Sağalmayan yaralar
Naxçıvan
1905-1906-cı illərdə 31 mart azərbaycanlıların
soyqırımı günüdür
1828-ci ildə imzalanan Türkmənçay müqaviləsindən sonra çar Rusiyası müsəlman ölkələri ilə sərhəd zonalarını möhkəmləndirmək məqsədilə Naxçıvan, İrəvan və Qarabağ xanlıqlarına kütləvi şəkildə ermənilərin köçürülməsinə başladı. Naxçıvana köçürülənlərin sayı o qədər çox idi ki, onları tez bir zamanda yerləşdirmək mümkün deyildi. Ona görə də ermənilər boş torpağı və evi olan ən yaxşı kəndləri seçir və sonra yerli idarələrə müraciət edərək onları məskunlaşdıqları ərazidə qeydiyyata almağı tələb edirdilər. İmperiyanın köçürmə siyasəti yerli əhaliyə də ziyan vururdu.
Məcburiyyət qarşısında qalan camaat
torpaqlarının bir qismini silahlı rus əsgərlərinin
qorxusundan gəlmə ermənilərə verməli olurdular.
Çar hökumətinin köçürmə siyasətinə
qədər Naxçıvan diyarında əhalinin 82,8 faizini
azərbaycanlılar təşkil edirdi, erməni əhalinin
sayı isə 17,2 faizə bərabər idi. Rus tədqiqatçısı
S.Qlinka "Ermənilərin Rusiya ərazilərinə miqrasiyası
haqqında" (Moskva, 1831) əsərində yazırdı
ki, Türkmənçay müqaviləsindən üç ay
sonra keçmiş Rusiyanın yeni ərazilərinə, yəni
çar Rusiyası tərəfindən işğal olunmuş
sabiq Naxçıvan, İrəvan və Qarabağ
xanlıqlarına 40.000 erməni
köçürülmüşdür. Bu "köçürmənin"
təşəbbüsçüsü milliyyətcə erməni
olan X.Y.Lazarev idi. O, hələ İkinci Rusiya-İran
müharibəsi bitməmiş 1827-ci ildə ermənilərin
Şimali Azərbaycana köçürülməsinin layihəsini
tərtib edərək çar hökumətinə təqdim
etmişdi. Bu layihənin baş xəttini Rusiya
imperiyasının tərkibində "Erməni
çarlığının bərpa olunması" təşkil
edirdi. Həmin ideya Rusiyanın hakim dairələri
üçün İranla Türkiyə sərhədlərində
xristianlardan ibarət vilayətin yaradılmasına bir bəhanə
oldu. 1828-ci ilin mart
ayında general-adyutant A.X.Benkendorf X.Y.Lazarevin layihəsini
imperator I Nikolaya təqdim edir. İmperatoru əsasən
Türkiyə və İranla, yəni müsəlman ölkələri
ilə sərhəd zonalarını möhkəmləndirmək
daha çox maraqlandırdığı üçün o,
1828-ci il martın 21-də xüsusi qərarla Naxçıvan
və İrəvan xanlıqlarını ləğv edərək
əvəzində həmin ərazidə süni olaraq "Ermənistan
vilayəti" yaratdı. Bu vilayət 1850-ci ilədək
davam etmiş, sonra isə İrəvan quberniyası ilə əvəz
olunmuşdur. Naxçıvan diyarı da həmin quberniyaya
daxil edilmişdir.
Bir
faktı da qeyd edək ki, köçürməyə qədər
Naxçıvan bölgəsində erməni ailələri
daxil olmaqla 530 xristian ailəsi var idisə, Türkmənçay
müqaviləsindən sonra orada xristianların sayı 4 dəfə
artmışdı. Dərələyəz mahalına 507,
Naxçıvan mahalına 941 erməni ailəsi yerləşdirilmişdi.
Ordubad dairəsində isə ən çox gəlmə ermənilər
Bilev mahalında məskunlaşmışdılar. XIX əsrin
əvvəllərində Naxçıvan
xanlığının ərazisində İran dövləti
tərəfindən yaradılan 282 azərbaycanlı ailəsindən
ibarət olan Məvazi-Xatun mahalına da 216 erməni ailəsi
yerləşdirilmişdi. Məqsəd azərbaycanlıların
çoxluq təşkil etdikləri ərazilərdə ermənilərin
say tərkibini artırmaq idi. Tədqiqatçıların
araşdırmalarına görə, həmin dövrdə
Naxçıvan diyarında nə sosial-iqtisadi münasibətlərdə,
nə də məhsuldar qüvvələrin inkişafında
elə bir dəyişiklik baş verməmişdir. Kənd əhalisi
yenə də əsasən taxılçılıq,
maldarlıq, ipəkçilik, bağçılıqla məşğul
olmuş, şəhərlərdə sənətkarlığın
bir çox sahələri - bez parçaların istehsalı,
zərgərlik, dəmirçilik, qalayçılıq və
digər sahələr inkişaf etmişdi.
1905-ci
ilin fevralında Bakıda baş verən erməni-müsəlman
toqquşması may ayının əvvəllərində
Naxçıvan camaatında da xüsusi narahatlıq
doğurmuşdu. Qafqaz canişinliyinin yüksək rütbəli
erməni və ermənipərəst məmurları vasitəsilə
silahlandırılan xüsusi dəstələr 1905-ci ildə
digər yerlərdə olduğu kimi, Naxçıvanda da azərbaycanlılara
qarşı silahlı hücumlar edib onları qırır,
ermənilərin say üstünlüyünə nail olmaq istəyirdilər.
Həmin dövrdə Qafqazdakı 54 qəzadan yalnız
beşində ermənilər çoxluq təşkil edirdilər
(V.Arzumanlı, N.Mustafa. "Tarixin qara səhifələri",
Bakı, 1998).
1905-1906-cı
illərdə Qafqazda erməni-müsəlman
qırğınları haqqında polis departamentinin
"Daşnaklar" adlı arxiv sənədində
("Daşnaki", Baku, 1990) deyilir:
"Daşnaksütyun" öz qüdrətini göstərdi,
müsəlmanlar cəfalarını çəkdilər.
Burada ikili oyun oynanılmışdır: biricisi, müsəlmanlarda
olan qisasın bir qismini almaq, digər tərəfdən
baş verən hadisələrin günahını mətbuat
və təbliğatın köməyi ilə rus hökumətinin
üzərinə yıxmaq, bununla da təkcə erməniləri
deyil, Qafqazın digər sakinlərini də
inqilabçılaşdırmaq üçün güclü
təbliğat materialı əldə edilmiş olurdu. Nəticədə
ermənilərə münasib olmayan bir çox rus məmurları
və ayrı-ayrı şəxslər terror qurbanı oldular:
general Əlixanov (Əlixanov-Avarski), qubernator Nakaşidze
(Bakı qubernatoru), Andreyev (Yelizavetpolun vitse-qubernatoru),
polkovniklər Bıkov, Saxarov və başqa dövlət məmurları.
Onların qismən nail olduqları ikinci məqsədləri
ondan ibarət oldu ki, Zaqafqaziyada ermənilərlə müsəlmanların
yaşadıqları ərazilər bir-birindən
ayrıldı, Türkiyədən və qismən İrandan
köçən ermənilərin məskunlaşdırılması
üçün torpaqlar boşaldıldı. Son 5-6 ildə
onların sayı yarım milyona çatmış, 200 min nəfər
isə rus idarələrinin vəkaləti ilə təbəəlik
əldə etmişdi. Yelizavetpol, İrəvan və Qars vilayətlərində
ərazilərin qismən ayrılmasına nail olunmuş,
torpaqların müəyyən hissəsi
boşaldılmış, həmin ərazilərdən bir
çox müsəlmanlar qaçaraq canlarını
qurtarmışlar".
Əslində
Rusiyanın hakim dairələri də 1905-1906-cı illərdə
erməni-müsəlman iğtişaşlarından öz məqsədləri
üçün istifadə etmişlər. Çar məmurları
Qafqazda güclənən narazılıq dalğasının
hökumət əleyhinə istiqamətlənəcəyindən
ehtiyat edərək ermənilərin müsəlmanlar
yaşayan ərazilərdə törətdikləri
qırğınlara laqeydlik göstərmiş, bəzi
hallarda isə hər iki tərəfin gücünün etnik
toqquşmalara sərf edilməsinə nail olmuşdular. Bu məqsədlə
xüsusi xəfiyyə şəbəkəsinin qurulması
haqqında Cahangir Zeynaloğlunun 1924-cü ildə
İstanbulda dərc edilən "Müxtəsər Azərbaycan
tarixi" kitabında (Bakı, 1992) belə bir məlumat var:
"Yalnız azəri türkləri qəflətdə idilər
və iğtişaşlarda çar tərəfini
saxlayırdılar. Rusiya hökuməti müsəlmanların
bu qəflətindən istifadə edib, Peterburqdan xüsusi surətdə
yüz otuz xəfiyyə məmuru göndərərək
türklər ilə ermənilər arasında icra etdiyi
propaqanda ilə biri digəri əleyhinə silah işlətməyə
təşviq olundu və... iki milləti biri digərinə
qırdırdı".
1905-ci il
fevralın 6-da Bakıda bir nəfər azərbaycanlının
erməni komitəsi tərəfindən öldürülməsi
ilə başlanan qırğınlar bir çox müəlliflərin
iddia etdikləri kimi təsadüf nəticəsində deyil, məhz
bütün Qafqazın varlı ermənilərinin zaman-zaman cəm
olunduqları bir şəhərdə planlı şəkildə
baş vermişdi. Ermənilər Bakıda öz milyonerlərinin
köməyi ilə istədiklərinə nail olacaqlarına,
Bakının neft səltənətlərini ələ
keçirəcəklərinə və bundan sonra bütün
Zaqafqaziyadan müsəlmanları silah gücünə qovub
Ermənistan dövləti yaradacaqlarına əmin idilər.
Lakin Bakıdakı qırğınlar zamanı tələfat
min nəfərə çatsa da, ermənilərin niyyətləri
baş tutmamış və onlar məğlub olmuşdular.
Mir
Mövsüm Nəvvabın "1905-1906-cı illərdə
erməni-müsəlman davası" (Bakı, 1993) və Məmməd
Səid Ordubadinin "Qanlı sənələr" (Bakı, 1991) əsərlərindən
məlum olur ki, Naxçıvanda ermənilərin müsəlmanlara
qarşı ilk həmlələri 1905-ci ilin mayında
başlamış və qırğın fasilələrlə
1907-ci ilə qədər davam etmişdir. Həmin dövrdə
ermənilər azərbaycanlıların yaşadıqları
kəndlərə gedən yolları bağlamış,
onların bir-biri ilə əlaqəsini kəsmiş, kəndlərin dörd bir tərəfinə
çoxsaylı silahlı əsgərlər yerləşdirmişdilər.
Şəhərdə söhbət gəzirdi ki, ermənilər
cürbəcür odlu silahlarla azərbaycanlılara qəfildən
hücum edəcəklər. Digər tərəfdən isə
təxribatçılar şayiə yaymışdılar ki,
"Qafqazda bizim əlimizin üstündə gərək əl
olmasın". Bu fikirlərlə yerli camaatı
çaşdıran erməni millətçiləri heç
kəsdən qorxmayıb azərbaycanlılara hər cür əziyyət
verməkdə idilər, hətta "Naxçıvanın ətrafı
hər tərəfdən erməni kəndləri ilə əhatə
olunduğundan, 6 saat ərzində İrəvandan istədikləri
qədər erməni əsgəri gətirməyə gücləri
çatdıqlarından daha müsəlmanları şirin
dillə dindirmək belə istəmirdilər". M.S.Ordubadi
"Qanlı sənələr" əsərində
yazırdı ki, mayın 5-də saat 3 radələrində
üç nəfər Cəhri kəndinin azərbaycanlı
sakini erməni kəndi Şıxmahmuddan keçdikləri vaxt
ağır yaralanır. Bu xəbər şəhər əhlində
daha çox həyəcan yaradır və ermənilər həmin
gündən dükanlarını bağlayıb kimisi kilsəyə,
kimisi də evlərinə yığışır. Mayın
7-də Tumbul adlı erməni-müsəlman kəndində
(bu kəndin iki hissəsi müsəlman, bir hissəsi erməni
idi) bir azərbaycanlı öldürülür. Səhəri
gün İrəvanın vitse-qubernatoru Baranovski İrəvandan
şəhər qlavası Ağamalov, daha bir ay qabaq Peterburqa
getmiş şəhər
qlavası Cəfərqulu xan Naxçıvanski ilə
Naxçıvana gəlirlər. Onların gəlişini
eşidən camaat ermənilərin
işlərindən şikayət etməyə
başlayır. Lakin vitse-qubernator həmin şikayətləri
cavabsız qoyur. Mayın 9-da Cəhri müsəlmanları
yenidən qubernatorun hüzuruna gəlib qeyd edirlər ki,
"bizim kəndin yolları hər tərəfdən erməninin
əlindədir. Bu səbəbdən təvəqqe edirik,
yolları hökumət mühafizəsinə
alasınız". Lakin bu şikayətə də
baxılmır, azərbaycanlılar
məyusluq içərisində geri dönürlər. Bundan
qəzəblənən ermənilər azərbaycanlıları
cürbəcür söyüşlərlə təhqir etməyə
başlayırlar. May ayının 9-da naxçıvanlı Əli
Hacı Bayramzadə səhrada Əliabad adlı erməni kəndliləri
tərəfindən gecə vaxtı yeddi güllə
yarası ilə qətlə yetirilir. Ayın 11-də Kültəpə
erməni kəndinin varlısı erməni fədailəri tərəfindən
ailəsi ilə birlikdə öldürülür. Günah isə
müsəlmanların üzərinə qoyulur. Lakin sonralar
aparılan istintaqdan aydın olur ki, Xaçatur adlanan bu şəxs daşnakların tələb etdiyi
vəsaiti vermədiyi üçün onlar tərəfindən
cəzalandırılmışdır. Həmin gecə
vitse-qubernator Baranovski yol ilə gedən bir ermənidən
çoxlu bomba müsadirə edir. May ayının 11-də ermənilər
bütün şəhəri atəşə tuturlar. Bu
müdhiş gecədə iki saat yarım müddətində
güllə səsindən, alov və tüstüdən
başqa heç nə eşidilmir. Səhəri gün azərbaycanlılar
vitse-qubernatora gecənin dəhşətli
atışmasından şikayət edib əncam çəkməsini
tələb edəndə o, laqeydcəsinə "əgər
onlar sizə atəş açırsa, siz də tutub
onların tapançalarını alın. Mən bilmərəm"
deyib camaatı geri qaytarır. Mayın 12-də baş verən
atışma nəticəsində məşhur erməni tacirləri
Adamov şagirdləri, Xalatov uşaqları ilə və
başqaları qətlə yetirilir. Adamovun dükanı od
tutub yanır. Azərbaycanlılardan beş nəfər
ölür və bir neçəsi yaralanır. Erməni
dükanlarının əksəriyyəti, azərbaycanlılarınkından
isə 10 dükan qarət olunur. Bu qırğın zamanı
polis qulluqçusu, naçalnik Angel qətl-qarətlərə
mane olmaq əvəzinə əksinə, talan vaxtı "tez
olun, tez aparın" deyib camaatı daha da
qızışdırırdı. Cəhri kəndindən
başlayan qarışıqlıq, yanğın və talanlar
həmin il noyabrın 26-na qədər davam edir. Bir faktı
qeyd edək ki, qubernator bu hadisələrdən məlumatlıydı,
amma heç bir tədbir görmək fikrində deyildi. Adətən
gecə saat 12-dən sonra başlanan şiddətli atəş
ermənilərin ipək zavodundan açılırdı. Bir
sözlə, Naxçıvan camaatı zülm və əziyyət
altında əzilir, hökumət isə bu işləri yoluna
qoymaq istəmirdi. Noyabrın 26-da camaat yenidən bir-birinə
dəyir, onlar tələm-tələsik dükanlarını
bağlayıb evlərinə qaçırlar. Amma insanlar təlaşda
olsalar da, nə baş verəcəyindən xəbərsiz
idilər. Qəfildən xəbər yayılır ki, kazaklar
sülh və asayişi təmin etmək üçün
Çeşmə-Bazar kəndinə gedərkən Hacı Nəsir
Hacı Nağı oğlunun evini qarət etmiş, buna mane
olmağa çalışan Hacının bir zavallı
oğlu öldürülmüşdür. Ev sahibi də
oğlunu qana bulaşmış görərkən
çaşıb bir güllə kazaklara atmışdır.
Elə buna görə də onun bütün ailəsi "biədəblər"
tərəfindən qətlə yetirilmişdir. Bu xəbər
Naxçıvanın yerli əhalisini son dərəcə qəzəbləndirir
və pərişan edir. M.S.Ordubadi yazırdı ki, "zira,
bu işlərin ümdə baniləri və
başçıları polkovnik Krılov və naçalnik
Angel idi".
Noyabrın
26-sı gecəsi isə
Naxçıvanda odlu-alovlu, müsibətli bir gecə
olmuşdur. "Həmin gecə saat 7 radələrində dəhşətli
sədalar eşidilirdi. Məlum olduğu kimi, həmin səs
bazar qarovullarının səsi imiş. Hərdənbir
beşatılan sədaları da eşidilirdi. Camaat evlərindən
çıxıb bazara girmək istəsələr də,
kazaklar hər tərəfdən atışma salıb mane
olurdular. Xülasə, güllə səsi iki saat davam edib
camaatı heyrət içində qoymuşdu... Bir azdan şəhəri
tüstü bürüyüb, bazar tərəfdən qəmli
bir işıq şəhəri ara-sıra
işıqlandırdı. O vəziyyətdə bazar yanar
dağ və vulkanlara bənzədi. Bir saatdan sonra məlum
oldu ki, hərif kazaklar və ermənilər əlbir olub
müsəlman bazarını tamam qarət edəndən sonra
ora od vurmuşlar". Camaatın illər boyu zəhmətlə
qazandıqları var-dövlətləri bir neçə
saatın içində yanıb kül olmuşdu. Bu
yanğında 85 dolu dükan, 75 anbar və bir neçə
boş dükan yandırılmışdı. 3 gün -
noyabrın 27-dən 30-dək bazarda əsla yeməyə bir
şey qalmamışdı. Camaat son dərəcə ehtiyac
içində idi. Noyabrın 29-da gecə şəhərin
ikinci hissəsində kazaklar müsəlman evlərini atəşə
tutub qarət etmişdilər...
Cəhri
kəndinin ermənilər və kazaklar tərəfindən
yandırılması camaatın qəzəbinə və pərişanlığına
səbəb olmuşdu. Elə həmin gün İrəvan
qubernatoru Paskeviç Naxçıvana gəlir. Azərbaycanlılar
yığışıb Cəhri faciəsini də ortaya
qoyaraq dərdlərini ona deyib çarə istəyirlər.
Qubernator isə tədbir görəcəyinə söz verir.
Kənd tamamilə yanıb qurtardıqdan sonra o, Cəhriyə
gedir. Dekabrın 2-də camaat kazakların geriyə dönmələrini
tələb edir. Qubernator əhalinin bu şikayətinə də
laqeydcəsinə "tədbir görəcəyik" deyib
heç bir iş görmür və oradan uzaqlaşır.
Ümumiyyətlə,
Naxçıvan hadisələri zamanı oradakı kəndlərdə
10 anbara, 150 dükana od vurulmuş, 350 günahsız müsəlman
qətlə yetirilmiş, 250 nəfər isə
yaralanmışdır (bax: Gürcüstan Respublikasının
Dövlət Arxivi, fond 30/21, sax. Vahidi 21, qovluq 4, s.2). Mir
Mövsüm Nəvvab "1905-1906-cı illərdə erməni-müsəlman
davası" adlı əsərində İrəvan ermənilərinin
cinayətkar məqsədlərinə qarşı Bakı
hadisələrindən sonra Naxçıvanda
xalqımızın qəhrəmancasına müqavimətini
çox təsirli şəkildə ifadə edib. Müəllif
yazır: "Elə ki İrəvanın fitnə-fəsad
törədən erməniləri yenidən Naxçıvana
gəldilər, orada vəziyyət gərginləşdi.
Naxçıvan erməniləri neçə illərdən bəri
tədarük etdikləri döyüş sursatlarını -
topları, bombaları, beşaçılan tüfəngləri
və s. onların ixtiyarına verməyə başladılar.
Hərbi sursatları keçidlərdə və gizli
mövqelərdə yerləşdirdikdən sonra növbəti
qırğın üçün hazırlamağa
başladılar. Dükan-bazarı bağlayıb bütün
icma ilə qalxıb mövqelərdə yerləşdirdikləri
silahlardan müsəlmanlara atəş açdılar...
Hadisələrdən
xəbərsiz biçarə müsəlmanlar
çaş-baş qalıb bilmədilər ki, nə etsinlər.
Hamı dükan-bazarını bağlayıb qaçdılar
evə. Yarım saatdan sonra tüfəngi olan tüfəngini,
tapançası olan tapançasını, olmayanlar isə xəncər,
külüng, balta, dəhrə və ağac
götürüb ermənilərin müqabilinə gəldilər
və onlarla davaya başladılar. Silahsız müsəlmanlar
münasib fürsətdən istifadə edərək qəflətən
erməni silahlılarının üzərinə hücum
edib... tüfəng və patronlarını əllərindən
alıb üz qoydular davaya... Hər iki tərəfdən
ölənlər oldu. Hər tərəfdə ermənilər
böyük tələfata məruz qaldılar və vahiməyə
düşən ermənilər üz qoydular
qaçmağa... Şəhər erməniləri məğlub
olandan sonra müsəlmanlar erməni
kəndlərinə yollandılar. Böyük Badamlı kəndinin
erməniləri - ahıl, qoca bütün külfətləri
ilə müsəlmanların qabağına
çıxdılar. Tam ehtiramla müsəlmanlığı
qəbul etdiklərini bildirdilər".
İrəvan
hadisələri barədə irəvanlı Mirabbas
Mirbağırzadənin topladığı materiallar əsasında
məlumat verən M.S.Ordubadi qeyd edirdi ki, Bakı faciələrinə
münasibət ilk olaraq İrəvan quberniyasının
Naxçıvan qəzasında bildirilmişdir:
"Naxçıvanda müsəlmanlar say və nüfuzca ermənilərdən
üstün olduqlarından qabaqca müharbə tələb
etmiş ermənilər, nəhayət, büsbütün məğlub
olaraq milli səhifələrinə qara bir xətt çəkdirdilər...
Naxçıvanda olan erməni məğlubiyyəti İrəvan
ermənilərini acıqlandırıb son dərəcə qəzəbləndirmişdi".
Naxçıvan
hadisələrindən sonra İrəvanda müsəlmanlara
qarşı alçaq hərəkətlər gündən-günə
çoxalırdı. Bu şəhərdə 10 min müsəlman
olsa da, çox narahat idilər. Ermənilərə gəldikdə,
Naxçıvan hadisələrinin intiqamını almaq
üçün bəhanə axtarırdılar (A.Paşayev.
"1905-1907-ci illərdə Azərbaycan xalqına
qarşı erməni vəhşilikləri",
Bakı, 2006).
Bundan
sonra ermənilər İrəvan quberniyasında, daha sonra
Eçmiədzində, Gəncədə, Qarabağda, Zəngəzurda,
Qazax uyezdində faciəli hadisələr,
iğtişaşlar törətdilər. Qırğınlar
zamanı nə qədər insanın həyatına son
qoyuldu. Ermənilərin məqsədi ilk növbədə
İrəvan və onun ətraf kəndlərini müsəlmanlardan
təmizləmək, sonra isə M.S.Ordubadinin təbirincə,
"İrəvandan Naxçıvana qədər yol üstə
yerləşən müsəlman kəndlərini
dağıtmaqla İrəvan ermənilərini
Naxçıvanda hazır əsgəri qüvvələrlə
birləşdirmək, Naxçıvandan Zəngəzura kimi
yol boyunda olan köyləri dağıdıb, Zəngəzur
könüllüləri ilə Naxçıvandakı əsgəri
qüvvəni bitişdirmək kimi alçaq xəyallar"dan
ibarət idi.
Mayın
23-də ermənilərin Qaraçay bağçasında
müsəlman gənclərə hücumu ilə İrəvanda
qırğınlar başlanır.
İradə ƏLİYEVA
Azərbaycan.-2013.- 29 mart.- S.7.