Xarici İşlər Nazirliyində
Azərbaycan-Yunanıstan münasibətləri
müzakirə edilmişdir
Aprelin
30-da Azərbaycanın xarici işlər naziri Elmar Məmmədyarov
Yunanıstanın xarici işlər naziri Dimitrios Avramopoulos
başda olmaqla bu ölkənin nümayəndə heyəti ilə
görüşmüşdür.
AzərTAc
xəbər verir ki, görüşdə iki ölkə
arasında bütün sahələrdə münasibətlərin
yüksək səviyyədə olması qeyd edilmişdir. E.Məmmədyarov
vurğulamışdır ki, son vaxtlar iki ölkə
arasında əmtəə dövriyyəsinin həcmi 4 dəfə
artmış və bir milyard dollara yaxınlaşmışdır.
Azərbaycanlı nazir demişdir: "Bizim ortaq fikrimizə
görə, hər iki ölkənin potensial imkanları o qədər
genişdir ki, biz əmtəə dövriyyəsini artıra
bilərik. Görüşdə bu istiqamətdə nəzərdə
tutulan tədbirlər müzakirə edilmişdir. Biz
qarşılıqlı turist axınlarının
artırılması, həmçinin energetika sahəsində
əməkdaşlıq tədbirlərini də müzakirə
etmişik".
Bakıda
keçirilən görüşlərin səmərəli
olduğunu qeyd edən Dimitrios Avramopoulos ikitərəfli
münasibətlərin inkişaf dinamikasında bu
görüşlərin müsbət rol oynayacağına əmin
olduğunu bildirmişdir. Dimitrios Avramopoulos qeyd etmişdir ki,
budəfəki səfər Azərbaycan ilə Yunanıstan
arasında diplomatik münasibətlərin iyirmi illik tarixində
mühüm mərhələdir. Görüşlərdə
iki ölkə arasında siyasi, iqtisadi və energetika sahələrində
əməkdaşlıq barədə razılıq əldə
edilmişdir.
Dağlıq
Qarabağ münaqişəsində status-kvo barədə
jurnalistlərin sualına cavab olaraq Dimitrios Avramopoulos
bildirmişdir ki, Yunanıstan Azərbaycanın ərazi
bütövlüyünü dəstəkləyir və belə
hesab edir ki, bu cür münaqişələr beynəlxalq
hüquq normaları və prinsipləri nəzərə
alınmaqla dinc yolla həll edilməlidir. O həmçinin
qeyd etmişdir ki, Yunanıstan ATƏT-in üzvü olmaqla
Dağlıq Qarabağ münaqişəsinin dinc yolla həll
edilməsi məsələsində ATƏT-in Minsk qrupunun səylərini
tamamilə dəstəkləyir.
Azərbaycan.-2013.- 1 may.- S.1.