmişə görkəmli
dövlət xadimi Heydər Əliyevin böyük siyasətinin
yaxın əhatəsində olan bir şəxsiyyət kimi
mühüm dövlətçilik məktəbi
keçmişdir. Böyük siyasi xadim Heydər Əliyevin
zamanında Moskva Dövlət Beynəlxalq Münasibətlər
İnstitutunda mükəmməl təhsil alan, Kreml mühitində
cərəyan edən daxili proseslərdən xəbərdar
olması, sonralar Azərbaycan Dövlət Neft Şirkətinin
birinci vitse-prezidenti, Respublika Olimpiya Komitəsinin Prezidenti, millət
vəkili, Avropa Şurası Parlament Assambleyasında ölkəmizin
nümayəndə heyətinin rəhbəri, nəyahət,
Baş nazir kimi məsul vəzifələrdə şərəfli
və məsuliyyətli yol keçməsi, mükəmməl
həyat təcrübəsi və zəngin siyasi təcrübə
qazanması, Avropa dillərində sərbəst və sərrast
danışmaq imkanlarına malik olması əvəzəedilməz
üstünlüklər və nailiyyətlərdir.
Müşahidələr göstərir ki, İlham Əliyev
görkəmli dövlət xadimi Heydər Əliyevin müstəqil
dövlətçilik və böyük siyasət
akademiyasını, necə deyərlər, fərqlənmə
diplomu ilə bitirmişdir. Həyat təsdiqlədi ki, İlham
Əliyev ümummilli lider Heydər Əliyevdən ali mükəmməl dövlətçilik təlimini
gerçəkləşdirməkdə də hamıdan fərqlənir.
Əvvəla, o, Heydər Əliyev siyasi kursuna dərin, birmənalı
sədaqətində, ikincisi isə həmin sınaqlardan
çıxmış siyasi kursu qətiyyətlə, dönmədən,
yaradıcılıqla, ardıcıllıqla müasirlik
işığında həyata keçirməkdə fərqli,
üstün imkanlara və böyük potensiala, qeyri-adi enerjiyə
və yaxşı mənada qibtə olunacaq istedada malikdir.
Azərbaycan
xalqı Prezident İlham Əliyevin simasında ilk növbədə
əsl, həqiqi,
geniş dünyagörüşə, sağlam və
aydın məntiqi təfəkkürə malik Heydər Əliyevçini
görür və yüksək dəyərləndirir.
Qazanılmış ümumxalq rəğbəti,
seçilmiş və isbat olunmuş siyasi kursun
ardıcıllıqla, qətiyyətlə davam etdirilməsi əvvəlki
on il ərzində qazanılan nailiyyətlərin
artırılması, müəyyən olunmuş istiqamətlərin,
başlanmış mühüm işlərin,
hazırlanmış layihələrin uğurla icrası deməkdir.
Böyük sürətlə yeniləşən Bakı
şəhəri, xüsusi templə dəyişən və
inkişaf edən Azərbaycan iqtisadiyyatı, həyata
keçirilən möhtəşəm layihələr -
Bakı-Tbilisi-Ceyhan neft boru, Bakı-Tbilisi-Ərzurum qaz kəmərləri,
Bakı-Tbilisi-Qars-Naxçıvan dəmir yolu, hər gün
gözəlləşən və müasirləşən Azərbaycan
cəmiyyəti Heydər Əliyev siyasi kursunun uğurla,
yaradıcılıqla davam etdirilməsinin real bəhrələri,
sanballı töhfələridir. Məhz
bütün bunlar Prezident İlham Əliyevin timsalında
çətin, sınaqlardan çıxmış
inanılmış siyasi kursun ardıcıllıqla və qətiyyətlə
davam etdirilməsinin nələrə qadir olduğunun, ölkəmizi
hansı səviyyəyə gətirib çatdıra biləcəyinin
gerçək təzahürləridir.
"Azərbaycan naminə" əqidəsi əsasında
formalaşmış İlham Əliyev siyasəti ölkəmizə
beynəlxalq aləmdə də böyük şöhrət
qazandırmışdır. Azərbaycan Respublikasının Birləşmiş
Millətlər Təşkilatı Təhlükəzislik
Şurasının üzvü seçilməsi və
dünyanın ən böyük və mötəbər təşkilatının
ciddi bir qurumuna müəyyən olunmuş müddətdə
rəhbərlik etməsi Prezident İlham Əliyevin
apardığı xarici siyasətin əhəmiyyətini, təsir
imkanlarını, beynəlxalq aləmdə tutduğu
böyük mövqeyini əyani şəkildə
nümayiş etdirir. Azərbaycan
Respublikasının Avropa Şurası, Avropa Birliyi məkanında,
o cümlədən UNESCO səviyyəsində nümayiş
etdirdiyi üçün mövqe ölkəmizin böyük
Avropa evində normal yer tuta bildiyini nümayiş etdirir. Azərbaycanda neft-qaz siyasətinin Avropa siyasətinə
uzlaşdırılması və bu prosesdə ölkəmizin
maraqlarının əsas kimi qəbul edilməsi qərbyönlü
uğurlu siyasi gedişlərin düzgün məntiqi nəticəsidir.
Müasir Azərbaycanda Çin, Cənubi Koreya, Yaponiya,
Sinqapur, Malayziya kimi inkişaf etmiş Asiya ölkələri
ilə də əməkdaşlığın sürətləndirilməsi
bizdə Şərq tərəfdaşlığına dair
böyük və etibarlı addımların
atıldığını göstərir. Nəticə
etibarilə Azərbaycan Şərq üçün də, Qərb
üçün də cəlbedici və əhəmiyyətli
ölkə olmaq statusu qazanmışdır.
Prezident İlham Əliyev ulu öndər Heydər Əliyevin
siyasi təlimini yeni dövrün və müasir Azərbaycanın
reallıqları ilə yeniləşdirən və daha da zənginləşdirən
siyasi xadimdir.
Ümummilli liderimiz Heydər Əliyevdən sonrakı tarixi mərhələnin
meydana çıxardığı siyasi-ictimai reallıqlar,
iqtisadi-hərbi proseslər, ideoloji-etnik problemlər mövcud
siyasi kursun işığında hadisələrin və
gedişatların yenidən dəyərləndirilməsini tələb
etdiyi məqamlarda Prezident İlham Əliyev istənilən məsələyə
yaradıcı münasibət bəsləməyi, yeni müstəvidən
yanaşmağı müvəffəqiyyətlə həyata
keçirir.
Bu mənada İlham Əliyev daim inkişafda olan Heydər
Əliyevçi siyasi təlimin yaradıcısıdır.
İlham Əliyev mövcud siyasi kursun yeni epoxa ilə
şərtlənən yeni dövrünün lider səviyyəsində
görkəmli təmsilçisidir.
İlham Əliyev Azərbaycanın
sınanılmış yolu olan Heydər Əliyev yolunun yeni
magistrallardakı qüdrətli
sükançısıdır.
Bütün bunlara görə o, görkəmli dövlət
xadimi və böyük siyasi xadim səviyyəsinə
yüksəlmiş, geniş şöhrət və nüfuz
qazanan Prezident İlham Əliyev məqamına
çatmağı bacarmışdır.
Nəticə
olaraq Prezident İlham Əliyevin siyasi özünəməxsusluqlarını
aşağıdakı kimi ümumiləşdirmək
mümkündür:
Heydər Əliyev siyasi kursu, üstəgəl yeni dünyanın,
beynəlxalq aləmin reallıqları və üstəgəl
müstəqil Azərbaycanda yeni dövrün meydana
çıxardığı gerçəkliklər və dəyişikliklər,
üstəgəl müasirlik və modernləşdirmə, bərabərdir
İlham Əliyev.
Məhz İlham Əliyev yeni dünya düzənində
müdrik siyasəti və böyük bacarığı ilə
Azərbaycana baş ucalığı gətirən ən
qüdrətli liderdir. Müasir Azərbaycanın yeni tarixi mərhələdəki
yeni həyatı Prezident İlham Əliyevin yorulmaz fəaliyyətinin
konkret əməli nəticəsidir. Respublikamızda
paytaxtımız Bakı ilə yanaşı, Azərbaycan
regionlarının böyük sürətlə və hərtərəfli
şəkildə inkişaf etdirilməsi hərəkatının
başında möhtərəm Prezident İlham Əliyev
dayanır. Bu mənada o, yeni Azərbaycan
adlı möhtəşəm əsərin qüdrətli
yaradıcısıdır.
Azərbaycanın ayrılmaz tərkib hissəsi olan
Naxçıvan Muxtar Respublikası və qədim diyarda
dövlət başçısının rəhbərliyi ilə
Ali Məclisin Sədri Vasif Talıbovun həyata keçirdiyi
genişmiqyaslı quruculuq işləri ölkənin yüksək
inkişaf göstəricilərinin salnaməsində önəmli
yer almış pozulmaz naxışlar, parlaq səhifələrdir. Blokada şəraitində
yaşamasına baxmayaraq, sürətlə qurulub-tikilən,
müasirləşən Naxçıvanın düşmən
sərhədində alınmaz qalaya çevrilməsi ölkəmizin
ərazi bütövlüyünün qorunub saxlanılması
və daha da möhkəmləndirilməsi siyasətinin
uğurla gerçəkləşdirilməsindən ibarətdir.
Beləliklə, İlham Əliyev ilk növbədə
ümummilli lider Heydər Əliyev məktəbi əsasında
yetişib formalaşan, meydana çıxan, yetkin, təcrübəli,
görkəmli dövlət xadimidir.
İlham Əliyev analitik düşüncə sahibi kimi
dərin məntiqə və aydın təfəkkürə
malik olan, siyasi reallıqları nəzəriyyə ilə vəhdətdə
ifadə edən mükəmməl siyasi xadimdir.
O, XXI əsrin
yeni tipli siyasi lideridir.
Müstəqil Azərbaycanın yeni həyatının,
təzə çağının müəllifi Prezident
İlham Əliyevdir.
Dünyanın yeni reallıqları, beynəlxalq aləmdə
gedən müasir proseslər zəminində yeni Azərbaycanın
maraqlarını və mənafeyini ifadə etməkdə
İlham Əliyev zəngin təcrübəyə, dönməz
siyasi iradəyə malikdir.
İlham Əliyev yeni mərhələdə Azərbaycan
ölkəsinin və cəmiyyətimizin müasirləşdirilməsinin
baş memarıdır.
İlham Əliyev yeni siyasi təfəkkürə və
yeni, yaradıcı yanaşmalara malik novator dövlət
xadimidir.
Xalq amili, milli mənafe, ölkə maraqları İlham Əliyev
üçün müqəddəs meyarlardır.
İlham Əliyev yaxın və uzaq gələcəyi,
bütün reallıqları incəliklərinə qədər
görən və məharətlə
proqnozlaşdırmağı bacaran böyük dövlət
xadimidir.
Ölkəmizin və xalqımızın bundan
sonrakı mərhələdə İlham Əliyev kimi
geniş formatda, böyük masştabda düşünən,
xalqına və dövlətinə ürəkdən
bağlı olan, yüksək səviyyəli və enerjili
dövlət xadiminə ciddi ehtiyacı var.
Bütövlükdə Qərb və Şərq
müstəvisində, xüsusən də Qafqazda gedən
mürəkkəb ictimai-siyasi proseslərdə İlham Əliyevin
tutduğu tarazlaşdırılmış mövqe və həyata
keçirdiyi müstəqil siyasət dövlətimizi
dünya üçün də, regionlar üçün də
əhəmiyyətli ölkəyə çevirmişdir. Prezidentimizin
müdrik siyasəti Azərbaycanın dünyada və
Qafqazdakı hadisələrin həlli baxımından söz
sahibi olan dövlətə çevrilməsi ilə nəticələnmişdir.
İndi Azərbaycanın yaxından
iştirakı, razılığı təmin olunmadan, nəzərə
alınmadan Qafqaz regionunda heç bir problemin həllindən
danışmaq olmaz. Eyni sözləri Azərbaycanı
əhatə edən digər Şərq tipli dövlətlərə,
bir çox Avropa ölkələrinə də şamil etmək
olar. Belə yüksək imici ölkəmizə
Prezident İlham Əliyev qazandırmışdır.
Bütün
bunlara görə Azərbaycan xalqı Prezident seçkisi
üçün artıq özünün qəti
seçimini etmişdir: YALNIZ İLHAM ƏLİYEV!
Ölkəmiz və xalqımız Prezident seçkilərinə
YENİLƏŞMİŞ MÖHTƏŞƏM AZƏRBAYCAN
BOYDA BÖYÜK HESABATla gedir.
Görkəmli dövlət xadimi İlham Əliyevi yenidən
ölkə Prezidenti seçmək Müstəqil Azərbaycanın
xoşbəxt sabahına inamla baxmağın real təminatı
deməkdir. Bu, Azərbaycanın müstəqilliyinin daha da
möhkəmlənməsinə, işıqlı, xoşbəxt
gələcəyə, daha böyük inkişafa, geniş
üfüqlərə hesablanmış seçimdir. Bu, hər bir azərbaycanlının reallıqlardan
doğan yekun qənaətidir.
Yeni Azərbaycan Partiyasının V qurultayında ölkəmizin
rəhbərinin yenidən cəmiyyətimizin bu böyük və
mütəşəkkil siyasi təşkilatının Sədri
seçilməsi müəyyən olunmuş siyasi-ideoloji xəttimizin
bundan sonra da yaradıcılıqla inkişaf etdiriləcəyinə
tam təminat verir. Cəmiyyətin ən qabaqcıl siyasi qüvvəsi
olan Yeni Azərbaycançıların və
xalqımızın mütləq əksəriyyətinin
arzusunun ifadəsi olaraq YAP-ın V qurultayında İlham Əliyevin
növbəti dövr üçün böyük yekdillik
şəraitində Azərbaycan Respublikasının
Prezidentliyinə namizədliyinin irəli sürülməsi
ölkəmizdə müstəqil dövlətçiliyin daha
da inkişaf etdirilərək möhkəmləndiriləcəyinə,
yeni zirvələrin fəth edilə biləcəyinə
böyük inam doğuran əlamətdar hadisədir. Prezident
İlham Əliyevin Yeni Azərbaycan Partiyasının
qurultayında ifadə etdiyi aşağıdakı fikirlər
onun Azərbaycanın inkişafı haqqındakı
böyük proqramının mühüm ana xətlərini
müəyyənləşdirir: "Bu gün Azərbaycan həm
iqtisadi, həm də siyasi cəhətdən, sözün əsl
mənasında, müstəqil dövlətdir. Biz
öz müstəqilliyimizi möhkəmləndirməliyik.
Bizim amalımız qüdrətli Azərbaycandır,
müasirlikdir, inkişafdır, sosial rifahdır... Demokratiyanın inkişafı bizim üçün əsas
vəzifədir. Bu gün Azərbaycan
demokratiyanın inkişafına görə heç kimdən
geri qalmır. İqtisadi sahədə
şaxələndirmə bizim əsas istiqamətimizdir.
Biz neft amilindən
asılılığımızı azaldırıq. Bundan sonra sənayeləşdirmə prosesi daha da
sürətlə gedəcəkdir. Ərzaq
təhlükəsizliyimizi tam şəkildə təmin etməliyik.
Azərbaycanda qəbul edilən qərarlar gələcəkdə
enerji təhlükəsizliyi ilə bağlı olan yeni məsələlərə
yeni istiqamət verəcəkdir".
Bəli, bütün bunlar Azərbaycan
Respublikasının yeni inkişaf konsepsiyası ilə
bağlı olan aydın və konkret proqramdır. SON ON İLDƏ
Azərbaycanda cəmiyyət həyatının bütün
sahələrində dünyanın gözü
qarşısında baş vermiş böyük dəyişikliklərin
fonunda bundan sonrakı dövrün böyük
reallıqları, yeni çağırışları da hər
kəs tərəfindən rahatlıqla qəbul edilir.
Ona görə də ölkənin, müstəqil dövlətimizin
və xalqımızın qarşıdakı ən məsuliyyətli
və şərəfli prezident seçkilərinə gedərkən
qəlbinin dərinliklərindən gələn yalnız bir qərarı
vardır:
YALNIZ
İLHAM ƏLİYEVLƏ!
Gün işığı kimi aydındır ki,
müdrik, qədirbilən, uzaqgörən xalqımız bu dəfə
də bu mühüm və qəti seçiminin böyük bəhrəsini
görəcəkdir. Fikrimizcə, indiki seçimin ən
böyük bəhrəsi, əsas nəticəsi daha
güclü və inkişaf etmiş müstəqil Azərbaycan
dövləti və daha xoşbəxt həyat şəraiti
qazanmaq imkanları əldə edəcək, bilik və bərabərlik
nümayiş etdirən Azərbaycan xalqı olacaqdır.
İsa HƏBİBBƏYLİ,
Azərbaycan Milli Elmlər
Akademiyasının vitse-prezidenti, Milli Məclisin deputatı, YAP
Siyasi Şurasının üzvü, akademik
Azərbaycan.-2013.- 11 iyun.- S. 3.