Bakıda «Terrorizmin
qarşısının alınmasında əməkdaşlığın gücləndirilməsi»
mövzusunda Beynəlxalq
konfransda yüksək səviyyəli rəsmilər
çıxış etmişlər
Xəbər
verdiyimiz kimi, martın 18-də Bakıda BMT-nin, Azərbaycan
hökumətinin və İSESCO-nun təşkilatçılığı
ilə "Terrorizmin qarşısının alınmasında
əməkdaşlığın gücləndirilməsi"
mövzusunda Beynəlxalq konfrans keçirilir.
Konfransda
50-dən çox ölkənin nümayəndələri, o
cümlədən xarici işlər nazirləri, nazir
müavinləri, 25-dək beynəlxalq təşkilatın -
ISESCO, GUAM, MDB, Türkdilli Ölkələrin Əməkdaşlıq
Şurası və digər qurumların baş katibləri,
BMT, ATƏT, NATO və s. beynəlxalq təşkilatların rəsmiləri,
habelə 30-a yaxın yüksək səviyyəli ekspert
iştirak edirlər.
İki
gün davam edəcək konfransda terrorizmin yayılmasına
şərait yaradan amillərin aradan qaldırılması
üçün həyata keçirilən tədbirlərin
gücləndirilməsi üzrə beynəlxalq əməkdaşlığın
inkişaf etdirilməsi, terrorizmlə əlaqədar mövcud
stereotiplərin qarşısının alınması, dərk
edilməsi və bu mövzuda dialoqun əhəmiyyəti, o cümlədən
terrorizmlə mübarizə sahəsində ölkələrin
imkanlarının gücləndirilməsində beynəlxalq tərəfdaşların
rolu və digər məsələlər müzakirə
olunacaqdır.
Konfransın
açılış mərasimindən sonra yüksək səviyyəli
rəsmilərin çıxışları olmuşdur.
İclasa
sədrlik edən Azərbaycanın xarici işlər naziri
Elmar Məmmədyarov beynəlxalq terrorizmə qarşı
mübarizədə konfransın əhəmiyyətini
vurğulamışdır.
Qafqaz
Müsəlmanları İdarəsinin sədri
şeyxülislam Allahşükür Paşazadə müasir
dövrdə cəmiyyəti təhdid edən, əsas təhlükə
olan terrorizmin qarşısının alınması
baxımından belə tədbirlərin əhəmiyyətini
vurğulamışdır.
Tədbirdə
çıxış edən milli təhlükəsizlik naziri
Eldar Mahmudov Azərbaycanda terrorçuluğun maliyyələşdirilməsində
iştirak edən fondların aşkarlanaraq fəaliyyətlərinin
dayandırıldığını, bu mənbələrin zərərsizləşdirilməsi
üçün müvafiq tədbirlərin
görüldüyünü bildirmişdir. Nazir demişdir ki,
terrorçuluqla mübarizədə beynəlxalq əməkdaşlıq
Azərbaycanın dövlət siyasətində mühüm
yer tutur.
Qeyd
edilmişdir ki, Azərbaycan artıq 12 ildir ki, beynəlxalq
antiterror koalisiyasının fəal üzvü kimi terrorizmə
qarşı ardıcıl mübarizə aparır. Son illər
həyata keçirilmiş tədbirlər strateji obyektlərə,
diplomatik nümayəndəliklərə qarşı terror
hücumlarının planlaşdırılmasına cəhdlərin
aradan qaldırılması ilə nəticələnmiş, tərəfdaş
ölkələrin hüquq-mühafizə orqanları ilə
müntəzəm məlumat mübadiləsi
aparılmışdır. Beynəlxalq terror şəbəkələri
və müəyyən dairələr Azərbaycanda dini
tolerantlıq mühitini pozmağa və bu fəaliyyəti
müxtəlif pərdələr altında həyata
keçirməyə çalışırlar.
Terrorçuluğun nə islam, nə də heç bir
dünyəvi din ilə əlaqəsi yoxdur, əksinə, bu,
həmin dinlərin əsaslarına və prinsiplərinə
ziddir. Bunları nəzərə alaraq Milli Təhlükəsizlik
Nazirliyi digər dövlət strukturları və ictimai təşkilatlarla
birgə məqsədyönlü profilaktik tədbirlər
görür. Bu işlər qanunun aliliyi prinsipi əsasında
həyata keçirilir.
Diqqətə
çatdırılmışdır ki, ekstremist qüvvələr
son dövrlərdə tərəfdarlar cəlb etmək məqsədilə
internetdən və sosial şəbəkələrdən
geniş istifadə edirlər. Xüsusilə də beynəlxalq
şəbəkələrin informasiya resurslarında Azərbaycan
dilli seqmentlərin yaradılması və radikal ideoloji təbliğat
materiallarının yerləşdirilməsi müşahidə
olunur. İnternet şəbəkələrindən radikal dini
baxışların təbliği, terrorçuların öz
aralarında sövdələşməsi, partlayıcı
maddələrin və qurğuların hazırlanması
üsullarının yayılması üçün istifadə
olunması Azərbaycanı və bütün beynəlxalq
ictimaiyyəti narahat edir. Kiber-cinayətkarlıq ilə
mübarizə bütün dünyada yeni sahədir. Bu istiqamətdə
beynəlxalq əməkdaşlığın həyata
keçirilməsi və telekommunikasiya şirkətlərinin
tam dəstəyi zəruridir.
Dini
Qurumlarla İş üzrə Dövlət Komitəsinin sədri
Elşad İsgəndərov dini radikalizmin və ekstremizmin
terrorçuluq üçün əsas bazalardan birinə
çevrildiyini vurğulamışdır. Qeyd edilmişdir ki,
əsasən təhsil səviyyəsinin aşağı
olduğu, sosial problemlərin yaşandığı ölkələrdə
daha fəal çıxış edən radikal qruplar nə
özlərinin, nə də ətrafdakı insanların həyatlarına
qəsd etməkdən çəkinmirlər. Statistika göstərir
ki, terrorçu qruplaşmaların əksəriyyəti öz
addımlarını dini baxımdan əsaslandırsa da, əslində
dini zəmində törədilən terror aktları azlıq
təşkil edir. Hər şeyi dini motivlərlə əlaqələndirmək
yanlış nəticələr doğurar. Din altında pərdələnmiş
radikalizm və ekstremizm cəmiyyət üçün təhlükə
daşıyır.
Komitə
sədri radikal qrupların təsirini azaltmaq üçün
cəmiyyətdə geniş maarifləndirmə işlərinin
aparılmasının, təhsilin səviyyəsinin yüksəldilməsinin,
sosial problemlərin həllinə xüsusi diqqət yetirilməsinin
vacibliyini vurğulamışdır.
Beynəlxalq
təşkilatlar nəzarətsiz ərazilərə ciddi diqqət
yetirməlidir, - deyən Gürcüstanın xarici işlər
naziri xanım Maya Pancikidze terror təzahürlərinə
qarşı mübarizənin gücləndirilməsi
baxımından beynəlxalq əməkdaşlığın
önəmini qeyd etmişdir. Cinayətkar qrupların
Gürcüstan ərazisindən tranzit marşrut kimi istifadə
edə biləcəyindən narahatlığını diqqətə
çatdıran nazir buna qarşı mübarizə aparmaq
üçün beynəlxalq mexanizmlərdən istifadə
olunmasının vacibliyini vurğulamışdır. O,
ölkəsinin milli təhlükəsizliyini möhkəmləndirmək
üçün tədbirlər gördüyünü,
hüquq-mühafizə orqanlarının, sərhəd xidmətinin
və antiterror qruplarının işini gücləndirdiyini
diqqətə çatdırmışdır.
Gürcüstanın bu məsələdə BMT-nin müvafiq
təşkilatları ilə əməkdaşlıq etdiyini
vurğulayan M.Pancikidze bu gün dövlətlərin nəzarətində
olmayan əraziləri kriminal elementlər üçün təhlükəsiz
məkan kimi dəyərləndirmiş, beynəlxalq təşkilatların
buna ciddi diqqət yetirmələrinin zəruriliyini qeyd
etmişdir.
Malinin
ədliyyə naziri Malik Kulibali hazırda ölkəsinin təhlükəsizlik
sisteminin əsas hissəsini terrorizmə qarşı
mübarizənin təşkil etdiyini demişdir. Terrorçu
qruplaşmaların Malinin şimal hissəsini nəzarətə
götürdüklərini xatırladan nazir digər ölkələrin
də qatıldığı antiterror əməliyyatları nəticəsində
bu ərazilərin azad edildiyini bildirmişdir. Bu, onu göstərir
ki, beynəlxalq terrorizmlə yalnız birgə əməkdaşlıq
şəraitində mübarizə aparmaq mümkündür.
Nəzərə alsaq ki, beynəlxalq terrorizm çox
böyük şəbəkələşmədir, bu əməkdaşlıq
daha sıx və möhkəm olmalıdır.
Mərakeşin
daxili işlər naziri Mohaned Lanser konfransın təşkilinə
və tədbirdə iştirakına görə Azərbaycan
Prezidentinə təşəkkürünü bildirmişdir.
Terrorizmlə mübarizənin bütün dövlətlər
üçün əhəmiyyət
daşıdığını vurğulayan mərakeşli
nazir bu baxımdan konfransın əhəmiyyətini qeyd
etmişdir. Nazir demişdir ki, terrorizmlə mübarizə bir
ölkəyə aid ola bilməz, bu, regional və beynəlxalq
əməkdaşlıq tələb edir. Bunun
üçün beynəlxalq hüquqi baza yaradılmalı,
bu istiqamətdə xüsusi təhlükəsizlik qüvvələri
formalaşdırılmalıdır.
Tədbirdə
çıxış edən Qazaxıstan xarici işlər
nazirinin müavini Aleksey Volkov demişdir ki, terrorizmə
qarşı beynəlxalq əməkdaşlıq hüquqi baza
əsasında aparılmalıdır. Bu istiqamətdə səylərini
əsirgəməyən Qazaxıstan çirkli pulların
yuyulması, kiber-təhlükəsizlik, insan alveri, narkotik
vasitələrin dövriyyəsi və digər sahələrdə
mühüm tədbirlər həyata keçirir. Nazir
müavini beynəlxalq terrorizmin get-gedə dini, milli, etnik pərdə
altında çıxış etdiyini vurğulayaraq bunun
qarşısının alınması üçün
maarifçiliyin gücləndirilməsi, dini ekstremizmin, insan
alverinin, qanunsuz silah ticarətinin qarşısının
alınması və başqa tədbirlərin əhəmiyyətini
qeyd etmişdir.
MDB-nin
icraçı katibi Sergey Lebedev də terrorçuluğa
qarşı mübarizənin qanunvericilik bazasının
gücləndirilməsinin vacibliyindən
danışmışdır. Terrorizmin, dini ekstremizmin, narkotik
maddələrin və silahların qanunsuz dövriyyəsinin
dünyada geniş miqyas aldığından
narahatlığını diqqətə çatdıran
S.Lebedev bu problemin MDB məkanında da aktual olduğunu
demişdir. MDB digər beynəlxalq təşkilatlarla əməkdaşlıq
çərçivəsində belə mənfi təzahürlərlə
mübarizə aparır. MDB-yə üzv ölkələrin
dövlət başçıları terrorçuluğa
qarşı beynəlxalq səviyyədə mübarizəni dəstəkləyən
bir sıra qərarlar qəbul etmişlər. Lakin bu işin
hüquqi bazasını yaratmaq, bu sahəyə dair
qanunvericiliyi gücləndirmək lazımdır. O, Bakı
konfransının terrorçuluğa qarşı mübarizədə
irəli atılmış daha bir addım olacağına əminliyini
bildirmişdir.
Asiyada
Əməkdaşlıq və Etimadartırıcı Tədbirlər
Konfransı (CICA) katibliyinin icraçı direktoru Mehmet
Çinar Aldemir regional və beynəlxalq təşkilatların
terrorizmə qarşı mübarizədə mühüm rol
oynadıqlarını vurğulamışdır. O,
CİCA-nın üzv ölkələr arasında transmilli
cinayətkarlıq, kiber-təhlükəsizlik, insan alveri,
narkotik vasitələrin qanunsuz dövriyyəsi, silah ticarəti
və digər sahələrlə bağlı mühüm
proqramlar həyata keçirdiyini bildirmişdir. Bu ilin
mayında İranda, iyununda isə Tailandda bu istiqamətdə
böyük konfransların keçiriləcəyini qeyd edən
M.Ç.Aldemir rəhbərlik etdiyi qurumun terrorizmə
qarşı mübarizədə digər beynəlxalq təşkilatlar,
o cümlədən BMT ilə yaxından əməkdaşlıq
etdiyini vurğulamışdır.
Konfransın
çox aktual mövzuya həsr olunduğunu diqqətə
çatdıran GUAM-ın baş katibi Valeri Çeçelaşvili
çıxışında terrorçuluğa qarşı
yalnız əl-ələ verərək beynəlxalq və
regional əməkdaşlıq çərçivəsində
səmərəli mübarizə aparmağın
mümkünlüyünü bildirmişdir. Azərbaycanın
terrorçuluğa, mütəşəkkil cinayətkarlığa
qarşı ardıcıl mübarizə aparan ölkələrdən
olduğunu qeyd edən V.Çeçelaşvili
respublikamızın məhz bu səbəbdən konfransa ev
sahibliyi etdiyini vurğulamışdır.
Türkdilli
Ölkələrin Əməkdaşlıq
Şurasının baş katibi Xəlil Akıncı terrorizmə
qarşı mübarizəni hansı yollarla və vasitələrlə
aparılması imkanlarının müzakirəsi
baxımından konfransın əhəmiyyətini qeyd
etmişdir. Terrorçuluğa qarşı mübarizədə
qeyri-mütəşəkkilliyin nəzərə
çarpdığını vurğulayan X.Akıncı bu bəlanın
digər formaları, o cümlədən dövlət
terrorundan söz açmışdır.
Nahar
fasiləsindən sonra beynəlxalq konfrans "Terrorizmin
yayılmasına şərait yaradan amillərin aradan
qaldırılması üçün həyata keçirilən
tədbirlərin inkişaf etdirilməsi üzrə beynəlxalq
əməkdaşlığın gücləndirilməsi"
mövzusunda birinci sessiya ilə işini davam etdirmişdir.
Sessiyanın
moderatoru Demokratiya İctimai Fondu Mərkəzinin direktoru,
macarıstanlı İstvan Gyarmati müzakirə olunacaq məsələlər
barədə məlumat vermişdir.
Sonra
BMT-nin terrorçuluğa qarşı mübarizə üzrə
işçi qrupunun direktoru Cahangir Xan sessiyada
açılış nitqi ilə çıxış etmişdir.
O, belə mötəbər tədbirin yüksək səviyyədə
təşkilinə görə təşəkkürlərini
çatdırmış, gözəl Bakı şəhərində
olmaqdan məmnunluğunu bildirmişdir. Terrorizmdə cinayətkarların
mühakimə olunmamalarının, cəzasız
qalmalarının xüsusilə ikrah hissi
yaratdığını vurğulayan C.Xan demişdir ki,
terrorizm heç bir dini və ya milli kimlik daşımır,
heç bir sərhəd tanımır və heç bir
dövlət bu bəla ilə təkbaşına mübarizə
apara bilməz. Biz bu problemi köklü, hərtərəfli əməkdaşlıqla
aradan qaldıra bilərik.
Sonra
müxtəlif mövzularda panellərin təqdimatı
olmuşdur.
Əfqanıstanın
Təhlükəsizlik Direktoratlığının
keçmiş rəhbəri Amrullah Saleh "Münaqişələrin
qarşısının alınması və həll
olunması", Şimali Amerikanın İslam
Alyansının nümayəndəsi Mohamed Elsanousi və
Mançester Metropolitan Universitetinin professoru, Beynəlxalq
biznes və siyasi iqtisadiyyat bölməsinin rəhbəri Hamed
El-Said "İnkişaf və sosial bərabərliyin təbliğ
edilməsi", Hüquqşünasların Beynəlxalq
Komissiyasının, beynəlxalq hüquq və mühafizə
proqramlarının direktoru Aleks Konte "İnsan
hüquqları və qanunun aliliyinə hörmət"
mövzularında təqdimatlarla çıxışlar
etmişlər.
Təqdimatlarda
terrorizmin qarşısının alınmasında
münaqişələrin həllinin, cəmiyyətdə
inkişafın və sosial bərabərliyin, insan
hüquqlarının və qanunun aliliyinin təmin edilməsinin,
eləcə də bu istiqamətdə geniş maarifçilik
və təbliğat işlərinin aparılmasının əhəmiyyəti
xüsusilə vurğulanmış, bu dəhşətli bəlanın
aradan qaldırılmasında beynəlxalq əməkdaşlığın
genişləndirilməsinin zəruriliyi diqqətə
çatdırılmışdır.
Sonda
müzakirələr aparılmışdır.
Konfrans
martın 19-da sessiyalarda işini davam etdirəcəkdir.
AzərTAc
Azərbaycan.-2013.- 19 mart.- S.5.