İqtisadi modernləşmənin uğuru
sahibkarlığın inkişafından keçir
Azərbaycanda
sahibkarlığın inkişafı strategiyası bir model
olaraq keçid iqtisadiyyatı ölkələrinin iqtisadi
yüksəlişində möhtəşəm nümunəyə
çevrilir
Hər bir xalqın milli inkişaf strategiyası özündə həm də ictimaiyyətin müəyyən gözləntilərini, arzu və istəklərini təcəssüm etdirir. İqtisadi inkişaf prioritetlərinin düzgün müəyyənləşdirilməsi ümumi məqsəd və strategiyanın reallaşdırılmasına imkan yaradır, habelə modernləşmənin vacib amilinə çevrilir. Bu prizmadan əminliklə söyləmək olar ki, müstəqil Azərbaycanın son illər əldə etdiyi makroiqtisadi nailiyyətlər, ilk növbədə, sistemli və ardıcıl şəkildə gerçəkləşdirilən islahatların nəticəsidir.
Bazar münasibətlərinə söykənən liberal iqtisadi sistemin qurulmasının, vətəndaşların iqtisadi azadlığına, təşəbbüskarlığına geniş meydan verilməsinin, zəngin təbii sərvətlərdən səmərəli istifadə edilməsinin, ölkənin investisiya cəlbediciliyinin yüksəldilməsinin və digər konseptual əhəmiyyətli tədbirlərin nəticəsi olaraq son illər milli iqtisadiyyat təkcə sürətli inkişafla deyil, eyni zamanda yeni keyfiyyət parametrləri ilə özünü təsdiqləmişdir. Ən müxtəlif iqtisadi mərkəzlər respublikamızın davamlı iqtisadi yüksəlişi timsalında XXI əsrin yeni fenomenini görür, inkişafın Azərbaycan modelinin mahiyyətini öyrənməyə çalışırlar. Bu modelin özünəməxsusluğunu şərtləndirən mühüm amillər sırasında regional inkişafa xidmət edən kompleks tədbirlərə xüsusi diqqət çəkilir.
İnkişaf etmiş dövlətlərin təcrübəsi sübut edir ki, iqtisadiyyatın sabit tempini qorumaq üçün regional inkişafda tarazlılığın, tarixi məşğulluq ənənələrinin qorunub saxlanılması vacib şərtlərdəndir. Son illərdə Azərbaycan hökumətinin iqtisadi siyasətində regional inkişaf məsələlərinə xüsusi diqqətin yetirilməsi, bölgələrin tərəqqisinə yönəlmiş dövlət proqramlarının, fərman və sərəncamların yüksək dinamizmlə həyata keçirilməsi məhz bu reallığa əsaslanır. Bu həm də onunla şərtlənir ki, milli iqtisadiyyatın daha da inkişaf etdirilməsi istiqamətində qarşıda duran vəzifələrin yerinə yetirilməsi regionların inkişafının sürətləndirilməsini, habelə sosial-iqtisadi problemlərin həllində sahibkarlığın rolunun artırılmasını, regionlarda müasir infrastrukturun yaradılmasını tələb edir.
İqtisadiyyatın
modernləşmə mərhələsində qazanılan
uğurların qorunub saxlanılması üçün idarəçilikdə
yüksək səmərəliliyin, məqsədyönlülüyün
və çevikliyin təmin edilməsi, strateji əhəmiyyətli
sahələrin inkişafında tarazlığın
saxlanılması vacib məsələlərdəndir. Son 10
ildə məhz regionların sosial-iqtisadi inkişafına
göstərilən yüksək diqqət və
qayğının nəticəsi olaraq ümumi daxili məhsul
istehsalına görə dünyanın ən sürətlə
inkişaf edən dövlətlərindən birinə
çevrilmiş Azərbaycan investisiya cəlbediciliyini də
qoruyub saxlamışdır. Dünyanın mötəbər
"beyin mərkəzi" sayılan Davos Forumunun 2012-ci il
üçün hesabatında Azərbaycan rəqabət
qabiliyyətliliyinə görə 46-ci yerə layiq
görülmüşdür. Respublikamız 2011-ci ildəki
mövqeyində 9 pillə irəliləyərək MDB məkanında
lider mövqeyini qoruyub saxlamışdır.
"Azərbaycan
Respublikası regionlarının 2009-2013-cü illərdə
sosial-iqtisadi inkişafı Dövlət Proqramı"nın
icrasının dördüncü ildönümü ilə əlaqədar
2013-cü il fevral ayının 13-də dövlət
başçısının rəhbərliyi ilə
keçirilmiş konfrans respublikamızın dinamik inkişaf
yolunda olduğunu bir daha təsdiqləmişdir. Möhtərəm
Prezidentin konfransda vurğuladığı kimi, qeyri-neft
sektorunun dinamik inkişafı sahəsində əldə olunan
nəticələr uğurlu təməlini, ilk növbədə,
regionların sosial-iqtisadi inkişafı sahəsində həyata
keçirilmiş tədbirlərdən götürür.
Ölkə başçısının hələ
2004-cü il 11 fevral tarixli sərəncamı ilə təsdiq
edilmiş "Azərbaycan Respublikası regionlarının
sosial-iqtisadi inkişafı (2004-2008-ci illər) Dövlət
Proqramı" bu baxımdan xüsusi əhəmiyyətə
malik olmuşdur. Dövlət Proqramı regional inkişafda kəskin
fərqin aradan qaldırılması, yerlərdə
sosial-infrastruktur layihələrinin həyata keçirilməsi,
sahibkarlığın inkişafı baxımından əlahiddə
əhəmiyyətli sənəd olmuş, bu mükəmməl
konsepsiyanın icra vəziyyəti ilə bağlı hər
il hökumətin xüsusi müşavirələri
keçirilmişdir.
Dövlət
başçısı İlham Əliyev "Azərbaycan
Respublikası regionlarının 2009-2013-cü illərdə
sosial-iqtisadi inkişafı Dövlət Proqramı"nın
icrasının dördüncü ilinin yekunları ilə
bağlı konfransda 2004-2008-ci illəri əhatə edən
ilk sənədin əhəmiyyətini xüsusi önə
çəkmişdir: "2004-cü ilin əvvəlində
proqramın qəbul edilməsinin bir neçə səbəbi
var idi. İlk növbədə, bölgələrin
inkişafı əlbəttə ki, diqqət mərkəzində
duran vəzifə idi. Bölgələrin inkişafı
üçün infrastruktur layihələrinin icrası məsələləri
qarşıda dayanmışdı. Eyni zamanda,
sahibkarlığın inkişafı, dövlət dəstəyinin
gücləndirilməsi və bütün bu məsələlərin
bir-biri ilə əlaqəli şəkildə həll edilməsi
proqramın əsas mahiyyətini təşkil edirdi. Yerli
istehsalın artırılması, idxaldan
asılılığın azaldılması, iş yerlərinin
yaradılması və beləliklə, yoxsulluğun,
işsizliyin aradan qaldırılması məsələləri
də böyük əhəmiyyət kəsb edirdi. Yəni
regionların sosial-iqtisadi inkişafı Dövlət
Proqramı, əslində, ölkəmizin uğurlu,
dayanıqlı inkişafı, iqtisadiyyatımızın
şaxələndirilməsi üçün ən vacib və
ən əsas iqtisadi alətə çevrilmişdir".
Dövlət
başçısı İlham Əliyevin 14 aprel 2009-cu il
tarixli fərmanı ilə təsdiq edilmiş "Azərbaycan
Respublikası regionlarının 2009-2013-cü illərdə
sosial-iqtisadi inkişafı Dövlət Proqramı"nın
əsas məqsədi isə bu sahədə həyata
keçirilən siyasətin davamı olaraq ölkədə
qeyri-neft sektorunun inkişafının sürətləndirilməsinə,
iqtisadiyyatın diversifikasiyasına, tarazlı regional və
davamlı sosial-iqtisadi inkişafa, əhalinin həyat səviyyəsinin
daha da yaxşılaşdırılmasına nail olmaqdır.
Dövlət Proqramında müəyyən edilmiş məqsədlərə
nail olmaq üçün ölkənin təbii və əmək
potensialından səmərəli istifadə etməklə
qeyri-neft sektorunun sürətli inkişafının təmin edilməsi;
infrastruktur təminatının
yaxşılaşdırılması istiqamətində tədbirlərin
davam etdirilməsi; sahibkarlıq mühitinin
yaxşılaşdırılması ilə bağlı məqsədyönlü
tədbirlərin həyata keçirilməsi və
sahibkarlığın inkişafının daha da sürətləndirilməsi;
iqtisadiyyatın inkişafına investisiyaların cəlb
olunması işinin davam etdirilməsi; ixracyönümlü məhsul
istehsalının stimullaşdırılması; müasir
tipli infrastruktur obyektlərinin yaradılması, mövcud
obyektlərin beynəlxalq standartlara
uyğunlaşdırılması; əhalinin kommunal xidmətlərlə
təminatının yaxşılaşdırılması; əhalinin
məşğulluq səviyyəsinin artırılması
istiqamətində tədbirlərin davam etdirilməsi;
yoxsulluğun səviyyəsinin azaldılması və digər
tədbirlər diqqətdə
saxlanılır.
Prezident
İlham Əliyev proqramın icrasını 2012-ci ildə də
xüsusi diqqət mərkəzində saxlamış, bölgələrə
çoxsaylı səfərlər edərək görülən
işlərlə yerindəcə tanış olmuş, hər
bir rayonun inkişafı ilə bağlı əlavə tədbirlərin
görülməsi, eləcə də ictimaiyyətlə
görüşlərdə qaldırılmış konkret məsələlərin
həlli məqsədilə 64 əlavə sərəncam
imzalamış, həmin sərəncamlar əsasında 232,5
milyon manat vəsait ayırmışdır. Ötən il 93
mini daimi olmaqla 117 min yeni iş yeri və 5,4 min müəssisə
açılmışdır. Ümumilikdə, 2009-cu ildən
bəri ölkə üzrə 20 mindən çox müəssisə
fəaliyyətə başlamış, 360 minə yaxın
yeni iş yeri yaradılmışdır. Yoxsulluğun səviyyəsinin
6 faizə, işsizliyin isə 5,2 faizə enməsi regional
inkişaf proqramlarının mühüm nəticələrindən
biri kimi qiymətləndirilməlidir.
2012-ci
ildə regionların sosial-iqtisadi inkişafına dair Dövlət
Proqramında nəzərdə tutulmuş işlər
üçün əsas kapitala 5 milyard manat, o cümlədən
dövlət investisiya proqramı çərçivəsində
4,1 milyard manat vəsait yönəldilmişdir. Və bu da
ümumi məbləğin 72 faizini təşkil edir.
2009-2012-ci illərdə regionların inkişafına
ümumilikdə 14,5 milyard manat dövlət investisiyası
yönəldilmişdir. 2013-cü ildə əsaslı vəsait
qoyuluşlarının 77 faizi və yaxud 5,3 milyard manatı məhz
regionlar üçün nəzərdə tutulmuşdur.
Dövlət əsaslı kapital qoyuluşlarının ilbəil
artımı, eyni zamanda, sahibkarlığın inkişafı
üçün zəruri kommunal infrastrukturun, yol-nəqliyyat
qovşağının modernləşməsinə imkan
yaradır.
"Azərbaycan
Respublikası regionlarının 2009-2013-cü illərdə
sosial-iqtisadi inkişafı Dövlət Proqramı"
regionların davamlı inkişafı, sosial infrastrukturun yenidən
qurulması, milli iqtisadiyyatın neft amilindən
asılılığının qeyri-neft sektorunun tərəqqisi
hesabına aradan qaldırılması üçün kompleks
tədbirlər müəyyənləşdirməklə
yanaşı, iş adamlarının fəaliyyəti
üçün yaxşı imkanlar açmışdır.
Proqramda özəl sektorun dəstəklənməsi ilə
bağlı nəzərdə tutulan kompleks tədbirlər təsdiqləyir
ki, zəngin iqtisadi biliklərə, menecment təfəkkürünə
malik olan, dünyada baş verən iqtisadi prosesləri dərindən
bilən Prezident İlham Əliyev ölkənin sosial-iqtisadi tərəqqisində
sahibkarların rolunu düzgün dəyərləndirir və
onlara hərtərəfli dəstəyini əsirgəmir.
Dövlət başçısı sözügedən
konfransda bir daha ölkə sahibkarlarının Azərbaycanın
iqtisadi inkişafındakı rolunu və xidmətlərini
yüksək dəyərləndirmiş, onların fəaliyyətinə
yaradılan bəzi bürokratik maneələrin aradan
qaldırılması ilə bağlı qəti
tapşırıqlar vermişdir: "Mən daim sahibkarlarla
görüşürəm, həm Bakıda, həm bölgələrdə
açdığım müəssisələrin sayı bəlkə
də indi yüzlərlə, minlərlə ölçülür.
Ancaq hər bir yerdə yerli icra orqanlarının rəhbərləri,
icra başçıları, vəzifəli şəxslər
sahibkarlara kömək göstərməlidirlər. Onların
fəaliyyətinə dəstək verməlidirlər,
onları incitməməlidirlər, onların işinə
müdaxilə etməməlidirlər, qanunsuz tələblər
irəli sürməməlidirlər. Belə hallar vardır.
Deyə bilmərəm ki, bu, belə geniş vüsət
alıbdır, amma var və buna son qoyulmalıdır.
Sahibkarlığın inkişafı dövlət siyasətidir
və yerli icra başçısı yerlərdə dövlət
siyasətini aparan şəxsdir və o, dövlət siyasətindən
kənarda heç bir iş görə bilməz. Ona görə
bir daha deyirəm, bütün icra başçıları
bilsinlər, sahibkarları incidən cəzalandırılacaqdır.
Onlardan qanunsuz tələbdə olan şəxslər öz cəzasını
alacaqdır. Onlara yalnız kömək göstərmək
lazımdır ki, öz işlərini daha da səmərəli
şəkildə qura bilsinlər".
Prezident
İlham Əliyevin rəhbərliyi altında həyata
keçirilən iqtisadiyyatın şaxələndirilməsi
tədbirləri, sahibkarlığın inkişafı,
investisiya mühitinin yaxşılaşdırılması nəticəsində
qeyri-neft sektorunun dinamik inkişafı davam edir və neft sənayesinin
artım tempini üstələyir. 2012-ci ildə qeyri-neft sənayesinin
9,7 faizlik artım tempi bunu bir daha təsdiqləyir. Sevindirici
haldır ki, qeyri-neft sektorunun inkişafında və bu sahədə
istehsal olunan məhsulların həm kəmiyyət, həm də
keyfiyyət etibarı ilə yüksəlişində
sahibkarlar daha böyük rol oynamağa başlayırlar.
Bütün bunlar faktiki olaraq ölkədə biznes
mühitinin daha da yaxşılaşdırılması, bu sahəyə
dövlət dəstəyi tədbirlərinin genişləndirilməsi,
iqtisadiyyata yerli və xarici investisiyaların, müasir
texnologiyaların, idarəetmə təcrübəsinin cəlbi,
bu yolla yüksək keyfiyyətli, rəqabətqabiliyyətli
məhsulların istehsalı istiqamətində həyata
keçirilən siyasətin məntiqi nəticəsidir.
2004-cü
ildən uğurla icra edilən regional inkişaf
proqramlarının əsas istiqamətlərindən biri də
məhz respublikada əlverişli biznes və investisiya
mühitinin formalaşdırılması, iş
adamlarının fəaliyyət imkanlarının genişləndirilməsi,
bölgələrin istehsal potensialının səmərəli
realizə edilməsi olmuşdur. Bütün bunlar
regionların inkişafına dair ikinci Dövlət
Proqramında da öz əksini tapmışdır. Hazırda
müvəffəqiyyətlə icra edilən bu sənəd
çərçivəsində sahibkarlığın tərəqqisi
daha dinamik hal almışdır. Ümumilikdə, ötən
10 ildə respublikada sahibkarlıq fəaliyyətini tənzimləyən
prosedur və qaydaların əhəmiyyətli dərəcədə
liberallaşdırılması, sahibkarlığa dövlət
maliyyə yardımı mexanizmlərinin təkmilləşdirilməsi,
ixrac rüsumlarının ləğv edilməsi, idxalda
rüsumların 15 faizlik maksimal həddinin müəyyənləşdirilməsi
özəl sektora dəstəyin bariz nümunələridir.
2010-cu
ildən mənfəət vergisinin dərəcəsinin 22
faizdən 20 faizə, fiziki şəxslərdən gəlir
vergisinin maksimal həddinin 35 faizdən 30 faizə, fərdi
sahibkarlar üçün isə 35 faizdən 20 faizə
endirilməsi, bir sıra fəaliyyət növləri
üçün xüsusi razılıq (lisenziya)
alınmasına görə dövlət rüsumunun məbləğinin
azaldılması sahibkarlığın inkişafına ciddi dəstək
olmuşdur. "Azərbaycan Respublikasının Vergi Məcəlləsində
dəyişikliklər edilməsi haqqında" Azərbaycan
Respublikasının 2012-ci il 21 dekabr tarixli Qanununda da sahibkarlar
üçün ciddi güzəşt
və imtiyazlar nəzərdə tutulmuşdur. Vergi
qanunvericiliyinə edilmiş dəyişikliklərin konseptual əsasları
bir tərəfdən yeni qlobal iqtisadi
çağırışlara əsaslanır, digər tərəfdən
ölkənin ortamüddətli hədəflərinə
istiqamətlənmiş məqsədlərə xidmət edir.
Məcəlləyə daxil edilmiş bir sıra yeniliklər
sahibkarların hüquq və qanuni mənafelərinin
müdafiəsinə yönəlmişdir. Məcəllədə
əksini tapmış vergi güzəştlərinin bir qrupu
sosial məqsəd daşıyaraq vergi ödəyicilərinin
maddi vəziyyətinin yaxşılaşdırılmasına,
digər qrupu isə stimullaşdırıcı xarakter
daşıyaraq müəyyən sahələrin
inkişafına hesablanmışdır.
Respublikamızın
yaxın illərdə qarşısında duran əsas məsələlərdən
biri iqtisadiyyatda karbohidrogen ehtiyatlarından
asılılığı aradan qaldırmaq və iqtisadi
artımın qeyri-neft sektorunun, o cümlədən onun
aparıcı tərkib hissəsi olan sənaye sektorunun
hesabına təmin etməkdir. Sənayenin innovasiyalar əsasında
inkişafının təmin olunması, texnoparkların sənayeləşmədə
əsas strateji layihələr kimi yer alması "Azərbaycan
- 2020: gələcəyə baxış" İnkişaf
Konsepsiyasında da başlıca hədəflər
sırasındadır. Yaxın gələcəkdə dövlət
investisiya siyasətində əsas istiqamətlərdən biri
də sənaye şəhərciyi infrastrukturunun formalaşdırılması
və qeyri-neft sənayesinin inkişaf etdirilməsi ilə
bağlı olacaqdır. Sumqayıt şəhərində
Kimya Sənaye Parkının, Yüksək Texnologiyalar
Parkının və Balaxanı Sənaye Parkının
yaradılması bu istiqamətdə atılmış ilk
addımlardır. Bu baxımdan orta və uzunmüddətli
perspektivdə texnoparkların inkişafını
stimullaşdırmaq üçün ölkənin vergi
qanunvericiliyində sənaye və texnologiyalar parklarında
çalışan fiziki və hüquqi şəxslərə,
eləcə də parkların idarəedici təşkilat və
operatorlarına gəlir, mənfəət, ƏDV, əmlak və
torpaq vergiləri üzrə 7 illik vergi güzəştləri
nəzərdə tutulmuşdur. Vergi Məcəlləsinə
texnoparklarla bağlı edilmiş əlavə və dəyişikliklər
iqtisadiyyatın inkişafına müsbət təsir göstərməklə,
layihələrin miqyasının artmasına, bu sahəyə
investorların cəlb olunmasına, yüksək texnologiyalar əsasında
rəqabətqabiliyyətli, elmtutumlu sənaye məhsullarının
istehsalına, yeni iş yerlərinin açılmasına
imkan verəcəkdir.
Vergi
Məcəlləsinə daxil edilmiş bir sıra yeniliklər
Azərbaycanda vergi orqanları ilə vergi ödəyiciləri
arasında münasibətlərin qarşılıqlı
etimada əsaslanan çevik və şəffaf mexanizmlər əsasında
qurulmasına xidmət edir. Məcəlləyə vergi
partnyorluğu sazişi ilə bağlı konkret müddəanın
daxil edilməsi bu istiqamətdə gerçəkləşdirilən
ən mütərəqqi yeniliklərdən biri kimi diqqəti
çəkir. İnkişaf etmiş Avropa ölkələrinin
vergi administrasiyalarının tətbiq etdiyi bu tərəfdaşlıq
modelinin respublikamızda tətbiqi, ilk növbədə, biznes
mühitinin liberallaşdırılması tədbirlərinin
davamı kimi dəyərləndirilir. Vergi partnyorluğu
sazişi vergi orqanı ilə vergi ödəyicisi arasında
könüllü bağlanmış niyyət
razılaşmasıdır. Bu saziş fəaliyyətində
qanunvericiliyə tam əməl etməyə
çalışan hər bir vergi ödəyicisi
üçün son dərəcə əlverişlidir. Bu
halda, vergi ödəyicisi, məsələn, vergi bəyannamələrini
vaxtlı-vaxtında təqdim edəcəyinə,
hesablanmış vergiləri tam həcmdə ödəyəcəyinə,
nağd hesablaşmalar aparılarkən nəzarət-kassa
aparatlarından istifadə edəcəyinə, müştərilərin
plastik kartlarla ödəmələr aparmasına şərait
yaradacağına dair öhdəliklər götürür.
Vergi orqanları da bunun əvəzində vergi nəzarətinin
distant formalarından istifadə ediləcəyinə,
sahibkarlıq subyektində və onun obyektlərində əlavə
yoxlamalar və inzibatçılıqla bağlı təsirlərin
olmayacağına razılıq verir.
Ümumilikdə,
son 10 ildə ölkədə sahibkarlığın
inkişafı istiqamətində həyata keçirilmiş tədbirlər
özünün sistemli və ardıcıl səciyyə
daşıması ilə diqqəti çəkir. Prezident
İlham Əliyevin 30 aprel 2007-ci il tarixdə
imzaladığı "Azərbaycan Respublikasında
sahibkarlığın inkişafı ilə bağlı bəzi
tədbirlər haqqında" fərman bu baxımdan
mühüm sənədlərdən biri olmuşdur. Belə
bir fərmanın imzalanması o dövrə qədər
çoxpilləli biznesə başlamaq sahəsində
mövcud problemlərin həlli, eyni zamanda,
süründürməçilik hallarının aradan qaldırılması
sahəsində, sözün əsl mənasında, inqilabi dəyişikliklərə
yol açmışdır. Bu məqsədlə fərmanda
vahid kodlaşdırmanın aparılması, biznes
strukturlarının "bir pəncərə" - vahid
qeydiyyat orqanı tərəfindən qeydə alınması məsələləri
əksini tapmışdır. Həmçinin fərmanda biznes
strukturlarının fəaliyyəti üçün torpaq
ayırmalarının, tikinti, yenidənqurma və bərpa
işlərinə icazə verilməsi prosedurlarının sadələşdirilməsi,
tikintinin ekspertizadan keçirilməsi sahəsindəki
bürokratik əngəllərin aradan qaldırılmasına
geniş imkanlar açılması kimi məsələlər
ehtiva olunmuşdur. Tətbiq olunan bu və digər yeniliklər
nəticəsində indi həm fiziki, həm də hüquqi
şəxslər cəmi bir neçə dəqiqə ərzində
elektron formada - internet üzərindən qeydiyyatdan keçir,
vergi və rüsumları da eyni qaydada ödəyirlər. Bu
sistemin tətbiqindən sonra Azərbaycanın investisiya cəlbediciliyi
əhəmiyyətli dərəcədə yüksəlmiş,
sahibkarlığın inkişafı və biznes mühitinin təkmilləşdirilməsi
istiqamətində aparılan islahatlar beynəlxalq təşkilatlar
tərəfindən yüksək qiymətləndirilmişdir.
Prezident
İlham Əliyevin ilk gündən müəyyənləşdirdiyi
mühüm vəzifələrdən biri də
sahibkarların fəaliyyətinə qanunsuz müdaxilə
hallarının qarşısının alınması, bu məqsədlə
qanunvericiliyin təkmilləşdirilməsi, digər
institusional-təşkilati tədbirlərin həyata
keçirilməsidir. Dövlət
başçısının 15 fevral 2011-ci il tarixli fərmanı
ilə "Sahibkarlıq sahəsində aparılan
yoxlamaların vahid məlumat reyestrinin forması və
aparılması qaydası haqqında Əsasnamə" təsdiq
edilmiş, 1 may 2011-ci il tarixdən etibarən sahibkarlıq sahəsində
aparılan yoxlamaların vahid məlumat reyestri fəaliyyətə
başlamışdır. Dövlət nəzarət tədbirinin
reyestrdə qeydiyyata alınması eyni vaxtda bir sahibkarlıq
subyektində müxtəlif yoxlamaların
aparılmasının qarşısının alınmasına,
konkret məsələ üzrə aparılan
araşdırmaların tezliyinə nəzarət etməyə,
həmçinin sahibkarlıq subyektlərinin öncədən
aparılacaq yoxlama və onun nəticələri haqqında məlumatlanmasına
şərait yaratmışdır.
Ölkə
başçısının "Dövlət orqanlarında
elektron xidmətlər göstərməsinin təşkili sahəsində
bəzi tədbirlər haqqında" 23 may 2011-ci il tarixli fərmanının
tələblərinə əsasən, Nazirlər Kabinetinin 24
noyabr 2011-ci il tarixli qərarı ilə təsdiq edilmiş
"Elektron xidmət növlərinin Siyahısı"na
sahibkarlıq subyektlərinə göstərilən xidmətlər
də daxil edilmişdir. Həmin siyahıya sahibkarlıq fəaliyyətini
tənzimləyən, müxtəlif dövlət qurumları
tərəfindən verilən icazələr, lisenziyalar,
sertifikatlar və müxtəlif cür digər tənzimləyici
sənədlər daxil edilmişdir.
Dövlət
başçısının 26 oktyabr 2011-ci il tarixli
"Müəyyən sahibkarlıq fəaliyyəti növləri
ilə məşğul olmaq üçün tələb edilən
xüsusi razılıq (lisenziya) və icazə sistemi ilə
bağlı bəzi məsələlər haqqında" fərmanına
əsasən, yaradılmış icazələrin elektron
informasiya portalı (www.icazeler.gov.az) ölkə vətəndaşlarının,
eləcə də sahibkarların icazələrlə
bağlı məlumatlılıq səviyyəsinin yüksəldilməsinə,
icazələr barədə sorğulanan məlumatların asan
tapılmasına, bu sahədə şəffaflığın
artırılmasına səbəb olmuşdur.
Sahibkarlığın,
xüsusilə kiçik sahibkarlığın
inkişafına və əhalinin işgüzarlıq fəaliyyətinin
artırılmasına maliyyə dəstəyinin verilməsi məqsədilə
İqtisadi İnkişaf Nazirliyinin nəzdində
Sahibkarlığa Kömək Milli Fondunun yaradılması
özəl sektorun maliyyə ehtiyacının qarşılanmasında
genişmiqyaslı işlər görməkdədir. Azərbaycan
Respublikası Prezidentinin müvafiq fərmanları ilə
2002-ci, 2004-cü, 2005-ci, 2006-cı və 2009-cu və 2011-ci
illərdə onun statusu və vəsaitlərinin istifadə
edilməsi qaydaları təkmilləşdirilmişdir. 2011-ci
il 13 oktyabr tarixli "Azərbaycan Respublikası
Sahibkarlığa Kömək Milli Fondunun vəsaitlərinin
istifadəsi mexanizminin təkmilləşdirilməsi
haqqında" Fərmana uyğun olaraq, güzəştli
kreditlərin istifadəsi qaydalarına edilmiş dəyişikliklər
iri və uzunmüddətli investisiya layihələrinin, həmçinin
kiçik sahibkarlığın güzəştli şərtlərlə
maliyyələşdirilməsi imkanlarını genişləndirmiş,
güzəştli kreditlər üzrə müddətin
maksimum həddi 10 ilədək, məbləği isə 10
milyon manatadək artırılmışdır. 2012-ci ildə
Sahibkarlığa Kömək Milli Fondunun vəsaitləri
hesabına 2419 sahibkarlıq subyektinə 218 milyon manat güzəştli
kredit verilmiş, həmin kreditlər hesabına 9100-dək
yeni iş yerinin yaradılması nəzərdə
tutulmuşdur. Verilmiş kreditlərin 83 faizi regionların
payına düşmüşdür.
Regionların
sosial-iqtisadi inkişafına dair Dövlət
Proqramının dördüncü ilinin yekunlarına həsr
olunmuş konfrans göstərdi ki, Prezident İlham Əliyev
sahibkarlarla birbaşa təmasa xüsusi önəm verir,
onların üzləşdiyi problemlərin, çətinliklərin
yerindəcə həlli istiqamətində müvafiq
addımlar atır. Son iki ildə korrupsiyaya qarşı
aparılan mübarizənin daha səmərəli və
intensiv xarakter daşıması məqsədilə cənab
Prezidentin ortaya qoyduğu siyasi iradə öz yüksək nəticələrini
verir. Sahibkarlığın inkişafına maneə olan
bürokratik əngəllər daha sürətlə aradan
qalxır, özəl sektorun tərəqqisi intensivlik əmsalı
yüksək olan yeni mərhələyə qədəm qoyur.
Dövlət başçısı İlham Əliyevin
konfransda söylədiyi fikirlər bunu bir daha təsdiqləyir:
"Dəfələrlə demişdim, bu gün də demək
istəyirəm ki, mənim üçün özəl
şirkətlə dövlət şirkəti arasında
heç bir fərq yoxdur. Hər ikisi Azərbaycan şirkətidir,
hər ikisi Azərbaycanda çalışır, Azərbaycan
naminə çalışır. Ona görə özəl
şirkətlərə, dövlət şirkətlərinə
göstərilən diqqət eyni olmalıdır və hesab
edirəm ki, biz buna nail oluruq. Əgər
sahibkarlığın, özəl sektorun ümumi daxili məhsuldakı
payına nəzər salsaq görərik ki, artıq 80 faizdən
çoxdur. Son rəqəmlərə görə ümumi
daxili məhsulda özəl sektor 83 faiz təşkil edir. Cəmi
20 il ərzində bazar iqtisadiyyatı şəraitində
yaşayan ölkə üçün hesab edirəm ki, bu,
böyük göstəricidir".
Dövlət
başçısının bu qətiyyətli mövqeyindən
sonra sahibkarların qanuni mənafelərinin qorunması,
onların fəaliyyətinə qanunsuz müdaxilələrin
qarşısının alınması məqsədilə qanunvericiliyin
təkmilləşdirilməsi tədbirlərinə də diqqət
artırılmışdır. Milli Məclisə təqdim
olunmuş "Sahibkarlıq sahəsində aparılan
yoxlamaların tənzimlənməsi və sahibkarların
maraqlarının müdafiəsi haqqında" qanun layihəsi
artıq müvafiq komitələrdə müzakirə olunur, təkmilləşdirilir.
Qanun layihəsinin qəbulundan sonra sahibkarlıq subyektlərində
aparılan yoxlamaların vahid qaydaları bu sənədlə
müəyyən ediləcəkdir. Məqsəd sahibkarlıq
subyektlərində çoxsaylı yoxlamaları azaltmaq,
qanunsuz müdaxilələri aradan qaldırmaqdır. Yeni
qanunda bir sahibkarın bir neçə qurum tərəfindən
yoxlanmasının qarşısını almaq
üçün vahid məlumat reyestri yaradılması nəzərdə
tutulur.
Bütün
bunlar təsdiqləyir ki, cənab İlham Əliyevin
yürütdüyü iqtisadi siyasət orta sahibkar təbəqəsinin
yaranıb təşəkkül tapmasına, bir növ cəmiyyətin
aparıcı lokomotivinə çevrilməsi məqsədinə
xidmət edir. İnkaredilməz həqiqətdir ki, hər bir
ölkənin iqtisadi-siyasi durumunun sabitliyi və rifahı onun
orta təbəqəsinin vəziyyəti ilə
ölçülür. Dövlətin sütunlarının
möhkəmlənməsi üçün cəmiyyətdə
orta təbəqənin, belə demək mümkünsə,
orta burjuaziyanın yaranması mühüm şərtlərdəndir.
Məhz bu təbəqə cəmiyyətdə balans yaradaraq kəskin
təbəqələşməni, sosial gərginliyi aradan
qaldırır və ümumi inkişafda harmoniya yaradır. Bu
baxımdan da ölkə başçısı cəmiyyətdə
sağlam orta təbəqənin formalaşmasında
maraqlıdır və bu prosesə süni maneçilik
hallarına qarşı barışmaz mövqe nümayiş
etdirir. Eyni zamanda, ictimai münasibətlər sisteminə təsir
göstərən dövlət-sahibkar münasibətlərinin
qarşılıqlı etimad və tərəfdaşlıq
müstəvisində qurulmasını vacib sayır. Dövlət
məmurlarından bu münasibətlərdə yaranan istənilən
ziddiyyətlərin, qüsurların aradan
qaldırılmasını təkidlə tələb edir.
Son
illər sahibkarlığın inkişafı sahəsində əldə
olunmuş uğurlar ölkənin
sosial-iqtisadi həyatında özünəməxsus çəkiyə
malik Sumqayıt şəhərinin simasında da aydın
müşahidə olunur. Şəhər rəhbərliyi
sahibkarlarla münasibətləri ölkə
başçısının müəyyənləşdirdiyi
sağlam prinsiplər əsasında qurur, onların problemlərinin
həllinə dəstək verir.
Gənclər
şəhəri Sumqayıt bu gün həm də möhtəşəm
abadlıq və quruculuğun, yenidənqurma işlərinin əsas
ünvanlarından birinə çevrilmişdir. Uzun illər
boyu ölkənin əsas sənaye mərkəzi olaraq qalan
Sumqayıtın qısa zaman kəsiyində həm də
geniş quruculuq məkanına çevrilməsinin ən
başlıca səbəblərindən biri Prezident İlham Əliyevin
xüsusi diqqət və qayğısıdır. Təsadüfi
deyildir ki, son illərdə cənab İlham Əliyev 4 dəfə
Sumqayıta səfər etmiş, Sumqayıt Texnologiyalar
Parkında polimer məhsulları istehsal zavodunun genişləndirilməsi
işləri ilə tanış olmuş, ağır
maşınqayırma və dəqiq emal mərkəzləri
zavodlarının açılışında iştirak
etmişdir. İnanırıq ki, ölkə
başçısının xüsusi diqqət və
qayğısı ilə Sumqayıtın digər sənaye
müəssisələri də böhranlı vəziyyətdən
çıxacaqdır. Azərbaycan iqtisadiyyatına layiqli
töhfəsini verəcək belə layihələrdən
biri də "Xəzər" Səhmdar Cəmiyyətinin
şüşə sənayesini inkişaf etdirəcək
"Azərşüşə" layihəsidir.
Ümumilikdə,
ölkədə sahibkarlığın inkişafı
strategiyası nəinki ölkəmizin iqtisadi tərəqqisində
müstəsna rol oynayır, hətta bir model olaraq keçid
iqtisadiyyatı ölkələrinin iqtisadi inkişafında
möhtəşəm nümunəyə çevrilir. Sözügedən
nümunənin formalaşmasının əsasında isə
Prezident İlham Əliyevin həyata keçirdiyi məqsədyönlü
iqtisadi siyasət dayanır. İnanırıq ki, dövlət
başçısının diqqət və
qayğısı ilə ölkədə sahibkarlar sinfi bundan
sonra da güclənəcək, müstəqil Azərbaycanın
inkişafına öz layiqli töhfəsini verəcəkdir.
Qüdrət KƏRİMOV,
"Xəzər" ASC-nin sədri,
iqtisad elmləri doktoru
Azərbaycan.-2013.- 13 mart.- S.5.