Dağlıq Qarabağ
narkotik məhsulların yetişdirilməsi
və qaçaqmalçılığı yuvasına çevrilib
Ermənistan bütün çağırışlara və
tövsiyələrə məhəl qoymayaraq
qeyri-qanuni əməllərini
hələ də davam etdirir
Təəssüflər olsun ki, bu
gün narkotik ticarəti genişlənir və dünyada ən
gəlirli marşrutlardan biri hesab olunur. Birləşmiş
Millətlər Təşkilatının statistikasına
görə, son 12 ay ərzində planetimizin ümumi əhalisinin
3 faizi, yəni təxminən 15-64 yaş arasında 185 milyon
insan narkotikdən istifadə edib.
İki yüz milyondan çox insan "narkomaniya"
adlı xəstəliyə tutulub və elə bunun nəticəsidir
ki, beynəlxalq narkobiznesin illik gəliri məhz təxminən
400 milyard dollar təşkil edir. Bu göz qaraldan rəqəm
milyonlarla insanın həyatı hesabına qazanılır.
Narkotrafik Dağlıq Qarabağdan
keçir
Geosiyasi
və geoiqtisadi maraqların kəsişdiyi məkanda yerləşən
Azərbaycan narkotiklərin qanunsuz dövriyyəsi ilə məşğul
olan transmilli cinayətkar şəbəkələrin daim maraq
dairəsində olub. Bu, eyni zamanda xaricdəki narkobaronlar tərəfindən
"ağ ölüm"ün istehsalçıdan
istehlakçıya çatdırılması
üçün Azərbaycanın ən qısa və ən
ucuz yol kimi qiymətləndirilməsi ilə
bağlıdır. Beynəlxalq narkosindikat öz məkrli niyyətlərini
həyata keçirmək üçün bir neçə
marşrutlardan istifadə etməklə Azərbaycan ərazisindən
həm tranzit marşrut, həm də əlverişli bazar kimi
yararlanmağa cəhd göstərir.
Bu
gün dünyada narkotik qaçaqmalçılığı
ilə mübarizə intensivləşsə də, təəssüflər
olsun ki, Azərbaycanın işğal olunmuş Dağlıq
Qarabağ ərazisindən tranzit kimi istifadə edilərək
Avropaya daşınan narkotiklərin miqdarı da
çoxalıb. Narkotika ticarətinin ən təhlükəsiz
marşrutunun Ermənistan ərazisindən keçməsi isə
hamıya məlumdur. Bu marşrutlar Əfqanıstan-İran-Ermənistan-Rusiya,
Qarabağ-İran-Azərbaycan-Rusiya, Qarabağ-Ermənistan-Rusiyadır.
Ermənistan və Dağlıq Qarabağ separatçı rejiminin rəhbərliyinin narkotik ticarətinə birbaşa himayəçiliyi artıq sirr deyildir. Azərbaycanın rəsmi nümayəndələri dəfələrlə Dağlıq Qarabağ ərazisinin narkotik vasitələrin əsas tranzit məkanı olduğunu bildiriblər. Bundan əvvəl ayrı-ayrı cinayət işlərində Azərbaycanın işğal olunmuş və respublikamız tərəfindən nəzarət edilməyən Dağlıq Qarabağ və ətraf ərazilərdən müxtəlif cinayətkar məqsədlər üçün istifadə edildiyi faktları var.
Aparılan təhqiqatlara əsasən, Azərbaycana narkotik vasitələrin qanunsuz dövriyyəsindən irəli gələn təhlükə bir tərəfinin Əfqanıstanda, digər tərəfinin isə Avropaya qədər uzandığı narkotrafikin mərkəzində yerləşməsi ilə əlaqədardır. Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası nəzarətdən kənarda qalan ərazilərin narkotrafikdə mühüm nöqtəyə çevrildiyi barədə dəfələrlə beynəlxalq təşkilatlar səviyyəsində məsələ qaldırsa da, hələ də bu müraciətlər nəticə verməyib, əvəzində beynəlxalq qurumların laqeyd münasibəti nəticəsində bölgədə Əfqanıstanla rəqabətə girə biləcək bir "narkofabrik" meydana çıxıb.
Məlumdur ki, Əfqanıstan və Dağlıq Qarabağ bölgəsi qaynar nöqtələrdir. Hər iki ərazi nəzarət edilməsi mümkün olmayan sərhədlərə sahibdir. Əfqanıstanın İran və Pakistanla sərhədləri təbii-coğrafi şərait baxımından nəzarətdən kənar ərazilərdir. Hər iki bölgədə narkotiklərin əkilib-becərilməsi hərbçilər tərəfindən həyata keçirilir. Əfqanıstanda bu iş hər zaman səhra komandirlərinin nəzarətində olub, Dağlıq Qarabağda da bu prosesdə işğalçı ordunun zabitləri əsas rol oynayırlar. Əfqanıstanda bu proses hökumətin nəzarətindən kənarda olduğu halda, Dağlıq Qarabağda isə narkotik bitkilərin əkilib-becərilməsi, istehsalı birbaşa Ermənistan hökumətinin nəzarəti altında həyata keçirilir. "Boz ərazilər"də istehsal olunan narkotik maddələrin Avropa və Rusiya bazarında satışından külli miqdarda gəlir əldə edilir ki, bu da iqtisadi durumu ağır olan Ermənistanın hərbi xərclərinin bir qismini kompensasiya etməyə yönəldilir.
Ötən 5 il ərzində həyata keçirilmiş əməliyyat-axtarış tədbirləri, eləcə də əldə edilmiş faktların təhlili Əfqanıstandan Azərbaycana, buradan isə Avropa və dünyanın digər ölkələrinə narkotiklərin daşınması işində kuryer qismində əksər hallarda İran vətəndaşları çıxış edir. 2004-2009-cu illər ərzində Milli Təhlükəsizlik Nazirliyinin həyata keçirdiyi əməliyyat-axtarış tədbirləri nəticəsində narkotik vasitələrin qanunsuz dövriyyəsi ilə məşğul olduğuna görə 26 iranlı kuryer cinayət məsuliyyətinə cəlb olunub. Bundan əlavə, bir çox şahid ifadələri və sübutlar var ki, əksər hallarda İran vətəndaşları narkotiklərin Azərbaycana və ya ərazimizdən istifadə edərək başqa ölkələrə ötürülməsində iştirak edib, lakin planları pozulduqda məsuliyyətdən yayınmağa və İran ərazisində gizlənməyə müvəffəq olublar.
Təqdim
olunan faktlar bir daha sübut edir ki, narkotik vasitələrin və
psixotrop maddələrin qanunsuz daşınması ilə məşğul
olan transmilli cinayətkar qruplaşmalar öz məhsullarını
böyük bazarlara çıxarmaq üçün Azərbaycanı
ən əlverişli tranzit dəhlizi kimi qiymətləndirir.
Azərbaycanda narkotiklərin qanunsuz dövriyyəsi ilə
mübarizəyə dair dövlət proqramı qəbul
edilib. Bu proqramın həyata keçirilməsində digər
aidiyyəti dövlət qurumları ilə yanaşı, Milli
Təhlükəsizlik Nazirliyi də fəal iştirak edir. Bu
gün milli təhlükəsizlik orqanları narkotik vasitələrin
qanunsuz daşınması üçün Azərbaycan ərazisindən
tranzit kimi istifadə etməyə cəhd göstərən
yerli və beynəlxalq mütəşəkkil cinayətkar
qruplaşmalara qarşı mübarizənin aparıcı
qüvvəsidir. İndi "ağ ölüm"lə
mübarizədə ciddi nəticələr verən
qabaqlayıcı-profilaktik tədbirlərdən istifadə
olunur. Son 9 ildə Milli Təhlükəsizlik Nazirliyi tərəfindən
həyata keçirilən tədbirlər nəticəsində
5 tondan artıq ağır tərkibli narkotik vasitələr
qanunsuz dövriyyədən çıxarılıb. Bu
gün ümumbəşəri bəlaya çevrilmiş
narkotiklərlə mübarizənin səmərə verməsinə
səbəb Milli Təhlükəsizlik Nazirliyinin cəmiyyətlə
möhkəm və etibarlı əlaqələr
qurmasının nəticəsidir.
Sarkisyan qlobal narkobiznes şəbəkəsinin
üzvüdür
Ermənistan
tərəfindən qəsb edilmiş Azərbaycan ərazilərindən
müxtəlif cinayətkar məqsədlər, o cümlədən
terrorçuluq, narkotiklərin qanunusuz dövriyyəsi, silah
qaçaqmalçılğı və s. üçün
istifadə edildiyi sübuta ehtiyacı olmayan faktlardır. Təcavüzün
nəticəsidir ki, bu gün Azərbaycan-İran sərhədinin
132 kilometri narkobaronlar və onların laboratoriyaları
üçün açıqdır. Bu, eyni zamanda həm MDB,
həm Avropa, həm də
ümumilikdə bütün dünya üçün
çox böyük və ciddi təhlükədir.
Bununla
yanaşı, hazırda ciddi iqtisadi tənəzzül və
maliyyə yoxluğu ilə üzləşmiş Ermənistan,
onun yaratdığı qondarma separatçi rejim və erməni
silahlı birləşmələri hərbçiləri Azərbaycanın
işğal olunmuş ərazilərində qanunsuz fəaliyyətlərini
davam etdirməyin başlıca yollarından biri kimi narkotik
vasitələrin yetişdirilməsini və
satışının daha da artırılmasında, qanunsuz
dövriyyəsinin genişləndirməsində görürlər.
Ermənistanın
yüksək çinli məmurları, o cümlədən
prezident Serj Sarkisyanın qardaşının birbaşa rəhbərliyi
altında Qarabağdan və İrandan gətirilən narkotik
maddələr Rusiya bazarlarına, oradan isə Avropaya
daşınır. Xatırladaq ki, bu barədə ötən
il Ermənistan mətbuatı geniş məlumatlar
yaymışdı.
"Armenia
Today" portalında yer alan xəbərlərdə
bildirilirdi ki, Ermənistanda ağır sosial durumla əlaqədar
narkotik və insan alveri geniş vüsət alıb və bu
işlər dövlət səviyyəsində həyata
keçirilir. Həmin dövrdə saytın yazdıqları
göstərirdi ki, Ermənistan dövlət səviyyəsində,
baş prokurorun simasında narkotika ticarəti və pornobizneslə
məşğuldur. Sayt Ermənistanın baş prokuroru Aqvan
Ovsepyanın narkotik ticarətin başında durduğunu
bildirirdi: "Parlament və prezident Serj Sarkisyan bu
biabırçılıqdan sonra baş prokuror Aqvan
Ovsepyanı dərhal istefaya göndərməzsə, onun barəsində
cinayət işi açılmazsa, demək, onlar da
Ovsepyanın cinayətlərinə görə məsuliyyəti
üzərlərinə götürürlər".
"Joxovurd"
qəzetinin yaydığı xəbərlərdə isə
bildirilirdi ki, İranla sərhəddə yerləşən
Sünik vilayətinin qubernatoru Suren Xaçatryan da narkotik
alverçisidir. Qəzetin məlumatına görə, Suren
narkotika alveri ilə əsasən Rusiyada məşğul olub.
Elə bu səbəbdən də Rusiyada onun barəsində
cinayət işi qaldırılıb. Bu barədə qəzetə
məlumat verən "Birlik" Milli Klubunun rəhbəri
Sumbat Karaxanyan qeyd edib ki, Xaçatryan təkcə narkotika
deyil, həmçinin qeyri-qanuni silah alveri ilə də məşğul
olub.
Bütün
faktlar göstərir ki, Azərbaycanın Ermənistan tərəfindən
işğal olunmuş ərazilərində narkotik vasitələrin
yetişdirilməsi və emalı getdikcə geniş vüsət
almaqdadır. Bunun bir neçə əsas səbəbi
vardır. İlk növbədə, Ermənistanın
özündə və işğal etdiyi Azərbaycan ərazilərində
erməni politoloqlarının, siyasətçilərinin və
iqtisadçı ekspertlərin özləri tərəfindən
də etraf olunduğu kimi, əhalinin sosial-maddi vəziyyəti
xeyli pisləşir, yoxsulluq gündən-günə daha da
artır. Bu vəziyyətin digər sferalarda olduğu kimi,
artıq Ermənistan silahlı qüvvələrinə də
ciddi təsir etdiyi göz
qabağındadır.
Elçin CƏFƏROV
Azərbaycan.-2013.- 20 iyun.- S.4.