Prezident İlham Əliyev
Səudiyyə Ərəbistanı Krallığının Azərbaycanda
yeni təyin
olunmuş səfirinin etimadnaməsini qəbul etmişdir
Azərbaycan
Respublikasının Prezidenti İlham Əliyev iyunun 28-də Səudiyyə
Ərəbistanı Krallığının ölkəmizdə
yeni təyin olunmuş fövqəladə və səlahiyyətli
səfiri Musaid bin İbrahim bin Abdullah Əl-Səlimin etimadnaməsini
qəbul etmişdir.
Səfir
fəxri qarovul dəstəsinin qarşısından
keçdi.
Musaid
bin İbrahim bin Abdullah Əl-Səlim etimadnaməsini Prezident
İlham Əliyevə təqdim etdi.
Sonra
Azərbaycan Prezidenti İlham Əliyev səfirlə söhbət
etdi.
Ölkələrimiz
və xalqlarımız arasında ikitərəfli əlaqələrin
yüksək səviyyədə olduğunu vurğulayan
dövlət başçısı Səudiyyə Ərəbistanının
Azərbaycana dost və müttəfiq ölkələrdən
biri olduğunu dedi. Azərbaycan ilə Səudiyyə Ərəbistanı
arasında güclü siyasi və mədəni əlaqələrin
mövcud olduğunu bildirən Prezident İlham Əliyev bu əlaqələrin
iqtisadi sahədə də inkişaf etdirilməsi
üçün geniş imkanların olduğunu qeyd etdi.
Dövlət başçısı ölkələrimizin
bütün beynəlxalq təşkilatlarda daim bir-birini dəstəkləməsinin
əhəmiyyətini vurğuladı. Musaid bin İbrahim bin
Abdullah Əl-Səlimin ölkəmizdəki diplomatik fəaliyyəti
müddətində bu əlaqələrin daha da inkişaf
etdiriləcəyinə və yeni əməkdaşlıq sahələrinin
müəyyənləşdiriləcəyinə ümidvar
olduğunu bildirən Prezident İlham Əliyev səfirə fəaliyyətində
uğurlar arzuladı.
Səudiyyə
Ərəbistanı Krallığının ölkəmizdə
yeni təyin olunmuş fövqəladə və səlahiyyətli
səfiri Səudiyyə Ərəbistanının Kralı
Abdullah bin Əbdüləziz Al Səudun salamlarını
dövlət başçısına çatdırdı. O,
ölkəsinin Azərbaycan ilə ikitərəfli əlaqələri
genişləndirməkdə maraqlı olduğunu dedi. Ölkələrimiz
arasında siyasi münasibətlərin yaxşı səviyyəsindən
razılığını bildirən səfir əlaqələrimizin
iqtisadi sahədə də inkişaf etdirilməsi
üçün böyük imkanların olduğunu
vurğulayaraq bu istiqamətdə səylərini əsirgəməyəcəyini
bildirdi.
Dövlət
başçısı Səudiyyə Ərəbistanının
Kralı Abdullah bin Əbdüləziz Al Səudun
salamlarına görə minnətdarlığını
bildirdi, onun da salamlarını Səudiyyə Ərəbistanının
Kralına çatdırmağı xahiş etdi.
AzərTAc
Azərbaycan.-2013.- 29 iyun.- S.1.