Beynəlxalq muğam festivalı çərçivəsində özbək və Azərbaycan musiqiçilərinin konserti keçirilmişdir

Xəbər verdiyimiz kimi, Heydər Əliyev Fondunun, Mədəniyyət və Turizm Nazirliyinin və Azərbaycan Bəstəkarlar İttifaqının birgə təşkilatçılığı ilə ölkəmizdə "Muğam aləmi" Üçüncü Beynəlxalq Muğam Festivalı keçirilir.

AzərTAc xəbər verir ki, festival çərçivəsində martın 13-də Beynəlxalq Muğam Mərkəzində Özbəkistanın xalq artisti, özbək makomlarının mahir ifaçısı Munojat Yolçiyevanın "Şaşmakom" adlı konserti təqdim edilmişdir.

Müğənnini Şuxrat Razzakov (rübab), Axmatjon Dadayev (gijjak), Dilfuzaxon Xaydarova (dutar), Xocimurad Safarov (doira), İbrohimcon Qaniyev (ney) müşayiət etmişlər.

Munojat Yolçiyevanın gözəl tembrli, nadir səsi ifadəli, güclü bədii təsirə malik olub, öz sənətkarlığı və təbii cazibədarlığı ilə Fransa, İngiltərə, ABŞ və Yaponiyanın ən nüfuzlu konsert salonlarında dinləyicilərin qəlbini fəth etmişdir.

Dünyanın müxtəlif millətlərindən olan minlərlə insan üçün Munojat Yolçiyeva Özbəkistan musiqi sənətinin təcəssümünə çevrilmişdir. Müğənni özbək makomlarında klassik və müasir şairlərin lirik poeziyasına əsaslanır.

Munojat Yolçiyeva fəal ictimai xadim kimi "Kelajak Ovozi" istedadlı gənclərin respublika müsabiqəsinin İctimai Şurasına daxildir və müxtəlif beynəlxalq layihələrdə fəal iştirak edir.

Konsertin ikinci hissəsində Azərbaycan xanəndələri - xalq artisti Mənsum İbrahimov və əməkdar artist Təyyar Bayramov "Şur" muğamını ifa etmişlər. Xanəndələri əməkdar artistlər Elçin Həşimov (tar), Elnur Əhmədov (kamança), Təranə Əliyeva (qanun), Kamran Kərimov (nağara), Qalib Həşimov (ud), Coşqun Sadıqov (balaban) və Nizami Allahverdiyev (balaban) müşayiət etmişlər.

Konsert tamaşaçıların sürəkli alqışları ilə qarşılanmışdır.

Azərbaycan.-2013.- 14 mart.- S.7.