Yüksəlişin mübarəkdir, Azərbaycan!

Min illərdir yol gəlirsən.

Bu yollarda gör nə qədər

Hünər, zəfər, qüssə, kədər,

Yaxşı, yaman, daha nələr...

Sən görmüsən, Azərbaycan!

Sinə gərib hər möhnətə,

hər zülmə,

hər zəlalətə

Kərpic-kərpic, yarpaq-yarpaq

Boy atmısan, yüksəlmisən.

Arzuların indi sənin

çin olubdu.

Bu arzular Günəş nurlu

Əməllərlə yoğrulubdu.

İndi sənin öz səsin var,

öz sözün var,

Ali-ali kürsülərdən

Yalanlara, böhtanlara

Doğru, sərrast atəş açan

düz sözün var.

Ay-ulduzlu bayrağımız

dalğalanır

Neçə-neçə ölkələrin, dövlətlərin

Bayraqları sırasında.

Öz qüruru, öz vüqarı, əzəməti

vardır onun

Dalğalanan bu bayraqlar

arasında.

Göy Xəzərin sahilində

Başı dəyir, əli çatır

Karvan-karvan ötüb keçən

buludlara.

Ucalıqda tayı yoxdur,

Çata bilmir dünyadakı

Bayraqların biri ona.

Bu bayrağı zirvələrdən

zirvələrə,

Zəfərlərdən zəfərlərə

Qaldıracaq, aparacaq,

Gör nə qədər igidlərin,

ərənlərin

Vardır sənin, Azərbaycan!

Hamımıza əzizdən də

əziz olan

Doğma Bakı gündən-günə,

aydan-aya,

ildən-ilə

Gör necə də gözəlləşir!

Hara getsən, hara baxsan,

Hər tərəfi naxış-naxış

Xalça kimi toxunubdur

gül-çiçəkdən.

Göz də doymur gözoxşayan

Belə ülvi gözəllikdən.

Binaların sıra-sıra,

qatar-qatar...

Əl uzatsa, ulduzlara

əli çatar.

Gündüzlərin al-əlvandır

bahar kimi.

Gecələrin çıraqbandır

səhər kimi.

Küçələrin aşıb-daşır

gur çay kimi.

Uzaq-yaxın qitələrdən, ölkələrdən

Gələnləri heyran edir

bu mənzərə.

Onlar deyir: "Biz vurulduq

Mavi Xəzər qoynundakı

bu şəhərə".

Bəli, bəli, hər tərəfdə

bir yüksəliş,

bir tərəqqi.

Bu yüksəliş aşıb-keçib

Yerlə göyün arasında

olan həddi.

Bu gün artıq böyük-böyük

Ölkələrin sırasında

Kosmosda da öz yerimiz,

peykimiz var,

İllər ilə görülən iş, salınan

bağ

İndi artıq yetirir bar.

Dünəninə, bu gününə

nəzər salıb

Oğlun, qızın fərəhlənir,

dost sevinir.

Hər birinin sinəsində

çırpınaraq

Pöhrələnən neçə-neçə

arzu, istək,

dilək dinir.

Qaranlığa işıq saçan

Xoş, mehriban gözlər gülür.

Ağbənizli, qaraxallı

üzlər gülür.

Sevincindən dilə gələn

Milyon-milyon ürəklər də

belə deyir:

- Yüksəlişin mübarəkdir,

Azərbaycan!

Seyran CAVADOV

Azərbaycan.-2013.- 15 iyun.- S.12.