Ermənilərin bütün dövrlərdə ölkəmizə qarşı apardıqları millətçi-şovinist siyasətin əsas məqsədi azərbaycanlıları tarixi torpaqlarından qovmaqla bu əzəli ərazilərimizdə «Böyük Ermənistan» xülyasını reallaşdırmaq olmuşdur

Martın 29-da "Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyi 31 mart - Azərbaycanlıların soyqırımı günü ilə əlaqədar toplantı keçirmişdir.

İctimai Birliyin analitik-informasiya şöbəsindən AzərTAc-a bildirmişlər ki, əvvəlcə Ermənistanın dövlət terrorizmi siyasətini özündə əks etdirən "Yalan və həqiqət" filmi nümayiş etdirilmişdir.

Tədbirdə çıxış edən "Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyinin sədri, Şuşa Rayon İcra Hakimiyyətinin başçısı Bayram Səfərov son iki əsrdə xalqımıza qarşı erməni millətçiləri tərəfindən məqsədyönlü şəkildə həyata keçirilən etnik təmizləmə, soyqırımı və təcavüzkarlıq siyasətindən danışmışdır. Natiq bu siyasətin Azərbaycan tarixinin faciələrlə, o cümlədən qanlı hadisələrlə dolu çox ağrılı mərhələlərini təşkil etdiyini bildirmişdir.

İcma rəhbəri qeyd etmişdir ki, bu millətçi-şovinist siyasətin əsas məqsədi azərbaycanlıları tarixi torpaqlarından qovmaqla bu əzəli Azərbaycan ərazilərində ermənilərin uydurduqları "Böyük Ermənistan" dövləti yaratmaq olmuşdur. XX əsrin əvvəllərində Bakı, Şamaxı, Quba qəzalarında, Qarabağ, Zəngəzur, Naxçıvan, Lənkəran bölgələrində və başqa ərazilərində azərbaycanlıların soyqırımı xüsusi qəddarlıqla həyata keçirilmişdir.

B.Səfərov bütün dövrlərdə olduğu kimi, ermənilərin həyata keçirdikləri bu soyqırımı siyasətinin də kütləvi qırğınlarla müşayiət olunduğunu diqqətə çatdırmışdır. O, Azərbaycan Respublikası Dağlıq Qarabağ bölgəsinin 75 min nəfərdən çox azərbaycanlı əhalisinin adından bəyan etmişdir ki, biz beynəlxalq birliyi xalqımıza qarşı bu gün də davam edən təcavüz hərəkətlərinə obyektiv siyasi-hüquqi qiymətin verilməsi üçün Azərbaycanın haqlı mövqeyini dəstəkləməyə çağırırıq.

Azərbaycan Respublikasının Prezidenti yanında Dövlət İdarəçilik Akademiyasının dosenti, İctimai Birliyin analitik-informasiya şöbəsinin müdiri Elçin Əhmədov bildirmişdir ki, ermənilərin azərbaycanlılara qarşı törətdikləri qanlı faciələrin daha dəhşətlisi 1918-ci il martın 31-də və aprelin 1-2-də törədilmiş soyqırımı hadisələridir. Həmin günlərdə təkcə Bakıda 12 min azərbaycanlı qətlə yetirilmişdir. Ümumiyyətlə, aprel və may aylarında ermənilər Bakıda və ətraf kəndlərdə 30 minə yaxın azərbaycanlını xüsusi qəddarlıqla öldürmüşlər.

Elçin Əhmədov qeyd etmişdir ki, hazırda terrorizmi dövlət səviyyəsində dəstəkləyən Ermənistanın bu cinayətkar siyasətinin davamlılığını sübut edən fakt ondan ibarətdir ki, təkcə XX əsrdə azərbaycanlılar 4 dəfə - 1905-1907-ci, 1918-1920-ci, 1948-1953-cü və nəhayət, 1988-1993-cü illərdə erməni millətçiləri tərəfindən törədilən soyqırımı və etnik təmizləmələrə məruz qalmışlar. Çox təəssüflər olsun ki, Ermənistanın yürütdüyü etnik təmizləmə və soyqırımı siyasəti uzun illərdir dünya ictimaiyyətinin gözü qarşısında baş verir. Halbuki soyqırımı ən ağır beynəlxalq cinayət olmaqla yanaşı, beynəlxalq hüquqa görə sülh və təhlükəsizliyə qarşı yönələn cinayətlər qrupuna aid edilir. Soyqırımı cinayətinin hüquqi əsası BMT Baş Məclisinin 1948-ci il 9 dekabr tarixli 260 (III) saylı qətnaməsi ilə qəbul edilmiş "Soyqırımı cinayətinin qarşısının alınması və cəzalandırılması haqqında" Konvensiya ilə müəyyən olunmuşdur.

Münaqişənin nizama salınması prosesində Azərbaycanın ilk növbədə sülh variantına üstünlük verdiyini deyən E.Əhmədov qeyd etmişdir ki, Prezident İlham Əliyev Azərbaycan xalqı və dövlətinin bu işğal, etnik təmizləmə siyasəti və ərazilərimizin müvəqqəti olaraq itirilməsi ilə heç vaxt barışmayacağını bildirməklə yanaşı, öz torpaqlarımızı azad etmək üçün tam əsasımızın olduğunu və bunun beynəlxalq hüquq normaları ilə təsdiq etdiyini vurğulamışdır.

Digər çıxış edənlər də ermənilərin zaman-zaman xalqımıza qarşı həyata keçirdikləri soyqırımı siyasətinin mərhələlərindən danışaraq hazırda Azərbaycanın nəzarətində olmayan Dağlıq Qarabağ ərazilərinin və digər yeddi rayonun Ali Baş Komandan İlham Əliyevin rəhbərliyi ilə tezliklə işğaldan azad olunacağına və üçrəngli bayrağımızın həmin torpaqlarda dalğalanacağına əmin olduqlarını bildirmişlər.

Sonda Azərbaycan Respublikası Dağlıq Qarabağ Bölgəsinin Azərbaycanlı İcmasının adından 31 mart - Azərbaycanlıların soyqırımı günü ilə əlaqədar dünya ictimaiyyətinə müraciəti qəbul edilmişdir.

AzərTAc

Azərbaycan.-2013.- 30 mart.- S.6.