Qətiyyətli və prinsipial lider
Xalq özünə
belə rəhbər seçir
Azərbaycan tarixinin çox mühüm,
xüsusi əhəmiyyət kəsb edən əsas hadisəsinə
- prezident seçkisinə yaxınlaşır. Prezident
seçkiləri bütün ölkələrin, xalqların
getdiyi yoldur. Axı müasir dünyada hakimiyyətə gəlməyin
yalnız bir yolu - sivil yol, seçkilər vasitəsilə və
xalqın zəmanəti və dəstəyi ilə gəlmək
yolu var. Demokratik respublikada hakimiyyətin və hakimiyyətə
gəlməyin əsas mənbəyi xalq və onun səsidir.
Müasir dünyada partiyalar seçkilərə aparıcı,
xalq içərisində reytinqi yüksək olan namizədlərlə
gedirlər. Ölkəni irəli aparmağa qadir olan, xalqı
vahid qüvvə kimi bir ideya ətrafında birləşdirə
bilən partiyalar seçkilərdə uğur qazana bilirlər.
Lakin elə ölü doğulmuş partiyalar var ki, uzun illər
mövcud olsalar da, hakimiyyətə gələ bilməyiblər.
O partiyaların xəstəliyini ağıllı rəhbərdən
məhrumluq sindromu adlandırmaq olar. Amma elə partiyalar da var
ki, onların yaranması və hakimiyyətə gəlməsi
çox sürətli olmuşdur. Dünya siyasi partiyalar tarixində belə partiyalar bu
gün də var.
Partiyanın
uğuru və uzun illər hakimiyyətdə qala bilməsinin əsas
mənbəyi təmsil etdiyi, arxalandığı sosial
bazanın genişliyidir. Azərbaycan Cənubi Qafqazın ən
güclü və modern dövlətinə çevrildiyi kimi,
Yeni Azərbaycan Partiyası da xalqın dəstəyini
qazanmasına, missiyasının müqəddəsliyinə, vətənin
və xalqın taleyinə verdiyi müstəsna əhəmiyyətə
görə öz siyasətində sosial sifariş amilini incəliklə
nəzərə almasından qaynaqlanaraq dünyanın və
bölgənin nüfuzlu partiyalarından biridir. Xalqın
inamına arxalanan və ümidini liderə bağlayan belə
partiyalar həmişə qələbə qazanır, uzun
müddət hakimiyyətdə qala bilirlər. Partiyanın
ideoloji-siyasi kursu və onun ictimai bazasının yaranması,
genişlənməsi və möhkəmlənməsi bir-biri
ilə bağlı proseslərdir. Azərbaycanda son seçkilərdə
daxili siyasətdə liberalizm elementləri qabarıq şəkildə
nəzərə çarpmağa başlamış, siyasi
qüvvələr arasında dialoqa meyil güclənmişdir.
Azərbaycanda demokratikləşmə prosesi uğurla davam
edir, dövlət siyasi partiyalara, vətəndaş cəmiyyəti
institutlarına qanun əsasında, beynəlxalq standartlar səviyyəsində
yardım göstərir.
Xarizmatik
lider amili prezident seçkiləri ərəfəsində
namizədin müəyyən edilməsində müsbət nəticəni
əvvəldən sığortalamış olur. Prezidentliyə
namizədin müəyyən edilməsi prinsipində
müasir dünyanın aparıcı ölkələrində
dəyişməz, sabit, konstitusiya ilə müəyyən
olunan prosedurlar var. Prezidentlik müddətinin sonuna doğru
aparıcı, iqtidar partiyası qurultayını
çağıraraq namizədini müəyyən edir. Azərbaycanın
dünyaya inteqrasiyası bütün sahələrdə
olduğu kimi, prezident seçkisində də konstitusiya tələbləri
diqqətlə gözlənilir, namizədin müəyyən
edilməsində fərdi təşəbbüsləri deyil, təşkilatı
təmsil edən bütün üzvlərin təşəbbüsünə
üstünlük verilir.
Ən mühüm olan namizədin qətiyyəti
və prinsipiallığıdır. İki mühüm
transmilli layihə - Bakı-Tbilisi-Qars dəmiryol xətti və
Avropaya təbii qaz ixracını reallaşdıracaq TANAP layihəsi
cənab İlham Əliyevin qətiyyətli və prinsipial
siyasi qərarı ilə həyata vəsiqə qazandı. Keçmiş
SSRİ məkanında ən qısa müddətə və ən
yüksək əmsalla əhalinin batmış əmanətləri
dövlət vəsaiti hesabına əmanətçilərə
qaytarıldı. Orbitə peykini çıxaran Azərbaycan
dünya kosmik klubunun üzvü oldu. Ölkə tarazlı,
öncədən hazırlanmış dövlət
proqramları əsasında inkişaf etdirilir, regionlar
heç də paytaxt Bakıdan geri qalmır. Gəncəyə
səfəri zamanı Azərbaycan Respublikasının Prezidenti İlham Əliyevin söylədiyi:
"Şadam ki, qısa müddət ərzində Gəncədə
çox böyük quruculuq işləri aparılıb. Gəncəyə
daim böyük diqqət göstərilmişdir. Bu diqqət
daimidir. Mən istəyirəm ki, hər bir şəhərdə
belə gözəl işlər aparılsın.
Bütövlükdə ölkəmizdə, hər bir yerdə
çox sürətli və uğurlu inkişaf gedir"
sözləri bütöv Azərbaycanın vahid dövlət
proqramı əsasında inkişaf etdiyinin əyani
sübutudur. Bu reallıqlar hər bir ölkə vətəndaşı
kimi, bizim də qəlbimizi qürur hissi ilə doldurur.
Azərbaycan
Respublikasının Prezidenti İlham Əliyev 2011-ci ildə Gəncəyə
səfər edərkən demişdir: "Belə getsə, Gəncə
Bakını ötəcək". Nizami Gəncəvinin 870 və
Məhsəti Gəncəvinin
yaradıcılığının 900 illiyi UNESCO xətti ilə
dünyada qeyd edilir. Gəncə Avropanın gözəl şəhərləri
səviyyəsinə çatmaq iddiasındadır.
Yeni Azərbaycan
Partiyasının V qurultayı faktiki olaraq çox
mühüm bir missiyanı - 2013-cü ildə keçiriləcək
Azərbaycan Respublikası prezidentliyinə namizədi müəyyən
etdi. Bu, son 5 ilə yaxın bir müddətdə Prezidentin fəaliyyətinin
xalq tərəfindən bəyənilməsi, dəstəklənməsi
və hakimiyyətinin davam etdirilməsinə təkidin təsdiqidir.
Xalqın güclü dəstəyi bütün hakimiyyətlərin
olduğu kimi, prezident hakimiyyətinin də
uzunömürlük eliksiri, fenomenidir.
"Xalq
prezidenti seçir, prezident də xalqın
qarşısında cavab verməlidir. Əgər xalq onun fəaliyyətini
dəstəkləyirsə, ona inanırsa, bu, ən
böyük mükafatdır" - cənab İlham Əliyevin
irəli sürdüyü bu prinsip indi və bütün
zamanlarda öz qüvvəsindədir. Bu gün Azərbaycan,
sözün əsl mənasında, tam müstəqil siyasət
yürüdən ölkədir. Bu gün müstəqil Azərbaycan
dövlətinin öz siyasi dəst-xətti, dövlətçilik
siması, inkişaf yolu var. Cənab İlham Əliyev Azərbaycanda
siyasi qüvvələrin və əksər partiyaların birmənalı
şəkildə qəbul etdikləri, ən çətin
sınaqlardan mətanətlə və üzüağ
çıxmış liderdir. Onun beynəlxalq və
nüfuzlu qurumlar tərəfindən dəfələrlə
keçirilən rəy sorğularında daim yüksək
reytinqə sahib olduğu sübuta yetirilib. Cənab İlham Əliyev müstəqil Azərbaycan dövlətini
həm mükəmməl şəkildə idarə edir, həm
də istənilən mötəbər məqamda böyük
ləyaqətlə təmsil etmək vəzifəsini yüksək
səviyyədə gerçəkləşdirir.
Prezidentliyə
namizədin müəyyən edilməsini, onun dəstəklənməsini
vacib edən bir sıra şərtlər var. Prezident hakimiyyəti
illərində əvvəlki seçkilərdə verdiyi vədləri
yerinə yetirməlidir. Cənab İlham Əliyev verdiyi vədləri
tamamilə yerinə yetirmişdir. Ölkədə sabitlik daha
da möhkəmləndirilmişdir. Azərbaycan son 5 ildə
sözün tam mənasında çox böyük
uğurlara imza atmışdır. Dövlətçilik
postsovet məkanında və dünyada yüksək standartlar
səviyyəsindədir. Azərbaycanda mövcud olan
ictimai-siyasi sabitlik real təminatlara söykənir.
Ölkəmizdə
demokratik cəmiyyətin, bazar münasibətlərinə əsaslanan
iqtisadi siyasətin bərqərar olması proseslərinə
ciddi diqqət yetirilir. İqtisadiyyatda özəl sektorun
üstünlük qazanması, neft gəlirlərinin məqsədyönlü
idarə olunması ilə yanaşı, qeyri-neft sektorunun
inkişaf etdirilməsinə xüsusi önəm verilməsi
Prezident İlham Əliyevin siyasətinin əsasını təşkil
edir.
Azərbaycan
son 10 ildə Qərb məkanında yalnız zəngin neft və
qaz ehtiyatları ilə deyil, həm də demokratiyaya, liberal dəyərlərə,
insan və vətəndaş hüquq və
azadlıqlarına sadiqliyi ilə tanınmaq əzmini bir
sıra konkret addımları ilə sübuta yetirmişdir.
Dünya ictimaiyyəti də, Azərbaycan xalqı da artıq
çoxdandır ki, Prezident İlham Əliyevi böyük
siyasətçi, siyasi idarəetməni həyati proseslərlə
bütün incəliklərinə qədər
uzlaşdırmaq vəzifələrini məharətlə
gerçəkləşdirən kamil siyasi xadim kimi qəbul
edir. Yeni tarixi epoxada məhz İlham Əliyev kimi böyük
siyasətlə yüksək idarəçiliyi və vətənpərvərliyi
özündə cəmləşdirən görkəmli bir
dövlət xadiminin və mahir siyasətçinin Azərbaycana
rəhbərlik etməsi ölkənin və xalqın tarixi
şansıdır.
2011-ci ildə respublikamızın
sivil dünyanın hüquqi-siyasi atmosferinin müəyyənləşməsində
mühüm rolu olan Birləşmiş Millətlər Təşkilatının
(BMT) Təhlükəsizlik Şurasının qeyri-daimi
üzvü seçilməsi bütövlükdə müasir
tariximizin ən əlamətdar, qürur doğuran hadisələrindən
biri kimi yadda qalmışdır. Ən böyük
uğurlarımızdan biri 155 dövlətin dəstəyi ilə
BMT Təhlükəsizlik Şurasına üzv seçilməyimizdir.
Azərbaycan
xalqı hələ 1993-cü ilin qanlı-qadalı iyun
günlərində ulu öndər Heydər Əliyevin siyasi
kursunu seçib. Bu kursun ən layiqli
davamçısının cənab
İlham Əliyev olduğunu xalqımız onun on illik
prezidentliyi dövründə yəqinləşdirib və qətiləşdirib.
Növbəti dəfə də Heydər Əliyevin siyasi
kursuna və İlham Əliyevin Azərbaycana rəhbərlik
müddətinin uzadılmasına mütəşəkkilliklə
səs verəcəyi şəksizdir.
Həsənbala
SADIQOV,
Gəncə Dövlət Universitetinin professoru, Azərbaycan Respublikasının əməkdar müəllimi
Azərbaycan.-2013.-
20 iyun.- S.2.