Böhrandan yüksəlişə
doğru: aqrar sektorun inkişafı
"Azərbaycan"
qəzetinin Qobustan Rayon İcra
Hakimiyyəti ilə birgə "dəyirmi
masa"sı
Qarşıdan müasir Azərbaycan dövlətçiliyinin ən parlaq səhifələrindən olan Milli Qurtuluş tarixinin 20-ci ildönümü gəlir. Bu tarix bütün Azərbaycan xalqı üçün əzizdir. Ona görə ki, 20 il öncə iyun ayında Heydər Əliyevin xalqın istəyi ilə Naxçıvandan Bakıya gəlməsi və iyunun 15-də Ali Sovetin Sədri seçilməsindən sonra Azərbaycan dövləti və xalqı başının üstünü almış təhlükələrdən xilas oldu, qurtuldu. Heydər Əliyev Azərbaycanın əldən getmək üzrə olan müstəqilliyini bərpa etdi, dövləti qurdu və inkişaf etdirdi. Bu gün inkişaf edən, regionun lider dövlətinə çevrilən Azərbaycanın hər bir uğurunun kökündə milli qurtuluşumuzdan başlanan Heydər Əliyev siyasəti dayanır.
Xalqımızın dövlətçilik və müstəqillik salnaməsinin əlamətdar tarixlərinin geniş işıqlandırılması "Azərbaycan" qəzetinin öz fəaliyyətində diqqət yetirdiyi prioritet məsələlərdən biridir. Milli Qurtuluş Gününün 20 illiyi ilə bağlı qəzetimizin keçirdiyi "dəyirmi masa"lar bu tarixin əhəmiyyətinin xüsusən gənc və böyüməkdə olan nəslə çatdırılmasına xidmət edir. Növbəti belə "dəyirmi masa" Qobustan rayonunda keçirildi. Tədbir iştirakçıları öncə rayon mərkəzində Heydər Əliyevin abidəsinin önündə ulu öndərin parlaq xatirəsini yad etdilər.
"Dəyirmi masa"nı giriş sözü ilə açan "Azərbaycan" qəzetinin Baş redaktoru, Milli Məclisin deputatı Bəxtiyar SADIQOV dedi:
- Dünyanın əksər dövlətlərinin tarixi göstərir ki, onların üzləşdikləri problemlərdən xilas olmasında, azadlığa qovuşmasında qətiyyəti, prinsipiallığı, tutduqları mövqe və xarizması ilə fərqlənən siyasətçilərinin böyük rolu olmuşdur. Ona görə belə siyasətçilərin adları həmin dövlətlərin tarixinə qızıl hərflərlə yazılmışdır. Keçmişi azadlıq mübarizələri ilə zəngin olan Azərbaycan xalqı da özünün dövlətçilik tarixində xidmətləri olan dahi şəxsiyyətlərinin adını və xatirəsini həmişə uca tutur.
Müasir Azərbaycan tarixində adı dövlətçilik tariximizə qızıl hərflərlə həkk olunmuş dahi şəxsiyyət xalqımızın böyük oğlu Heydər Əliyevdir. Bu böyük şəxsiyyət həyatı boyu fəaliyyət göstərdiyi hər bir vəzifədə, ölkəmizə rəhbərlik etdiyi bütün dövrlərdə xalqımızın və dövlətimizin mənafeləri üçün çalışmış, onu hər şeydən uca tutmuş, Azərbaycanın inkişafı üçün misilsiz işlər görmüşdür. Heydər Əliyevin ölkəmizə istər sovet illərində, istərsə də müstəqillik dövründə rəhbərliyə gəlişini Azərbaycanda intibahın başlanğıcı kimi səciyyələndirmək olar. Birinci dəfə ulu öndər Azərbaycanı sovetlər birliyinin inkişaf etmiş sənaye-aqrar respublikasına çevirdi, gələcək müstəqilliyimizin əsaslarını formalaşdırdı.
1993-cü ildə isə Heydər Əliyev xilaskarlıq missiyasını üzərinə götürdü və özünün ən böyük əsəri olan müasir və müstəqil Azərbaycan dövlətini qurdu. O dövrdə Azərbaycanda cərəyan edən xaotik proseslər təsdiq edirdi ki, yalnız möhkəm siyasi iradəsi olan bir rəhbər ölkəni başının üstünü almış bütün təhlükələrdən qurtarmaq, dövlət müstəqilliyimizi yaşatmaq kimi ağır bir missiyanın öhdəsindən gələ bilər. Bu lider isə xalqın məhəbbətini qazanmış Heydər Əliyev idi! Bu baxımdan 1993-cü ildə dövlət idarəçiliyindəki kobud səhvlərin məntiqi nəticəsi olaraq ağır sosial-iqtisadi gərginliyin pik həddinə çatdığı, ölkə vətəndaş müharibəsi təhlükəsi ilə üz-üzə qaldığı, cəbhədə torraqlarımızın itirildiyi, bir sözlə, Azərbaycan dağılmaq və rarçalanmaq təhlükəsi ilə üzləşdiyi vaxtda xalqımızın özünün böyük oğlu, həyatı və mübarizəsi üçün ümummilli liderlik missiyası xarakterik olan Heydər Əliyevə üz tutması təsadüfi deyildi. Çünki ölkədəki hərc-mərcliyi, itaətsizliyi, Gəncədə başlanmış qardaş qırğınını, hərbi xəyanəti, qanunsuz silahlı dəstələrin Bakıya yürüşünü yalnız o böyük insan aradan qaldıra bilərdi! O zaman vəziyyəti düzgün qiymətləndirən xalqın qərarı ölkə rəhbərliyinə Neydər Əliyevin gəlməsi idi. Bu məqsədlə ulu öndərə məktublar, teleqramlar göndərilirdi. Bu müraciətlər maddi-mənəvi iztirablara məruz qalan bir xalqın sadəcə vəziyyətdən çıxış yolu deyil, həm də dövlətçiliyimizin yaşaması üçün qəbul edilən tarixi bir xalq qərarı idi.
İflasa uğrayan AXC-Müsavat iqtidarı da vəziyyətdən çıxış yolunu Neydər Əliyevin Bakıya dəvət edilməsində görürdü. Əslində buna qədər özlərinə əsas təhlükə, ən qorxulu rəqib kimi xalqın içərisində böyük hörməti və nüfuzu olan Neydər Əliyevi hesab edir və onu necə sıradan çıxarmaq barədə düşünürdülər. Bu niyyətin gerçəkləşməsi üçün hətta 1992-ci ildə Heydər Əliyevi Naxçıvan Ali Məclisinin Sədri vəzifəsindən devirməyə cəhd etmişdilər.
Dövlətçiliyimizin müqəddəratının həll olunduğu məqamda ulu öndər Heydər Əliyevin Bakıya gəlişi respublika əhalisində böyük ümidlər yaratdı. Bakıya gəldikdən sonra parlamentə sədr seçilmək barədə iqtidarın və deputatların xahişini qəbul etməyən Heydər Əliyev Gəncədə yaranmış vəziyyətlə tanış olmaq üçün ora yola düşdü, döyüş meydanına çevrilmiş hərbi hissələrin ərazisini gəzdi. Bu dahi siyasətçinin şəhərə gəlişi əhalidə gələcəyə böyük inam yaratdı. Şəhər sakinləri, hərbi qulluqçularla görüşüb söhbət etdi.
Ulu öndər Heydər Əliyev sonralar həmin vaxtları xatırlayaraq deyirdi: "1993-cü ilin iyun ayında Azərbaycanda böyük dövlət böhranı yarandı. Azərbaycan dağılmağa başladı, ovaxtkı iqtidar ölkəni idarə edə bilmədi. Gəncədə toqquşma baş verdi, qan töküldü. Gəncədə başlayan hərəkat Azərbaycanın ərazisinin, demək olar ki, yarısından çoxunda hakimiyyəti öz əlinə aldı. Vaxtilə məni təqib edən, Naxçıvanda məni devirmək, məni Azərbaycandan sıxışdırıb çıxarmaq istəyən ovaxtkı iqtidar belə bir zamanda əlacsız qaldı və mənə müraciət etdi. Ancaq ondan əvvəl mənə müraciət edənlər bizim partiyanın üzvləri, Azərbaycanın müxtəlif təbəqələrinin nümayəndələri, ziyalıları oldu. Onlar məni yenidən Bakıya dəvət etdilər".
1993-cü il iyunun 15-də Heydər Əliyev Azərbaycan Ali Sovetinin Sədri seçildi. Beləliklə, xalqın tələbi ilə hakimiyyətə qayıdan ulu öndər xilaskarlıq missiyasını həyata keçirməyə başladı. 1993-cü ilin iyununda bir tərəfdən erməni hərbi birləşmələri hücumlarını genişləndirir, bir tərəfdən Azərbaycanı parçalamaq istəyən separatçı qruplar öz fəaliyyətlərini genişləndirir, digər yandan vətəndaş qarşıdurması şiddətlənirdi. Ölkənin bu vəziyyətə salınmasında birbaşa günahkar olan Ə.Elçibəy isə vəzifəsini tərk edərək Kələkiyə çəkilmişdi. Belə bir vaxtda Ali Sovetə sədr seçilən Heydər Əliyevin qarşısında olduqca ağır və gərgin vəzifələr dururdu.
Lakin Heydər Əliyevin qətiyyətinin, xarizmasının, siyasi uzaqgörənliyinin qarşısında aradan qaldırılması mümkün olmayan məsələ yox idi! Bu mənada 1993-cü ildən sonra cərəyan edən siyasi-ictimai, iqtisadi proseslər, bütün sahələrdə inkişafa doğru dönüş yaradılması həqiqətən də ölkəmizə milli mənafelərimizi əldə rəhbər tutan xarizmatik və qətiyyətli liderin, əsl siyasətçinin rəhbərlik etməsindən xəbər verirdi. O siyasətçidən ki üzləşdiyi çətinliklərə, maneələrə, dövlət çevrilişi cəhdlərinə baxmayaraq Azərbaycanı parçalanmaqdan, vətəndaş müharibəsindən qurtardı. Heydər Əliyevin Prezident seçilməsi isə Azərbaycanda tamamilə yeni bir siyasi-ictimai münasibətlər sisteminin bərqərar edilməsinə, nəhayət, ümumxalq maraqlarının gerçəkləşməsinə xidmət edən proseslərin start götürməsinə səbəb oldu, xalqın özünə inamını, sabaha nikbin baxışlarını bərpa etdi, dövlətçiliyimizin əsasını təmin edən ictimai-siyasi sabitliyin əsasını qoydu. Azərbaycan yalnız Heydər Əliyevin siyasi hakimiyyətə qayıdışından sonra özünün geosiyasi imkanlarını gerçəkləşdirə bildi. Azərbaycan beynəlxalq aləmdən təcrid olunmaq təhlükəsindən sovuşdu, dünya dövlətləri arasında özünə layiqli yer qazandı, ölkənin ictimai-siyasi, sosial-iqtisadi, elmi-mədəni həyatında dönüş yarandı, sivil və hüquqi dövlət quruculuğunun əsası qoyuldu.
Beləliklə, XX əsrin sonlarında Azərbaycanda dövlətçilik ənənələrinin bərpa edilib zənginləşdirilməsi, Azərbaycanın müstəqilliyinin möhkəmləndirilməsi, onun əbədi, dönməz xarakter alması, ölkəmizin dinamik iqtisadi inkişaf yolu ilə inamla irəliləməsi, onun beynəlxalq nüfuzunun sürətlə artması Heydər Əliyevin uzaqgörən və zəngin siyasi fəaliyyəti sayəsində mümkün oldu. Ulu öndər öz əməlləri ilə, xalqa əvəzsiz xidmətləri ilə tariximizdə əbədiyaşarlıq qazandı.
Heydər Əliyev ideyalarının alternativinin
olmadığını hər birimiz bilirik. Bu
ideyaların layiqli davamçısı cənab İlham Əliyevin
2003 və 2008-ci illərdə Azərbaycan
Respublikasının Prezidenti seçilməsi Heydər Əliyev
yolunun nə qədər doğru-düzgün olduğunu
göstərir. Heydər Əliyev
ideyalarının Azərbaycan Prezidenti İlham Əliyev tərəfindən
uğurla davam və inkişaf etdirilməsinin nəticəsində
ölkəmiz bütün sahələrdə yüksək
sürətlə inkişaf edir, dünya dövlətləri
arasında öz yerini daha da möhkəmləndirir.
Heydər Əliyev ideyalarının və müəyyən
etdiyi inkişaf siyasətinin uğurla davam etdirilməsi Azərbaycanın
bölgələrinin yüksəlişi fonunda da aydın
görünür. Bu gün Azərbaycan ilbəil deyil,
günbəgün inkişaf edir. Bunu
Qobustan rayonunun timsalında da aydın görmək
mümkündür. Keçirdiyimiz bu "dəyirmi
masa"nın məqsədi də Milli
Qurtuluşdan başlanan yüksəlişə Qobustan rayonunun
nümunəsində nəzər yetirməkdir.
İndi isə çıxış üçün
söz Qobustan Rayon İcra Hakimiyyətinin
başçısı Adil MƏMMƏDOVa verilir.
Adil MƏMMƏDOV:
- 20 il əvvəl - 1993-cü il iyunun 15-də Azərbaycan
dövlətinin və dövlətçiliyinin
formalaşmasında 40 ildən çox bir dövr ərzində
misilsiz xidmətlər göstərmiş Heydər Əliyevin
ölkədə ali qanunvericilik orqanına sədr seçilməsi
ilə ikinci dəfə hakimiyyətə gəlməsi
xalqımızın şanlı tarixinə Milli Qurtuluş
Günü kimi daxil oldu. Şəxsiyyətlər
haqqında danışarkən onları mühitin, tarixin
yetişdirməsi kimi qeyd edirlər. Lakin bəzi
xalqlara tarixi yaradan şəxsiyyətlər qismət
olmuşdur. Belə şəxsiyyətlər
mənsub olduğu xalqın, dövlətin üzləşdikləri
fəlakətlərin, çətinliklərin aradan
qaldırılmasında qətiyyətə,
prinsipiallığa, möhkəm siyasi iradə və
çevik siyasi manevr qabiliyyətinə malik olan insanlardır.
Məhz Heydər Əliyev tarixi
yaradan şəxsiyyətlərdəndir! Azərbaycanın
inkişafında, müstəqilliyində, gələcəyində
müstəsna rol oynayan, xalqın illərdir qəlbində
alovlandırdığı azadlıq arzusunu boğulmağa
qoymayan, cahanşümul əməlləri ilə Azərbaycan
xaqlının yaddaşında sarsılmaz, möhtəşəm
abidə ucaldan ümummilli lider Heydər Əliyev xalqın
xilaskarı olmuşdur. Əlbəttə, bu
sarsılmazlığı, bu tarixi yaratmaq heç də asan
olmamışdır. Xalqın təkidli tələbi
və iqtidarın məcburiyyət qarşısında qalaraq
davamlı xahişi ilə Heydər Əliyev Bakıya gəldi.
Yaranmış acınacaqlı vəziyyətdə
günahı olan iqtidar sahibləri ölkəyə rəhbərlik
etməyə mənəvi haqlarını itirdiklərinə
görə bir-birinin ardınca istefaya gedir və vəzifələrini
"dondururdular". Ölkədə və
hakimiyyətdə ağlasığmaz dərəcədə
baş alıb gedən bu xaos və gərginliyə baxmayaraq,
ulu öndər Heydər Əliyevin Bakıda olması respublika
əhalisində gələcəyə böyük ümidlər
yaradırdı və xalq Heydər Əliyevi tezliklə
yüksək vəzifələrdə görmək istəyirdi.
Bax belə
bir siyasi, sosial, iqtisadi və hərbi böhran şəraitində
- 1993-cü il iyunun 15-də Heydər Əliyev
ölkənin ali qanunvericilik orqanına sədr seçildi. Xalqın tələbi ilə hakimiyyətə bu
qayıdışın dövlətçiliyimiz
üçün misilsiz faydası oldu. Bu
tarixi qayıdış, sözün həqiqi mənasında,
Azərbaycan dövlətçiliyinin və millətimizin
qurtuluşu oldu və xalqın öz seçimində
yanılmadığı təsdiqini tapdı.
Daha sonra bu tarixi hadisəni unutmayan xalq dəfələrlə
Milli Məclisə müraciət edərək bu günün
Azərbaycan xalqının Milli Qurtuluş Günü kimi qeyd
olunması istəyini bildirdi. 1997-ci il iyunun
27-də Milli Məclis deputatlarının
çıxışında bu təklif dəstəkləndi
və 15 iyun Azərbaycan xalqının Milli Qurtuluş
Günü elan olundu.
Məhz Heydər Əliyevin hakimiyyətə
qayıdışı ilə Azərbaycanın dünya xəritəsindən
silinməsi təhlükəsi qısa zamanda aradan
qaldırıldı. Tezliklə separatçıların
respublikanı parçalamaq kimi məkrli siyasətlərinə
layiqli cavab verildi. Ordu quruculuğu sahəsində
mühüm işlər görüldü. Cəhbədə atəşkəs elan olundu. Dövlət çevrilişi cəhdlərinin və
terror aktlarının qarşısı alındı. Görkəmli dövlət xadimi, bütün bəşəriyyətin
ən nadir tarixi simalarından sayılan Heydər Əliyevin rəhbərliyi
ilə respublikamız dünyanın tanınmış neft
şirkətləri ilə "Əsrin müqaviləsi"
və digər kontraktlar imzaladı. İqtisadiyyatın
və həyatın bütün sahələrində
islahatlar, tərəqqi və dirçəliş
başladı. Bununla da 1993-cü ilin 15 iyun
günü xalqımızın mübarizələrlə dolu
yeni tarixinə yeni eranın başlanğıcı kimi daxil
oldu. Heydər Əliyev siyasəti
çoxsaylı siyasi, hərbi və iqtisadi təlatümlərin
sınağından üzüağ çıxaraq daha da
möhkəmlənmişdir. Heydər Əliyev
müdrik siyasəti, möhkəm əqidəsi və
uzaqgörənliyi sayəsində milli dövlətçilik
ideyasının gerçəkləşdirilməsinə,
müasir Azərbaycan dövlətinin qurulmasına və
xalqımızın müstəqillik arzusuna çatmasına
nail oldu. Çoxşaxəli fəaliyyəti
nəticəsində Azərbaycan qısa müddət ərzində
regionda öz mövqeyini möhkəmləndirdi, Şərqlə
Qərb arasında etibarlı körpü rolunu oynamağa
başladı, iqtisadi və mədəni potensialından
istifadə etməklə dünyanın dinamik inkişaf etməkdə
olan ölkələrindən birinə çevrildi.
Azərbaycanda müasir, demokratik hüquqi və dünyəvi
dövlət quruculuğu, vətəndaş cəmiyyətinin
təşəkkülü, elmin, təhsilin, mədəniyyətin
inkişafı Heydər Əliyevin adı ilə
bağlıdır. İqtisadiyyatın müxtəlif sahələrinin,
xüsusilə neft və qaz sənayesinin, kənd təsərrüfatının
inkişafı və dirçəldilməsi, eləcə də
dünya iqtisadiyyatına inteqrasiya bilavasitə ulu öndərin
fəaliyyətinin əsas istiqamətlərindən biri
olmuşdur. Yeni neft strategiyasının
uğurla həyata keçirilməsi, dünyanın
aparıcı ölkələrinin neft şirkətləri ilə
müqavilələrin bağlanması, Bakı-Tbilisi-Ceyhan,
Bakı-Supsa boru kəmərləri vasitəsilə neft məhsullarının
birbaşa dünya bazarlarına ixracı, eləcə də
qeyri-neft sektorunun inkişaf etdirilməsi, iqtisadiyyatın rəqabət
qabiliyyətinin artırılması və ölkəyə
xarici investisiyaların cəlb edilməsi Heydər Əliyev
uzaqgörənliyinin məntiqi nəticəsidir. Dövləti olmayan xalq ölümə məhkumdur.
Dövlətçilik xalqın "olum, ya ölüm" məsələsidir!
Heydər Əliyevin xalqımızın və tariximizin
qarşısında ən böyük xidmətləri kəskin
geosiyasi ziddiyyətlərin mövcud olduğu bir şəraitdə
Azərbaycan dövlətçiliyini xilas etməsində, Azərbaycanın
varlığını parçalanıb yox olmaq təhlükəsindən
qurtarmaqda idi.
Dövlətimizin qorunub saxlanılması isə
azadlığımızın, müstəqilliyimizin qorunub
saxlanması deməkdir, qurtuluş deməkdir! Azərbaycan
dövlətçiliyi ona qarşı yönəlmiş qəsdlərdən
uğurla çıxdı. Ümummilli
liderin qətiyyəti xalqa ruh yüksəkliyi gətirdi,
inamımızı özümüzə qaytardı, sabitlik və
əmin - amanlıq yaratdı. Ümummilli
lider Heydər Əliyevin Azərbaycana rəhbərlik etdiyi
dövrdə milli-mənəvi dəyərlərimiz bərpa
edilmiş, onun qətiyyəti, apardığı uğurlu
daxili və xarici siyasət sayəsində ölkəmiz
xaosdan xilas olmuş, sivil demokratik inkişaf yolu ilə inamla irəliləyərək
böyük nailiyyətlər qazanmışdır. Heydər Əliyev öz gücünə, təcrübəsinə
güvənən dahi siyasətçi kimi dəfələrlə
söylədiyi məşhur kəlamına sadiq
qaldığını sübut etdi ki, "Azərbaycanın
dövlət müstəqilliyi əbədidir,
sarsılmazdır, dönməzdir".
Ulu öndər Heydər Əliyevin Azərbaycana rəhbərlik
etdiyi dövrdə milli-mənəvi dəyərlərimiz bərpa
edilmiş, onun qətiyyəti, apardığı uğurlu
daxili və xarici siyasət sayəsində ölkəmiz
xaosdan xilas olmuş, sivil demokratik inkişaf yolu ilə inamla irəliləyərək
böyük nailiyyətlər qazanmışdır.
Ölkəmizdə ərzaq təhlükəsizliyinin təmin
edilməsi, MDB məkanında ilk dəfə olaraq torpaqların
şəxsi mülkiyyətə verilməsi, kənd təsərrüfatının
inkişafı ümummilli liderin səyi nəticəsində
mümkün olmuşdur. Heydər Əliyev hakimiyyətdə olduğu müddətdə
bölgələrin sosial-iqtisadi inkişafını daim diqqət
mərkəzində saxlamış, saysız-hesabsız zavod və
fabriklərin açılmasına, on minlərlə yeni
iş yerinin yaradılmasına nail olmuşdur. Ulu
öndərin respublikamıza rəhbərlik etdiyi dövrlərdə
digər rayonlarla yanaşı, o dövrdə Şamaxı
rayonunun tərkibində olan Qobustanın da iqtisadiyyatı xeyli
inkişaf etmiş və siması dəyişərək
müasir görkəm almışdır. Onun
hər gəlişi sadə zəhmət adamlarının
sevincinə səbəb olmuş, eyni zamanda rayonumuzun
iqtisadiyyatında mühüm istiqamət olan
üzümçülüyün,
taxılçılığın və
heyvandarlığın inkişafına xüsusi təkan
vermişdir.
Heydər Əliyevin müəllifi olduğu milli
inkişaf konsepsiyası bu gün onun siyasi varisi və layiqli
davamçısı, "Mən ona özüm qədər
inanıram!" dediyi Prezident İlham Əliyev tərəfindən
uğurla həyata keçirilir. Ötən 10 ilə
yaxın müddətdə respublikamızın inkişafı
ilə bağlı yüzlərlə sənaye və
infrastruktur layihəsinin reallaşdırılması,
regionların sosial-iqtisadi inkişafı ilə bağlı
iki dövlət proqramının qəbulu və icrası
bunun əyani təsdiqidir.
Dövlət
proqramlarının nəticəsi olaraq Qobustan rayonunda da
infrastruktur və istehsal müəssisələrinin
yaradılması istiqamətində xeyli iş
görülmüş, yeni iş yerlərinin
açılması əsas prioritetlərdən biri
olmuşdur. 10 min tonluq taxıl anbarının
inşası, Qobustan Bağ-bağat Mərkəzinin, eləcə
də ümumtəhsil məktəblərinin tikintisi və ya əsaslı
təmiri, idarə və müəssisələr
üçün bir sıra inzibati binaların, obyektlərin
yenidən qurulması rayonun sürətli
inkişafının əsas göstəriciləridir.
Bununla yanaşı həyata keçirilən
abadlıq-quruculuq işləri, küçə və
prospektlərin, park və xiyabanların yenidən qurulması,
müasir işıqlandırma sistemlərinin
quraşdırılması, Heydər Əliyev Mərkəzinin,
Heydər Əliyev parkının, Bayraq meydanı, rayon Gənclər
Mərkəzi, Qobustan İdman Kompleksi, 6 kəndi birləşdirən
Qobustan-Xilmilli avtomobil yolunun yüksək səviyyədə
asfaltlaşdırılması və eləcə də
sadalamadığımız digər tədbirlər Qobustan
rayonunu respublikamızın öndə gedən rayonlarından
birinə çevirmişdir. Azərbaycan Respublikasının
Prezidenti cənab İlham Əliyev rayonumuza səfəri
zamanı görülən işləri yüksək qiymətləndirərək
demişdir: "İndi bütün bölgələrdə
gedən inkişaf Qobustan rayonunda da hiss olunur".
Ölkə Prezidentinin rayonumuza olan diqqət və
qayğısı, rayonumuz haqqındakı bu fikri həm hər
bir qobustanlının yüksək sevincinə səbəb
olmuş, həm də bizi daha səylə işləməyə
sövq etmişdir. Məhz bunun nəticəsidir ki, lap yaxın zamanda,
2013-cü ilin may ayının 1-də rayonumuzda yenə cənab
Prezidenti qarşılamaq şərəfinə nail olduq!
Ölkə Prezidentinin son iki ildə rayonumuza iki dəfə səfər
etməsi və bir sıra mühüm obyektlərin - Qobustan
Olimpiya İdman Kompleksinin, Qobustan Gənclər Mərkəzinin,
Bayraq meydanının, Qobustan-Xilmilli avtomobil yolunun
açılışında iştirakı, ictimaiyyətlə
görüşü, bizə verdiyi tapşırıq və
tövsiyələr hər bir qobustanlının daha yüksək
əzmlə çalışmasına təkan vermişdir. İndi biz əminliklə deyə bilərik ki, ulu
öndər Heydər Əliyev tərəfindən
hazırlanmış Azərbaycanın inkişaf
konsepsiyası Qobustan rayonunun da timsalında öz əksini
çox aydın tapmışdır. Həqiqətən
də son bir neçə il ərzində
Qobustan rayonunun siması dəyişərək onun
inkişafı üçün çox böyük, tarixi
işlər görülmüşdür.
Bugünün
fövqündən baxanda Azərbaycanın gələcəyi
işıqlı və firavan görünür. Çünki bu gün müstəqil Azərbaycanın
sükanı ulu öndər Heydər Əliyevin siyasi varisi
İlham Əliyevin əlindədir. Onun rəhbərliyi
altında Azərbaycan misli görünməmiş
sosial-iqtisadi inkişafa nail olmuş, regionda beynəlxalq aləm
tərəfindən tanınan lider ölkə statusunu
qazanmışdır. Bütün bunlara görə bu gün
Azərbaycan xalqı Heydər Əliyev siyasi məktəbinin ən
layiqli yetirməsi - Prezident İlham Əliyevin siyasi və
iqtisadi kursu sayəsində ölkəmizin XXI əsrdə daha
yüksək zirvələr fəth edəcəyini
görür və buna qəlbən inanır!
Bəxtiyar
SADIQOV:
- Qobustan
iqtisadiyyatda özünün ənənələri olan
rayondur. Xüsusən kənd təsərrüfatı
fəaliyyəti üçün münbit şəraitin
olması burada heyvandarlığın və əkinçiliyin
inkişafı üçün geniş imkanlar açır.
Təsadüfi deyil ki, bu gün Azərbaycan rəhbərliyinin
ölkədə aqrar sahənin inkişafı istiqamətində
həyata keçirdiyi məqsədyönlü tədbirlərin
bəhrəsini Qobustanda daha yaxından görmək
mümkündür. İndi Qobustanda aqrar
sahədə həm keçmiş ənənələr bərpa
olunur, həm də tamamilə yeni istehsal sahələri
formalaşır. Bu barədə
çıxış üçün söz Qobustan rayonu
M.Hüseynzadə adına Dövlət Kənd
Təsərrüfatı İstehsalı Müəssisəsi MMC-nin
direktoru Zümrüd ŞƏRİFOVAya verilir.
Zümrüd
ŞƏRİFOVA:
- Bu
gün müstəqil Azərbaycanımız sosial-iqtisadi, həmçinin
kənd təsərrüfatı sahəsində yüksək
inkişaf tempi ilə irəliləyir və bu sahələrin
hər birində artıq nailiyyətlər əldə
olunmuşdur. Lakin 20 il əvvələ
qayıtsaq görərik ki, bu, heç də asan başa gəlməmişdir.
Azərbaycanda bütün iqtisadi, o cümlədən aqrar sahə dərin böhran
içində olmuş, iş yerləri bağlanmış, əhalinin
yaşayış səviyyəsi olduqca aşağı
düşmüşdü. Odövrkü iqtidarın səriştəsizliyi
ucbatından artıq Azərbaycanın müstəqil dövlət
kimi taleyi sual altına düşmüşdü. Məhz belə bir çətin vəziyyətdə
xalqın təkidli tələbinə cavab olaraq ümummilli
lider hakimiyyətə gəlmiş və qısa zaman kəsimində
vətənimizin üzləşdiyi problemlərin həllinə
yönəlmiş qətiyyətli addımlar
atmışdır. Ulu öndərin
hakimiyyətə gəlişi ilə istər sənaye, istər
iqtisadi və istərsə də aqrar sahələrin yenidən
inkişaf strategiyaları hazırlanaraq həyata keçirilməyə
başlanmışdır. İqtisadiyyatın
inkişafına dair dövlət proqramlarının
icrasına başlanılmış, torpaq islahatları
aparılmış, sahibkarlığın inkişafı
üçün zəmin yaradılmışdır. Heydər Əliyevin hazırladığı
inkişaf konsepsiyası bu gün möhtərəm Prezident
İlham Əliyev tərəfindən çox uğurla davam
etdirilməklə yanaşı, həm də müasir tələblərə
uyğun şəkildə zənginləşdirilmişdir.
Qobustan rayonu qədim əkinçilik və
heyvandarlıq ənənəsi olan aqrar rayonlardan biridir. Rayonumuz son illər
bu sahədə mühüm nailiyyətlər əldə edə
bilmişdir. Belə ki, "Azərbaycan Respublikası
regionlarının 2009-2013-cü illərdə sosial-iqtisadi
inkişafı Dövlət Proqramı"nın
icrası rayonumuzda da uğurla davam etdirilmişdir. Rayonda
istifadə olunan kənd təsərrüfatına yararlı
torpaq sahələri onun ümumi ərazisinin 67,4
faizini təşkil edir. Kənd təsərrüfatına
yararlı torpaq sahəsinin 37 faizi əkinəyararlı torpaq
sahələridir. Ötən il ərzində
rayonda 28.663 ha taxıl sahəsi biçilmiş, 57.614 ton məhsul
istehsal edilmişdir. Bu da ondan əvvəlki dövrə nisbətən
142,5 faiz təşkil edir. Hər hektardan
orta hesabla 20,1 sentner və yaxud da keçən
ilin müvafiq dövründən 3,4 sentner çox məhsul
yığılmışdır. Məhsuldarlığın
artmasının əsas səbəblərindən biri dövlətimizin
kənd təsərrüfatına ayırdığı
subsidiyaların nəticəsidir ki, insanlar bu güzəştlərdən
maksimum səmərəli istifadə edirlər. Ötən dövr ərzində kənd təsərrüfatı
məhsullarının istehsalının və emalının
dəstəklənməsinin davam etdirilməsi istiqamətində
4.564 ton gübrə rayon fermerlərinə güzəştli
şərtlərlə verilmişdir. Qobustan
şəhərində 10 min tonluq tutumu olan taxılsaxlama
anbarının tikintisi başa çatdırılmış,
hazırda üzümçülüyün inkişafı ilə
əlaqədar müvafiq tədbirlər hazırlanır.
Qobustan şəhərində 105 min başlıq
quşçuluq fabriki tikilmişdir. Bu il rayon üzrə 28.657 ha sahədə
38.726 ton buğda, 18.884 ton arpa olmaqla ümumilikdə 57.610 ton
və ya adambaşına 1,4 ton taxıl
istehsal edilmişdir. Bu da əvvəlki ildəkindən 42,5 faiz çoxdur. O cümlədən, 38.726 ton
buğda istehsal edilmişdir ki, bu da əvvəlki ildən 49,9 faiz çox olmaqla rayonumuzun tarixində ən
yüksək göstəricidir. 2013-cü ilin məhsulu
üçün 18.847 ha buğda, 7.921 ha arpa olmaqla 26.786 ha sahədə
taxıl əkilmişdir.
Rayonda aqroservis xidmətlərinin
yeni texnikalarla təchizatının
yaxşılaşdırılması məqsədilə Təklə
kəndində "Aqrolizinq" Səhmdar Cəmiyyətinin
Qobustan "Aqroservis" filialı üçün inzibati və
anbar binalarının tikintisi aparılır və tamamlanmaq
üzrədir. 2012-ci ildə rayona 5 ədəd
taxılbiçən kombayn, 10 ədəd şum traktoru, 15 ədəd
otbiçən, 12 ədəd dırmıq, 2 ədəd
toxumsəpən, 2 ədəd çiləyici aparat
alınmışdır.
Keçmişdə rayonumuzda
üzümçülük çox geniş ərazidə
inkişaf etdirilmişdi. Bu sahə öz növbəsində həm
də bütün kənd əhalisinin işinin təminatı
demək idi. Yəni qadınlarımız,
qızlarımız, cavanlarımız bu sahədə
böyük həvəslə işləyirdilər və
xeyli gəlir götürürdülər. Çox təəssüflər olsun ki, o vaxt Sovetlər
İttifaqı rəhbərlərinin, şəxsən
M.Qorbaçovun düşüncəsiz siyasəti nəticəsində
bu üzümlüklər ləğv edildi və
çoxsaylı insan işsiz qaldı. Amma
sevindirici hal kimi onu da qeyd edim ki, artıq rayonumuzda
üzümlüklərin salınması işinə başlanmışdır.
Yeni salınan üzümlüklərdə
sortlar seçilir, araşdırılır, ən yeni məhsuldar,
xəstəlik və ziyanvericilərə qarşı
davamlı tinglər əkilir.
Qobustanın
Yekəxana, Poladlı, Bədəlli, Təsi kəndlərində
nar bağlarının salınması çox sürətlə
inkişaf edir. Bu kəndlərdə insanlar
çox böyük həvəslə bu sahədə işləyir,
nar bağlarını günü-gündən genişləndirirlər.
Çünki bu məhsulun alıcıları kəndlərə
gələrək kəndlinin öz həyətindəcə məhsulun
dəyərini ödəməklə təhvil
götürürlər. Bu da kəndliyə
çox sərf edir.
Qobustana içməli suyun çəkilişi sakinlərin
ən ağrılı yeri idi. Artıq bu problem də
həll olunub. Aparılan quruculuq işlərinə
və xüsusilə su çəkilişinə görə
bütün qobustanlıların adından öz sevimli
Prezidentimizə - cənab İlham Əliyevə dərin təşəkkürümüzü
bildiririk. Suyun çəkilişi həm də
bostançılığın inkişafına zəmin
yaradır. Rayonumuzun su ilə təmin
olunmuş kəndlərində - Xilmillidə, Naburda,
Qaracüzlüdə, Ərəbçalbaşda
bostançılıq inkişaf etdirilir.
Qobustan rayonunda əsas məşğuliyyətlərdən
biri də heyvandarlıqdı. Hal-hazırda rayonumuzda
30.000 baş qaramal, 189.000 baş davar mövcuddur. Bu da keçmiş sovet dövrindəki göstəricimizdən
bir neçə dəfə artıqdır. Rayonda ötən
dövr ərzində 5259,9 ton ət, 16.885 ton süd, 7,2 milyon
ədəd yumurta, 340,4 ton yun istehsal edilmişdir. Hal-hazırda respublikamıza Almaniyadan, Hollandiyadan
yüksək məhsuldar cins düyələrin lizinq yolu ilə
gətirilməsi davam etdirilir. Rayonumuzda da
bu dövlət əhəmiyyətli işin dəstəklənməsi
sevindiricidir. Rayonun Çalov kənd sakini
Rəhim Rəhimli Almaniyadan 10 baş "Holştinfriz"
cinsindən olan boğaz düyələri lizinq yolu ilə
alıb gətirmişdir. Alınmış
cins mallar üçün tələb olunan qaydada, yəni
zoobaytarlıq tələblərinə cavab verən tövlə
tikmiş, isti və soyuq su təminatı, işıq,
sağım aparatı və sair avadanlıqlarla lazımi
şərait yaratmışdır. Bununla
yanaşı, heyvandarlıqda süni mayalama işinin tətbiq
olunması işinə də başlanmışdır.
Bütün respublikamızda olduğu kimi, Qobustanda da
iqtisadiyyatımız uğurla inkişaf edir və
insanlarımız çox böyük həvəslə bu
quruculuqda iştirak edirlər.
Bəxtiyar
SADIQOV:
- Azərbaycan
iqtisadiyyatının inkişafı və ölkəmizin
maliyyə imkanlarının artması paralel olaraq digər sahələrin
yüksəlişi üçün imkanlar açır. Biz bunu sosial sahədə həyata keçirilən
uğurlu fəaliyyətin timsalında aydın görürük.
Sosial sahəyə diqqət, xüsusi
kateqoriyalı insanlara sosial dəstək hər yerdə
uğurlu bəhrələrini verir. Eyni
zamanda, bu gün Azərbaycanın bütün şəhər
və kəndləri abadlaşır, yenidən qurulur, gözəlləşir.
Təbii ki, Qobustan da bu proseslərdən kənarda
deyil və bu barədə rayon Ağsaqqallar
Şurasının sədri Şıxbala BAYRAMOV
danışacaq.
Şıxbala
BAYRAMOV:
-
Ümummilli liderin 1993-cü ildə hakimiyyətə gəlişi
ilə bütün sahələrdə ciddi dönüş
yarandığı kimi, sosial və iqtisadi sferalarda da əsaslı
yüksəlişə nail olunmuşdur. 1993-2003-cü
illərdə ulu öndər Heydər Əliyev tərəfindən
imzalanan sənədlər, həyata keçirilən tədbirlər
müstəqil ölkədə daim güclənən iqtisadi
təməl üzərində etibarlı sosial müdafiə
sisteminin yaradılmasına, vətəndaş
firavanlığının təmin olunmasına xidmət
etmişdir.
1993-cü ildən etibarən pensiya və müavinətlər
sahəsində dövlət təminatlarının
artırılması, əməkhaqlarının ilbəil
yüksəlişinə nail olunması, ayrı-ayrı
kateqoriyalara pul kompensasiyalarının təyin edilməsi ilə
yanaşı, inflyasiyanın qarşısının
alınması mühüm bir addım olmuş və həmin
sosial ödənişlərdən əhalinin səmərəli
istifadəsinə imkan yaranmışdır. Digər tərəfdən,
1990-cı illərin ortalarında ölkədə aqrar
islahatların uğurla həyata keçirilməsi iqtisadi fəal
əhalinin böyük hissəsini təşkil edən kənd
əhalisinin məşğulluğuna böyük dəstək
olmuşdur.
Ənənəvi
təminatlarla yanaşı əlil və şəhid ailələrinin
dövlət hesabına mənzillərlə, əlillərin
minik avtomobilləri, müxtəlif reabilitasiya vasitələri
ilə təminatı, bərpa-müalicə və protez xidmətinin
təkmilləşdirilməsi və bölgələr üzrə
genişləndirilməsi, aktiv məşğulluq tədbirlərinin
həyata keçirilməsi və s. sahələrdə tədbirlərə
də məhz ulu öndər Heydər Əliyevin təşəbbüsü
və xeyir-duası ilə başlanmışdır. 2003-cü ildən sonrakı dövrdə möhtərəm
Prezident İlham Əliyevin rəhbərliyi ilə ölkəmiz
keyfiyyətcə yeni inkişaf və sürətli tərəqqi
mərhələsinə qədəm qoymuşdur. Düzgün müəyyənləşdirilmiş
siyasət ölkəni inkişafa, tərəqqiyə
aparır. 21 illik müstəqillik tarixinə
malik olan ölkəmizin bu gün beynəlxalq aləmdə iqtisadi
möcüzələr diyarı, Cənubi Qafqazın parlayan
ulduzu kimi tanınması və mövqeyini möhkəmləndirməsi
də respublikamızda həyata keçirilən siyasətin
düzgünlüyünün təsdiqidir.
Ümummilli liderin inkişaf strategiyasının layiqli səviyyədə
davam etdirilməsi ölkəmizin bütün sahələrdə,
o cümlədən sosial sahədə yeni tarixi nailiyyətlər
əldə etməsinə səbəb olmuşdur. Son 9 ildə ölkə
iqtisadiyyatı 3 dəfədən çox artmış, 1
milyon 200 mindən artıq iş yeri yaradılmış,
işsizlik 5,2 faizə, yoxsulluq 6 faizə
enmişdir. Möhtərəm dövlət
başçısının siyasətinin mərkəzində
yoxsulluğun tam olaraq aradan qaldırılması, insanların
rifahının daim yüksəldilməsi dayanır.
Bunun nəticəsidir ki, iqtisadi tərəqqi prosesləri
ilə paralel olaraq əhalinin sosial müdafiəsi sahəsində
tədbirlər də ilbəil güclənir. Artıq bu
vaxtadək 5 minə yaxın əlil və şəhid ailəsi
mənzillə, 3500-dən çox əlil minik avtomobili,
yüzlərlə əlil müxtəlif reabilitasiya
avadanlıqları ilə təmin edilmişdir. Həmçinin
hər il 8 mindən çox əlilliyi
olan şəxsə bərpa-müalicə xidməti göstərilir.
Əlillərin ölkə daxilində və
xaricdə müalicəsi, müvafiq kateqoriyalardan olan vətəndaşların
müavinət və yardımla təminatı uğurla davam
etdirilir.
Ölkədə aparılan bu uğurlu siyasətin
davamı olaraq rayonumuzda da bu sahəyə xüsusi diqqət
ayrılmışdır. Son illər rayonumuzda aparılan
genişmiqyaslı quruculuq-abadlıq işləri,
yaşıllaşdırma, ağac əkini
kampaniyasının geniş vüsət alması, kəndlərimizin
ad göstəricilərinin müasir memarlıq üslubu ilə
tərtibi, məktəb binalarının müasir standartlara
cavab verən formada tikilməsi, kəndlərimizdə
xeyir-şər evlərinin inşası, rayon mərkəzi
olan Qobustan şəhərinin günbəgün gözəlləşməsi,
80 faiz kəndlərimizə qaz xəttinin çəkilişi,
su probleminin aradan qaldırılmasına yönəlmiş
layihənin icrasının uğurla davam etdirilməsi və
sadalamadığım bir sıra işlər rayonumuzun da
inkişafının əyani göstəricisidir. Son illər rayon əhalisinin rifah halının,
yaşayış şəraitinin yaxşılaşması
diqqət çəkir. Rayonda yaşayan məcburi
köçkün ailələrinə, şəhid ailələrinə,
Böyük Vətən müharibəsi iştirakçılarına
və Qarabağ müharibəsi əlillərinə xüsusi
diqqət göstərilir. Rayonumuzda son 10 ildə 2813-ü daimi olmaqla 11.363 yeni
iş yeri açılmışdır. 2012-ci ildə həyata
keçirilmiş tədbirlər nəticəsində rayonda
2.237 yeni iş yeri yaradılmışdır ki,
bunlardan 782-si daimi iş yerləridir.
10 nəfər sosial işçi rayonun şəhər
və kəndlərində 82 nəfər tək, tənha və
kimsəsiz vətəndaşa sosial məişət xidməti
göstərir. Hər il əlillərə diqqət
və qayğının nəticəsi olaraq müalicə
pansionatlarına göndərişlər verilir, respublikamızın
hər yerində olduğu kimi, rayonumuzdan olan əlil vətəndaşlar
da pulsuz avtomaşınlar alırlar. Möhtərəm
Prezidentimizin əlil və şəhid ailələrinə
göstərdiyi diqqət və qayğı nəticəsində
son illər Qobustan rayonunda 2 şəhid ailəsi və 26
müharibə əlili mənzillə təmin olunmuşdur.
Rayonda 4.947 nəfər pensiya alır ki,
onların da pensiyaları vaxtlı-vaxtında
çatdırılır.
Bu gün Azərbaycanda sosial rifahın təmin
olunması sahəsində əldə olunan nailiyyətlər
ölkədə xalq-Prezident birliyinin daim möhkəmlənməsinə
səbəb olmuşdur. Mən bir ağsaqqal kimi əminliklə demək istəyirəm
ki, bütün
qobustanlılar ulu öndərin layiqli davamçısı
möhtərəm Prezident İlham Əliyevin uğurla
apardığı daxili və xarici siyasəti dəstəkləyir,
ona vətənimizin taleyüklü məsələlərinin
həllində müvəffəqiyyətlər arzu edərək
dərin minnətdarlıqlarını bildirirlər.
Bəxtiyar
SADIQOV:
- Ulu
öndər Heydər Əliyevin 20 il əvvəl siyasi hakimiyyətə
dönüşü ilə xalqımız təhlükələrdən,
müstəqilliyini itirməkdən qurtuldu. Xilaskarlıq
missiyasını uğurla başa vuran Heydər Əliyevin əsasını
qoyduğu siyasi kurs bu gün Azərbaycanı regionun lider və
dinamik inkişaf edən dövlətinə çevirib.
Bu mənada Azərbaycanın 20 il əvvəllə
bugününün müqayisəsi Milli Qurtuluş
missiyasının dövlətçilik tariximizin parlaq səhifəsi
olduğunu göstərir. Milli Qurtuluş missiyasının əyani
nəticəsi Qobustanın da dünəni ilə bugününün
müqayisəsində öz real təsdiqini
tapır. Bu barədə danışmaq
üçün söz Qobustan rayonu Heydər Əliyev
İrsini Araşdırma Mərkəzinin direktoru Ruslan
ŞAHBAZOVa verilir.
Ruslan
ŞAHBAZOV:
- Azərbaycan
tarixinə Milli Qurtuluş Günü kimi daxil olmuş
1993-cü ilin 15 iyunu dövlətçiliyimizin xilası
günüdür. Bu baxımdan vətənini, xalqını
sevən, həmçinin o çətin və
ağrılı günləri görən, yaşayan insanlar 15
iyun - Milli Qurtuluş Gününün dövlətçiliyimizin
tarixinə qızıl hərflərlə
yazıldığını yaxşı bilir. Hər
kəs yaxşı dərk edir ki, 15 iyun - ümummili lider Heydər
Əliyevin xalqının, dövlətinin taleyinə sahib
çıxdığı bir gün olmaqla yanaşı,
Prezident İlham Əliyevin rəhbərliyi altında
hazırda dünya siyasi arenasında xüsusi yerə malik,
mühüm iqtisadi göstəricilərə və
inkişafa imza atan, qısa müddətdə yerləşdiyi
regionun lider dövlətinə çevrilən müasir Azərbaycanın
təməlinin atıldığı gündür.
1993-cü
ilin iyununda parçalanmanın, sözün əsl mənasında
məhvin astanasında dayanan, müstəqilliyi, suverenliyi, ərazi
bütövlüyü təhlükə ilə üzləşən
Azərbaycan ulu öndər Heydər Əliyevin xalqın təkidi
və tələbi ilə siyasi hakimiyyətə
qayıdışı sayəsində nəinki bu ağır
günləri arxada qoydu, hətta qısa bir müddətdə
siyasi sabitliyə qovuşdu. 1994-cü il
sentyabrın 20-də ümummilli liderin əsasını
qoyduğu yeni neft strategiyasının məntiqi nəticəsi
və ölkəmizin inkişafında böyük paya malik
"Əsrin müqaviləsi"nin imzalanması isə Azərbaycanın
həyatında, iqtisadiyyatımızda inkişafa təkan
verdi. Eyni zamanda sonrakı illərdə
atılan addımlar, görülən işlər modern,
qüdrətli, varlı, vətəndaşının sosial
rifahını təmin etməyi bacaran bir Azərbaycanın
ortaya çıxmasında rol oynayan səbəblərə
çevrildi. Bu mənada 1995-ci ildə ulu
öndər Heydər Əliyevin rəhbərliyi ilə
hazırlanan ölkə Konstitusiyasının yeri xüsusi və
əhəmiyyətlidir. Demokratik inkişaf
yolunda əldə olunan nailiyyətlər, insan hüquq və
azadlıqlarının qorunması, genişləndirilməsi
istiqamətində aparılan davamlı fəaliyyət,
ölkəmizdə yaradılan siyasi sabitlik bugünkü
müasir və inkişaf etmiş Azərbaycanın təməl
prinsiplərinə çevrildi. Bəli, məhz
bu mənada 15 iyun - Milli Qurtuluş Günü həm də
qüdrətli və güclü Azərbaycanın təməlinin
atıldığı gündür.
Daha dəqiq
desək, 15 iyun 1993-cü il
bugünümüzün uğurları fonunda tariximizin
dönüş nöqtəsidir. Çünki
1993-cü ilin 15 iyunu ulu öndər Heydər Əliyevin siyasi
uzaqgörənliyi və böyük dühası sayəsində
siyasi sabitliyə qovuşmuş Azərbaycanın
inkişafının əsasının qoyulduğu tarixdir.
Müstəqilliyimizin əldə olunmasından ötən 20 il tarixi baxımdan çox qısa müddət
sayılır.
Bizim hər birimizə azərbaycanlı
olmağımızla fəxr etməyi məhz Heydər Əliyev
öyrətmişdir. O, böyük qürurla deyirdi: "Mən fəxr edirəm
ki, mən azərbaycanlıyam". Bu gün
bizim regionda lider olan müstəqil dövlətimiz,
güclü iqtisadiyyata malik ölkəmiz, dünya
şöhrətli siyasi xadim Heydər Əliyev vardır.
Onun uğurlu siyasəti nəticəsində Azərbaycan
gündən-günə qüdrətlənir və beynəlxalq
aləmdə nüfuz sahibi olan bir dövlətə
çevrilir. Bunun sayəsində biz həm
azərbaycanlı olmağımızla, həm də Azərbaycanımızla
fəxr edirik.
Tarixən hər bir xalq özünün xoşbəxt gələcəyə
olan ümidlərini ilk növbədə gənc nəsillə
bağlayır. Gənc nəslin yetişdirilməsi hər
bir ölkə üçün ən başlıca məsələdir.
Çünki ölkənin gələcəyi,
müqəddəratı indiki gənclərdən
asılıdır. Gənc nəslin vətənpərvərlik
ruhunda tərbiyə olunması onun mənsub olduğu
xalqın rifahının, ölkənin çiçəklənməsinin
rəhnidir. Bu gün böyük iftixarla
demək olar ki, müasir Azərbaycan gəncliyi milli-mənəvi
dəyərlərimizi, doğma ana dilimizi, ata-babalardan qalan
gözəl adət-ənənələrimizi göz bəbəyi
kimi qoruyub yaşadır. Ulu öndərin ən
böyük xidmətlərindən biri də o idi ki, gənclərlə
bağlı məsələləri həmişə öz
siyasətinin əsas tərkib hissələrindən biri hesab
edir, gənclərin imkan və bacarıqlarını yüksək
qiymətləndirir, onların problemlərinin həlli istiqamətində
həyata keçirilən tədbirlərə xüsusi önəm
verirdi. Məhz bunun nəticəsidir ki, bu
gün ölkə gəncləri ulu öndər Heydər Əliyevə
və onun layiqli davamçısı, Prezident İlham Əliyevə
böyük etimad göstərir və özünün gələcək
inkişaf perspektivini onun adı ilə bağlayırlar.
Bəli, artıq bu gün Heydər Əliyevin
arzuladığı gənclik yetişib. İndi
onların məqsədli şəkildə irəlilədiyi
bir yol var!
Vaxtilə
bu ərazidən keçənlərdə bir kəndi
xatırladan, indi isə rayon mərkəzi olan Qobustan şəhəri
2007-ci il oktyabr ayında dövlət
başçısının rayonumuza tarixi səfərindən
sonra böyük inkişaf mərhələsinə qədəm
qoydu. Həmin gündən rayonumuzda idarə,
müəssisə və təşkilatların inzibati
binaları müasir standartlara uyğun, texniki avadanlıqlarla
təmin olunmuş vəziyyətdə istifadəyə verildi.
Prezident İlham Əliyevin son iki ildə iki dəfə
rayonumuza səfər etməsi, hər səfəri zamanı
yeni binaların, yolların, istirahət mərkəzlərinin,
Qobustan İdman Kompleksinin, Gənclər Mərkəzinin və
digər müasir standartlara cavab verən obyektlərin
açılışını etməsi buna əyani
misaldır. Bunları sadalamaqda fikrim sizləri bir necə il öncəyə nəzər salmağa səsləməkdir.
Həmin illərdə adi bir tədbirin
keçirilməsi üçün idarə və təşkilat
binalarında yer tapa bilmirdik. Uçmuş,
istiliyi olmayan köhnə binalarda yerləşən idarələrdə
oturmaq üçün belə yer tapılmırdı.
Bu gün isə rayonumuzda tədbirləri keçirəndə
tərəddüd içində qalırıq, hansı yerdə
keçirək: Heydər Əliyev Mərkəzindəmi, Gənclər
Mərkəzindəmi, Heydər Əliyev parkındamı,
Bayraq meydanındamı, idarələrin, məktəblərin
konfrans zalındamı? Seçim etməkdə
çətinlik çəkirik, çünki hamısı
bir-birindən gözəl, yaraşıqlı və tədbirlərin
keçirilməsinə uyğun məkandır. Əslində bu sadaladıqlarımıza nəzər
saldıqda heç keçmiş dövrdəki rayonumuzla
bugünkü rayonumuzu müqayisə etməyə dilimiz gəlmir.
Bu gün
rayonumuzun ümumtəhsil məktəb şagirdləri, gənclər,
ümumilikdə Qobustan rayon sakinləri mütəmadi olaraq
Heydər Əliyev adına parkdakı Heydər
Əliyev Mərkəzində ulu öndərin həyat və
fəaliyyətinin müxtəlif anlarını əks etdirən
fotoşəkillərlə, əyani vəsaitlərlə,
kitablarla tanış olurlar.
Bütün rayon sakinləri adından bildirirəm ki,
Milli Qurtuluş missiyasının əyani nəticəsi Qobustanın
dünəni ilə bugününün müqayisəsində
öz real təsdiqini tapır. Biz Qurtuluş
missiyasının davamlılığı üçün
Prezident İlham Əliyevin ətrafında indi daha sıx birləşmişik.
Bəxtiyar
SADIQOV:
- Azərbaycanın
faktiki müstəqilliyinin qazanılması, möhkəmləndirilməsi,
yüksəlişi, inkişafı Heydər Əliyevin adı
ilə bağlıdır. Son 10 ildə Prezident
İlham Əliyevin rəhbərliyi ilə
qazandığımız bütün nailiyyətlər
göstərir ki, Heydər Əliyev siyasi kursunun alternativi
yoxdur. Keçirilən bütün
seçkilərin nəticələri də göstərir ki,
xalqımız Heydər Əliyev kursunu Azərbaycanın
dövlətçilik qüdrətinin və davamlı
inkişafının əsas təminatçısı kimi qəbul
edir və bu mövqe dəyişməzdir. Bu mövzuda çıxış üçün
söz "Müasir qadın və cəmiyyət"
İctimai Birliyinin sədri Fidan MAQSUDOVAya verilir.
Fidan
MAQSUDOVA:
- Ulu
öndər Heydər Əliyevin timsalında Azərbaycan
xalqı bəşəriyyətin ən yeni tarixinə öz
imzasını yazan dahi bir övlad yetirdi. Onun
dühasının işığı ilə xalqımız
milli oyanış və dirçəliş yolu keçərək
öz müstəqil dövlətçiliyini bərpa etdi,
möhkəmləndirdi, bir millət kimi yetkinləşdi,
birliyə, həmrəyliyə qovuşdu. Bir
çox tarixi məqamlar bunu təsdiqləyir, sübut edir.
Azərbaycan dövlətçiliyinin xilası
və bərpası kimi tarixə düşən 1993-cü
ilin 15 iyunu da məhz ölkəmizdə dirçəlişin,
inkişafın təməlinin qoyulduğu tarixdir. Azərbaycan
tarixinə Milli Qurtuluş Günü kimi daxil olmuş həmin
vaxtdan isə 20 il keçir. Bir dövlətin tarixi üçün bu müddət
çox qısa bir zamandır. Amma həmin
tarixdən ötən bu illər çox şeyləri
xalqımızın xeyrinə, inkişafına doğru dəyişdi.
Bu dövr ərzində Azərbaycan xalqı
milli dövlətini yaradaraq müstəqilliyini əbədi
etdi. Əgər həmin gün xalqın istəyi və
tələbi ilə Heydər Əliyevin hakimiyyətə
tarixi qayıdışı gerçəkləşməsəydi,
bu gün biz müstəqil, qüdrətli, tərəqqi edən,
yeniləşən və demokratikləşən Azərbaycan
dövlətindən danışa bilməzdik! Bu böyük
qayıdış millətimizin və dövlətimizin
qurtuluşuna yol açdı! Bu gün
demokratiya, sabitlik və davamlı inkişaf müasir Azərbaycanı
xarakterizə edən əsas amillərdir. Məhz
bu mühüm strateji amillərin vəhdəti sayəsində
müstəqil dövlət kimi çox gənc olmasına
baxmayaraq, Azərbaycan qısa vaxt ərzində
sıçrayışa və hərtərəfli tərəqqiyə
nail oldu, dünya və Avropa ailəsində öz layiqli yerini
tutdu. İndi Azərbaycan artıq öz
inkişafının keyfiyyətcə elə yüksək mərhələsinə
daxil olub ki, o, artıq dünyada cərəyan edən proseslərə
təsir göstərmək iqtidarındadır.
Heydər Əliyevin
adı bu gün sözün həqiqi mənasında Azərbaycan
dövlətinin rəmzi kimi səslənir. Azərbaycan gənci olaraq bu gün çox önəmli
olan bu məclisdə vətəndaş cəmiyyətini təmsil
etdiyim üçün icazənizlə bu sahənin
inkişafında ümummilli liderin xidmətlərindən və
bugünkü davamlı inkişafından da
danışım. Bəli, ümummilli
lider Heydər Əliyev Azərbaycan dövlətçiliyinin
bütün vacib sferalarda möhkəmləndirilməsi ilə
yanaşı güclü vətəndaş cəmiyyətinin
formalaşması məsələsini də prioritet istiqamət
kimi diqqətində saxlayırdı. Təbii
ki, belə böyükmiqyaslı vətəndaş cəmiyyəti
institutlarının formalaşdırılması qısa zaman
kəsiyində reallaşa bilməzdi. Bunun
üçün ilk növbədə ölkədə
hüququn aliliyi təmin edilməli, sabit ictimai münasibətlər
zəmini formalaşdırılmalı, beynəlxalq təcrübə
öyrənilməli, QHT sektoru cəmiyyətə
daşınmalı və bir sıra digər mühüm mərhələlər
keçilməli idi. Heydər Əliyevin
bu sektorun strateji planda inkişafı üçün
atdığı addımlar tezliklə öz konkret nəticələrini
göstərməyə başladı. 1993-cü
ilin avqustunda Heydər Əliyev vətəndaş cəmiyyəti
institutlarının ən fəal təbəqəsi - gənclər
təşkilatlarını bir araya gətirərək onlarla
ilk və tarixi görüşünü keçirdi.
Bununla da gənclərə vətəndaş cəmiyyəti
quruculuğu prosesində öncül yer verilmiş oldu və
çox əhəmiyyətli ictimai münasibətlərə
start verildi. Nəticədə isə ölkəmizdə
sayı iki yüz əlliyə yaxınlaşan gənclər
təşkilatının sərbəst çalışmaq
imkanının, gənc, bacarıqlı, dövlətinə
sadiq yeni liderlərin meydana çıxmasının əsası
qoyuldu. Heydər Əliyev hətta BMT-ni Azərbaycanda
vətəndaş quruculuğuna cəlb edərək şəxsi
təşəbbüsü ilə birgə layihələr həyata
keçirmək haqqında saziş imzaladı və 1999-cu ildə
95 təşkilat tərəfindən Bakıda Milli
Qeyri-Hökumət Təşkilatlarının Forumu (MQF) təsis
edildi. Cəmiyyətdə humanizm prinsiplərinin
bərqərar olmasına şərait yaradan digər bir məsələ
isə 1998-ci ildə Azərbaycan Respublikasında ölüm
cəzasının ləğv olunması oldu ki, bununla
bağlı qanun qəbul edilərək ölüm
hökmü cəza sistemindən çıxarıldı və
ömürlük azadlıqdan məhrumetmə cəza
növü ilə əvəz olundu.
Müasir dövrdə cəmiyyətə təsir
imkanı baxımından ən aktiv vətəndaş cəmiyyəti
institutlarından biri də kütləvi informasiya vasitələridir. Məhz bu
baxımdan adıçəkilən sektorun inkişaf səviyyəsi
həm də dövlətdəki ümumi yüksəliş səviyyəsinin,
demokratik durumun göstəricisi sayılır. Müstəqilliyimizi
bərpa etdikdən cəmi beş il sonra
ümummilli lider Heydər Əliyev tərəfindən
"Qlavlit" - senzura idarəsi ləğv edildi. Azərbaycan Respublikasının Prezidenti tərəfindən
"Kütləvi informasiya vasitələri haqqında"
qanun imzalanaraq qüvvəyə mindi. 2003-cü
ildə isə Mətbuat Şurası yaradıldı.
2002-ci ildə ümummilli liderin imzaladığı fərmana
əsasən Milli Televiziya və Radio Şurası
yaradıldı ki, bu gün ölkəmizdə otuzadək mərkəzi
və regional televiziya və radionun fəaliyyət göstərməsi
məhz Heydər Əliyevin KİV-lərlə bağlı uzaqgörən siyasətinin
bariz göstəricilərindən sayılır. 1998-ci ildə ilk dəfə insan hüquqları
üzrə müvəkkil institutunun, ombudsmanın təsis
edilməsi, 1999-cu ildə bələdiyyələrin
yaradılması da vətəndaş cəmiyyətinin
inkişafına töhfə verən göstəricilərdəndir.
Azərbaycan
gəncləri ümummilli liderin bizlərə əmanət
qoyub getdiyi zəngin irsi bu gün də, sabah
da, gələcəkdə də daim öyrənməli, onun əsas
mahiyyətini dərk edərək özümüzdən
sonrakı nəsillərə ötürməlidir. Bu zəngin
irs müstəqil Azərbaycan dövlətinin
sütun dirəkləridir. Ümumilikdə isə ictimai həyatımızın
elə bir sahə və istiqamətini tapmaq mümkün deyil
ki, orada Heydər Əliyevin ideyasının təntənəsi,
izi, hərarəti duyulmasın! Biz bunu respublikamızın bir
parçası olan gözəl, saf təbiətə malik
Qobustanımızda da hər gün, hər an
duymaqdayıq. Son illər bir-birindən gözəl,
yaraşıqlı inzibati binaların, parkların, mərkəzlərin,
sosial obyektlərin əksəriyyətinin
açılışı dövlət
başçımızın iştirakı ilə
reallaşır.
Dünəninə
hörmət, bugününə qayğı, gələcəyinə
etimad göstərən dövlət başçısı
İlham Əliyevin rayonumuza tez-tez səfər etməsi,
insanlarla səmimi münasibəti, onların problemlərinə
diqqətlə yanaşması da məhz Heydər Əliyev
ideyalarının davam və inkişaf etməsinin göstəricisidir.
Fikirlərimi yekunlaşdıraraq ümummilli lider Heydər Əliyevin
Dünya azərbaycanlılarının birinci
qurultayındakı müraciətini diqqətinizə
çatdırmaq istəyirəm. Ulu öndər bütün
dünya azərbaycanlılarına müraciətlə
bildirmişdir: "Azərbaycanlılar, harada
olmağınızdan, harada yaşamağınızdan
asılı olmayaraq hər zaman Azərbaycan haqqında, onun
bugünü və gələcəyi haqqında, müstəqilliyimizin
əbədiliyi haqqında düşünün!" Zənnimcə,
ümummilli liderin bu fəlsəfi fikri, nəsihəti
xüsusilə Azərbaycan gəncliyini daha çox
düşündürməlidir. Çünki min bir əziyyət,
qan bahasına yaradılmış müstəqil dövlətimizin
idarəçiliyi, inkişafı, tanıdılması bizim fəaliyyətimizlə
bağlıdır. Dövlətimizin yeritdiyi gənclər
siyasətinin də elə əsl qayəsi, məğzi budur.
Ona görə də biz gənclər Heydər Əliyevin
azrbaycançılıq ideologiyasına sadiqlik nümayiş
etdirərək hər zaman dövlətimizi yad təsirlərdən
qorumağı bacarmalı, adını uca tutmalıyıq.
Bəxtiyar SADIQOV:
-
Heydər Əliyev xalqımızın qürur mənbəyi,
qazandığımız bütün nailiyyətlərin səbəbkarı,
uğurlu gələcəyimizin təməlini qoyan
böyük şəxsiyyət, dahi siyasətçi idi. Bu
gün müstəqil Azərbaycan və onun əldə etdiyi
bütün uğurlar məhz onun titanik fəaliyyətinin nəticələridir.
Ulu öndər deyirdi: "Yaratdığım hər bir
şey mənim üçün əzizdir. Zavod da, fabrik də,
elektrik stansiyaları da, yol da, körpü də, ev də,
bina da, saray da - hər bir şey. Amma mənim
üçün hər şeydən əziz mənim xalqımdır,
mənim vətənimdir, mənim torpağımdır".
Bu
müqəddəs amala bütün həyatı boyu sadiq qalan
Heydər Əliyev elə böyük vətənpərvər,
müdrik dövlət xadimi idi ki, xalqının və
dövlətinin müqəddəratını yalnız öz
fəaliyyəti dövrü üçün
düşünmürdü. Bütün parametrlərə
görə haqlı olaraq dünyanın ən böyük azərbaycanlısı
adını daşımağa layiq olan Heydər Əliyev Azərbaycanın
nailiyyətlərinin, zəfərlərinin sonrakı onilliklərdə
də davam etməsi, müəllifi olduğu milli inkişaf
strategiyasının bəhrələrinin gələcək nəsillər
üçün də daha əlamətdar olması naminə
fədakarlıqla çalışırdı. Son illərin
uğurları da bunu təsdiq edir. Azərbaycan Prezidenti
İlham Əliyevin rəhbərliyi ilə Azərbaycan
dövlətinin 2003-cü ildən bəri qazandığı
nailiyyətlər, keçdiyi möhtəşəm
inkişaf yolu göstərir ki, Heydər Əliyev siyasi kursu yaşayır, ulu öndərin
ideyaları hər bir sahədə real həyata vəsiqə
alır! İndi Azərbaycan həm BMT Təhlükəsizlik
Şurasının, həm də kosmik klubun
üzvüdür! Dünyanın əksər dövlətlərinin
həsəd apardığı bu uğurlara gənc müstəqil
dövlət olan Azərbaycan artıq nail olub! Bütün
bunları xalqımız görür və qiymətləndirir!
Bu mənada artıq qarşıdan gələn prezident
seçkiləri ilə bağlı Azərbaycan
xalqının mövqeyi bəllidir! Bu mövqe də ondan ibarətdir
ki, Heydər Əliyevin alternativi olmayan siyasi kursu cənab
İlham Əliyevin rəhbərliyi ilə davam edəcəkdir!
Azərbaycan.- 2013.- 12
iyun.- S. 8-9.