Azərbaycan teatrının yeni uğurlar qazanmasına güclü təkan

 

Çox hörmətli Prezident!

 

Sizin "Milli Teatr Günü"nün təsis edilməsi haqqında" və "Azərbaycanda peşəkar milli teatrın yaradılmasının 140 illiyi haqqında" sərəncamlarınız bütün teatr ictimaiyyəti kimi, Azərbaycan Dövlət Musiqili Komediya Teatrı kollektivininböyük sevincinə səbəb olmuşdur. Bu sərəncamlarda milli teatrın fəaliyyətinə verdiyiniz yüksək qiymət kollektivimizin hər bir üzvünü qəlbən sevindirmişdir. Biz bir daha inandıq ki, Azərbaycan dövləti teatr sənətinin inkişafını milli mədəniyyətin və müasir cəmiyyətin inkişaf prioritetlərindən hesab edir. Bu, teatr sahəsində çalışan hər kəsdə böyük qürur hissi doğurur.

Ümummilli lider Heydər Əliyev teatr sənətinə həmişə böyük diqqətlə yanaşmışdır. Azərbaycan mədəniyyətinin son illərdəki tarixi inkişaf yolu bilavasitə ulu öndərin adı və şəxsiyyəti ilə bağlı olmuşdur. Mədəniyyət və incəsənət xadimlərimiz bu dövrdə yaradıcılıq axtarışlarını məhz ulu öndərin qayğısı sayəsində genişləndirməyə müvəffəq olmuşlar.

Bu siyasət hazırda Sizin tərəfinizdən də uğurla davam etdirilir. Faktdır ki, son illər ərzində Azərbaycan xalqının həyatında bir sıra uğurlu tarixi dəyişikliklər baş vermişdir. Ölkə rəhbərliyinin prinsipial, xalqımızın mənafeyini təmin edən xarici siyasətinin və həyata keçirdiyi müxtəlif tədbirlərin nəticəsində Azərbaycanın nüfuzu dünya miqyasında artmış, beynəlxalq əlaqələri daha da genişlənmişdir.

Yurdumuzun mədəni həyatında xüsusi önəm kəsb edən teatr sənətinin inkişafı ilə bağlı bir sıra fundamental dövlət sənədləri də məhz Sizin hakimiyyətiniz dövründə qəbul edilmişdir.

"Teatr və teatr fəaliyyəti haqqında" Azərbaycan Respublikasının Qanunu, "Azərbaycan teatr sənətinin inkişaf etdirilməsi haqqında" sərəncam və nəhayət "Azərbaycan teatrı 2009-2019-cu illərdə" Dövlət Proqramı milli teatrımıza göstərilən dövlət qayğısıdır.

Bu gün ölkəmizdə öz yaradıcılığı ilə fərqlənən sənət ustalarına Azərbaycan Respublikasının fəxri adları, Prezident təqaüdləri və Prezident mükafatları verilir, onların əməyi ölkənin ən yüksək mükafatlarına - ordenlərə layiq görülür. Milli mədəniyyətimizin qorunması, zənginləşdirilməsi və tərəqqisinə xidmət edən teatr, musiqi, təsviri sənət və kino sahəsində xüsusi nailiyyətlər qazanan istedadlı şəxslərin bədii axtarışlarını dəstəkləmək məqsədilə Sizin gördüyünüz işlər sonsuzdur.

Azərbaycan teatrının 10 illik inkişaf perspektivlərini müəyyənləşdirən Dövlət Proqramı öz fəaliyyəti ilə milli mədəni sərvətə çevrilən səhnə sənətimizin zəngin bədii irsinin və yaradıcılıq ənənələrinin qorunması, Avropa mədəniyyətinə inteqrasiya olunması, teatrların maddi-texniki bazalarının modernləşdirilməsi, ölkədəki əksər teatr binalarının dünya standartlarına uyğun təmiri və günün tələblərinə cavab verən repertuarın formalaşması məqsədlərinə xidmət edir.

Beynəlxalq təcrübə ilə davamlı tanışlıq mexanizmi, genişmiqyaslı qastrol səfərləri, canlı ünsiyyət, yaradıcılıq mübadiləsi bu gün teatrlarımızın əsas fəaliyyət dairəsinə daxildir. Bu istiqamətdə son illərin uğurları göz qabağındadır. İndi ölkə teatrlarının sorağı dünyanın ən müxtəlif meredianlarından gəlir. Amerika Birləşmiş Ştatlarında, Almaniyada, Türkiyədə, Rusiyada, Belarusda, Gürcüstanda, Fransada, Mərakeşdə, Finlandiyada, İranda, Misirdə, Hollandiyada, Estoniyada, Bolqarıstanda, Ukraynada, Türkmənistanda, Tacikistanda, İsveçrədə, Moldovada, Serbiyada, Fuceyrada keçirilən beynəlxalq tədbirlərdə teatrlarımız Azərbaycanı ləyaqətlə təmsil etmişlər.

 Eyni zamanda, vaxtaşırı olaraq xarici dövlətlərdən tanınmış rejissorlar, baletmeysterlər, xoreoqraflar, teatr rəssamları tamaşa hazırlamaq üçün Azərbaycana dəvət olunurlar. Dövlət vəsaiti hesabına teatrlarımızda xarici ölkələrin tanınmış sənətkarları ustad dərsləri keçir. Səhnələrimizi bəzəyən bir neçə tamaşa beynəlxalq layihədə öz həllini tapıb.

Bu gün Azərbaycanın qaynar mədəni həyatı var. Heydər Əliyev Fondunun prezidenti, ölkənin birinci xanımı, UNESCO və İSESCO-nun xoşməramlı səfiri Mehriban xanım Əliyevanın bilavasitə təşəbbüsü və rəhbərliyi ilə keçirilən beynəlxalq tədbirlər Azərbaycanı dünyanın tanınan mədəniyyət mərkəzinə çevirmişdir. Biz bütün bunlarla fəxr edirik!

 

Hörmətli Prezident!

 

Sizin 25 noyabr 2010-cu il tarixli sərəncamınızla Azərbaycan Dövlət Musiqili Komediya Teatrı da əsaslı təmirə dayandırılmışdır. Hazırda teatrda dünya standartları səviyyəsində gərgin və sürətli təmir, yenidənqurma və bərpa işləri aparılır. Görülən işlər göz oxşayır. Tarixi 1910-cu ildən başlayan teatrımızın kollektivi bir əsrlik yubileyində Sizin bu barədə sərəncamınızı ən yüksək hədiyyə kimi qəbul etmişdir. Artıq binada tamamlama işləri görülür. Və buna görə də daha böyük əzmlə yaradıcılıq işini davam etdiririk, çox böyük sevinclə teatrımızın istifadəyə veriləcəyi günü gözləyirik.

Bu gün Azərbaycan Dövlət Musiqili Komediya Teatrı inkişaf mərhələsini yaşayır. Teatrda dövlət islahatlarına uyğun olaraq yüksək mənəvi-milli dəyərlərə söykənən repertuar formalaşır və bu iş davam etməkdədir. İndi repertuarımızda tamaşaçılar tərəfindən sevilən onlarla maraqlı səhnə əsəri var. Bu tamaşalar dövlət sifarişi ilə, dövlət vəsaiti ilə reallaşır. Bundan əlavə, teatrımız Mədəniyyət və Turizm Nazirliyinin maddi dəstəyi ilə müxtəlif beynəlxalq teatr festivallarında iştirak edir. Bütün bunların həyata keçirilməsində dövlətin diqqət və qayğısını hiss edirik. Görülən işlər aktyorların, rejissorların, ümumilikdə teatrımızın inkişafına böyük dəstəkdir.

Hazırda teatrda yeni tamaşalar hazırlanır, qastrollar təşkil olunur. Təkcə son üç ildə kollektivimiz Rusiyada, Gürcüstanda, Türkiyədə, İranda səfərlərdə olmuş, nüfuzlu beynəlxalq festivallarda iştirak etmişdir. Milli teatrlarımız arasında ilk dəfə məhz Azərbaycan Dövlət Musiqili Komediya Teatrı Beynəlxalq quruma - Musiqili Teatrların Beynəlxalq Assosiasiyasına üzv olmuşdur. Ölkə əhalisi qarşısında uğurlu çıxışlarımız, müxtəlif bölgələrə qastrol səfərlərimiz də maraqla qarşılanmışdır.

İki il bundan öncə Amerikada fəaliyyət göstərən "Azərbaycan-Nyu-York Assosiasiyası" Amerika Birləşmiş Ştatlarının Nyu-York və Vaşinqton şəhərlərində "Amerikada Azərbaycanın teatr bayramı" adı ilə dövlət müstəqilliyimizin bərpasının iyirminci ildönümünə həsr olunmuş tədbirlər keçirdi. Bu tədbirlər təkcə bu ölkədə yaşayan azərbaycanlılar deyil, xarici vətəndaşlar tərəfindən də böyük maraqla qarşılanmış, teatr sənətimiz uzaq Amerikada layiqincə təmsil olunmuşdur. Bu, Azərbaycan teatrının yarandığı 140 il ərzində okeanın o tayına ilk səfəri idi. Qürur duyuruq ki, məhz bu yolu Amerikaya biz açdıq - Azərbaycan Dövlət Musiqili Komediya Teatrının kollektivi!

 

Möhtərəm cənab Prezident!

 

Bir daha bildiririk ki, Sizin teatr sahəsində son sərəncamlarınız bütövlükdə Azərbaycan teatrının yeni uğurlar qazanmasına güclü təkan verəcək. Bütün bunlara görə Sizə bir daha minnətdarlığımızı bildiririk. Bizim hamımızın bir vətəni var - Ulu Azərbaycan! Azərbaycanın inkişafı, daha böyük uğurları naminə biz də hər zaman Sizin yanınızdayıq! Hər zaman Sizinləyik! Biz bundan sonra da şərəfli əməyimizi, bütün yaradıcılıq axtarışlarımızı və sənət uğurlarımızı məhz Azərbaycanımızın böyük inkişafına həsr edəcəyik!

Azərbaycan Dövlət Musiqili Komediya Teatrının kollektivi adından Sizə qarşı dərin hörmət və ehtiramla:

 

 

Əliqismət LALAYEV,

teatrın direktoru, əməkdar incəsənət xadimi, sənətşünaslıq üzrə fəlsəfə doktoru

 

 

Afaq BƏŞİRQIZI,

xalq artisti, Prezident mükafatçısı

 

 

İlham NAMİQ KAMAL,

xalq artisti, Prezident təqaüdçüsü

 

 

Fatma MAHMUDOVA,

xalq artisti, Prezident təqaüdçüsü

 

 

Nazim HACIƏLİBƏYOV,

əməkdar incəsənət xadimi, Prezident mükafatçısı

 

 

Əsgər ƏSGƏROV,

əməkdar incəsənət xadimi, Prezident mükafatçısı

 

 

Səmayə MUSAYEVA,

əməkdar artist, şəhid anası

 

 

Ramiz MƏMMƏDOV,

əməkdar artist, Prezident mükafatçısı

 

 

Xanım QAFAROVA,

əməkdar artist, Prezident mükafatçısı

 

 

Boris QRAFKİN,

əməkdar artist

 

 

Gülnar SALMANOVA,

əməkdar artist

 

 

Əkbər ƏLİZADƏ,

əməkdar artist

 

 

Çingiz ƏHMƏDOV,

əməkdar artist

 

 

Nərgiz KƏRİMOVA,

əməkdar artist

 

 

Naidə ORUCOVA,

əməkdar artist

 

 

Elxan OCAQOV,

əməkdar mədəniyyət işçisi

 

 

Svetlana BULAX,

aktrisa

 

 

Marina LİTVİNENKO,

Aktrisa

 

 

Azərbaycan.-2013.- 5 mart.- S.2.