Azərbaycanın birinci xanımı, Milli Məclisin deputatı Mehriban Əliyeva amnistiya aktının qəbul olunması ilə bağlı Milli Məclisə müraciət etmişdir

Azərbaycanın birinci xanımı, Heydər Əliyev Fondunun prezidenti, Milli Məclisin deputatı Mehriban Əliyeva yeni amnistiya aktının qəbul olunması ilə bağlı Milli Məclisə müraciət etmişdir.

Bu barədə Milli Məclisin Hüquq siyasəti və dövlət quruculuğu komitəsinin aprelin 30-da keçirilmiş iclasında məlumat verilmişdir.

Komitənin sədri Ə. Hüseynli demişdir ki, Azərbaycan xalqının ümummilli lideri Heydər Əliyevin 90 illik yubileyi münasibətilə hazırlanan amnistiya aktı ulu öndərin humanist siyasətinə sədaqətin nümayişidir.

Heydər Əliyev Fondunun prezidenti Mehriban xanım Əliyevanın Milli Məclisə göndərdiyi müraciətdə deyilir ki, dahi şəxsiyyət Heydər Əliyevin misilsiz xidmətləri nəticəsində tarixin çox çətin və taleyüklü sınaqlarından çıxaraq dünyanın ən dinamik inkişaf edən ölkələrindən birinə çevrilmiş Azərbaycan Respublikasında qanunçuluğa və hüququn aliliyinə əsaslanan cinayət hüquq siyasəti həyata keçirilir.

Xalqımızın ümummilli lideri Heydər Əliyevin əsasını qoyduğu dövlətçilik strategiyası hələ uzun illər müstəqil Azərbaycan dövlətinin daha da güclənməsinə, iqtisadi qüdrətinin və xalqımızın rifahının artırılmasına xidmət edəcəkdir.

Ulu öndərin siyasətinin insanpərvərlik ənənələrini daim təşviq edən Heydər Əliyev Fondu amnistiya aktlarının ardıcıl təşəbbüskarı olmuşdur. Fondun təşəbbüsü ilə Azərbaycan Respublikasının Milli Məclisi tərəfindən 2007-ci il mayın 8-də qəbul olunmuş qərarla 9877 məhkum barəsində, 2009-cu il 17 mart tarixli qərarla 9564 məhkum barəsində amnistiya tətbiq edilmişdir. Qeyd olunan amnistiya aktları cinayət törətmiş şəxslərin cəmiyyətə yenidən inteqrasiya olunaraq islah edilməsini stimullaşdırmış, əhali arasında böyük minnətdarlıq hissi ilə qarşılanmışdır.

Yeni amnistiya aktının layihəsinə əsasən böyük ictimai təhlükə törətməyən və az ağır cinayətlərə görə məhkum edilmiş qadınlar, cinayət törədərkən 18 yaşına çatmayanlar, birinci və ya ikinci qrup əlillər, 60 yaşına çatmış kişilər, öhdəsində yetkinlik yaşına çatmayan, yaxud 1-ci və 2-ci qrup əlil övladı olanlar, Azərbaycan Respublikasının suverenliyinin və ərazi bütövlüyünün qorunmasında iştirak etmiş, Azərbaycan ərazisinin bir hissəsinin işğalı nəticəsində öz doğma torpaqlarından məcburi köçürülmüş və bəzi digər kateqoriyalardan olan şəxslər azadlıqdan məhrumetmə cəzasından azad ediləcəklər. Həmçinin cəzasının çəkilməmiş hissəsi bir ildən artıq olmayan, məntəqə tipli cəzaçəkmə məntəqələrində cəza çəkən, islah işləri, ictimai işlərlə cəzalandırılmış bütün şəxslərə, habelə cərimə cəzasına məhkum edilmiş, cəzasının çəkilməsi təxirə salınmış, şərti məhkum edilmiş və digər qruplara daxil olan bir sıra məhkumlara amnistiya tətbiq edilməklə onların cəzadan azad olunmaları təklif edilir.

Aparılan təhlillərə əsasən amnistiya aktının təxminən 9000 şəxsə şamil ediləcəyi gözlənilir. O cümlədən 2 mindən artıq məhkumun azadlıqdan məhrumetmə yerlərindən azad edilməsi nəzərdə tutulur.

Amnistiya aktı haqqında müraciətə Milli Məclisin mayın 7-də keçiriləcək iclasında baxılacaqdır.

Həmçinin iclasda Miqrasiya Məcəlləsinə baxılmışdır.

Dövlət Miqrasiya Xidməti rəisinin müavini Pərviz Musayev demişdir ki, Azərbaycan dövlətinin iqtisadi inkişafı, ölkəmizdəki davamlı ictimai-siyasi sabitlik xarici ölkə vətəndaşlarının Azərbaycana marağının artmasına səbəb olmuşdur. Bu da öz növbəsində miqrantların Azərbaycana axınını gücləndirmişdir. Azərbaycan Prezidenti bütün bunları və digər amilləri nəzərə alaraq Dövlət Miqrasiya Xidmətinin (DMX) yaradılması barədə qərar qəbul etmişdir. Hazırda DMX-nin fəaliyyəti müvafiq əsasnamə və normativ hüquqi aktlarla tənzimlənir. Yeni hazırlanmış məcəllə isə bu sahədəki bütün münasibətləri tənzimləyəcəkdir.

Daha sonra məcəllə geniş müzakirə olunmuş, bir sıra rəy və təkliflər irəli sürülmüşdür.

İclasda "Məhkəmələr və hakimlər haqqında", "İcra haqqında", "Daşınmaz əmlakın dövlət reyestri haqqında", "Avtomobil yolları haqqında", eləcə də Cinayət, Cinayət-Prosessual, İnzibati Xətalar məcəllələrinə təklif olunan əlavələr və dəyişikliklər müzakirə olunmuşdur.

Sonda qanun layihələri təsdiqlənmək üçün Milli Məclisə tövsiyə edilmişdir.

AzərTAc

Azərbaycan.-2013.- 1 may.- S.3.