Bakıda Üçüncü Beynəlxalq «Muğam aləmi» elmi simpoziumu işini davam etdirir

Xəbər verdiyimiz kimi, Bakıda "Muğam aləmi" Üçüncü Beynəlxalq Muğam Festivalı çərçivəsində Üçüncü Beynəlxalq "Muğam aləmi" elmi simpoziumu keçirilir.

AzərTAc xəbər verir ki, martın 13-də simpozium işini Azərbaycan Bəstəkarlar İttifaqında (ABİ) "Azərbaycan muğamlarında və Şərqin oxşar ənənəvi janrlarında musiqi alətlərinin rolu" mövzusunda iclasla davam etdirmişdir.

"Muğam aləmi" Üçüncü Beynəlxalq Muğam Festivalının bədii rəhbəri, ABİ-nin sədri, xalq artisti Firəngiz Əlizadənin və almaniyalı alim Elsner Yurgenin sədrlik etdikləri iclasda ümumilikdə 6 məruzə dinlənilmişdir.

"Muğam aləmi" Üçüncü Beynəlxalq Muğam Festivalı çərçivəsində reallaşan tədbirlərdən söz açan Firəngiz Əlizadə simpoziuma qatılmış alimlərin məruzələrini nəzəriyyə ilə praktikanın vəhdəti kimi dəyərləndirmişdir.

İclasda azərbaycanlı alimlər Səadət Abdullayevanın "Azərbaycan instrumental muğam ifaçılığı-ənənələrin varisliyi kontekstində", Seyran Qafarovun "Azərbaycanın nəfəsli musiqi aləti ney: tarixi retrospektivi və xüsusiyyətləri", Abbasqulu Nəcəfzadənin "Muğam İfaçılığında nəfəs çalğı alətlərinin müxtəlifliyi", UNESCO-nun nümayəndəsi Jan Dürinqin "Mərkəzi Asiyanın maqam musiqisində vokal-instrumental münasibət. Əsas məsələlərin şərhi", türkiyəli tədqiqatçı Murat Səlim Tokaçın "Türk maqam musiqisində ney və tənbur alətlərinin rolu və az istifadə olunan məqamlar" və özbəkistanlı alim Rövşən Yunusovun "Buxara Şaşmakomunun instrumental hissələrinin ansambl ifası haqqında" məruzələri təqdim edilmişdir.

Məruzələrdə Azərbaycan muğamlarının özünəməxsus üslubu, dünya xalqlarını valeh edən bu musiqi növünün fəlsəfəsi, digər millətlərə məxsus muğamların xüsusiyyətləri geniş şəkildə şərh olunmuşdur.

Günün ikinci yarısında davam etdirilən iclasda isə Azərbaycan, Hindistan, Kanada, Qazaxıstan və Tacikistan alimləri əsasən milli alətlərin xüsusiyyətlərindən bəhs edən məruzələrlə çıxış etmişlər.

İclasda "Uyğur muğamı və instrumental ənənə", "Hind raqalarının sitarda ifası: meyillər və xüsusiyyətlər", "Azərbaycan tarının milli özəlliyinin yaranmasında saz alətinin tarixi rolu haqqında", "Şaşmakom və tənbur: musiqinin və alətin həmahəngliyi problemi haqqında" və "Azərbaycan muğam dəstgahı Şərq musiqi alətlərinin müqayisəli öyrənilməsi üçün konseptual əsas kimi" mövzularında təqdim olunan məruzələrdə alimlərin araşdırdıqları məsələlər əyani vasitələrlə diqqətə çatdırılmışdır.

Simpozium işini martın 15-də yekunlaşdıracaqdır.

AzərTAc

Azərbaycan.-2013.- 14 mart.- S.7.