Qədimliyin naxışları - Bakı kəndləri
Prezident İlham Əliyevin 27 fevral 2006-cı ildə "Bakı şəhərinin, qəsəbələrinin 2006-2007-ci illər üzrə sosial-iqtisadi inkişafının sürətləndirilməsinə dair Tədbirlər Proqramı" və 2011-ci il mayın 4-də imzaladığı "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı" çərçivəsində tarixçi jurnalist Təranə Cəbiyevanın "Bakı kəndlərinə səyahətim" adlı ensiklopedik-etnoqrafik kitabı işıq üzü görüb.
Azərbaycan
Milli Elmlər Akademiyasının (AMEA) prezidenti Akif Əlizadə
yeni nəşrə yazdığı ön sözdə
öz təəssüratlarını belə qələmə
alıb: "Bakı kəndlərinin etnoqrafiyası, o
cümlədən mədəniyyəti, adət-ənənələri,
dini inancı ətraflı araşdırılıb. Burada
tarixi abidələr və memarlıq nümunələrinin hər
biri öz tarixçəsi ilə kitaba oxucuların
böyük marağını qazandırır. Tarixə aid səhifələrdə
ermənilərin azərbaycanlılara qarşı törətdiyi
1918-ci il mart soyqırımı barədə mühüm
faktlar, həmçinin həmin ilin sentyabrında xilaskar
türk ordusunun Bakıya daxil olması da təfərrüatı
ilə əks olunur".
Dörd
bölmədən ibarət yeni nəşrdə Şərq və
Qərb memarlığının həmişəyaşar ənənələrini
məharətlə birləşdirən qədim məkan -
Bakının mənbələrdə əks olunmuş tarixinə
ayna tutulub. Müəllif çalışıb ki, hər bir
kənd haqqında oxucuda ətraflı və dolğun təsəvvür
yaratsın. Bu kitab Bakı kəndlərinə çox
maraqlı bir səyahətdir. Hər bir kəndin maddi mədəniyyət
abidələri - türbələr, qədim hamamlar, ocaqlar,
ziyarətgahlar, məscidlər, körpülər, toponimləri,
eləcə də məşhur şəxsiyyətləri
haqqında məlumat verilib.
"Bakılı
alimlər" bölməsində isə bu torpaqdan pərvazlanmış
görkəmli şəxsiyyətlər haqqında maraqlı
oçerklər qələmə alınıb. Eləcə də
"Bakılı şairlərin söz xəzinəsindən"
verilən seçmələrdə paytaxtımızın və
onun ətrafındakı kəndlərin poeziyada necə tərənnüm
edildiyi diqqət çəkir. "Arxiv sənədləri"
bölümündə isə müəllif həmin mənbələrin
fotosurətini verərək hələ XVIII-XIX əsrlərdə
Bakı ilə əlaqədar imzalanan bir sıra fərmanları,
onun əhalisinin sayını, sakinlərinin məşğuliyyətini
oxucuların diqqətinə çatdırıb.
Flora XƏLİLOVA
Azərbaycan.-2013.- 13
iyun.- S.11.