Kiyev Milli Linqvistik Universitetində Azərbaycan Dili və Mədəniyyəti Mərkəzinin açılması ulu öndər Heydər Əliyevin 90 illik yubileyinə layiqli töhfədir

 

Dünyanın nüfuzlu mədəniyyət mərkəzləri və ali təhsil ocaqları ilə səmərəli əməkdaşlıq Bakı Slavyan Universitetinin (BSU) fəaliyyətinin prioritet istiqamətlərindən biridir. Universitetin ölkə hüdudlarından kənarda apardığı işlərin əsasında isə Azərbaycan dilinin, mədəniyyətinin, ümumilikdə azərbaycanşünaslığın təbliği dayanır.

Azərbaycanşünaslıq ixtisası üzrə kadr hazırlığı istiqamətində böyük təcrübə toplamış BSU tərəfindən dilimizi və mədəniyyətimizi təbliğ etmək məqsədilə müxtəlif ölkələrin universitetlərində Azərbaycan dili və mədəniyyəti mərkəzlərinin yaradılması və onların fəaliyyətinin təmin edilməsi istiqamətində böyük işlər həyata keçirilir. Bu gün Rusiyanın Moskva Dövlət Linqvistik Universiteti, Belarusun Maksim Tank adına Dövlət Pedaqoji Universiteti və Ukraynanın Poltava İqtisadiyyat və Ticarət Universiteti kimi nüfuzlu ali təhsil ocaqlarında Azərbaycan dili və mədəniyyəti mərkəzləri fəaliyyət göstərir.

Bu mərkəzlərdə müntəzəm olaraq məşğələlər keçirilir, tələbələr üçün vaxtaşırı Azərbaycanın görkəmli elm və mədəniyyət xadimləri, tanınmış ziyalıları və ictimai xadimləri ilə görüşlər, Azərbaycan yazıçılarına, şairlərinə həsr olunmuş gecələr təşkil olunur, milli və dövlət bayramları, Azərbaycanın unudulmaz tarixi hadisələri qeyd edilir. Bu mərkəzlərin yaradılması yalnız universitetlərarası əlaqələrin inkişafı üçün deyil, həm də ölkələrarası siyasi, tarixi, mədəni-kulturoloji və elmi əlaqələrin möhkəmlənməsi baxımından da böyük əhəmiyyət kəsb edir.

BSU-dan AzərTAc-a bildirmişlər ki, belə mərkəzlərin sırasına daha biri də əlavə olunmuşdur. Hələ 2010-cu ilin oktyabrında BSU ilə Ukraynanın Kiyev Milli Linqvistik Universiteti (KMLU) arasında uzunmüddətli əməkdaşlıq haqqında imzalanmış müqaviləyə əsasən, universitetlərarası tələbə-müəllim mübadiləsi, müştərək elmi konfransların, seminarların təşkili, birgə elmi əsərlər məcmuələrinin və elmi-metodik vəsaitlərin hazırlanması və ən əsası KMLU-da Azərbaycan dilinin tədrisi və Azərbaycan Dili və Mədəniyyəti Mərkəzinin yaradılması barədə mühüm razılaşma əldə edilmişdir.

Artıq KMLU-da müvafiq mərkəzin açılması ilə bağlı hazırlıq işləri sona çatdırılmış və mərkəz Azərbaycanın ədəbiyyatına, tarixinə, siyasətinə dair materiallarla təchiz olunmuşdur. BSU bu mərkəzi yalnız metodik vəsaitlərlə təmin etməklə kifayətlənməmişdir. Burada müasir texniki avadanlıq quraşdırılmış, xüsusi kitabxana fondu yaradılmış, xalqımızın mədəniyyətini və tarixini, zəngin milli adət-ənənələrini əks etdirən eksponatlar yerləşdirilmişdir.

 Azərbaycanşünaslıq ixtisası istiqamətində Azərbaycan dilinin, ədəbiyyatının, mədəniyyətinin, tarixinin tədrisi məqsədilə filologiya elmləri doktoru, BSU-nun professoru Rafiq Novruzov KMLU-ya ezam edilmişdir.

Martın 29-da Azərbaycan xalqının ümummilli liderinin anadan olmasının 90 illik yubileyi ərəfəsində KMLU-da Heydər Əliyev adına Azərbaycan Dili və Mədəniyyəti Mərkəzinin rəsmi açılışı olmuşdur.

 Mərasimdə Azərbaycanın Ukraynadakı səfirliyinin təmsilçiləri, BSU-nun və KMLU-nun rektorları, Ukrayna Azərbaycanlıları Konqresinin sədri, Ukrayna Azərbaycanlı Gənclər Birliyinin, Azərbaycan Respublikası Dövlət Neft Şirkətinin (ARDNŞ) nümayəndələri, Azərbaycan Televiziyasının Ukrayna və Şərqi Avropa üzrə nümayəndəliyinin başçısı, KMLU-nun tələbələri və Kiyevin ali təhsil müəssisələrində təhsil alan azərbaycanlı tələbələr iştirak etmişlər.

Mərasimi giriş sözü ilə KMLU-nun rektoru, professor Roman Vasyuk açaraq  iki universitet arasındakı müqaviləyə əsasən, fəaliyyət göstərəcək mərkəzin açılışını əlamətdar hadisə kimi qiymətləndirmişdir. Bildirmişdir ki, bu hadisədən əvvəl daha bir mühüm yenilik baş vermişdir: Azərbaycan dili KMLU-nun şərqşünaslıq fakültəsində öyrənilən dillərin kadastrına daxil edilmişdir. Artıq üçüncü kurs tələbələri mərkəzdə məşğul ola bilərlər. Burada onlar Azərbaycan dili, tarixi və mədəniyyəti ilə bağlı zəngin ədəbiyyatla tanış olmaq imkanı əldə etmişlər.

BSU-nun rektoru, AMEA-nın müxbir üzvü, professor Kamal Abdullayev bu əlamətdar hadisə münasibətilə tədbir iştirakçılarını təbrik edərək bildirmişdir ki, bu, Poltava İqtisadiyyat və Ticarət Universitetində fəaliyyət göstərən mərkəzdən sonra BSU-nun təşəbbüsü ilə Ukraynada açılmış ikinci mərkəzdir. Ümummilli lider Heydər Əliyevin adını daşıyan və açılışı ulu öndərin anadan olmasının 90 illiyinə təsadüf edən bu mərkəz iki dost xalqın daha da yaxınlaşmasında əvəzsiz rol oynayacaqdır.

Daha sonra tədbirdə Azərbaycanın təhsil naziri Misir Mərdanovun, Azərbaycanın Ukraynadakı və Ukraynanın ölkəmizdəki səfirlərinin, eləcə də Poltava İqtisadiyyat və Ticarət Universiteti rektorunun təbrik məktubları oxunmuşdur.

ARDNŞ-in nümayəndəsi şirkətin mərkəzi linqafon kabineti və interaktiv lövhə ilə təchiz etməklə onun təşkilinə öz töhfəsini verdiyini demişdir.

Ukraynada  Azərbaycan diaspor təşkilatının sədri Rövşən Tağıyev demişdir kii, bu mərkəz  Kiyevdə Azərbaycanın təhsil və mədəniyyət guşəsi kimi fəaliyyət göstərəcəkdir.

Tədbirin sonunda azərbaycanlı və ukraynalı tələbələr milli geyimlərdə konsert proqramı ilə çıxış etmişlər.

Hazırda BSU-nun təşəbbüsü və dəstəyi ilə bir sıra xarici ölkələrin nüfuzlu universitetlərində yeni Azərbaycan  tədris-mədəniyyət mərkəzlərinin təşkili istiqamətində intensiv iş aparılır və imzalanmış əməkdaşlıq müqavilələri çərçivəsində Azərbaycan dilinin, ədəbiyyatının, mədəniyyətinin, tarixinin geniş təbliği, tədrisi və tədqiqi sahəsində uğurlu addımlar atılır. BSU ilə Almaniyanın Yohannes Quttenberq Universiteti (Mayns), Rusiyanın Ural Federal Universiteti, Bolqarıstanın Müqəddəs Kliment Oxridski adına Sofiya Universiteti arasında əməkdaşlıq  müqavilələri imzalanmışdır.

 

 

AzərTAc

 

Azərbaycan.-2013.- 30 mart.- S.7.