«Ömrün izi qalan anları»
kitabı ümummilli lider
Heydər Əliyevin
işıqlı və əziz xatirəsinə ithaf
edilmişdir
İkinci
dərəcəli dövlət ədliyyə müşaviri,
"Şöhrət" ordenli hakim Südabə Həsənovanın
ümummilli lider Heydər Əliyevin işıqlı və əziz
xatirəsinə ithaf etdiyi "Ömrün izi qalan
anları" kitabı nəşr olunmuşdur.
AzərTAc
xəbər verir ki, "Çaşıoğlu" mətbəəsində
nəfis tərtibatlı, xüsusi dizayn və zövqlə
çapdan çıxmış bu kitabda görkəmli
hüquqşünas Südabə Həsənovanın müxtəlif
illərdə mətbuatda və ayrı-ayrı nəşrlərdə
dərc edilmiş məqalələrinin, müsahibələrinin,
eləcə də dövlət tədbirlərində və
beynəlxalq forumlarda çıxışlarının mətnləri
verilmişdir.
Kitabda
yer alan yazıların əksəriyyəti Azərbaycan
dövlətinin xilaskarı və qurucusu, onun
intibahının böyük memarı, dünya şöhrətli
siyasətçi, xalqımızın milli maraq və
iftixarı olan dahi oğlu, ulu öndər Heydər Əliyevin
Azərbaycan müstəqilliyinin qorunub saxlanılması,
islahatların aparılması, demokratik, sivil və hüquqi
dövlətin yaradılması, onun dünya miqyasında tanıdılması yolunda titanik fəaliyyətinə
həsr edilmişdir.
Kitabın
elmi redaktoru Azərbaycan Milli Elmlər Akademiyasının
müxbir üzvi, hüquq elmləri doktoru, professor, əməkdar
hüquqşünas Məsumə Məlikovadır.
Müəllif
kitaba yazdığı "Ön söz əvəzi"
başlıqlı yazıda bildirir: "Bu gün qürur
hissi keçirirəm ki, ulu öndərimiz, dünya
şöhrətli şəxsiyyət olan Heydər Əliyevin
müasiri olmuşam, bir dövrdə yaşamışam, onun əlindən
həyata vəsiqə, xüsusi ali rütbələr
almışam, bu müdrik, əvəzedilməz insanın rəhbərliyi
altında işləmişəm və daim onun atalıq
qayğısını hiss etmişəm. Bu qürur və
xoşbəxtliyi təkcə özümə deyil,
bütün həmyaşıdlarıma, həmkarlarıma, ulu
öndərin rəhbərliyi altında işləyib
yaşayanlara da aid edirəm.
Çünki Azərbaycanın müstəqil dövlət
kimi təşəkkül tapmasında biz ancaq ona,
bugünkü yüksək inkişaf və tərəqqiyə
görə isə onun siyasi kursunu ləyaqətlə davam
etdirən dövlət başçımız İlham Əliyevə
minnətdar olmalıyıq".
Görkəmli
hüquqşünas, fədakar və zəhmətkeş insan
Südabə Həsənovanın kitabda yer almış
qısa, lakin olduqca zəngin tərcümeyi-halını
gözdən keçirərkən bu insanın öz peşəsinə
olan sonsuz sevgisinə heyrətlənməyə bilmirsən. Ən
çox kişilərin çalışdığı ədliyyə
sistemində, qanunverici orqanlarda zərif bir qadının
uzunömürlü, səmərəli fəaliyyətini izlədikcə
insan zəhmətin və fədakarlığın nəyə
qadir olduğunu bir daha əyani olaraq duyub dərk edir. Bu iki səhifəlik
tərcümeyi-halın özü də gənclərə
seçdikləri peşənin məsuliyyətini anlamaq və
onu sona qədər sevmək, yaşatmaq baxımından
olduqca qiymətlidir.
"Şöhrət"
ordenli hakim qeyd edir ki, mən ulu öndərimizin yubileyinə
bir töhfə olaraq fəaliyyətim dövründə
müxtəlif nəşrlərdə dərc edilmiş məqalələrimi,
müsahibələrimi, çıxışlarımı və
s. bir topluya yığmağı qərara aldım.
Çünki fəaliyyətim dövlət quruculuğu və
respublikanın ictimai-siyasi həyatı ilə bilavasitə
bağlı olmaqla əsasən ulu öndərimiz Heydər Əliyevin
rəhbərliyi illərinə təsadüf edir. O illər
çox təlatümlü, qaynar, siyasi baxışların
toqquşduğu, burulğanlı bir dövr idi. Bu illərdə
xüsusilə məsul vəzifədə olmaq və əksəriyyətini
kişilərin təşkil etdiyi böyük bir sistemə rəhbərlik
etmək çox məsuliyyət
tələb edirdi. Hesab edirəm ki, kitab böyük marağa
səbəb olacaq və mənim yaxınlarım, həmkarlarım,
övladlarım və hətta gənc hüquqşünaslar
üçün keçmişə baxmağa bir pəncərədir...
Əsərin
müəllifinin və onun həmin dövrdə rəhbərlik
etdiyi qurumların fəaliyyəti respublikanın ictimai-siyasi həyatı
ilə bağlı olduğundan və əsasən Azərbaycanda
siyasi baxışların toqquşduğu burulğanlı və
qaynar bir dövrə təsadüf etdiyindən, o illərlə bağlı digər
yazılara da kitabda yer verilmişdir.
"Ömrün
izi qalan anları" kitabı altı bölmədən -
"Dövri mətbuatda dərc edilən məqalələrdən
nümunələr", "Ayrı-ayrı mətbuat
nümayəndələrinə verilən müsahibələr",
"Dövlət tədbirlərində və beynəlxalq
forumlarda edilən çıxışlardan nümunələr",
"Haqqımda mətbuatda və ayrı-ayrı nəşrlərdə
çap edilmiş yazılar və şeirlər",
"Müəllimlərim və həmkarlarım haqqında
ayrı-ayrı nəşrlərdə çap edilmiş xatirələr"
və "Təltiflər, hədiyyələr, təbriklər
və avtoqraflardan seçmələr"dən ibarətdir.
Geniş
oxucu kütləsi üçün nəzərdə
tutulmuş bu dəyərli kitab hər kəsə müasir
dövlətimizin hüquq siyasətini daha yaxından öyrənməkdə
əsl bələdçilik edəcəkdir.
Nəfis
tərtibatda nəşr olunan kitabda müəllifin fəaliyyətinin
müxtəlif dövrlərinə aid fotoşəkillər
öz əksini tapmışdır.
Kitabın
tərtibçiləri Qumru Əliyeva və Günay
Hacızadədir.
Azərbaycan.-2013.- 14 iyun.- S.4.