Biz Heydər Əliyev universitetinin məzunlarıyıq
"Azərbaycanda kadr hazırlığı məsələsi ilə şəxsən, bilavasitə ciddi məşğul olarkən və o cümlədən sizləri respublikamızdan kənarda ali məktəblərə göndərərkən mütləq və mütləq Azərbaycanın gələcəyini, müstəqilliyini düşünürdüm. O vaxt mən inanırdım: vaxt gələcək ki, bu kadrlar müstəqil Azərbaycana lazım olacaqdır. Vaxt gələcəkdir ki, nəhayət, Azərbaycan müstəqil olacaqdır və bu kadrlar Azərbaycanın müstəqilliyini təmin edəcəklər".
Heydər
ƏLİYEV
Zaman
öz ardıcıllığında xalqların, dövlətlərin
taleyini müəyyənləşdirən əhəmiyyətli
dönəmləri bir araya gətirir. Mahiyyəti ilə min
illərin təkamül və mübarizələrinin
bütöv nəticəsini ehtiva edən bu mərhələlər
qarşıdakı həyat yolları üzərində dəqiqləşdirmə
aparmaq üçün cəmiyyətlərə verilmiş
seçim imkanıdır. Xalqın, dövlətin gələcək
uğur və məğlubiyyətlərini, intensiv
inkişafını məhz bu dönəmlərdə
aparılan seçimin məzmunu şərtləndirir.
Bu mənada,
ümummilli lider Heydər Əliyevin adı ilə
bağlı hər gün Azərbaycanın tale tarixi kimi nəzərdən
keçirilməlidir. Bu günlərin hər biri
gözümüz önündə qədəm-qədəm
böyüyən, işıqlı gələcəyinə
doğru sürətlə irəliləyən, dünya
düzənində layiqli yerini, mövqeyini möhkəmləndirən
müstəqil Azərbaycanın tərcümeyi-halına
qızıl hərflərlə yazılıb. Bu günlərin
hər biri Azərbaycanı ağır təbəddülatlardan,
dərin girdablardan çıxarıb inkişaf yoluna doğru
istiqamətləndirən yolun başlanğıcıdır.
Mustəqil
Azərbaycan dövləti, möhkəm özülə
söykənən dövlətçiliyimiz, dünyaya
açılmış qapılar, millətimizi uğurlu gələcəyə
doğru aparan aydın, nurlu yol... Bu reallıqların hər
birində Heydər Əliyev dühasının imzası var.
Və bu reallıqlar Heydər Əliyevin ruhunu xalqın ruhuna
qovuşdurub - o, xalq
üçün yaratdığı dəyərlərdə,
ondan həyat dərsi, millətə, dövlətə sevgi
nümunəsi, siyasi mədəniyyət, qətiyyət əxz etmiş milyonların
davranışlarında yaşayır və yaşayacaq...
Ümummilli
lideri cismən bizlərdən ayıran ötən illərdə
Azərbaycan cəmiyyəti və ümumilikdə
bütün dünya onun şəxsiyyətinin
böyüklüyünü daha aydın dərk etmiş oldu.
Heydər Əliyev öz şəxsiyyəti, xalqının mənafeyini
əsas götürən quruculuq əməlləri ilə XX əsr
Azərbacan tarixinin şanlı bir salnaməsini yaradıb. Bu
mənada, "Heydər Əliyev yeni Azərbaycanın
qurucusudur" deyənlər mövqelərində tam
haqlıdırlar. Ulu öndər Heydər Əliyevin həyat
və fəaliyyəti bütövlükdə Azərbaycan
tarixinin elə bir faktıdır ki, ümumən XX əsr Azərbaycan
tarixi məhz bu faktın dərkindən və gələcək
nəsillərə düzgün
çatdırılmasından asılıdır.
Hələ
hakimiyyətinin birinci dönəmində ölkəyə rəhbərlik
missiyasını üzərinə götürdüyü ilk
günlərdən Azərbaycan iqtisadiyyatının, elminin, mədəniyyətinin
inkişafı üçün yalnız ona xas tükənməz
enerji, peşəkarlıq və uzaqgörənliklə fəaliyyətə
başlayan Heydər Əliyev son dərəcə əhəmiyyətli
uğurlara imza atdı. Müxtəlif toplantılarda,
görüşlərdə, müzakirələrdəki
yüksək məzmunlu nitq, çıxış və
söhbətləri, verdiyi göstərişlər yalnız
müdrik dövlət başçısının
xalqının tərəqqisinə qayğısının
parlaq ifadəsi olmaqla məhdudlaşmır. Bütün bunlar
həmin sahələrin hər birinin inkişafını nəzərdə
tutan, mükəmməl proqram və konsepsiyadır.
Bu
gün hamı etiraf edir ki, məhz Heydər Əliyevin Azərbaycana
rəhbərliyə başlaması ilə sovetlər
dövrünün son onilliklərində respublika əhalisi,
bütövlükdə cəmiyyət milli şüurun
formalaşması baxımından daha aktiv, məhsuldar mərhələyə
qədəm qoydu. Ötən əsrin 60-cı illərinin
sonu, 70-ci illərinin əvvəllərindən etibarən
respublika bütün sahələr üzrə görünməmiş
sürətlə inkişaf etdi, ədəbiyyat, incəsənət,
təhsil məsələləri milli özünüdərkin
çevik komponentlərindən birinə çevrildi. Heydər
Əliyev Azərbaycan dövlətinin rəhbəri kimi fəaliyyətə
başladığı ilk illərdən bütün fəaliyyətini
bir həqiqətin istisnasız təsdiqinə yönəltdi
ki, o, qeyri-müstəqil bir respublikanın növbəti
başçısı yox, milli liderdir. Böyük strateq həmin
illərdə bu reallığı tam sübuta yetirdi ki, sovet
dövrünün ideoloji qadağalarına baxmayaraq, xalqın
öz dilini, ədəbiyyatını, mədəniyyətini,
elmini inkişaf etdirib yüksəklərə qaldırması
üçün ona uzaqgörən, müdrik dövlət
xadiminin rəhbərlik etməsi kifayətdir.
Bəli,
bugünkü yeni, müstəqil Azərbaycanı Heydər Əliyev
dühası ictimai həyatın bütün sahələrində
ağır tənəzzülün hökm sürdüyü
bir dövrdən - 1969-cu ildən qurmağa
başlamışdı. Bu qənaətin gerçəkliyini
tarixi proseslərin sonrakı gedişi də tam sübuta yetirir.
Zəngin idarəçilik təcrübəsini sovet rejiminin əsl
mahiyyəti barədə dərin bilgiləri ilə
uzlaşdıran ümummilli lider o zaman Azərbaycanı
düşdüyü böhrandan çıxarmaq
üçün qəti addımlar ataraq respublikanın
uzunmüddətli, ardıcıl inkişafının təminatına
yönələn proqramlar hazırlatdı və qısa zaman ərzində
onların icrasına nail oldu. Azərbaycanın müstəqil
yaşamağa qadir, elmi-texniki inqilabın ən son nailliyyətlərinə
yiyələnən, özü-özünü təmin edən
dövlətə çevrilməsini Heydər Əliyev hələ
o zaman ali məqsədlərdən biri kimi müəyyənləşdirmişdi.
Həmin
illərdə ümummili liderin xalq qarşısında ən
böyük xidmətlərindən biri də onun milli kadr
potensialının, həmçinin Azərbaycanın müxtəlif
sahələrdə ehtiyac duyduğu nadir ixtisaslar üzrə
mütəxəssislər ordusunun yaradılması istiqamətində
atdığı konkret addımlardan ibarət idi. Həmin
dövrün canlı şahidlərindən olaraq deyə bilərəm
ki, Heydər Əliyevin respublika rəhbəri kimi ilk gündən
qarşıya qoyduğu başlıca məqsədlərdən
biri də məhz kadrların milliləşdirilməsi idi.
Milli kadr quruculuğuna göstərilən həssas münasibət
bir sıra reallıqlarla şərtlənirdi. Həmin
dövrdə dövlət idarəçiliyində başqa
millətlərdən olan insanların önə keçməsi,
ana dilinin sıxışdırılması, kosmopolit
ideyaların təbliği fonunda milli ruhun, milli
özünüdərkin zəifləməsi ulu öndər
Heydər Əliyevi ciddiliklə narahat edirdi. Respublikanın gələcək
taleyini uzaqgörənliklə düşünən Heydər Əliyev
dövlət idarəçiliyinin müxtəlif sahələri
üzrə milli kadrların yetişdirilməsini, azərbaycanlıların
vəzifədə irəli çəkilməsini vacib məsələlərdən
biri kimi nəzərdən keçirirdi. Bunun əsas səbəblərindən
biri də respublikada bəzi yeni
ixtisaslar üçün kadrların hazırlanmaması idi.
Respublikaya
rəhbər təyin edilən Heydər Əliyev bu məsələni
xüsusi diqqət mərkəzində saxlayaraq 1969-cu ilin
avqustunda xaricdə təhsil almağa göndərilən tələbələrlə
görüşdü. Azərbaycana müsabiqədən kənar
qəbul üçün ayrılan yerlərin sayının
azlığı respublika rəhbərini bərk narahat edirdi.
Çox sonralar - 1998-ci il sentyabrın 1-də Azərbaycandan kənarda
təhsil almış mütəxəssislərlə
görüşündə böyük strateq Heydər Əliyev
məsələyə həssas münasibətini belə izah
edəcəkdi: "Araşdırmalar nəticəsində mənə
məlum oldu ki, Azərbaycandan kənarda respublikanın
özündə hazırlana bilməyən ixtisaslar üzrə
50 nəfərlik yer verilibdir. Mən maraqlandım ki, bəs nə
üçün bu qədər azdır? Çünki
respublikamız geniş inkişaf yoluna
başlamışdı və iqtisadiyyatımızın bir
sox sahələrində mütəxəssislər
çatışmırdı, bizim ali məktəblərimizdə
də belə mütəxəssislər
hazırlanmırdı. Yəni, o vaxt respublikamızda belə
fakültələr, kafedralar yox idi. Buna çox böyük
ehtiyac var idi. Soruşdum ki, bəs nə üçün 50 nəfərlik
yer ayrılıb? Mənə məlumat verdilər ki,
respublikamıza hər il 50 nəfərlik limit verirlər...
İkincisi siyahıya baxanda gördüm ki, təyin olunmuş
namizədlərin içərisində azərbaycanlılar
azlıq təşkil edirlər".
Ulu
öndər azərbaycanlıların keçmiş
SSRİ-nin nüfuzlu ali təhsil ocaqlarında təhsili
üçün səylə çalışır,
respublikamız üçün ayrılmış müsabiqədənkənar
yerlərin sayının artırılmasını Moskvadan
israrla tələb edir, əksər hallarda buna nail olurdu. 1970-ci
ildə respublikadan kənara oxumağa göndərilən belə
tələbələrin sayı əgər 60 nəfər
idisə, 1975-ci ildə onların sayı 600 nəfərə,
1978-ci ildə 800-900 nəfərə çatmışdı.
Beləliklə, SSRİ-nin müxtəlif ali təhsil müəssisələrinə
göndərilənlərin sayı o zaman təxminən Azərbaycan
Dövlət Universitetinə bir il ərzində qəbul
olunanların sayına bərabər idi. Ulu öndər Heydər
Əliyevin sonralar bəyan etdiyi kimi, kvotanın
artırılması heç də asan başa gəlməyib,
SSRİ rəhbərliyi ilə aparılan gərgin
danışıqlar nəticəsində mümkün olurdu.
Müqayisə üçün bildirək ki, digər müttəfiq
respublikalar üçün 100-150-dən artıq limit
verilmirdi.
Bir
çox hallarda 17-18 yaşında gənc üçün
Moskva Dövlət Universitetində müsabiqədən
keçmək çətin idi. Onların bir qisminin biliyi buna
imkan vermir, digər qismi isə rus dilini bilməməsi
üzündən məqsədini gerçəkləşdirə
bilmirdi. Lakin böyük strateq Heydər Əliyev özünəməxsus
uzaqgörənliklə bu problemin də həllinə nail
olmuşdu. Belə ki, MDU-ya daxil olmaq istəyənlər Azərbaycan
Dövlət Universitetində - öz ana dillərində
imtahan verir, sonra Moskvaya yola düşürdülər. Digər
şəhərlərin universitetlərində də qəbul
məhz bu cür idi. Ümumilikdə, ötən əsrin
70-80-ci illərində 15 mindən çox Azərbaycan gənci
respublikamızdan kənarda - keçmiş SSRİ-nin 50-dən
artıq şəhərinin 170 ali məktəbində 250-yə
yaxın ixtisasa yiyələnmişdi.
Hər il kənarda ali təhsil almağa göndərilən gənclərlə respublika rəhbərinin görüşlərinin keçirilməsi də xoş ənənəyə çevrilmişdi. Heydər Əliyev bəzən istirahətini yarımçıq qoyaraq avqustun son günlərində SSRİ-nin müxtəlif şəhərlərinə yola düşməyə hazırlaşan gənclərlə görüşür, onlara arzu və istəklərini bildirir, tövsiyələrini verirdi. Ulu öndər respublikaya birinci rəhbərliyi dövründə elə bir il olmamışdı ki, bu ənənədən kənara çıxsın. Heydər Əliyevin yüksək rəhbər qayğıkeşliyini öz taleyində hiss edərək onun xeyir-duası, dəstəyi ilə Moskvada ali təhsil almış gənclərdən biri kimi həmin görüşlərdə iştirakımı bu gün də böyük həyəcanla, qürurla xatırlayıram.
Həmin
illərdə bir çox gənclər kimi mənim də ali
təhsil almaq arzumun gerçəkləşməsi ulu öndər
Heydər Əliyevin tarixi xidmətlərinin nəticəsi
idi. Bakıda 172 saylı orta məktəbi
bitirdikdən və 2 illik hərbi xidməti keçdikdən
sonra - 1973-cü ildə D.Bünyadzadə adına Azərbaycan
Xalq Təsərrüfatı İnstitutuna (Hazırkı Azərbaycan
Dövlət İqtisad Universiteti - Ə.B.) qəbul olundum. Azərbaycan
KP MK-nın göstərişi ilə təhsildə yüksək
göstəricilərimi nəzərə alaraq məni Moskva
Dövlət Universitetinin iqtisadiyyat fakültəsinə
köçürdülər.
1977-ci
ildə - sonuncu kursda oxuyarkən, indiki Heydər Əliyev
adına Sarayda tələbə gənclərlə
keçirilən ənənəvi görüşdə əlaçı
tələbə kimi iştirak etmək fürsəti
qazanmışdım. Bundan əvvəl məni bir məsuliyyətli
görüşə - Azərbaycan KP MK-nın Elm və Tədris
şöbəsinə çağırdılar. Şöbə
müdirinin müavini, o zaman da biz gənc alimlərin himayədarı
kimi tələbələrin böyük ehtiramını
qazanmış hörmətli Ramiz Mehdiyev məni qəbul edərək
dedi: "Əlican, sən və sənin kimi tələbələr
üçün Bakıda və Moskvada oxuduğunuz ali məktəblər,
şübhəsiz, vacibdir. Amma heç bir zaman unutmayın ki,
Siz ən nüfuzlu, ən sanballı ali məktəbin - Heydər
Əliyev universitetinin tələbələrisiz, məzunlarısınız.
Unutmayın ki, Azərbaycanı və Heydər Əliyevi təmsil
edirsiniz". Aradan çox illər
ötsə də, möhtərəm Ramiz Mehdiyevin bu sözləri
mənim üçün həyat kredosu olaraq qalır.
Respublikanın
o zamankı rəhbəri ilə görüş isə həyatımın
ən gözəl xatirəsinə çevrilib. Respublika rəhbəri
özünəməxsus müdrikliklə
çıxış edən hər bir tələbəni dinləyir,
onlarla səmimi söhbətləşir, problemlərini,
qayğılarını soruşur, tövsiyələrini
verir, bir sözlə, hərtərəfli köməyini gənclərdən
əsirgəmirdi. Yaxşı yadımdadır, həyəcan
və sevinc hissi ilə çıxışıma
başlayaraq tələbə dostlarım adından
yaxşı oxuyacağımızı, respublikamızın
adını daim uca tutacağımızı, ictimai həyatda
fəal iştirak edəcəyimizi, Vətənə layiqli
kadr kimi dönəcəyimizi bildirdim.
Ulu
öndər hər bir gənci böyük maraqla, təmkinlə,
qürurla dinlədikdən sonra dərin məzmunlu nitqində
onlarla qürur duyduğunu bildirir, Vətənə layiqli
mütəxəssis kimi dönəcəklərinə dərin
inamını ifadə edirdi. Əvvəlki görüşlərdə
olduğu kimi, dahi rəhbərin nitqi bu tədbirdə də
diqqətlə dinlənildi. Həqiqətən, unudulmaz anlar
idi: görüş iştirakçılarının hər
biri bu tarixi məqamları yaddaşına əbədi həkk
etməyə çalışırdı. Ulu öndərin həmin
nitqindən bəzi hissələri hələ də
xatırlayıram: "Xüsusi razılıq hissi ilə deməliyəm
ki, ölkənin Moskva, Leninqrad və başqa şəhərlərinin
ali məktəblərinə kənd yerlərindən daxil olan
oğlan və qızların sayı durmadan artır və həmin
ali məktəblərdə indi əslində, bütün
respublika təmsil olunmuşdur...
Asudə
vaxtın təşkili, ondan istifadə problemləri hər
bir tələbə üçün mühüm problemdir.
Yadda saxlayın ki, istirahət, asudə vaxt heç də
boş-bekar gəzmək demək deyildir, vaxtı hədər
keçirmək demək deyildir. Fəal istirahət mütaliə
etmək, turist yürüşlərinə çıxmaq,
idmanla məşğul olmaq, sərgilərə və muzeylərə
getmək deməkdir. Bütün bunlar uzun illər boyu tükənməyən
və kara gələn qiymətli sərvətdir. Əksinə,
gənclik illərində itirdiyimiz vaxtı qaytarmaq, bilik, təsərrüfat
kəsirinin yerini sonradan doldurmaq mümkün deyildir".
Ulu
öndər Heydər Əliyev 1982-ci ildə SSRİ Nazirlər
Soveti sədrinin birinci müavini təyin olunduqdan sonra da
respublikamızdan kənarda təhsil alan gəncləri unutmur,
müntəzəm olaraq onlarla görüşür,
qayğıları, problemləri ilə maraqlanırdı. Bu ənənə
ümummilli lider Heydər Əliyevin xalqın təkidli istəyi
ilə hakimiyyətə gəlişindən sonra da davam
etdirildi. Qan-qada, böhran dolu həmin dövrdə
xalqının səsinə səs verərək xilaskar kimi
özünü yetirən, qardaş
qırğınlarının qarşısını alan,
ölkənin parçalanmasına imkan verməyən, Azərbaycan
dövlətini işıqlı bir yola çıxaran Heydər
Əliyevin 1993-cü ilin 22 sentyabrında - ölkədə
çox ziddiyyətli ictimai-siyasi proseslərin cərəyan
etdiyi bir zamanda gənclərlə görüşə vaxt
tapması, onların problemlərini dinləməsi ümummili
liderin Azərbaycan gəncliyinin cəmiyyət həyatındakı
roluna verdiyi böyük önəmin əyani göstəricisi
idi. Ulu öndər dövlət quruculuğunda enerjili, təşəbbüskar,
kreativ ruhlu gəncliyin potensialından səmərəli
istifadəni vacib sayır, eyni zamanda, onların bu prosesdə
yaxından iştirakına çalışırdı. Azərbaycan
gəncliyini milli inkişafın hərəkətverici
qüvvəsi hesab edən Heydər Əliyev onların cəmiyyətin
iqtisadi, siyasi, mənəvi, mədəni həyatında
önəmli yer tutmasını zəruri bilirdi. Eyni zamanda,
ölkə vətəndaşlarının təxminən 35
faizinin gənclərdən ibarət olması bu sosial zümrəyə
xüsusi diqqət və qayğının vacibliyini
qabarıq şəkildə üzə
çıxarırdı.
Ulu
öndər Heydər Əliyev 22 sentyabr 1993-cü ildə
parlamentdə ölkə gənclərinin fəal qrupu ilə
görüşündə bu məqsədini açıq bəyan
etməklə yanaşı, yeni dövrdə onların
qarşısında duran vəzifələrə də
toxunurdu. Xüsusi vurğulayırdı ki, yeni dövrdə
müstəqilliyin möhkəmləndirilməsi, ictimai-siyasi
sabitliyin, qanunçuluğun təmini, Azərbaycanın
müstəqil dövlət kimi dünya miqyasında
tanıdılması və digər mühüm məqsədlərin
həyata keçirilməsi prosesində respublika gənclərinin
üzərinə böyük vəzifələr
düşür. Ölkə gəncliyinin milli mənlik
şüuruna, onun sosial-mənəvi sarsıntılara məruz
qalmış düşüncəsinə belə bir ülvi
ideya aşılanırdı ki, dövlət müstəqilliyinin
əbədiliyinin təmini naminə hər bir gənc məsuliyyətini
aydın dərk edərək ölkə rəhbərinin ətrafında
sıx birləşməlidir. Gənclik öz potensialından
düzgün, səmərəli istifadə edərək bu
mürəkkəb şəraitdə dövlətinin,
xalqının problemlərinin həllində əlindən gələni
əsirgəməməlidir.
Dahi
öndər Heydər Əliyev özünün böyük fədakarlığı,
təkidli səyləri ilə 70-80-ci illərdə
keçmiş SSRİ-nin nüfuzlu ali məktəblərində
təhsil almış azərbaycanlı kadrları da qətiyyən
unutmur, onlara özünün doğmaları kimi
yanaşır, dövlət idarəçiliyində daim irəli
çəkirdi. Xatırlatmaq istərdim ki, müstəqillik
illərində həmin gənclər Azərbaycandan Kənarda
Təhsil Almış Mütəxəssislər Cəmiyyətini
təsis etmişdilər. Özündə 1500-dən çox
ixtisaslı ziyalını birləşdirən həmin cəmiyyətin
rəhbərliyinin xahişi ilə ulu öndər Heydər Əliyev
1998-ci il mayın 21-də 6 nəfərlik heyəti qəbul
etdi. Əlamətdar görüş ulu öndərin 75 illik
yubileyinə təsadüf etdiyindən, səmimi təbriklərimizi,
arzu və istəklərimizi izhar etdik. Heydər Əliyev cəmiyyətin
rəhbər şəxsləri ilə görüşdən
məmnun qaldığını bildirərək dedi: "Mənə
məlumat verdilər ki, siz - 1970-1980-ci illərdə
SSRİ-nin müxtəlif şəhərlərindəki
nüfuzlu ali məktəblərə müsabiqədənkənar
oxumağa göndərdiyimiz tələbələrin
yaratdıqları cəmiyyətin üzvləri mənimlə
görüşmək istəyirlər. Mən bunu məmnuniyyətlə
qəbul etdim. Çünki 1970-1980-ci illərdə Azərbaycandan
kənarda təhsil almağa göndərdiyim insanlar mənim
doğma övladlarımdır".
Ulu
öndər çıxışında Azərbaycandan Kənarda
Təhsil Almış Mütəxəssislər Cəmiyyətinin
yaradılmasını alqışladı və 70-80-ci illərdə
digər respublikalarda mütəxəssis kimi yetişmiş
insanlarla xüsusi görüşün keçirilməsinin
vacibliyini diqqətə çəkdi. Beləliklə, cəmi
bir neçə ay sonra - 1998-ci ilin sentyabrında bu əlamətdar
görüş reallaşdırıldı. Ulu öndər
Heydər Əliyev bilavasitə mütəxəssis kimi
formalaşmasına dəstək verdiyi həmin şəxsləri
səmimi salamladıqdan sonra respublikaya birinci rəhbərliyi
dövründə bu sahədə həyata keçirdiyi tədbirlərə
geniş toxundu. Ulu öndər ümumrespublika
toplantısında həmin dövrdə azərbaycanlı gənclərin
keçmiş SSRİ-nin nüfuzlu ali məktəblərində
təhsil almalarına törədilmiş süni maneələri,
çətinlikləri bir daha xatırlatdı. Azərbaycanlı
gənclərin xaricdə təhsil almalarının dərin
köklərinin olduğunu xatırladaraq ötən əsrin əvvəllərində
bir çox ziyalıların Avropa və Rusiyada yüksək
ixtisaslı mütəxəssis kimi yetişdiklərini, cəmiyyətə
fayda verdiklərini diqqətə çəkdi. Heydər Əliyev
Azərbaycana birinci rəhbərliyi dövründə gənclərin
respublikadan kənarda təhsil almasına dəstək verməsinin
bir sıra digər maraqlı məqamlarına da toxunaraq dedi:
"Əgər insan bir kənddə doğulursa və
ömrü boyu həmin kənddə yaşayırsa, yaxud bir
qəsəbədə doğulub ömrü boyu həmin qəsəbədə
yaşayırsa, yaxud bir şəhərdə doğulursa və
ömrü boyu o şəhərdə yaşayırsa, təhsil
almaq, işləmək üçün başqa bir yerə
getmirsə, nə qədər kitab oxusa, başqa vəsaitlərdən
istifadə etsə də, onun dünyagörüşü
çox kənara çıxa bilməz. Ancaq insan öz
baxış dairəsini nə qədər genişləndirirsə,
öz ölkəsindən, şəhərindən, kəndindən
çıxıb başqa ölkələrdə, şəhərlərdə
olanları nə qədər görüb-götürürsə
və öyrənirsə, daha da zənginləşir. Bax, o
illər mən bu prinsipi nəzərə aldım".
Ulu
öndərlə o zamankı Respublika sarayında gerçəkləşən
tarixi görüşdə
çıxışçılardan biri kimi mənə də
söz demək xoşbəxtliyi nəsib oldu. "Əgər
1977-ci ilin avqust ayında elə bu sarayda mən adi bir tələbə
kimi çıxış etmişdimsə, bu gün artıq
Sizin qarşınızda kafedra müdiri kimi
çıxış edirəm. Mənim elm sahəsində
qazandığım nailiyyətlər Sizin adınızla
bağlıdır" - deyə nitqimdə ulu öndərin
bu sahədəki fəaliyyətinə bir daha nəzər
saldım. Həmçinin vurğuladım ki, 70-80-ci illərdə
respublika iqtisadiyyatının güclənməsi
üçün ulu öndərin həyata keçirdiyi
islahatlar, xalqımızın mədəni, mənəvi
yüksəlişi üçün həyata keçirdiyi tədbirlər
dövlətə, xalqa xidmətin ən parlaq nümunəsi
idi. Qeyd etdim ki, həmin dövrdə təhsil alan mütəxəssislərin
böyük əksəriyyəti müstəqil Azərbaycan
Respublikasının inkişafı və problemlərinin həlli
naminə əllərindən gələni əsirgəmirlər.
Ulu
öndər Heydər Əliyev sonda dərin məzmunlu nitq
söyləyərək məsləhət və tövsiyələrini
verdi, qarşıda duran perspektiv planlardan söz açdı.
Dövlət ali məktəb şəbəkəsinin
saxlanılması, müəllim adının
ucalığının, Azərbaycan dilinin təmizliyinin
qorunması zərurətini önə çəkdi. İndi
həmin görüşü bir daha xəyalımda
canlandırıb qələmə alarkən o böyük və
qayğıkeş insanı minnətdarlıqla
xatırlayıram.
Nəhayət,
ulu öndər Heydər Əliyevlə dördüncü dəfə
görüşmək xoşbəxtliyini 2002-ci ildə
yaşadım. Həmin il professoru olduğum Azərbaycan
Dövlət İqtisad Universitetinin yubileyində ölkə
başçısı da iştirak edirdi. Fəxri
qonağı və onu müşayiət edən yüksək
vəzifəli şəxsləri ali məktəbin həyətində
qarşıladıq. Hamı ilə səmimi görüşən
Heydər Əliyev professor və müəllim heyətinin
dayandığı sıraya çatanda bir anlıq ayaq
saxlayaraq məni xatırlamağa çalışdı.
Universitetin o zamankı rektoru, hörmətli akademik Əli
Abbasov tez irəli keçib məni ölkə
başçısına təqdim etdi, haqqımda qısa məlumat
verdi. Öz növbəmdə mən də həmkarlarım
adından ümummilli liderə səmimi salamlarımı
yetirdim, onun vaxtı ilə xaricdə təhsil almağa
göndərdiyi şəxslərdən biri olduğumu dedim.
Böyük öndər iqtisadçı kadrların hazırlanmasında
universitetin professor-müəllim heyətinə öz
tövsiyələrini verdi.
Azərbaycandan
Kənarda Təhsil Almış Mütəxəssislər Cəmiyyətinin
Ali Məclisinin sədri kimi deyə bilərəm ki, ulu
öndərin böyük xeyirxahlığını
görmüş insanlar onun əziz xatirəsini daim əziz
tuturlar. 1500-dən çox üzvü olan cəmiyyət öz sıralarında onlarla elmlər
doktorunu, yüzlərlə fəlsəfə doktorunu birləşdirir.
Qurumun üzvlərindən 100-dən çoxu məhz MDU-nun məzunlarıdır.
Təşkilatın həyata keçirdiyi tədbirlər
genişdir, fəaliyyət planları rəngarəngdir. Hər
addımda məhz ulu öndərin tövsiyə və
tapşırıqlarını rəhbər tutmağa
çalışırıq.
Xatırladaq
ki, ulu öndər 1970-1987-ci illərdə Azərbaycandan kənarda
təhsil almış mütəxəssislərin 1998-ci ildə
keçirilən ümumrespublika toplantısında gənclərin
xaricdə təhsil alması məqsədilə xüsusi
dövlət proqramının hazırlanması vacibliyini
önə çəkmişdi. Həmin illərdə
respublikanın iqtisadi vəziyyəti buna imkan verməsə də,
ulu öndər Heydər Əliyevin ən layiqli
davamçısı Azərbaycan Prezidenti İlham Əliyev bu
nəcib təşəbbüsü praktik surətdə
gerçəkləşdirdi. Gənclərin xaricdə təhsil
almağa göndərilməsi ilə bağlı hələ
ötən əsrin 70-ci illərində mövcud olmuş
mütərəqqi ənənənin bərpası dövlət
idarəçiliyi üçün müasir təfəkkürlü,
biliklə və yüksək ixtisaslı kadrlar hazırlamaq məqsədi
daşıyır. Dövlət başçısının
31 yanvar 2008-ci il tarixli "Azərbaycan Respublikasının
ali təhsil müəssisələrinin Avropa ali təhsil məkanına
inteqrasiyası ilə bağlı bəzi tədbirlər
haqqında", habelə 16 aprel 2007-ci il tarixli "2007-2015-ci
illərdə Azərbaycan gənclərinin xarici ölkələrdə
təhsili üzrə Dövlət Proqramı"nın təsdiq
edilməsi haqqında", 5 sentyabr 2007-ci il tarixli
"2007-2015-ci illərdə Azərbaycan gənclərinin
xarici ölkələrdə təhsili üzrə Dövlət
Proqramı"nın 2007-2008-ci tədris ilində maliyyələşdirilməsi
haqqında" sərəncamları da məhz bu məqsədə
xidmət etmişdir. Ümumilikdə, proqram əsasında
5000 tələbənin xaricdə təhsil almağa göndərilməsi
nəzərdə tutulur ki, bu da Azərbaycan dövlətinin gələcəyi
baxımından son dərəcə əhəmiyyətlidir.
Azərbaycan
Prezidentinin "Azərbaycan Milli Elmlər Akademiyasının
gənc alimlərinin Avropanın elmi mərkəzlərində
doktorantura təhsilinin maliyyələşdirilməsi
haqqında" 2010-cu il 9 fevral tarixli sərəncamı isə
respublikada elmi tədqiqatların müasir standartlar səviyyəsində
aparılmasını, ölkənin elmi kadr
potensialının artırılmasını və Azərbaycan
elminin beynəlxalq elm məkanına inteqrasiyasının təmin
olunmasını daha da sürətləndirmək məqsədi
daşıyır. Sərəncamla Azərbaycan Respublikası
Prezidentinin Ehtiyat Fondundan Azərbaycan Milli Elmlər
Akademiyasına gənc alimlərin Avropanın elmi mərkəzlərinin
doktoranturalarında təhsil almaları üçün 500
min (beş yüz min) manat məbləğində vəsait
ayrılmışdır. Bu, sosial-iqtisadi inkişafın
keyfiyyətcə yeni mərhələsində elmi tədqiqatların
Avropa səviyyəsinə çatdırılmasını, gənc
alimlərin dünya elminə inteqrasiyasını nəzərdə
tutur.
Elm,
təhsil, bilik, müasirlik, savad gələcəyə
açılmış qapılar deməkdir. Prezident İlham Əliyev
sosial-iqtisadi inkişafın keyfiyyətcə yeni mərhələsində
Azərbaycan xalqının intellektual gələcəyini təmin
etməyin yeganə yolunu məhz bu sahələrin ən
müasir tələblər səviyyəsinə
çatdırılmasında görür. Görülən
işlər deməyə əsas verir ki, yaxın illərdə
Azərbaycanda elm və təhsil sahəsində
özünü göstərən qlobal problemlər əsaslı
surətdə aradan qalxacaq, milli təhsilimizin keyfiyyəti daha
da yüksələcəkdir.
Əlican BABAYEV,
Azərbaycan Dövlət
İqtisad Universitetinin
"İqtisadi nəzəriyyə-1"
kafedrasının müdiri,
iqtisad elmləri doktoru, professor,
əməkdar müəllim
Azərbaycan.-2013.- 2 mart.- S.4.