Azərbaycan Qızıl Aypara Cəmiyyətinin və Avstriya Qırmızı Xaç Cəmiyyətinin birgə layihəsinin təqdimatı olmuşdur

Martın 14-də Azərbaycan Qızıl Aypara Cəmiyyətinin (AQAC) "Təhlükəsiz və sabit icmaların qurulması" layihəsi Bakı ictimaiyyətinə və tərəfdaşlara rəsmi şəkildə təqdim olunmuşdur.

AQAC-ın prezidenti, Milli Məclisin deputatı Novruzəli Aslanov çıxışında bu layihənin həyata keçirilməsinin böyük əhəmiyyət daşıdığını vurğulamış, onun zəif kənd və şəhər icmalarının təbii və texnogen fəlakətlərə davamlılığının artırılmasına necə təsir göstərəcəyindən danışmışdır. N.Aslanov vurğulamışdır ki, AQAC fövqəladə hallara qarşı mübarizə sahəsində Azərbaycanın Fövqəladə Hallar Nazirliyi ilə uğurlu əməkdaşlıq edir. Bu məqsədlə 2006-cı ildə memorandum imzalanmışdır.

Sonra layihə haqqında slayd-şou göstərilmişdir.

Beynəlxalq Qırmızı Xaç Cəmiyyətinin və Beynəlxalq Qırmızı Xaç və Qırmızı Aypara Cəmiyyətləri Federasiyasının rəsmi missiyalarının rəhbərləri Danis Duran və Sabinamur Məhbubi həmin layihənin əhəmiyyətindən və fövqəladə hallara qarşı mübarizə sahəsində AQAC-ın uğurlarından söz açmışlar.

Qeyd edək ki, layihə Beynəlxalq Qırmızı Xaç və Qırmızı Aypara Hərəkatı çərçivəsində tərəfdaş qurum olan Avstriya Qırmızı Xaç Cəmiyyətinin (AQXC) texniki dəstəyi ilə həyata keçiriləcəkdir. Layihəyə Avstriya İnkişaf Agentliyi maliyyə dəstəyi göstərir.

AzərTAc xəbər verir ki, dördillik layihənin icrası üzrə rəsmi saziş AQAC və AQXC arasında 2012-ci ilin dekabrında imzalanmışdır.

Layihə Azərbaycanın İsmayıllı və Zaqatala rayonlarında zəif kənd və şəhər icmalarının təbii və texnogen fəlakətlərə davamlılığını artırmaq məqsədi daşıyır.

"Təhlükəsiz və sabit icmaların qurulması" layihəsi çərçivəsində 6 kənddə və 2 şəhərdə qəzaların aradan qaldırılması, təbii fəlakətlərə reaksiya göstərilməsi, habelə qəzaların və təbii fəlakətlərin nəticələrinin ləğv edilməsi üzrə tədbirlər kimi mövzularda treninqlər keçiriləcəkdir. Bundan əlavə, təxliyə məsələləri ilə bağlı planlar müvafiq dövlət, qeyri-hökumət, beynəlxalq qurumlara təqdim ediləcəkdir.

Layihənin həyata keçirilməsi təbii fəlakətlər zamanı görülən tədbirlərin əlaqələndirilməsi üçün potensial yaratmağa imkan verəcəkdir.

Azərbaycan.-2013.- 15 mart.- S.4.