Gürcüstanın idman və gənclərlə iş naziri Azərbaycan Taekvondo Mərkəzi ilə tanış olmuşdur

Mayın 12-də Gürcüstanın idman və gənclərlə iş naziri Levan Kipiani Azərbaycan Taekvondo Mərkəzində olmuşdur.

AzərTAc xəbər verir ki, Azərbaycanın gənclər və idman naziri Azad Rəhimov ölkəmizdə dövlət tərəfindən idmana göstərilən diqqət və qayğısından danışmış, idmançılarımızın qazandığı nailiyyətlər barədə ətraflı məlumat vermişdir. Sonra qonaq mərkəzdəki üzgüçülük hovuzu, böyük və kiçik məşq meydançaları ilə tanış olmuşdur.

L.Kipianiyə Azərbaycan taekvondoçularının uğurları barədə də məlumat verilmişdir.

Gürcüstanlı nazir mərkəzdə yaradılmış şəraiti yüksək qiymətləndirmiş, Azərbaycanın idman ölkəsinə çevrildiyini vurğulamışdır.

L.Kipianinin əsas məqsədi ölkələrimiz arasında gənclərlə iş və idman sahələrində əməkdaşlıq haqqında mövcud sazişlərin müddəalarının həyata keçirilməsinin hazırkı vəziyyətini, əlaqələrin genişləndirilməsi perspektivlərini müzakirə etməkdir.

Azərbaycan.-2013.-14 may.-S.6.