Avantüristlər gəncləri indi də «Molotov kokteyli» ilə silahlandırırlar

İfrat radikal müxalifətin ictimai-siyasi sabitliyi pozmaq cəhdinin qarşısı bu dəfə də alındı

Azərbaycan gənclərinin sağlam ruhda böyüməsi və ölkəyə layiqli vətəndaş kimi yetişmələri üçün ölkə rəhbərliyi tərəfindən ardıcıl və sistemli tədbirlər həyata keçirilir. Prezident İlham Əliyevin ölkədə aparılan kadr islahatları zamanı gənclərə göstərdiyi etimad bu baxımdan diqqəti cəlb edir.

Bu gün ölkəmizdə gənclər siyasəti dövlət siyasətinin mühüm tərkib hissəsinə çevrilib. Azərbaycan gəncliyi ictimai həyatın bütün sahələrində aktiv fəaliyyəti ilə seçilir, siyasi, iqtisadi, humanitar, sosial tədbirlərin gerçəkləşməsində mühüm rol oynayırlar. Dövlətin gənclərin fəaliyyəti üçün yaratdığı geniş imkanlar sayəsində bu təbəqə cəmiyyətin avanqard qüvvəsinə çevrilib. Ölkə başçısı bununla bağlı bildirmişdi: "Bugünkü gənclər bir neçə ildən sonra Azərbaycanın bütün idarəetmə sistemində əsas rol oynayacaqlar. Ona görə gəncləri inamla qabağa çəkmək lazımdır, məsul vəzifələrə təyin etmək lazımdır ki, onlar işləsinlər, gözəl təcrübə əldə etsinlər və beləliklə, gələcək fəaliyyət üçün hazır olsunlar".

Yüksək intellekti və bacarığı ilə seçilən gənclərin dövlət idarəetmə işlərinə cəlb olunması deyilənləri bir daha təsdiqləyir. Azərbaycanda gənclərin hərtərəfli inkişafı istiqamətində genişmiqyaslı işlər aparılır. Bu baxımdan ölkə Prezidentinin sərəncamı ilə təsdiq olunmuş "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı"nın böyük əhəmiyyəti var. Ötən müddətdə cəmiyyətin bu əhəmiyyətli təbəqəsinin hərtərəfli inkişafı istiqamətində mühüm addımlar atılmışdır. Gənclərimizin intellektual səviyyəsinin yüksəldilməsi üçün bütün imkanlar yaradılmışdır.

Təəssüflər olsun ki, ifrat radikal müxalifətin liderləri bir qrup gənci təsir altına salaraq onların ölkəyə layiqli vətəndaş kimi yetişməsinə, düzgün istiqamətdə inkişafına ciddi əngəl törədirlər. Onları destruktiv hərəkətlər törətməyə sövq edirlər. Sosial dayaqlarını və ictimai-siyasi proseslərə təsir imkanlarını tamamilə itirmiş radikal müxalifət təmsilçiləri seçkiqabağı ölkədə vəziyyəti süni şəkildə gərginləşdirməyə, bundan öz çirkin məqsədləri üçün istifadə etməyə çalışırlar. Radikal müxalifətin hakimiyyətin nüfuzu qarşısında acizliyi, gücsüzlüyü və sivil rəqabət imkanına malik olmadığı bununla bir daha təsdiq olunur. "Nida" Vətəndaş Hərəkatının üç üzvünün cinayət əməlləri törətməkdə şübhəli şəxs qismində həbs edilmələri də həmin gənclərin destruktiv dairələrin təsiri altında olduğunu sübuta yetirdi.

Milli Təhlükəsizlik Nazirliyinin və Baş Prokurorluğun birgə bəyanatında qeyd olunur ki, son dövrlər radikalyönümlü bəzi destruktiv qüvvələr tərəfindən ölkədə bərqərar olmuş ictimai-siyasi sabitliyin pozulmasına yönəlmiş qanunazidd cəhdlər göstərilir. İlkin istintaqla müəyyən edilib ki, Bəxtiyar Quliyev, Şahin Novruzlu və Məmməd Əzizov 2012-ci ilin ortalarından etibarən internet vasitəsilə "Nida" Vətəndaş Hərəkatının üzvləri və narkotika aludəçiləri olmaqla təşkilatın bir sıra qanunsuz tədbirlərində fəal iştirak etmişlər. Bu şəxslərin yaşadıqları mənzillərdən "Molotov kokteyli" adlanan tez alışan maye aşkarlanıb.

Məlum olub ki, 2013-cü il yanvarın 26-da keçirilmiş qanunsuz aksiyanın iştirakçısı M.Əzizov sosial şəbəkələrdəki yazışmalarında dinc aksiyaların fayda vermədiyini, insanlar arasında vahimə yaratmaq effekti verən "Molotov kokteyli"ndən istifadə edilməsinin lazım olduğunu bildirib. Aksiyanın digər iştirakçısı B.Quliyev "facebook" sosial şəbəkəsində Ş.Novruzlu ilə yazışmaları zamanı növbəti aksiyaların daha səmərəli keçməsi və əhalinin aqressiv addımlar atması üçün "Molotov kokteyli"ndən, səs və tüstü şaşkalarından istifadə edilməsinin zəruri olduğunu müzakirə etmiş və sonuncu artıq on ədəd "Molotov kokteyli" hazırlamışdır. Ş.Novruzlu 2013-cü il fevralın 23-də "facebook"da öz profilində "Molotov kokteyli", səs və tüstü şaşkalarının kustar üsulla hazırlanmasını öyrədən videomateriallar yerləşdirmişdir. Martın 10-da paytaxtın Fəvvarələr meydanında keçirilən qeyri-qanuni mitinq zamanı "Molotov kokteyli"ndən istifadənin yolları da göstərilmişdir. Bu şəxslərin qeyri-qanuni əməllərinin qarşısı vaxtında alınmışdır.

Martın 10-da Fəvvarələr meydanında cəmiyyətə açıq hörmətsizlik ifadə edən aqressiv və qərəzli hərəkətlər dinc sakinlərin ciddi narahatlığına və narazılığına səbəb olmuşdur. Asayişi mühafizə qüvvələrinin gördüyü qətiyyətli tədbirlər nəticəsində ictimai qaydanı pozan hərəkətlərin genişlənməsinin qarşısı alınmışdır. Radikal düşərgə təmsilçilərinin seçki öncəsi müxtəlif yollarla ictimai-siyasi sabitliyi pozmağa yönələn qanunazidd əməlləri bu şəxslərin simasızlığını bir daha ortaya çıxarır. Aqressiv müxalifət partiyaları rəhbərlərinin öz çirkin siyasi oyunlarında bəzi gəncləri də alət etmələri yalnız ikrah hissi doğurur.

Elnur HACALIYEV

Azərbaycan.-2013.- 12 mart.- S.7.