Parlamentlərarası İttifaq ilə Azərbaycan arasında əməkdaşlığın perspektivləri müzakirə olunmuşdur

Ekvadorun paytaxtı Kito şəhərində keçirilən Parlamentlərarası İttifaqın 128-ci Assambleyasında iştirak edən Azərbaycan Respublikası Milli Məclisinin nümayəndə heyəti Assambleyanın baş katibi Andres Consonla görüşmüşdür.

Nümayəndə heyətinin üzvü deputat Fuad Muradov AzərTAc-a bildirmişdir ki, görüşdə Parlamentlərarası İttifaq ilə Azərbaycan arasında əməkdaşlığın perspektivləri əsas müzakirə mövzusu olmuşdur.

Bildirilmişdir ki, Azərbaycan bu beynəlxalq təşkilatla əməkdaşlığın inkişafına böyük önəm verir.

Milli Məclis Sədrinin müavini Valeh Ələsgərov və nümayəndə heyətinin digər üzvləri Azərbaycanda gedən ictimai-siyasi proseslər, ölkədə həyata keçirilən islahatların uğurlu nəticələri barədə baş katibə məlumat vermişlər.

A.Conson Azərbaycan ilə əməkdaşlığın uzun illərdir davam etməsindən məmnun olduğunu bildirmişdir. Baş katib Azərbaycanın Cənubi Qafqazdakı mövqeyindən və dünyada artan nüfuzundan razılığını ifadə etmiş, münasibətlərimizin inkişafının hər iki tərəf üçün faydalı olacağını vurğulamışdır.

Milli Məclis Sədrinin müavini Valeh Ələsgərovun rəhbərlik etdiyi nümayəndə heyətinə Milli Məclisin deputatları Səməd Seyidov, Cavanşir Feyziyev, Fuad Muradov və Sahibə Qafarova daxildirlər.

Azərbaycan.-2013.- 28 mart.- S.4.